Zaa 10

Wïlaa ‑nyɛ 'yɩ 'ylizʋnɩnyɔɔ 'sɔ a ninea

1'N Zezwii yuëë 'nine 'pänɩ ɔ lɛ naa: «‑Tiamö n nyanyɩɛ dɛ'ɛ 'dɩ nɩɩ, wïlagbʋ 'mö, nɩkpɛ ‑kä ɔ 'kä ‑mä plɛ, 'n ɔ 'nɩ ‑mä ngloluëa 'mö ghlɛnɩ, ‑maa 'n ɔ ‑kä ‑mä wïlagbʋʋ 'wlu ghlɛnɩɩ, ‑sɩbhä a nɩkpɛ 'la, 'winyɔ ɔ glɩnɩɛ, jɛzlʋnyɔɔ. 2‑Maa ‑ɔ ghlɛnɩɛ ‑mä ngloluëa 'möö, mɔɔ glɩnɩɛ wïlaa a 'ylizʋnɩnyɔɔ. 3Ɔ ‑kä ‑lɛ ghlɛɛ, ‑ɔ ‑kʋä wïlagbʋʋ, ‑lɛ ɔ kälɩɛ 'n wïlaa a 'ylizʋnɩnyɔɔ plɛɛ. Ɔ ‑kɩɩ bhʋlʋbhlʋ wäzɩɩ, yɩ ‑ngö 'ɔ wɛlɩɩ 'mö zaa, 'n ɔ ‑nyɩɩ wlʋä ‑mä. 4Ɔ ‑kɩɩ yɩ 'wuë ‑mä ‑sɛ 'wëë, ɔ'bhë, 'yuku ɔ 'plɩniɛ. Yɩ ‑yi 'ɔ wɛlɩɩ 'mö zaa, ‑gänɩ yɩ ‑gänɔɔ. 5‑Maa 'n ɛ ‑kä käbönɩkpɛɛ, yɩ 'naa 'kɔ 'bɩwʋ bhlinɩ. Yɩ'ɩɛ 'ɔ wɛlɩɩ 'mö ‑yi zaa, futo yɩ 'kää futo.» 6Sa'a Zezwii 'pänuëë ninea, ‑maa wa'aa a zɛmö yɩbhlɩnɩ.

Wïla a 'ylizʋnɩnyɔ a ‑nɔ a ‑nɔ

7'N Zezwii yi'ɛɛ nɩɩ: «A ‑pʋnɩ sasɛ 'yukwli, ‑tiamö n nyanyɩɛ dɛ'ɛ 'dɩ nɩɩ, ‑amöö glɩnɩɛ wïlagbʋʋ a ngloluëa. 8‑Wa yiɛ na za tɛɛ, wa 'wuë 'wiwa wa glɩnɩɛ, jɛzlʋwa a 'yizee zaa, wïlaa 'nuëë 'yukwli ‑pʋnɩ. 9‑Amö ngloluëa, ‑amöä dɛ'ɛ. 'N nɩkpɛ ‑kaa 'mö ghlɛnɩ ɔ ‑kä plɛɛ, ɔ yi 'pʋ. Ɔ yi plɛ, ɔ yi ‑mä 'wlʋ, 'saa ɔ 'kää lii, ɔ yu ghlɩ. 10'Winyɔɔ, ɔ ‑kä yii, ɔ 'kä 'wi ghli, ɔ 'kä nyima, ɔ 'kä 'ku 'lɩbhä, nza ɔ yiɛ cuu. ‑Maa, ‑amö na a, nɩkpa 'kä ‑bhölɩbhölɛ ghlɩ, ɛ 'mäna 'kʋä 'wlʋ 'mänanɩ, nza n yiɛ.

