Luk 20
20
Osep tipmi Yesus ke ila arit batne
(Matyu 21.23-27 e Mak 11.27-33)
1Ke oklou kene Yesus dong ke omur ka lelei Ida Tapolngon ila ninu e parere osep e napapra omon itau ke isak. E osep loulou ina ka omba e osep ka tile itau ke Moses ila sogongon e osep namormor ke osep Yuda ina time tidong lelei iye. 2E tiwai ke iye langane. “Amwai ke imi emdidi sei ila arit ma omdue elio ka omdue. Sei kar arit ke wom?” 3E Yesus koli wai ke isak langane. “Ma ngapmi umu ke pmingen kene blang. Umawai ke ngong. 4Jon didi sei aitno alo ka iye paunim osep? Iye didi Ida Tapolngon aitno koke iye didi osep aitno lisak?” 5E tiwai pulu ine langane. “Langka itawai Jon didi Ida Tapolngon aitno ma Yesus pmi ite langane. ‘Ina lange aitno lumu la dagar ke Jon kovok?’ 6E langka itawai Jon didi osep aitno lisak ma osep tiuri opmu ke ite ma itemete kesua aitno lisak dagar langka Jon iye gute napaprangan ina.” 7E tikoli tiwai ke Yesus langane. “Imeile ine kovok.” 8Deka Yesus wai ke isak langane. “E ngong blang ma ngapalongo lumu sei kar arit ke ngong ma ngadue elio ane kovok.”
Osep soulu tiplau yage galou wain ina
(Matyu 21.33-46 e Mak 12.1-12)
9E iye wai pelengon ano ke osep langane. “Gute kene usak ila yage galou wain ina e due osep ma tiklie ke taiko kene kene e tidong tiboko ine. Deka iye la ke omur mawa e dong tauni. 10Mase alo ka lana ka galou wain toru ine sisiou iye pagei ila wokboi nating kene ke osep ka tiboko ke yage ma iye due ila aman ke galou wain toru ine. E osep tonari timluk iye e tipagei iye la e iye due aman kovok. 11Deka yage ina gute pagei ila wokboi nating silang e osep timluk iye blang e tidue wan ke iye ka iye mnak iye ine e tipagei iye la e iye due ina gute ila wan kovok. 12E yage ina gute pagei ila wokboi nating silang blang ke aling eklu ina e osep tidue pogle ke iye e tiuri iye ke yage dogur. 13Deka yage ina gute aitno mter ke wansua ma iye due. Deka iye wai langane. ‘Ma ngapagei erigu arang ka ngong lana ngong ke iye. Aitno lungong langka ma tidue anit ke iye.’ 14E alo ka osep tivati gute otno arang me tiwai pulu langane. ‘Gute ane ma due wan matamuli ke timla e oku ane ma itodue burwa ke iye e ma itodue wan matamuli.’ 15Deka tiuri iye ke yage dogur e tidue burwa ke iye.”
Deka Yesus pmi osep langane. “Aitno lumu lange? Ma yage ina gute due wansua ke osep tonari? 16Ma iye la e due agegeng ke osep tonari ma timete deka ma iye due osep leklou tiboko ke yage.” E alo ka osep tiklingen pelengon ano tiwai langane. “Aisudo. Ma elio langane polou kovok.” 17E Yesus bitna nekek ke isak e pmi isak langane. “Pelengon ka osep tisogoe ke Ida Tapolngon ila pelengon palma lana ine lange? Pelengon tonari langane.
‘Osep ka tiuri ninu ninu tipli opmu ane. E dau opmu ane iye opmu mgongon ina ka due opmu leklou ka tiuri ninu ine tinepir pulu.’
18Langka gute gene duru ke opmu are ma iye nabak e langka opmu gene duru ke iye ma opmu porpor iye ma iye mete.”
19Alo ari osep ka tile itau ke Moses ila sogongon e osep loulou ina ka omba tikrim ekreng ma suong tidue Yesus sep ke kalabus kesua tile alo ka iye wai pelengon ano tonari lana ine la ke isak. E tidue kovok kesua tilim ke osep.
Osep tipmi Yesus ma tikli takis ke Sisar koke aurou
(Matyu 22.15-23 e Mak 12.13-17)
20E osep tonari tipalem Yesus ila elio e tivai osep langka esim e tiyakyak langka urok elio itau. Tiwaiki tiyak iye ma iye wai pelengon ka tikaranga tisin pelengon vri ke iye ine e tikar iye ke gute ka vri mgo ke omur emkil ma iye kotim iye. 21E osep tonari tiwai langane. “Gute parerengen ina imeile amwai pelengon lokono e amparere osep ke pelengon lokono e amwai pelengon kene vala ke osep lama angainsak omba koke angainsak omba kovok. E amparere Ida Tapolngon ila elio ka didi pelengon lokono. 22Imepmi wom langane. Moses ila sogongon songon ite ma itekli takis ke Sisar koke aurou?” 23E Yesus ile urok pelengon yakngan e koli wai ke isak langane. 24“Umenis ngong ke mani ka itekli wan bitna bitna ine. Sei ano e angaine dong ine?” E tikoli tiwai Sisar ano e angaine dong ine. 25Deka Yesus wai ke isak langane. “Umakar Sisar ila wan ke iye e langane blang umakar Ida Tapolngon ila wan ke iye.” 26E tikaranga tiyak iye ma iye wai pelengon ka tikaranga tisin elio vri ke iye ke osep amtarsak kovok. E tidigrik ke ila pelengon e tikaranga tiwai kovok.
Osep Sadyusi ina tipmi Yesus ke elio ka osep timete e tipoga ke inarak denga
(Matyu 22.23-33 e Mak 12.18-27)
27E osep Sadyusi ina tiwai osep tipoga titito ke inarak denga blang kovok. E isak leklou kla ke Yesus e tiwai ke iye. 28Tiwai ke iye langane. “Gute parerengen ina Moses ila sogongon wai langane. ‘Langka gute gi e mase mete e ila asap divir dau kovok ma ina aiver gi asap batne tonari ma iye divir titno e tidong langka gute ka mete titno.’ 29Io oglou gute e ina saiver lumakene tidong kap imi. E gute ka sirngen gi e mase mete e ila asap dau divir mimi kovok. 30Deka gute orwo ina gi apmang tonari deka iye mete blang. 31E mase gute eklu ina gi apmang e ke elio langane isak lumorwo tigi apmang deka isak keniye timete e apmang divir mimi kovok. 32E mase apmang mete blang. 33Deka langane. Alo ka osep tipoga titito ke inarak denga apmang tonari dong sei ila asap kesua isak lumorwo tigi iye?”
34E Yesus koli wai ke isak langane. “Osep ka tidong oku ane tigi e tikar titorok ke gingen. 35E osep ka tidong itau ke Ida Tapolngon bitna ma tipoga titito ke inarak denga ma tigi kovok e tikar titorok ke gingen kovok. 36E tikaranga timete blang kovok kesua tidong langka Ida Tapolngon ila ensel. Isak Ida Tapolngon titno kesua iye due isak tipoga titito ke inarak denga. 37Silang blang langane. Ke basikngen ke akai ka neliplip e dau eiou ngene kovok Moses nis ite langane. Osep ka timete ma tipoga titito ke inarak denga blang. Kesua iye sir Ida Puda langane. Iye Ida Tapolngon ka Abraham e Aisak e Jekop tilotuim iye. 38Iye osep ka timete Inarak Tapolngon kovok. Aurou. Iye osep ka tidong Inarak Tapolngon. Kesua osep ka tidong tikaranga tilotuim iye e tidue urok mosongon batne iye dong.”
39Deka osep leklou ka tile itau ke Moses ila sogongon tiwai ke iye langane. “Gute parerengen ina lem pelengon itau.” 40E ke alo ari e la ine osep tilim ma tipmi iye ke pmingen silang.
Yesus pmi osep ke gute Krais
(Matyu 22.41-46 e Mak 12.35-37)
41E Yesus pmi osep tonari langane. “Ina lange osep tiwai gute Krais ka Ida Tapolngon rere ma iye lua osep ke urok elio epmes ina iye Devit otno arang? 42Kesua Devit sogo ke Buk Song langane.
‘Ida Puda wai ke Ngau Puda langane. “Omdong ke lungu odung. 43La lama ngadue ngap oul tidong moli ke kevep.”’
44Devit sir iye ‘Ngau Puda’ deka ina lange iye karanga dong Devit otno arang?”
Osep ka tile itau ke Moses ila sogongon tidue elio soulu
(Matyu 23.1-36 e Mak 12.38-40 e Luk 11.37-54)
45E osep pula tiklingen Yesus ila pelengon deka iye wai ke ila disaipel langane. 46“Umaplau umu itau ke osep ka tile itau ke Moses ila sogongon. Kesua tiwaiki tilila ke urok molo ka alang e tiwaiki osep tidue anit ke isak e tiwai ‘oklou itau’ ke isak ke bilmu. E tiwaiki tidong ke kova ka mgongon ke duningen ina ninu e tidong ke kova ka osep tidue anit ke osep ka tidong ine ke rogo. 47Tiwai ka apmang ka sasap batne e tiyak isak e tipanako urok ninu ninu e urok wan bitna bitna. E silang blang alo ka tiwai itau ke Ida Tapolngon tiyakyak e tiwai tauni kesua tiwaiki osep pula tipalem isak. E elio ka Ida Tapolngon mulu osep ka tidue langane ma mole elio ka iye mulu osep leklou.”
Aktualisht i përzgjedhur:
Luk 20: ANT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
copyright 2003 New Tribes Mission, Sanford, FL 32771