Hechos 27
27
Pablo edebisidꞌa Romaẽna
1Daira Italia druaedꞌa barcodꞌe wãbidꞌaita krĩchabʉdadꞌera Pablota dewaraurã ʉ̃kʉrʉ jida erubꞌe bawara soldaorã nokꞌota Julioa chãbꞌarisidꞌa. Izhira soldaorã rey Augustodꞌeta tabꞌʉdꞌebema basia. 2Daira barco Adramitio pʉwʉrʉdꞌebemane bꞌarisidꞌa. Maʉ̃ barcora wã basia Asia druadꞌebema odedꞌaze za. Dai bawara bꞌasia Aristarco Tesalónica pʉwʉrʉdꞌebemata, maʉ̃ pʉwʉrʉra Macedonia druadꞌebema. 3Nrũẽma jũẽkuasia Sidón pʉwʉrʉidꞌu. Juliobara Pablo bia edabʉrʉta izhi bawara biarãma idu wãbisia kꞌãrẽ nesidꞌata diadꞌamarẽã maʉ̃rãba. 4Mamaʉ̃ba jizoabʉdadꞌera dodꞌu Chipre ãbʉde wãsidꞌa pʉ̃ãdrʉta ãña nʉmʉba. 5Pusadꞌe berabꞌarisidꞌa Cilicia drua kĩrãpe, Panfilia drua kĩrãpe, aramaʉ̃ne zesidꞌa Mira pʉwʉrʉidꞌu, maʉ̃ pʉwʉrʉra Licia druadꞌebema.
6Mama soldaorã nokꞌobara barco Alejandría pʉwʉrʉdꞌebemata ũdusia wãta Italia druaedꞌa. Mawũẽ daira bꞌaribisia maʉ̃ne. 7Daira ewari bio bikaãkꞌa wãsia. Aramaʉ̃ne zuburia kꞌabadadꞌe pʉwʉrʉ Gido kĩrãpe jũẽkuape pʉ̃ãdrʉba idaribi ẽãba dodꞌu Creta ãbʉde wãsidꞌa dodꞌu Salmón kĩrãpe. 8Aramaʉ̃ne pusa kꞌaawa zuburia kꞌabadadꞌe berabꞌarisidꞌa odedꞌaze Buenos Puertos abada maẽ. Maʉ̃ kꞌaita bꞌasia pʉwʉrʉ Lasea.
9Ewarita bio aduabʉdaba ya menajacha nʉmesia pusadꞌe barcodꞌe wãĩrã. Maʉ̃sidꞌa mawũãne fiesta judíorã nekꞌodꞌakꞌa ewarira berabꞌarisia. Maʉ̃nerã Pablobara jarirãã, 10mawũãsia: Mʉã kꞌawua bꞌʉa barcora menajachadꞌe wãneba ne bio aduaya, bari ne zʉgʉa edeta barcota aduai ẽã, awuarabʉrʉ beukuaya dazhirãsidꞌa.
11Mawũãmina soldaorã nokꞌobara barco zhibari bedꞌeata, barcodꞌe nokꞌo bedꞌeata audre ũrĩsia Pabloba jara kꞌobꞌʉ kꞌãñabara. 12Odedꞌaze Buenos Puertos abada maẽrã kue ewarita berabꞌariira biga ẽbaera, zhi kꞌabanarã krĩchasidꞌa mama jipa berabꞌaridꞌaita jũẽnaĩ kꞌawuaita Fenice pʉwʉrʉedꞌa. Odedꞌaze maʉ̃ pʉwʉrʉdꞌebema Creta dodꞌudꞌebema, mawũã krĩchasidꞌa kue ewarira nangu ewarita pusa ewarita berabꞌaridꞌaita mama.
Nanguba pusa bomatʉbidꞌa
13Pʉ̃ãdrʉta juwua ãkꞌaareba pʉ̃ãdrʉ kꞌobꞌaera ãzhima biga basia wãnaĩta, mawũẽ ancla jiraedadꞌape wãsidꞌa dodꞌu Creta kꞌaawa. 14Mawũãmina audre ẽãne barco nanguba edabꞌarisia nangu Euroclidón abadaba. 15Aramaʉ̃ne barcora edabꞌari wãba zhi kẽbʉ nanguma pʉrʉwa bꞌedꞌa ẽãba daira idu zhi edebisidꞌa. 16Dodꞌu zake Clauda abada ãbʉde babʉdadꞌera bꞌe ẽã jirpanape edꞌa bꞌʉsidꞌa jãba zakera. 17Mawũã edꞌa bꞌʉdꞌape barcora lasoba jũẽkuasidꞌa ãrĩ ẽbamarẽã. Ibuta Sirte abadama poa nʉmeĩneba pera kꞌobꞌeba wua barcodꞌebema eubꞌari nʉmʉrã edꞌaa bꞌʉdꞌape nangua idu edebisidꞌa. 18Aramaʉ̃ne pusa nanguba bomatʉbi nʉmʉba nrũẽmanerã doidꞌu pepekuasidꞌa barcoba ne zʉgʉata edera. 19Ewari ũbeadꞌe daibara dazhi juwuaba doidꞌu pepekuasidꞌa netata barcodꞌebema. 20Ewari kꞌazhiruaba ʉ̃madau miã chĩdau ũdu ẽã ewari bio basia, pusa nanguba kꞌãbãẽã bomatʉbi nʉmʉba daibara krĩchasidꞌa daira ẽdrʉdꞌa ẽãta.
