LUKAS 24
24
Puwawangung I Yesus
(Mat. 28:1-10; Mrk. 16:1-8; Yoh. 20:1-10)
1Su l᷊ou ngu Misa, mal᷊uka-l᷊ukari manga kowawine e'e natamai sarang kubul᷊i numbawa manga rampa ko seng nisadia ngi sire. 2Su kubul᷊i, i sire nakawua watu l᷊ahumpinge seng nul᷊umunggi. 3Bou e'e i sire nusumu sarang l᷊al᷊ung u kubul᷊i e'e, kateho ta nakasugha badang u Mawu Yesus su se'e. 4Tintal᷊a i sire kararisi su se'e dang bingo kapusipiri hal᷊i e'e, singkawua pia dua ngkatau dingang u pakeang kukerong kararisi su sindihang i sire. 5I sire nataku kahingang, bou e'e nusuba nurating u tana, tintal᷊a tau darua e'e nangul᷊i si sire, “Nakurawe i kumu mundea taumata ko wiahi su tal᷊oara u taumata ko nate? 6#Mat. 16:21, 17:22-23, 20:18-19; Mrk. 8:31, 9:31, 10:33-34; Luk. 9:22, 18:31-33I Sie tarie su si'i. I Sie seng nuwangung! Tinaungete apa ko seng nihabari-E si kumu su tempo I Sie mborong su Galilea, 7himoneu ‘Ahusi Taumata mambeng isarakang su taumata ko bardosa, bou e'e ighantong, dang su l᷊ou katilunge I Sie sarung muwangung.’ ”
8Kuteu manga kowawine e'e nakatinaung apang ko nihabari Yesus. 9Suapang napul᷊e bou kubul᷊i e'e, i sire nuwuke ngu kaul᷊ie ko nariadi e'e su mapul᷊onsau rasuli dang su kaul᷊i u tumatuhu ko wal᷊inge. 10Manga kowawine ko nuhabari kaul᷊ie e'e su manga tumatuhu I Yesus e'e ko: I Maria Magdalena, i Yohana l᷊au i Maria mama ngi Yakobus, dang manga kowawine ko wal᷊inge ko nuhundingang i sire. 11Kateho manga rasuli e'e manika manga kowawine e'e mangkate asal᷊i kapuwukenge. I sire ta mangimang wuke ngu manga kowawine e'e. 12Arawe i Petrus nuwangung dang nutumal᷊ang sarang kubul᷊i. Apiru nukumakurung i sie nutuhung sarang l᷊al᷊unge, bou e'e nakawua kitang heka sapu su se'e. I Petrus naherang kahingang, bou e'e napul᷊e dingang napene kakina su l᷊al᷊ung u naunge hal᷊i u apang ko seng nariadi e'e.#24:12: Su l᷊al᷊ung u pira mbau wohe takoae ayeti 12.
Su l᷊al᷊eng sarang Emaus
(Mrk. 16:12-13)
13Su l᷊ou e'e l᷊ai, dua ngkatau tumatuhu I Yesus kal᷊al᷊enge sarang kampong simbau, arenge Emaus, manga mapul᷊onsau su kilonge bou Yerusalem. 14Apiru kal᷊al᷊enge i sire rua kapudidatonge kaul᷊i u hal᷊i ko seng nariadi e'e. 15Tintal᷊a i sire rua kapudidatonge l᷊au kapanipiri, I Yesus sisane nusumongo dang nurumal᷊eng dingang i sire rua. 16I sire nakawua si Yesus, kateho pia apa ko nakahumping si sire sarang ta nakakil᷊al᷊a si Sie. 17Bou e'e I Yesus nangul᷊i, “Apa kahipudidato ngi rua su l᷊al᷊eng i'i?”
I sire rua natatana dingang pahesi nasusa. 18Bou e'e singkatau bo i sire rua, arenge i Kleopas, nukina si Yesus, “Ko I Tuang singkatau ko wuhu su Yerusalem ko wugha ngu hal᷊i ko seng nariadi pai se'e wuhu-wuhu i'i?”