11‑Amö wïla a 'ylizʋnɩnyɔ a ‑ylizʋnɩnyɔ, ‑amöö dɛ'ɛ. Wïla a 'ylizʋnɩnyɔ a ‑ylizʋnɩnyɔ, ‑ɔ ‑bhɩɔ 'mö, ɔ 'kä ɔnyɩ 'mö 'wlʋ, ɔ 'kä yɩ 'wlumö 'ku. 12‑Maa nɩkpɛ wa 'pɛnɩɛ ɔ 'kä wïlaa 'yli 'zʋnɩ, ‑ɔ 'niɛ ‑kälɩɩ, ɔ ‑kä gbi 'ylɩmö cuu, ‑bʋ, ɔ yɛ futo. Gbii ɛbhlɩ, ‑mä wïlaa gla'mö ‑mä ɛ dɩɛ 'yi 'n wïlaa sɛnɩɛ yɔwʋ. 13Nɩkpɛ wa 'pɛnɩɛ, moni a libho ɔ nʋä ɔbhlɩ zaa, wïlaa a'bhï, yɩ gbʋ 'nɔɔ ‑tiasɛ plɛnɩ. 14-15‑Amö wïla a 'ylizʋnɩnyɔ a ‑ylizʋnɩnyɔ ‑amöä dɛ'ɛ. Sɛɛ na dɩba Lagɔ ‑yiiɛ 'n n ‑yoo'ɛɛ na a, ‑sɩbhä n ‑yiɛ na ‑nʋa 'wuë, 'n wa ‑yii'ɛɛ wabhlɩ. Wa 'wuë, n ‑bhɩɔ 'mö n 'kä wa 'wlumö 'ku. 16‑Wa ‑wʋä dɛ'ɛ ‑mä 'na ‑zɩkpaa 'möö, wa 'yize a gbʋʋ mʋʋ ‑nɩɩɛ plɛnɩ. ‑Maa na ‑nʋä ‑mumuë ‑wʋ'ɛ ‑lɛ. N kä'ɛ n 'kʋä wäzɩmö. N ‑kʋä wäzɩɩ, wa yi 'na wɛlɩɩ 'mö 'nʋ. Wa 'wuë wa yi ‑zɩkpa ‑bhlʋ 'zʋ, na 'yize n 'kʋä 'yli 'zʋnɩ.

17Na dɩba ‑wa ɔ ‑waaa tenyii, ɛ'ɛ ‑bhö nyɩasɛ, ‑maa n ‑bhɩɔ 'mö, n 'kä nanyɩ 'mö 'wlʋ n 'kä 'ku, 'wë, n 'kä 'sɔ ‑bhölɩnɩ. 18Nɩkpa ‑kaa 'lɩbhä n ‑kä 'kuu, ɛ'ɛ ‑bhö nɩɩ, sɛ wa 'tɛɛ 'mö a za, ‑maa ‑amöö 'yɩbhɩɛ ‑sɩbhä. N 'kä nanyɩ 'mö 'wlʋ n 'kä 'ku n 'kä 'sɔ ‑bhölɩnɩ a dɔ'wʋ, ‑amöö kää ‑lɛ a wɛlɩɩ. Sɛɛ na dɩba gbää n nɩ 'zʋʋ ‑sɩbhä ma‑a.»

19Wɛlɩkïbhë 'la Zezwii bhïlaa a za, 'n Zwiiföwaa yi'ɛɛ 'wʋ 'sɔ nimï 'bhööbhöönɩ. 20Wa gla'mö a ‑mumuë a ‑bɛ lɛ naa: «Nɩkpɛ nɩ, zuzukwëzokwë ɔ kää ‑gömö ɔ 'wlumö yɛ nyimo. Sɛ yɩ ‑wʋ ɔ 'mö 'n a ‑pʋnɔɔ 'yukwli a'bhë?» 21‑Mumuë lɛ naa: «Nɩkpɛ a ‑mɔɔ kää zuzukwëzokwë ‑gömö, ɔ'ɔɔ bhɛnɩ ɔ 'kä nɩkpɛ nɩ a saa bhïla. ‑Maa 'lɩlɩlɩ a dɔ'wʋ a'bhë, nɩkpɛ a ‑mɔ ‑kää zuzukwëzokwë ‑gömöö, ɔ bhɛnɩ bhä ɔ kä 'kukwlekänyɔ a 'yila ‑dɩ ‑a?»