21Aramaʉ̃ne Pablobara daira nekꞌodꞌa ẽã ewari bio badꞌeba ãzhi ẽsadra nʉmepe mawũãsia: Biga bakꞌausia mʉ bedꞌeata ũrĩsidꞌabʉrʉ, mawũãrã Creta dodꞌudꞌeba jizoa ẽbakꞌausia kꞌãwũã ne ãrĩne ne aduabidꞌe. 22Mawũãmina wãniguaudua, dazhirã miõta beu ẽã, awuarabʉrʉ teguezoaya barcotrʉ. 23Idꞌi diamase mʉ ũme bꞌasia ángel Daizezedꞌeta, mʉrã Daizezedꞌea, mʉãrã izha jara bꞌʉta aribꞌae bꞌʉa. 24Ángelbara mʉãã mawũãsia: Pablo perarãrũã, bʉra jũẽĩbara rey César kĩrãbita. Maʉ̃sidꞌa mawũãne bʉkꞌareuba Daizezebara jõma bꞌeabiya barcodꞌe bʉ bawara didꞌira. 25Maʉ̃ba wãniguaudua, mʉãrã Daizezera krĩcha bꞌʉa, mawũã baya izha mʉãã jaradꞌa kĩrãkꞌa. 26Aranaʉ̃ne dazhirã poa nʉmeña baridu dodꞌudꞌe.
27Aramaʉ̃ne semana ũme babʉrʉdꞌe diamase nʉmʉnerã pusa Adriáticodꞌe nanguba ededꞌe barcodꞌe trajabadabara ewari ẽsadra krĩchasidꞌa drua kꞌaita bakuata. 28Zabʉdadꞌera pusa nabuara bꞌasia treinta y seis metro. Ãmaña arana wãbʉdadꞌera nabua bꞌasia veintisiete metro. 29Peñama tẽũĩneba pera kꞌobꞌeba ancla kĩmarẽ tabuesidꞌa barco ãkidꞌaare. Mobe ĩñabasia ʉ̃nadrʉbi krĩña panasia. 30Barcodꞌe trajabadara merũ wãnaĩta krĩchasidꞌa barcodꞌebara. Mawũẽ jãba zakera pusaidꞌu babibʉdata sewa tabuedꞌai kĩrãkꞌa kꞌopanasia ancla budearebemata. 31Maʉ̃ne Pablobara soldaorã nokꞌoa soldaorãã mawũãsia: Naʉ̃rãta barcodꞌe kꞌopanʉ ẽbʉrʉ marã ẽdrʉdꞌa ẽã.
32Mawũãĩ soldaorãbara laso jãba zakedꞌeta tiawebʉdaba idu õbuesidꞌa.
33Ãsabodꞌodꞌe Pablobara nekꞌodꞌamarẽã jõmaʉ̃ã mawũãsia: Naʉ̃ba ewarira semana ũme babʉrʉa sãwũãĩ kꞌawuaita jʉ̃ã bꞌedꞌe miã kꞌãrẽta kꞌo ẽã. 34Maʉ̃ba mʉ biata oudua, nekꞌoudua zarea kꞌobꞌeaita. Marã budꞌaidꞌu miã abꞌabidꞌa miõneta adua ẽã.
35Mawũãpe pan jiraedape jõmaʉ̃ kĩrãbita Daizezea zhibia jipe bꞌʉape kꞌosia. 36Mawũẽ jõma wãniguadꞌape abꞌarika kꞌosidꞌa. 37Daira barcodꞌera jõmaʉ̃ne duanasia dociento setenta y seis. 38Pan jãwũã kꞌodꞌape barco wũẽsãbisidꞌa trigo pepekuabʉdaba pusadꞌe.
Barco pusaba teguezoabidꞌa
39Ʉ̃nadrʉbʉrʉdꞌera kꞌawuadꞌa ẽbasia sãʉ̃ druata, mawũãmina maʉ̃ druadꞌe jogꞌoata ũdusidꞌa ibu bara bꞌʉta. Barcora maʉ̃ma nʉmane wãbidꞌaita krĩchasidꞌa bꞌedꞌara. 40Mawũẽ laso tiawekua ancla idaribikuasidꞌa pusadꞌe, ẽnasidꞌa barco araa jatʉbari jʉ̃ nʉmʉrã. Mobe zhi wua budearebemata nanguma eubꞌaribʉdaba barcobara erutẽũsia ibuma. 41Aramaʉ̃ne istadꞌe poa nʉmebisidꞌa barcora. Zhi kẽbʉra jou nʉmebʉrʉba pʉkatʉ ẽbasia, aramaʉ̃ne zhi ãkidꞌara teguezoa bʉsadꞌewasia pusa jamaweba.
42Soldaorãbara krĩchasidꞌa jidakua erubꞌera beadꞌaita miõta tũẽ merũ wã ẽbamarẽã. 43Mawũãmina soldaorã nokꞌobara Pablo beabi krĩña ẽãba idaribi ẽbasia mawũã odꞌaidꞌera. Mawũẽ jarasia zhi tũẽ kꞌawua bꞌera naara doidꞌu jurzoape drua badꞌamarẽã. 44Zhi wuaabema bꞌaribigasia ʉ̃kʉrʉ tabladꞌe, ʉ̃kʉrʉ barco bꞌʉgʉzoamane. Aramaʉ̃ne jõma ẽdrʉbʉdaba drua basidꞌa.
Aktualisht i përzgjedhur:
Hechos 27: cto
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2012, Wycliffe Bible Translators, Inc. All rights reserved.