Matíe 5
5
ZOZÍI KƲ KÍKÉ WLÚ Ɔ́ PÁ TƆ́GƖ̀SƖ
(Lúkɩ 6.20‑23)
1Tányɩɛ́ mʋ́ Zozíi yɛ́ nyʋa a zumole a, ɔ́ gblà kíké wlú lé ɔ́ bɔ́ɔ sá lé ɔ́ kʋjɩ̀nyʋ̀àà ŋnɩ ɔ́ gɔ̀. 2Lé ɔ́ bháʋ́ niwɔlɩ, ɔ́ anɩ́:
3«Á ya pʋ́! Ámá Nyʋaá à yì a zizi a mnɩ́,
Mà ŋazɩ̀nyʋa á ŋwɔ́ɔ a,
Ámá à ŋwɔ́ɔ Lagɔ a Léyibhlɩɛ́ a kanyʋa.
4Á ya pʋ́! Nyʋaá à ŋwíé a,
Lagɔ yi kɛ́zɔ̀ a yízɔ̀ sɛ.
5Á ya pʋ́! Nyʋaá kà diwɔtɩɛ́ a,
Ámá nà kà kɛ́zɔ̀ dʋ̀dʋ jáa kʋ́ li!
6Á ya pʋ́! Nyʋaá Lagɔ̀nyùzɔ a bhlitʋ bhlá
Nànɩ́ cémʋ́ kleé yà mnátʋ sɔ́ bhláá lɛ́ a,
Á yi kɛ́zɔ̀ lʋ.
7Á ya pʋ́! Nyʋaá à kà ŋazɩ̀di a,
Lagɔ yi kɛ́zɔ̀ á ŋazɩ kʋ́ yɛ́.
8Á ya pʋ́! Nyʋaá à kà kplɔkplɔdì a,
Á yi kɛ́zɔ̀ Lagɔ yɛ́.
9Á ya pʋ́! Nyʋaá à ŋwʋ́ɛ́ núnule sáà,
Á yi kɛ́zɔ̀ Lagɔ a yúó plɩ́.
10Á ya pʋ́! Nyʋaá à yɛ́lɛ Lagɔ̀nyùzɔ a bhlibhlie a mnɩ́ kalɩmɛ a,
Ámá ŋwɔ́ɔ Lagɔ a Léyibhlɩɛ́ a kanyʋa.
11A ya pʋ́! Nyʋa nɩ trʋ amɔ, a nɩ ŋwʋ́ amɔ kalɩmɛ mʋ́, lé a nɩ ŋwʋ́ amɔ gbʋ́ wlú ná zà a. 12A nɩ lɔlɔ, a bhlɩ mà námɛɛ́ kádɛ gláalɛ amɔ Lagɔ gɔ̀. Sɩ́tɛ̀ mʋ́ á bhli wá sáà Lagɔ a nékʋ́cinyʋaá à kʋ̀ wá ʋ́ a, kʋ́.
Zozíi a kʋjɩ̀nyɔ ŋwɔ́ɔ zɩkpa zɔ̀ a gùu lé mɔ̀ a nápɛ
13Amɔ ŋwɔ́ɔ zɩkpa zɔ̀ a gùu. Mà gùu nɩ bhɩa mɛ́nɩmɛ a, cégbá mʋ́ á yiú sɔ́kʋ́ mɛ́nɩma áa? Ʋ nɩ́ yɩ́ náa, a nɩ ka yɩ́ mʋ́ lɛ́ mʋ́ nɩ, áa pá yɩ́ mʋ́ klá lé nyʋa námnɩlɛ ɩ́ mʋ́ mnɩ́. 14Amɔ ŋwɔ́ɔ zɩkpa zɔ̀ a nápɛ. Dúó kʋ̀ kíké wlú a, ʋ nɩ́ zúzùò. 15A nɩ́ ŋwʋ́ nápɛ klʋ́ lé a kɛ́ɛ́ sòlú wlú gbí. Mà, zɩkpa a mnɩ́ á bubuole lé ɛ́ ŋana gbó a nyʋa fɩ́ɛ́ kʋ́. 16Sɩ́tɛ̀ mʋ́ a nápɛɛ́ na ká ŋana lé nyʋa kɛ́ɛ́ yɛ́ lé a ká námagbɩ̀ɛ̀ a nie a, dʋdʋ̀ lé a ká a Tʋ́ Lagɔ ŋwnú fa.