19“Ko hal᷊i a?” I Yesus nukina.
“Hal᷊i ko seng nariadi si Yesus, tau Nazaret e'e,” nisimbahi sire. “I Sie ko nabi. Apang didato-Nge l᷊au apang kakanoa-E makawasa kahingang – maning tumuhu tatuhung u Mawu Ruata kere'e l᷊ai tumuhu tatuhung u kaul᷊i u taumata. 20Manga tumbonang u imam l᷊au manga pangaha u bangsa ngi kite nanarakang I Sie guna ngu hukumang papate, dang i sire nunggantong si Sie! 21Sumbal᷊i i kami muharapi ko seng I Sie ko sarung mul᷊iu ngu tau Israel! Dang silou i'i seng katilu l᷊ounge nanita bou hal᷊i e'e nariadi. 22Mborong l᷊ai, i sire pirangkatau kowawine bou tal᷊oara i kami nupahuwi si kami. Mborong mal᷊uka-l᷊ukari i sire nakoa sarang kubul᷊i, 23Kateho ta nakarea badang-E su se'e. Bou e'e i sire napul᷊e dang nangul᷊i uare i sire nakawua malaikati, dang manga malaikati e'e nangul᷊i uare I Yesus wiahi. 24Bou e'e pirangkatau bo i kami natamai sarang kubul᷊i dang nakahombang himoneu apang ko nihabari u manga kowawine e'e mang kere'e, kitang i sire ta nakawua si Yesus.”
25Bou e'e I Yesus nangul᷊i si sire rua, “I kumu mang ko l᷊ongong! Tumaniu mal᷊ongge i kumu mangimang kaul᷊ie ko seng nihabari u manga nabi! 26Wal᷊ingewe Ratu Mananal᷊amati mambeng mamundang horo singsara e'e, mbuhue makarea kawawantughi-E?” 27Bou e'e I Yesus nul᷊ahe si sire rua apang ko mawawohe su kaul᷊i u Buki Susi hal᷊i u watangeng-E, nanita bou apang buki i Musa dang buki u manga nabi.
28Tintal᷊a e'e i sire seng masandighi u kampong ko tamaing i sire. I Yesus tuhungang nutingkakoa kere ko mul᷊umal᷊eng turusi, 29kateho i sire rua nanahang si Sie. “Katanae dingang i kami,” Angkung i sire rua si Sie, “Ii seng kal᷊ahuwinge dang l᷊ai seng kararundunge.” Kuteu I Yesus nusumu tadeau makapangindul᷊e su tampa i sire rua. 30Su tempo nukumangiang nukumang dingang i sire rua, I Yesus nangal᷊a boroti, nutarimakase su Mawu Ruata, nangangompeng boroti e'e dingang u l᷊ima-Nge, bou e'e nangonggo si sire rua. 31Mbuhue i sire rua natitong himoneu e'e ko I Yesus. Kateho I Sie seng ta nikawua ngi sire. 32Angkung i sire singkatau su ko wal᷊inge, “Wal᷊inge we pundang u naung i karua sal᷊awe sumahoka, pia I Sie kapudidatonge dingang i karua su l᷊al᷊eng, dang nanarangkang tataho u Buki Susi si kite?”
33Singkatempo e'e l᷊ai i sire rua nakoa sarang Yerusalem. Pai se'e i sire rua nakahombang si sire mapul᷊onsau tumatuhu I Yesus kapukomol᷊i dingang i sire ko wal᷊inge. 34I sire e'e nangul᷊i, “Mang tingari Mawu seng sau nuwiahi! I Sie seng nutingkaandaghi watangeng-E si Simon!”
35I sire rua tumatuhu I Yesus ko mbuhue nusumongo e'e bou e'e nuwuke ngu sombang i sire rua su l᷊al᷊al᷊engang, dang kirapa i sire rua nakakil᷊al᷊a su tempo I Sie nangangompeng boroti.
