मरकुस 1
1
यूहन्ना बपतिस्मा देंइ बाले के प्रचार
1परमातिमा के लड़िका यीसु मसीह के खुसी के खबर के सुरुआत। 2जइसन परमातिमा के सँदेस बतामँइ बाले यसायाह के किताब माहीं लिखा हय, कि
“देखा, हम अपने दूत काहीं तोंहसे पहिले पठइत हएन, जऊँ तोंहरे खातिर मनइन काहीं तइआर करिहँय।
3सुनसान जघा माहीं एकठे मनई खुब चन्डे गोहराबत रहे हँय, कि अपने मन काहीं तइआर कइके गइल सीध बनाय ल्या, काहेकि प्रभू आमँइ बाले हें#यसा 40:3।”
4ऊँ गोहरामँइ बाले यूहन्ना बपतिस्मा देंइ बाले आहीं, जऊँ सुनसान जघा माहीं बपतिस्मा देत रहे हँय, ऊँ ठाढ़ होइके कहँइ लागें, पाप करब छोंड़िके अपने मन काहीं बदला, अउर बपतिस्मा ल्या, जउने परमातिमा तोंहरे अपराधन काहीं माफ कइ देंय। 5सगले यहूदिया प्रदेस के यहूदी, अउर यरूसलेम सहर के रहँइ बाले सगले मनई अपने घरन से निकरिके यूहन्ना बपतिस्मा देंइ बाले के लघे गें, अउर अपने-अपने पापन काहीं सोइकार कइके यरदन नदी माहीं उनसे बपतिस्मा लिहिन।
6यूहन्ना ऊँट के बार से बना ओन्हा पहिरत रहे हँय, अउर करिहाँ माहीं चमड़ा के पट्टा बाँधे रहत रहे हँय, अउर ऊँ चिड्डन काहीं अउर जंगल के महिपर खात रहे हँय। 7अउर इआ कहिके प्रचार करत रहे हँय, कि “हमरे बाद जऊँ आमँइ बाले हें, ऊँ हमसे एतना महान हें; कि हम निहुरिके उनखे पनहिन के डोरव तक छोरँइ के काबिल नहिं आहेन। 8हम त तोहईं पंचन काहीं पानी से बपतिस्मा दिहेन हय, पय ऊँ तोहईं पबित्र आत्मा से बपतिस्मा देइहँय।”
यीसु के बपतिस्मा अउर परिच्छा
(मत्ती 3:13; 4:11; लूका 3:21-22; 4:1-13)
9एक दिना यीसु गलील प्रदेस के नासरत गाँव से आइके, यरदन नदी माहीं यूहन्ना बपतिस्मा देंइ बाले से बपतिस्मा लिहिन। 10यीसु जइसय पानी से बहिरे निकरिके ऊपर आएँ, तबहिनय ऊँ अकास काहीं खुलत अउर पबित्र आत्मा काहीं अपने ऊपर परेबा के रूप म उतरत देखिन। 11अउर इआ अकासबानी भय, “तूँ हमार पियार लड़िका आह्या, हम तोंहसे प्रसन्न हएन।”
12तब पबित्र आत्मा हरबिन यीसु काहीं सुनसान जघा कइती पठइस। 13अउर सुनसान जघा माहीं, सइतान उनखर चालिस दिना तक परिच्छा लिहिस; अउर उहाँ यीसु जंगल म रहँइ बाले जानबरन के बीच माहीं रहे हँय, अउर स्वरगदूत उनखर सेबा करत रहे हँय।
यीसु के सेबकाई के सुरुआत
(मत्ती 4:12-17; लूका 4:14-15)
14जब हेरोदेस राजा यूहन्ना काहीं जेल माहीं डरबाय दिहिन तय, ओखे बाद यीसु गलील प्रदेस माहीं आइके, परमातिमा के राज के खुसी के खबर सुनामँइ लागें। 15अउर ऊँ कहिन, “सही समय आइगा हय, अउर हरबिन परमातिमा राजा बनिके आमँइ बाले हें; पाप करब छोंड़िके परमातिमा के लघे आबा, अउर खुसी के खबर के बिसुआस करा।”
पहिल चेलन काहीं बोलाबा जाब
(मत्ती 4:18-22; लूका 5:1-11)
16एक दिना यीसु गलील प्रदेस के झील के किनारे-किनारे चलतय-चलत, समौन अउर उनखे भाई अन्द्रियास काहीं झील म जाल डारत देखिन; काहेकि ऊँ पंचे मछुआरा रहे हँय। 17यीसु उनसे कहिन, “हमरे पीछे चले आबा, हम तोंहईं मनइन काहीं परमातिमा के लघे लइ आमँइ बाला बनाउब।” 18अउर ऊँ पंचे तुरन्तय जालन क छोंड़िके यीसु के पीछे चल दिहिन।
19उहाँ से कुछ दूरी चले के बाद, यीसु जब्दी के लड़िका याकूब अउर ओखे भाई यूहन्ना काहीं नाव म चढ़े जालन काहीं सुधारत देखिन। 20यीसु उनहीं हरबिन बोलाइन; अउर ऊँ पंचे अपने बाप जब्दी काहीं मजूरन के साथ नाव माहीं छोंड़िके यीसु के पीछे चल दिहिन।
बुरी आत्मा से परेसान मनई काहीं नीक करब
(लूका 4:31-37)