Zozíi cí Lagɔ̀jràmá a wɔlɩ́
17A ná bhobho mà náa yi lé ká ʋ́ Lagɔ̀jràmá yà Lagɔ a nékʋ́cinyʋa sɔ́ a cícíwɔlɩ ʋ́ sa à. Ɩ́mɩ́ nɩ́ ʋ́ sa ka yi, náa yi lé kɩ́ɩ́ zɔ̀bhɩà lé ɩ ká neé sralɔɔ̀. 18Cícása a mnɩ́ a zà, ná srʋɛ amɔ mà, tányɩɛ́ lagɔ yà dʋ̀dʋ sɔ́ na ká zi a, ɩ́ yié zi lé nábàyìè a múó coco nɩ́ ká kɔ́ɔ̀kɔ́ Lagɔ̀jràmá jɩ̀ wlʋ́ lé kɔ́ yi kɛ́ ʋ́ bhɩa. 19Nyɔɔ́ nà kà lɔ̀ tòtòyilɛ̀ a múó glɩ́zɩ̀ a, lé ɔ̀ ka nyʋa srʋ mà, a nɩ ɔ́mɔ́ bhísakʋ́ a, bhʋ́anɩ nyɔɔ́ yi Lagɔ a Léyibhlɩɛ́ a mnɩ́ a nyɩ́kpɔtòtòyilɛ̀ plɩ́. Mà nyɔɔ́ nɩ̀ nɩ́ ʋ́ glɩ́zɩ̀ lé ɔ̀ nɩ ŋwʋ́ ʋ́ kpá, lé ɔ̀ nɩ cɩ́alʋʋ́ ɔ lía a, ɔ́ yi Lagɔ a Léyibhlɩɛ́ a mnɩ́ a nyɩ́kpɔkádɔ plɩ́. 20Náa srʋɛ sáà yɩ́ amɔ mà, a Lagɔ̀nyùzɔ̀ɔ̀ a bhlie a, ʋ́ nɩ nɩ́ lɔ̀ a másɛnyʋa yà Falizɩ́ɛnyʋa sɔ́ a Lagɔ̀nyùzɔ̀ɔ̀ kʋ́ zi a, a nɩ́ ka Lagɔ a Léyibhlɩɛ́ a mnɩ́ pla.
Dɩ yà ciecú sɔ́ a wɔlɩ́
21A yì saá mà, Lagɔ̀jràmáá à tinyʋa jɩ́ɛ́ wá kʋ́ a, á cíé wá mà: Nàa bhlá nyɔ. #5.21 A zɛlɩɩ sáà Námɛɛ́ 20.13; Detro 5.17. Nyɔɔ́ nɩ bhlá ɔ liyʋ a, a fɔɔ́ zúzu a dú. 22Mà mɔ́ɔ, náa srʋɛ yɩ́ lɛ́ amɔ mà: Nyɔɔ́ nɩ̀ ŋwʋ́ ɔ liyʋ a dɩ duo kʋ́ a, a yio zúzu a dú fa. Nyɔɔ́ nɩ̀ trʋ sáà ɔ nɩ́ayʋ́ a, a yio Zúfʋnyʋa a lɔ̀ a jrèè a mnɩ́ tɩ́tɩ́ plɔ ka fa. Lé nyɔ nɩ̀ yɛ́lɔɔ́ nɩnàlɛ̀ kʋ́ a, a yio kosugàlàà à nɩ́ nyúmo kɔ́ɔ̀kɔ́ a mnɩ́ páa. 23Nɩ̀ mʋ Lagɔ̀bʋ̀bɔ̀da lé nɩ̀ cí mànɩ́ kà Lagɔ lɛ́ nyɛ́ a, lé nɩ̀ luo mà yà ɩ̀ nɩ́ayʋ́ nyumosa kʋ́ bhli lé ɔ́ ka nà dɩ mnɩ́ a, 24tɩ ʋ́ lɛ́ɛ́ ɩ̀ fa bʋbɔ̀da a, lé mʋ ɩ̀ nɩ́ayʋ́ gɔ̀, yɔ̀sɔ́ a ká núnuu, fɩ́ɛ́ lé lɛ́ɛ́ ɩ̀ fa la bʋbɔ̀da a, kɛ̀ yɩ́ Lagɔ tʋà. 25Nyɔ nɩ wle mɔ̀ zúzu a dú a, vʋ́vʋ̀à kʋ́ lé yɔ̀sɔ́ núnu fɩ́ɛ́ nyúzɔ kʋ́, ɔ nɩ ka lɛ mɔ̀ zúzu a drɩ̀ fa lé zúzu nɩ ka lɛ sʋ́ja ku, a nɩ ka lɛ mɔ̀ jɩ̀ɩ ŋwʋ́. 26Cɩ́cása a mnɩ́ náa srʋɛ yɩ́ lɛ́ mɔ̀ mà, nɩ̀ nɩ́ sɩ́tɛ̀ nyɔɔ́ kʋ́ bhli lé nɩ̀ pla jɩ̀ɩ a, ɩ̀ yi mɔ̀ɔ kʋ lé ɩ̀ yi kpaá a lɔ̀fɩ́ɛ́ pɛ́ɛ, lé a nɩ́ ka mɔ̀ pìkìni a múó coco ciè.»