I Yesus nutingkaandaghi watangeng-E su manga tumatuhu-E
(Mat. 28:16-20; Mrk. 16:14-18; Yoh. 20:19-23; Wuk. 1:6-8)
36Tintal᷊a i sire mborong kapuwawukenge, singkahuwi I Yesus sisane kararisi su tal᷊oara i sire dang nangul᷊i, “Sal᷊amati si kumu!”#24:36: Su l᷊al᷊ung u pira mbau wohe takoae: dang nangul᷊i, “Sal᷊amati si kumu!”
37I sire nahuwi dang nataku, ual᷊ingu su naung i sire ko nakawua himukuri. 38Arawe I Yesus nangul᷊i, “Nakurawe i kumu nataku? Nakurawe nutumimbul᷊i kaghagho su l᷊al᷊ung u naung i kumu? 39Tuhungete l᷊ima-Ku l᷊au laeri-Ku. Katitongte, ko Ia i'i! Pundangete dang tuhungete pakapia-pia, watu'u himukuri ko takoae ghisinge arako duhinge, musul᷊ung kere ko nikawua ngi kumu si Sia.”
40I Yesus nangul᷊i kere'e apiru nanode u l᷊ima-Nge l᷊au l᷊aeri-E si sire.#24:40: Su l᷊al᷊ung u pira mbau wohe takoae ayeti 40. 41Dang tintal᷊a i sire mborong sal᷊a ta mangimang, ual᷊ingu tumaniu kal᷊iaghi dang naherang, I Yesus nukina si sire, “Apa i kumu pia kang su si'i?” 42I sire nangonggo si Sie kina sinanga simpoto. 43I Yesus nundae kina e'e, bou e'e nukumang su tingo ngi sire.
44Bou e'e I Sie nangul᷊i si sire, “I'i manga hal᷊i ko seng mbuae Daku nihabari si kumu su tempo Ia mborong dingang i kumu: himoneu apang hal᷊i ko mawawohe su l᷊al᷊ung u Buki i Musa, l᷊au manga Nabi dang Mazmur, bou hal᷊i u Ia mang mambeng mariadi.”
45Bou e'e I Yesus namuka sipirang i sire tadeau makahingang pandung u Buki Susi. 46I Sie nangul᷊i si sire, “Su l᷊al᷊ung u Buki Susi mawawohe himoneu Ratu Mananal᷊amati e'e mambeng mutatahang u singsara, dang mambeng sau muwangung bou papate su l᷊ou katilunge. 47Himoneu l᷊ai areng u Ratu Mananal᷊amati e'e mambeng ipakatitong su kaul᷊i u bangsa himoneu taumata mambeng putobati, dang Mawu Ruata mangampung u dosa. Dang habari e'e mambeng ipakatitong manita bou Yerusalem. 48Seng i kumu makoa saksi ngu kaul᷊i u e'e. 49#Wuk. 1:4Ia sisane-Ku sarung mundoho si kumu apa ko seng nipudiandi ngi Yamang. Kateho i kumu mambeng tatapi mangampal᷊i su soa i'i sarang kawasa ngu Mawu Ruata mahumpa si kumu.”
I Yesus nihengke sarang sorga
(Mrk. 16:19-20; Wuk. 1:9-11)
50Bou e'e I Yesus numbawa si sire sarang l᷊ikuru soa sarang nurating u Betania. Su se'e I Sie nuhengke l᷊ima-Nge, mbuhue nangal᷊amati si sire. 51Tintal᷊a i Sie kapukoae e'e, I Sie nahengke sarang sorga, bou e'e#24:51: Su l᷊al᷊ung u pira mbau wohe takoae: nahengke sarang sorga, bou e'e. nutal᷊ei bo i sire. 52I sire nusuba nanumba si Sie, bou e'e napul᷊e sarang Yerusalem dingang u naung ko mal᷊uasi kahingang, 53dang turusi kapundalonge Mawu Ruata su Wal᷊e ngu Mawu.
Aktualisht i përzgjedhur:
LUKAS 24: PLT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr