Neto'te 2
2
Nsi nabte mènntùn
1Tshù mba Nsi miagte nenabte kamànyam, tsha'a, boa tshu ts'a mfe kamànyam nà. 2Nsi #Héb. 4.4,10miagte fa' se num mbatte lé'njù sammbàa; ndùlala mfite wul i num mbatte lé'njù sammbàa num njoṅ fa' fa s'a fa' là.
3Nsi #Netu. 20.11naṅ mbotni num mbatte lé'njù sammbàa, ndo' sen lé'njù là, nummb'a lo fite wul i num sen lé'njù là num njoṅ mfa' mi fa.
Nka' Edèn
4Tshù neto'te kamànyam bo tsha' ngelaṅ ze Nsi nabte yub là. Num lé'njù se Tshùaben nabte tsha' bo kamànyam nà, 5sàm tù lo ke yoṅ mbe num tsha'a, sàm nenà ke yoṅ mbile, nummbe Tshùaben Nsi lo ke yoṅ ngù mbaṅ lo num tsha'a, mènntùn ke yoṅ mbe bwe num nedù' nà. 6Là, mo' ntse lo ke ntum nsi, nke nzwi' num njoṅ nà fa. 7Tshùaben #1 Korin. 15.45lo' tsha' mbom mèn yi, mfùag ywèt yôg ntùm mfaṅ ntselag mi, mèn tù' mènntùn. 8Tshùaben Nsi bwe mo' nka' mà Edèn, nze bag ntumnyam, njab mènntùn z'a bom nà ntùm bwe. 9Tshùaben #Apok. 2.7; 22.2,14Nsi ghù mba sit tù lo s'a bwô neyene, mba nejù ntàm mi là bit mum nà. Mba tù yôg bit netèt nka', mba tù nelèn mebwô bo kebwô.
10Mo' ta'ntse nke ntum Edèn, nke nzwi' nka', ndo bwe mfagte mbu mi nkuà. 11Lén mbwe ta'ntse b'a Pishon. A yi bèn nke ndiaṅ njoṅ ngô Havila fa dù' ze gol be là mbume, 12gol yen ngô là bwô neshu. Bedelium bo loṅ onyx b'a bwe. 13Lén mbatte ta'ntse bàa b'a Gihon. A yi bèn nke ndiaṅ njoṅ ngô Kush fa mbume. 14Lén mbatte ta'ntse tat b'a Tigre, nke nswe' mà Assur, nze bag i z'a be bag ntumnyam nà. Mbatte ta'ntse kuà b'a Efrat. 15Tshùaben Nsi lo' mènntùn, nte i ntùm nka' Edèn ndù a ke ndù' mbèn nke mbébe. 16Ndùlala Tshùaben Nsi fà ntshù' mènntùn ntshob ndù: O ghù nejù ntàm ntù fa mi a ntùm nka' là, 17là, kà jù tàm tù nelèn mebwô bo kebwô, nummb'o nsi kwù lé'njù s'o nsi jù là.
18Tshùaben Nsi tshob ndù: A ke' bwô ndù mandum tswe tù' i. M'a' nabte ngaywimt'é z'a fut'é là mfà yi. 19Tshùaben Nsi lo' tsha' nabte njoṅ nyàm tshwèt fa yi, boa njoṅ nsaṅ fa mfe kamànyam, ngù bo se' mbaṅ mandum num neyen mba b'a tsiaṅ yub là, mba ndù njoṅ tshu nezinte fa lo' lén se mandum fà yi là. 20Ndùlala mandum tsiaṅ nyàm nke'nke' ndèn mube, ntsiaṅ nsaṅ mfe kamànyam ndèn mube, ntsiaṅ nyàm tshwèt ndèn mube. Là, mbe se' mba mandum nà, a ke yen sàm ngaywimt'é z'a fut'é là. 21Tshùaben Nsi ghù mo' neta miaglo ghom mandum, a zi; a lo' mo' kitnsa se, nkabte mbàb num dù' i. 22Tshùaben Nsi lo' kitnsa s'a lo' num mandum nà, nabte mènnzwi yi, ndo' i nèn yi mbaṅ mandum. 23Mandum tshob ndù:
Yen yoṅ i li, tshù vôg s'a lo num mvôg màm ni, mbàb z'a lo num mbàb àm nà. Bo nsi tsiaṅ yen mèn ni ndù mènnzwi, nummbe bo sô i à num mandum.
24A #Mat. 19.5; Mark. 10.7-8; 1 Korin. 6.16; Ef. 5.31ndùlala mandum nsi faṅ tàab bo màab lat num nzwi i, bo tamte ntù' ta' wut ntshù'. 25Mandum bo nzwi i na' mb'a tunntôg, là tuswe ke ke nko yube.
Aktualisht i përzgjedhur:
Neto'te 2: BMa
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
La Sainte Bible en Bamiléké-Medùmba © Alliance Biblique du Cameroun, 1993. All rights reserved.