Zozíi cí nyʋaá à yrá a lía a ŋwná a wɔlɩ́
27A nú sáà cémʋ́ Moyízɩ a Jràmáá cí wá mà: Nàa bháʋ́ ɩ̀ liyʋ a ŋwnɔ́, lé ŋwnɔ́ ná bháʋ́ ɔ liŋwnɔ ɔ nyɩtʋ.#5.27 A zɛlɩɩ sáà Námɛɛ́ 20.14; Detro 5.18. 28Mà mɔ́ɔ, náa srʋɛ yɩ́ lɛ́ amɔ mà, nyɔ nɩ dʋdʋ̀ ɔ liyʋ a ŋwnɔ́, lé ɔ́ duo nɩ kʋ ɔ bɩ́ a, ɔ́ duo a mnɩ́ mɔ̀ ɔ́ ya ʋ́ ɔ́mɔ́ bhá. 29Nà liliyɩ nɩ ka ŋnɩ́ lé nɩ̀ nɩ nyumoé a, sɛɛ́ mɔ̀ɔ lé pɛ́ɛ́ klá, dɛ́ ɩ̀ yie páa lé nɩ kɛɛ́ yɛ́ a! Nɩ̀ kà bhlɛ́ lé nɩ̀ wlʋ́ ʋ́ neé a, ɩ́ náa lé ɩ́ zi nàa ka bhlɛ́ lé kà kosugàlàà à nɩ́ bhɩa kʋ́ a, mnɩ́ bhli. 30Nà liliglɔ̀gbá nɩ ka ŋnɩ́ lé nɩ̀ nɩ nyumoé a, dí a kʋ́ lé pá á klá, dɛ́ ɩ̀ yi a páa lé nɩ ka á yɛ́ a! Nɩ̀ kà sɔdrè lé nɩ̀ wlʋ́ ʋ́ neé a, ɩ́ náa lé ɩ́ zi nàa ka bhlɛ́ lé kà kosugàlàà à nɩ́ bhɩa kʋ́ a, mnɩ́ bhli.
Ŋwnɔ́ yà ɔ nyɩtʋ sɔ́ a yɩ́ wlʋwlʋ́ɛ́ a wɔlɩ́
(Matíe 19.9; Málɩ́kɩ 10.11‑12; Lúkɩ 16.18)
31Moyízɩ a Jràmáá cíé mà: Nyɔ nɩ jɩ́ɩ ɔ ŋwnɔ́ a, ɔ nyɛ́ ɔ́ bɔ́gʋ̀ɔ̀ ʋ̀ cíé mà ɔ nɩ́ yrá yɩ́ ɔ́mɔ́. #5.31 A zɛlɩɩ sáà Detro 24.1. 32Mà mɔ́ɔ, ná srʋɛ yɩ́ lɛ́ amɔ mà, nyɔ a ŋwnɔ́ nɩ nɩ́ bheyi li, lé ɔ nɩ jɩ́lɔɔ́ a, ɔ́ súó mà ɔ mʋ ɔ ká yuwligbʋ yɛ́. Lé nyɔ nɩ bhá sáà ŋwnɔ́ɔ́ ɔ nyɩtʋ jɩ́ɩ a, bhʋ́anɩ nyɔɔ́ a sɛ́fʋ ɔ́ ya ŋnɩ́gbʋ yɛ́.
Sɔ́lɩlɛɛ́ a wɔlɩ́
33A yì saá mà, á srʋ á tɩtɩa mà: Nyɔ ná sɔ́lɩ lé ɔ ká cí mà, ɩ́ yi wɔlɩ́ɛ́ lɩ̀à nɩ! Bhè nɩ ka wɔlɩ́ɛ́ nɩ. Wɔlɩdrèè kà ŋnɩ́, lé nyɔ ya Lagɔ drɩ̀ sɔ́lɩ mà ɔ́ yi nɩ a, ɔ́ ka lé ɔ nɩ á!#5.33 A zɛlɩɩ sáà Levíi 19.12; Nɔ́blʋ 30.3; Detro 23.22‑24.
34Mà mɔ́ɔ, ná srʋɛ yɩ́ amɔ mà, a ná sɔ́lɩ yɩ́! A ná sɔ́lɩ yɩ́ sáà lagɔɔ́ a ŋnɩ́ mʋ́! Ɛ̀kʋ̀ʋ̀ a? Lagɔɔ́ mɔ̀ɔ à Tʋ́ Lagɔ sí, mɔ̀ɔmɔ̀ ŋwɔ́ɔ ɔ léyikpo. 35A ná sɔ́lɩ sáà dʋ̀dʋ a ŋnɩ́ mʋ́! Ɛ̀kʋ̀ʋ̀ a? Dʋ̀dʋ jɩ̀ à Tʋ́ Lagɔ gbɛlɛ kokokpí. A ná sɔ́lɩ sáà Zelízalɛ́mʋ a ŋnɩ́ mʋ́. Ɛ̀kʋ̀ʋ̀ a? Zelízalɛ́mʋ ŋwɔ́ɔ Lóoó kádɔ̀ɔ̀ a dú. 36Nà sɔ́lɩ sáà nà wlú a ŋnɩ́ mʋ́, mà nɩ ka míi lé kà nà wlú a nyíplʋ a múó pɔ́lʋma, lé nɩ ka sáà míi lé kʋ̀ʋ tríma. 37Nà cícíwɔlɩ plɩ́ kɔ́ɔ̀kɔ́ cícása, aan! Ɩ́ zà ʋ́ʋ̀n! Mà wɔlɩ́ ànɩ̀ɛ̀ cílo yɩ́ lɛ́ ʋ́ a, Dɩ́blʋ̀ɔ̀ a neé mʋ́ ɩ́ wlʋ́ɛ́ yɩ́.
Kpa á sɩsa wɔlɩ́
(Lúkɩ 6.29‑30)
38A nú sáà mà: Ɩ̀ liyʋ nɩ wla nà yɩ́ a, wla ɔ́ nɩ yɩ́! Ɔ nɩ sa mɔ̀ɔ glè neé a, sɔɔ́ glè neé!#5.38 A zɛlɩɩ sáà Námɛɛ́ 21.24; Levíi 24.20; Detro 19.21.
39Mà mɔ́ɔ, náa srʋɛ amɔ mà, nyɔ nɩ nɩ amɔ nyumoé a, a ná sa kpa. Nyɔ nɩ wla nà lilinyuklú a mnɩ́ kpá a, tʋalɔɔ́ ànʋ̀ɔ̀!
40Nyɔ nɩ cí mà ɔ́ ká mɔ̀ zúzu a dú fa lé ɔ ká mɔ̀ nà kótu gɔ̀ bhá a, cío sa ɔ bhá sáà ʋ́ nà jìgbìlɔ̀kwɩ! 41Nyɔ nɩ fɔ́sɩ mɔ̀ mà a bhli kilóo a múó a nyúzɔ a, yɔ̀sɔ́ a bhli kilóoyuo sɔ́ a nyúzɔ! 42Nyɔ nɩ zra mɔ̀ a, nyɛ́ ɔ́! Nyɔ nɩ yi mɔ̀ gɔ̀ gbla ka a, nàa sɩɔ́!
Wà nà gblɩ̀nyɔ
(Lúkɩ 6.27‑28; Lúkɩ 6.32‑36)
43« A nú sáà mà: Wà ɩ̀ liyʋ, lé gblɩ̀ nà gblɩ̀nyɔ.#5.43 A zɛlɩɩ sáà Levíi 19.18. 44Mà mɔ́ɔ, náa srʋɛ yɩ́ lɛ́ amɔ mà, a wà a gblɩ̀nyʋa! Lé nyʋaá à nie amɔ nyumoé a, a bhibhie a wlú. 45A nɩ nɩ sɩ́tɛ̀ a, bhʋ́ a ŋwɔ́ɔ cɩ́cása a Tʋ́ɔ́ ɔ̀ kʋ̀ lagɔɔ́ a, ɔ yúó, máà ɔ́ nie lé yrʋ́ pʋ́lɛ námanyʋa bhè mɔ́nyùmònyʋa sɔ́ jɩ̀; lé ɔ́ nie sáà lé nyú bhlalɛ nyʋaá à bhlie Lagɔ̀nyùzɔ lé ànàà à nɩ́ bhliú a. 46Bhè nyʋaá à wà amɔ a, áa múó a nɩ wà a, námɛ cégbá a mʋ́mɔ yɩ́ à? Lapóo a kʋbhlinyʋaá#5.46 Lapóo a kʋbhlinyʋaá: Nyʋa à yrá wá lapóo zúfʋbhlɩ kʋ́ a, á bhá wá má bhàlʋ̀nyʋa kʋ́. à ŋwɔ́ɔ lɛ́ mónyùmònyʋ̀àà a, sɩ́tɛ̀ á nie sáà. 47Bhè a níayúó a múó a nɩ pá yúó a, námasa gbá a nɩ, lé à nà kà nyʋa neé mna áa? Nyʋaá à nɩ́ bhli Lagɔ̀nyùzɔ a, á sɛ́fʋ sɩ́tɛ̀ á nie. 48A srí sá, a Tʋ́ɔ́ ɔ kʋ lagɔɔ́ a bhísakʋ́!»
Aktualisht i përzgjedhur:
Matíe 5: NEY
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© (Active), Wycliffe Bible Translators, Inc. All rights reserved.