Zezwii lɛ ɔ ‑nyɛ Lagɔ 'sɔ ‑bhlʋ wa glɩnɩɛ

22‑Bëbëyitɛnyɩɩ 'mö, Lagɔbudu 'Kɔdʋʋ a 'wʋbhlizlɩɩ ghlɛɛ, wa ‑wʋ ‑mä Zeluzalɛɛmö 'bhli dɔ'wʋ, 23‑mä Lagɔbudu 'Kɔdʋʋ 'mö a ‑gligbëa wa 'pää Salomɔɔ 'a nglɩɩ, a zɛmö, 'n Zezwii ziɛ ‑mä 'mö. 24'N Zwiiföwaa yoo binɩ, wa lɛ naa: «Sɛ yɩ ‑wʋ ɔ 'mö, n‑n luanyɩ bhä nyɛmʋ 'wʋ 'nɩ? Kliisɩ, Puënyɔɔ Lagɔ ‑sɛɛ ‑lɛ, mö ‑n ‑kä glɩnɩ, nyɩanyɩ yɩ 'dɩ gbëaa.» 25Ɔ lɛ naa: «N kanyɩ ‑sɩbhä 'dɩ 'nyɛ 'wë, ‑maa a ‑nɩɩɛ dlɩ 'wʋ ‑kä. ‑Li 'la 'wuë n nʋä na dɩba a 'nglɩ 'möö, mɩɩ zʋä 'na wɛlɩɩ kɛ ‑gömö. 26‑Maa abhʋa abhlɩ, a ‑nɩɩɛ dlɩ 'wʋ ‑kä 'yize. Ɛ'ɛ ‑bhö nyɩasɛ, ‑maa ‑mä 'na wïlaa a ‑zɩkpaa 'mö, a'aa ‑mä ‑wʋ. 27'Na wïlaa ‑ngö 'na wɛlɩɩ 'mö. ‑Amö yɩ ‑gänɩɛ, n ‑yii. 28‑Amöö nyɩɛ ‑bhölɩbhölɛ yɩ 'kä 'kwädlɩnɩ ‑bhölɩ. ‑Bɛ 'nɩɛ bhɛnɩ ɔ ‑ka'mi kä'mö ‑sɛ. 29Ɛ'ɛ ‑bhö nyɩasɛ, ‑maa na dɩba, ‑ɔ nyɩa'miɛ, ɔ 'tɛɛ 'mö ɔ zi ‑lii 'wuë 'wʋ. Nɩkpɛ a'bhë 'nɩɛ bhɛnɩ, ɔ 'kɔ ‑lu kä'mö ‑sɛ. 30‑Amö, n ‑nyɛ na dɩba 'sɔ, ‑bhlʋ ‑a glɩnɩɛ.»

31Zezwii gbää sa'a cuu, 'n Zwiiföwaa yi'ɛɛ 'kpɩ 'libhï, wa 'kɔnyɩ 'mö 'lɩbhä. 32Ɔ lɛ naa: «‑Li a ‑lii n yɛɛ a 'yila 'klʋ na dɩba a 'nglɩ 'mö nʋnɩɩ, yɩ'ɩɛ muënɩ. Yɩ gla'mö a dɔ'wʋ, ‑lu ‑mu kä bhä 'nglɩ 'n a yɩbhä bhä a ‑kaa 'kpɩ 'mö 'lɩbhä n 'kä 'ku 'nɩ?» 33Wa lɛ naa: «Ɛ'ɛ ‑bhö sɛɛ ‑n 'kä ‑li a ‑li ‑nʋ a za. ‑Maa ‑na'a sɛ ‑n bhïlaa dɛ'ɛ Lagɔ a dɛ wɛlɩzoku a za‑a. Nɩkpɛ ‑n glɩnɩaa ‑naa, n‑n 'libhïä ‑nanyɩ Lagɔ 'mö 'wʋ.» 34Ɔ lɛ naa: «Lagɔwɛlɩɩ a 'bɔgʋʋ 'mö, sɛ'ɛ yɩ cɛlɩɛ ‑mä nɩɩ, Lagɔ lɛ naa, ‑lagwɩ a glɩnɩɛ.#10.34 Soomö 82.6. 35Wɛlɩɩ 'wuë ‑yɩ cɛlɩɛ ‑mä Lagɔbɔgʋʋ 'möö, ‑bɛ 'nɩɛ bhɛnɩ ɔ 'kɩ sɛ ‑sɛ. A yɩɛ, wɛlɩkïbhë 'la Lagɔ bhïlaa, nɩkpaa ɔ nyɛɛ 'dɩɩ, 'mö ɔ laa ‑lagwɩɩ. 36Zaa, mɛɛ 'kä zi'e ‑amö Lagɔ ‑sɛɛ ‑lɛ, 'n ɔ ‑yii'ɛ 'bhlɩbhëa 'wʋ tiee, n ‑kaanyɩ 'dɩ 'nyɛ nɩɩ ‑amöö glɩnɩɛ Lagɔ 'a Yuu, sɛ yɩ ‑wʋ ɔ 'mö, 'n a nʋ bhä nɩɩ, n yɛ Lagɔ a dɛ wɛlɩzoku bhïla 'nɩ? 37'Na nʋnʋlii, yɩ 'nɩ na dɩba a 'möbhöönɩli glɩnɩɩ, a nɩ ‑tɩɩ 'fʋ dlɩ 'wʋ ‑kä. 38‑Maa ‑yɩ 'bhöönɔɔ 'mö, 'mö n ‑kä nʋʋ, na'bhë, a ‑nɩɩ a dlɩ 'wʋ ‑kää yi a'bhë ‑kë, 'na nʋnʋli 'la a za, a nɩ ‑kaaa'a dlɩ 'wʋ, ‑lɛ a dɔ'wʋ a yi sɛ yɩbhlɩmanɩ nɩɩ, na dɩba ‑wʋʋ ‑gömö, n ‑gälɔɔ 'wʋ.»

39Zezwii nʋä sa'aa, 'n wa yi'ɛɛ ‑mä 'kpɔtɔ, wa 'kɔ köbhä, 'n wa yoo kɛ wanɩ. 40Ɔ 'bhööä ‑lɛ, ‑mä Zludɛɛ ‑gömö a dɛɛ Zaa wɔlʋnɩ a‑a nɩkpaa 'wluu, 'n ɔ yi'ɛɛ ‑lɛ mö. Ɔ gwälɛ ‑lɛ, 41'n nɩkpa a ‑bɛ yo'ɛɛ yinɩ 'n wa nʋä nɩɩ: «Zaa Batisɩ, zɩzɛ a ‑mɛɛ 'kɔɔ kɛ ‑gömö 'zʋʋ, ɔ 'nɛɛ abhlɩ 'pä. ‑Maa wɛlɩɩ ɔ bhïla a‑a Zezwii a dɛɛ, yɩ 'wuë ‑tiawɛlɩɛ.» 42Dɛ ‑bhʋlʋ ‑kpɔ 'la, nɩkpa a ‑bɛ, 'n wa yiɛ 'wʋ nglu wa 'kä Zezwii dlɩ tɛɛnɩ.

Aktualisht i përzgjedhur:

Zaa 10: bet

Thekso

Ndaje

Copy

A doni që theksimet tuaja të jenë të ruajtura në të gjitha pajisjet që keni? Regjistrohu ose hyr

Mësoni më shumë rreth versionit BdG2

Zaa 10

Vargje biblike të njohura nga
Zaa 10

Dëgjoj Zaa 10

Devocione dhe Plane Leximi falas për Zaa 10

Le të lexojmë bashkë Biblën (Tetor)

Bibla:

Bété, Guiberoua

Versioni: BdG2 - bet

Zaa 10

Zaa 10

Vargje biblike të njohura nga Zaa 10

Dëgjoj Zaa 10

Devocione dhe Plane Leximi falas për Zaa 10

Le të lexojmë bashkë Biblën (Tetor)

Bibla:

Bété, Guiberoua

Versioni: BdG2 - bet

Zaa 10

Vargje biblike të njohura nga
Zaa 10