21यीसु अपने चेलन के साथ कफरनहूम सहर माहीं गें, अउर ऊँ पबित्र दिन काहीं हरबिन यहूदी सभाघर माहीं जाइके उपदेस देंइ लागें। 22अउर मनई उनखे उपदेस काहीं सुनिके चउआइगें; काहेकि यीसु उनहीं मूसा के बिधान सिखामँइ बालेन कि नाईं नहीं, बलकिन अधिकारी कि नाईं उपदेस देत रहे हँय। 23उहय समय उनखे सभाघर माहीं एकठे मनई बइठ रहा हय, जउने माहीं एकठे बुरी आत्मा रही हय। 24उआ एक दरकिन चिल्लाइके कहँइ लाग, “हे नासरत गाँव के रहँइ बाले यीसु हमार अपना से कउनव काम नहिं आय, का अपना हमहीं नास करँइ आएन हँय? हम अपना काहीं जानित हएन, कि अपना को आहेन? अपना परमातिमा के पबित्र जन आहेन।” 25यीसु ओही डाँटिके कहिन, “चुप्पय रव्ह; अउर उआ मनई से बहिरे निकर जा।” 26तबहिनय उआ बुरी आत्मा उआ मनई काहीं खुब अभुआइके, अउर खुब चंडे चिल्लाइके ओसे बहिरे निकरिगे। 27इआ देखिके सगले जन चउआइगें, अउर आपस माहीं कहँइ लागें, “इआ का बात ही? इआ त कउनव नबा उपदेस आय! यीसु अधिकार के साथ बुरी आत्मन काहीं हुकुम देत हें, अउर ऊँ उनखर हुकुम मनती हईं।” 28अउर यीसु के नाम हरबिन गलील प्रदेस के आस-पास के सगले गाँमन माहीं फइलिगा।
खुब बिमारन काहीं नीक करब
(मत्ती 8:14-17; लूका 4:38-41)
29यीसु हरबिन यहूदी सभाघर से निकरिके याकूब अउर यूहन्ना के साथ समौन अउर अन्द्रियास के घर माहीं गें। 30समौन के सास काहीं बोखार चढ़ी रही हय, अउर घरबाले हरबिन यीसु से उनखे बारे माहीं बताइन। 31तब यीसु समौन के सास के लघे जाइके उनखर हाँथ पकड़िके उठाइन; तबहिनय उनखर बोखार उतरि गे, अउर ऊँ उनखर सेबा-सहाई करँइ लागीं।
32साँझ के समय जब सुरिज बूड़िगा, तब खुब जने सगले बिमारन काहीं, अउर उनहीं जउनेन माहीं बुरी आत्मा रही हँय, यीसु के लघे लइ आएँ। 33अउर सहर के खुब मनई घर के सउहें एकट्ठा होइगें। 34यीसु खुब जनेन काहीं, जऊँ कइअक मेर के बिमारिन से परेसान रहे हँय, नीक कइ दिहिन, अउर खुब बुरी आत्मन काहीं निकारिन, अउर ऊँ, बुरी आत्मन काहीं बोलँइ नहीं देत रहे आहीं, काहेकि ऊँ यीसु काहीं जानत रही हँय।
अकेले माहीं यीसु के प्राथना
(लूका 4:42-44)
35भिनसरहय सुरिज निकरँइ से खुब पहिलेन, यीसु उठिके, घर से निकरिके सुनसान जघा माहीं गें, अउर उहँय प्राथना करँइ लागें। 36सकारे समौन अउर उनखर साथी उनहीं ढूँढ़ँइ गें। 37जब यीसु उनहीं मिलिगें, तब ऊँ पंचे उनसे कहिन, “सगले जन अपना काहीं ढूँढ़त लाग हें।” 38यीसु उनसे कहिन, “आबा हम पंचे अउर कहँव आस-पास के बस्तिन म चली, जउने हम उहँव प्रचार करी, काहेकि हम एहिन खातिर निकरेन हय।” 39यीसु सगले गलील प्रदेस माहीं उनखे सभाघरन माहीं जाइ-जाइके खुसी के खबर के प्रचार करत, अउर बुरी आत्मन काहीं मनइन से निकारत रहिगें।
कोढ़ के मरीज काहीं नीक करब
(मत्ती 8:1-4; लूका 5:12-16)
40एकठे कोढ़ी यीसु के लघे आबा, अउर उनसे चरउरी बिनती किहिस, अउर उनखे गोड़न गिरिके कहिस, “अगर अपना चाही त हमहीं सुद्ध कइ सकित हएन।” 41यीसु काहीं उआ मनई के ऊपर बड़ी दया आइगे, अउर आपन हाँथ बढ़ाइके ओही छुइन अउर कहिन, “हम चाहित हएन, तूँ सुद्ध होइजा।” 42अउर हरबिन ओखर कोढ़ के बिमारी नीक होंइ लाग, अउर उआ सुद्ध होइगा। 43तब यीसु ओही चेतउनी दइके तुरन्तय पठय दिहिन। 44अउर ओसे कहिन, “देखा कोहू से कुछू न कह्या, पय जाइके अपने-आप काहीं याजक क देखाबा, अउर अपने सुद्ध होंइ के बारे माहीं जउन चढ़ाबा चढ़ामँइ काहीं मूसा नबी ठहराइन हीं, उहय भेंट चढ़ाबा, कि जउने तोंहरे समाज के लोगन के खातिर गबाही ठहरय।” 45पय उआ बहिरे जाइके अपने निकहा होंइ के खुब प्रचार करँइ लाग, अउर सगले सहर म इआ खबर फइलाय दिहिस, इआ कारन से यीसु पुनि खुले आम सहर माहीं नहीं जाय सकें, पय सुनसान जघा माहीं रहत रहे हँय; अउर चारिव कइती से मनई उनखे लघे आबत रहिगें।
Aktualisht i përzgjedhur:
मरकुस 1: bag
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© Wycliffe Bible Translators, Inc. All rights reserved.