Jon 6
6
Yesus kar ngangon ke osep 5,000
(Matyu 14.13-21 e Mak 6.30-44 e Luk 9.10-17)
1Mase Yesus la bru elim Galili ke burla. E elim Galili angaine silang elim Taiberias. 2E osep pula pula tididi iye kesua tivati elio arit ina ka nisngen ka iye due alo ka iye due osep ka tipaia tipolou itau blang. 3E Yesus tito ke gigri daudeng gesa e dong ine kap ila disaipel. 4E alo ari osep Yuda ina urok rogo omba ka lana ine la ke alo ka Ida Tapolngon lua isak tisongon omur Isip isuk boto polou. 5Deka Yesus bitna tito e iye vati osep pula pula time ke iye deka iye pmi Filip langane. “Ma itekli bret karanga ke osep are ma tingene ke omur ge?” 6Iye wai langane ma iye tok Filip e ile ila kolingen vala kesua iye ile kodong elio ka iye ma due.
7Deka Filip koli wai langane. “Langka itekli bret ke 200 kina are karanga ma isak kene kene tingen bret sasi boto vala kovok.” 8E ila disaipel silang Andru ka Saimon Pita ina tovro wai ke iye langane. 9“Agau dong ane ka due bret daudeng elme ka tidue ke otna bali e lodu daudeng orwo. E osep ka tidong are isak pula pula e lange ka ngangon ane karanga ke isak keniye?” 10Deka Yesus wai langane. “Umodue osep tiduru tidong.” Gras pula dong ke omur are e osep tiduru tidong ine. E osep arang vala inarak sasa langka 5,000.
11E Yesus due bret e wai tenkyu ke Ida Tapolngon ine deka kare ke ila disaipel e titongoe ke osep. E Yesus due langane ke lodu blang. E osep tingen la lama tigot. 12Alo ka osep tingen e tigot Yesus wai ke ila disaipel langane. “Umatagom ngangon emkil emkil ka daudeng lama ngangon leklou imina adai.” 13E titagom ngangon emkil emkil ka dau dong ke bret ka bali elme ka osep tingene e tidue kerka songotno orwo bon ke ngangon emkil emkil.
14Osep are tivati elio arit ina ka nisngen ka Yesus due e tiwai pulu langane. “Lokono. Gute ane gute napaprangan ina ka oglou Moses wai ma iye me ke taklak.” 15E Yesus ile tiwaiki tikis iye e tidue iye gute ka vri mgo ke isak deka iye songon isak e iye tona vala la iding ke gigri.
Yesus lila ke aki tona
(Matyu 14.22-33 e Mak 6.45-52)
16Alo ka kirui kodong ila disaipel tiduru kla ke elim. 17Ke elim tisep ke bot kene ma tibru elim e tipolou ke Kaperneam. Alo ari epmes kodong e Yesus dau polou ke isak kovok. 18Ke elim engen ipu dagar e boitini omba nokul nokul. 19E tipoi langka kilomita elme koke lumakene deka tivati Yesus lila ke aki tona. Iye polou olwo boto ke bot e ansak nesik ke iye. 20E Yesus wai ke isak langane. “Anmu nesik sakam. Kesua ngong tona ane.” 21Deka aitno lisak neser e tidue sep ke bot e suong lokono bot polou ke aki ina dingen batne ka isak kla ine.
Osep tikrim ke Yesus
22Ke oklou silang osep pula pula ka dau tidong ke elim burla tivati bot daudeng kene vala dong are. E tile Yesus sep ke bot kap ila disaipel kovok. Ila disaipel vala isak kla ke bot. 23Deka bot daudeng leklou songon armok Taiberias e me ke aki ina dingen batne ka olwo boto ke omur ka Ida Puda wai tenkyu ke Ida Tapolngon ke bret deka osep tingene. 24E alo ka osep pula pula tile Yesus e ila disaipel tidong are kovok tisep ke bot tonari e isak kla ke Kaperneam ma tikrim ke Yesus.
Yesus wai iye bret ka omur heven ina
25Alo ka tipado iye ke elim burla tipmi iye langane. “Rabai lesen ompolou ke omur ane?” 26E Yesus koli wai ke isak langane. “Ngawai lokono ke umu langane. Aitno lumu mter ke elio arit ina ka nisngen ka ngadue deka umekrim ke ngong kovok. Aurou. Umekrim ke ngong kesua umangen bret e umogot. 27Umoboko ma umodue ngangon ka karanga polou okus kovok. E umoboko ma umodue ngangon ka dong vala dong ka ngong ka Gute Ka Polou Langka Osep ma ngakare ke umu. Kesua Ida Tapolngon ka Pmada nis osep aitno itau ke ngong.”
28Deka tipmi Yesus langane. “Imodue elio bitna bitna lange ma imodue wan ka Ida Tapolngon waiki imodue?” 29E Yesus koli wai ke isak langane. “Ida Tapolngon waiki umodue elio langane. Ma aitno lumu la dagar ke gute ka iye pagei ke umu.” 30E tipmi Yesus blang langane. “Ma omdue elio arit ina ka nisngen lange ma imavati e aitno limi la dagar ke wom? Ma omdue sua? 31Limem seia tingen mana ke omur ka dong adai vala langka Ida Tapolngon ila pelengon wai langane.
‘Iye kar ngangon ka omur heven ina ke isak ma tingene.’”#6.31 — Emritim basikngen ke ngangon mana ke Kisim Bek 16.4-15.
32E Yesus wai ke isak langane. “Ngawai lokono ke umu langane. Moses iye gute ka kar bret ka omur heven ina ke umu kovok. Aurou. Livou kar bret lokono ka omur heven ina ke umu. 33Kesua bret ka me ke Ida Tapolngon duru me ke omur heven e kar mosongon ka dong vala dong ke osep ka tidong ke taklak.” 34Deka tiwai ke iye langane. “Puda. Aling aling amkar bret ane ke imi.”
35Deka Yesus wai ke isak langane. “Ngong bret ka kar mosongon ke osep. Gute sei ka me ke ngong ma sapanga due kovok e gute sei ka aitno la dagar ke ngong ma aki vel iye kovok. 36E langka ngawai ke umu kodong umavati ngong e dau aitno lumu dagar ke ngong kovok. 37Osep ka pula keniye ka Livou kar isak ke ngong io ma time ke ngong e ma ngasapir isak kovok. 38Kesua ngaduru ngame ke omur heven ma ngadidi aitno lungong kovok. Aurou. Ngame ma ngadidi gute ka pagei ngong ngame aitno vala. 39E gute ka pagei ngong ngame aitno langane. Ma gute kene ke osep ka iye kar isak ke ngong iye imina kovok. E ke oklou ka Ida Tapolngon wade osep ka pula keniye urok elio ine ma ngadue osep ka iye kar isak ke ngong titito e tidong blang. 40E Livou aitno langane. Osep seisei ka tivati Otno Arang e aitno lisak la dagar ke iye ma tidue urok mosongon ka dong vala dong. E ma ngadue isak titito e tidong blang ke oklou ka Ida Tapolngon wade osep ka pula keniye urok elio ine.”
41Deka osep Yuda ina tingurngur ke Yesus kesua iye wai iye bret ka duru me ke omur heven. 42E tiwai langane. “Gute ane Yesus ka Josep otno arang. Iteile timla e tna deka ina lange oku ane iye wai langane? ‘Ngaduru ngame ke omur heven.’”
43Deka Yesus koli wai ke isak langane. “Umongurngur ke umu tona kovok. 44Gute kene karanga me ke ngong kovok lama Livou ka pagei ngong ngame paur iye ke ngong e ma ngadue tito e dong blang ke oklou ka Ida Tapolngon wade osep ka pula keniye urok elio ine. 45Oglou osep napaprangan ina tisogo langane.
‘Ma Ida Tapolngon parere osep ka pula keniye.’
Deka langane. Osep ka pula keniye ka tiklingen Livou e tidue ilengen ke iye ma time ke ngong.”
46“E dau gute kene gesa vati Livou kovok. Aurou. Gute ka dong kap Ida Tapolngon e duru me ke taklak iye kene vala vati Livou. 47Ngawai lokono ke umu langane. Gute ka aitno dagar ke ngong ma iye due mosongon ka dong vala dong. 48Ngong bret ka kar mosongon ke osep. 49Lumu seia tingen mana alo ka tidong ke omur ka dong adai vala e dau timete. 50E bret ka duru me ke omur heven langane. Langka gute ngen bret are ma iye mete kovok. 51Ngong bret ka duru ke omur heven ka kar mosongon ka dong vala dong ke osep. Langka gute ngen bret ane ma iye dong vala dong. Bret ane pampamu lungong ka ngakare ke osep taklak ina ma tikaranga tidue mosongon ka dong vala dong.”
52Yesus wai langane deka osep Yuda ina tituk orsak pulu ke ila pelengon langane. “Lange ka gute are karanga kar pampamu ine ke ite ma itangene?” 53Deka Yesus wai ke isak langane. “Ngawai pelengon lokono ke umu langane. Langka umangen Gute Ka Polou Langka Osep pampamu ine kovok e umeinim ina marau kovok mosongon ka dong vala dong ma dong ke umu kovok. 54Gute sei ka ngen pampamu lungong e inim ngau marau io mosongon ka dong vala dong ma dong ke iye e ma ngadue tito e dong blang ke oklou ka Ida Tapolngon wade osep ka pula keniye urok elio ine. 55Kesua pampamu lungong ngangon ka lokono e ngau marau wan lokono ka umeinime. 56Gute sei ka ngen pampamu lungong e inim ngau marau ngadong kap iye e iye dong kap ngong. 57Livou ka iye mosongon batne pagei ngong ngame e ngadong batne ke iye e eriar langane gute sei ka ngen pampamu lungong ma iye due mosongon batne ke ngong. 58Ane bret ka duru me ke omur heven. Ane langka lumu seia tingene ke omur ka dong adai vala kovok. Tingen bret are e mase timete. E gute sei ka ngen bret ane ma due mosongon ka dong vala dong.” 59Yesus wai pelengon ane alo ka iye parere osep ke duningen ina ninu ke Kaperneam.
Yesus wai ke mosongon oku ka dong vala dong
60Alo ka ila disaipel ti-klingen pelengon tonari isak pula tiwai langane. “Pelengon ane opru imi va. Gute sei karanga didie?” 61E Yesus ile ila disaipel tingurngur ke ila pelengon e wai ke isak langane. “Lange? Lou pelengon ane due aitno lumu segesege ke ngong? 62Deka aitno lumu lange langka umavati Gute Ka Polou Langka Osep tito la ke omur ka oglou iye dong ine? 63Ano Itau kar mosongon oku ke osep e pampamu lite karanga lua ite ke mosongon oku kovok. Lou pelengon ane ka ngawai ke umu due Ano Itau sep ke aitno lumu deka umodue mosongon ka dong vala dong. 64E dau umu leklou aitno lumu dagar ke ngong kovok.” Yesus wai langane kesua ke oglou lila me iye ile osep seisei ka aitno lisak dagar ke iye kovok e iye ile gute sei ka ma lai iye ina. 65Deka iye wai ke isak blang langane. “Ke batne ane ngawai ke umu langane kodong. Langka Livou paur gute me ke ngong kovok iye karanga me ke ngong kovok.”
66E ke oklou are lila la ila disaipel pula tisongon Yesus e tididi iye blang kovok. 67Deka Yesus pmi ila disaipel songotno orwo langane. “Umu blang umawaiki umosongon ngong?” 68E Saimon Pita koli wai langane. “Ipem Puda ma imala imedidi gute sei silang? Kesua wom vala gute ka amwai pelengon ka due osep tidue mosongon ka dong vala dong. 69E aitno limi dagar e imeile itau wom gute itau lokono ka Ida Tapolngon pagei me ke osep.” 70Deka Yesus koli wai ke isak langane. “Ngong tona ngarere umu songotno orwo ma umodong lou disaipel e dau gute kene ke umu langka angelo soulu dong ke iye.” 71Yesus wai langane ke gute Judas ka Saimon Iskariot otno arang. Iye gute kene ke disaipel songotno orwo e dau mase iye lai Yesus ina.
Aktualisht i përzgjedhur:
Jon 6: ANT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
copyright 2003 New Tribes Mission, Sanford, FL 32771