Hechos 10
10
Pedro wãna Cornelioma
1Cesarea pʉwʉrʉdꞌe bꞌasia Cornelio abadata, soldaorã Italiadꞌebema abada nokꞌo basia. 2Izha jara bꞌʉta aribꞌae Daizeze wawia bꞌasia izhi dedꞌabema bawara. Aramaʉ̃ne zuburia bꞌeta biodꞌe ne bari dia bꞌʉta ewariza zhiwidꞌi bꞌasia Daizezea. 3Maʉ̃bara kꞌãĩmokꞌaradꞌe kĩrãkꞌa a las tres dajada ne ũdubʉrʉta ángel Daizezedꞌeta izhi bꞌʉ maẽ edꞌa zepe mawũãsia: Cornelio.
4Mawũãĩ izhara akʉ pera kꞌobꞌʉba mawũãsia: ¿Kꞌãrẽpe Nokꞌó?
Mawũãĩ mawũãsia: Bʉ zhiwidꞌi bꞌʉra, bʉa zuburia bꞌeta ne bari dia bꞌʉra bude nʉmʉkꞌãrĩã Daizezebara. 5Mawũẽ kꞌãwũãwedꞌa ũmakĩrãrãta Jope pʉwʉrʉedꞌa zokꞌakuadua, aramaʉ̃ne zebirua Simónta, maʉ̃ abꞌaʉta Pedroa. 6Maʉ̃ bꞌʉa Simón abada dedꞌa, ne eta bi-ia obari maẽ bꞌʉa, Simónbara izhi dera erubꞌʉa pusa kꞌaita. Pedroba jaraya bʉa kꞌãrẽ oi barata.
7Ángel izhi ũme bedꞌea kꞌobꞌape wãbʉrʉdꞌera, Corneliobara izhi nezokꞌarãta ũme trʉ̃sia, Daizezedꞌebema aribꞌae bꞌʉta soldaota abꞌa trʉ̃sia izhi akʉbadadꞌebemata. 8Maʉ̃rãta Jope pʉwʉrʉedꞌa zokꞌasia izha ũdudꞌata jõma nebʉrʉpe.
9Nrũẽma maʉ̃rã odꞌe wãta pʉwʉrʉ kꞌaita babʉdadꞌera, Pedrora kʉdꞌa de ʉ̃rʉ̃bemaĩnu wãrĩzesia zhiwidꞌidꞌe ʉ̃matipa badea. 10Izhira bio jarra kꞌobꞌʉba nekꞌo krĩña kꞌobꞌasia. Mawũẽ izhiita ne o kꞌopanʉẽna ne ũdusia kꞌãĩmokꞌaradꞌe kĩrãkꞌa. 11Ũdusia bãjã ewa nʉmʉta, maʉ̃ne uru basia burubꞌa zroma kĩrãkꞌa bꞌʉta, i kĩmarẽneba tãjʉ̃ uru basia druaedꞌa. 12Maʉ̃nerã nendʉwʉrʉ jẽrũ kĩmarẽ bꞌeta ne jõma bꞌasia druadꞌebemata. Bꞌasia jãne wã bꞌeta, bꞌasia ibanarã ewaradꞌebemata. 13Maʉ̃ne nemita ũrĩbʉrʉdꞌera mawũãsia: Pedro, piradrʉrua, beape kꞌorua.
14Mawũãĩ Pedrobara mawũãsia: Nokꞌó, mʉãrã kꞌo ẽã, ne mitiata daia kꞌobidꞌa ẽãrã mʉãrã kꞌokꞌa. 15Bedꞌea kꞌobꞌʉra bedꞌeama ũmeta mawũãsia: Daizezeba nene ẽã obʉrʉta bʉa ne mitia arãrũã. 16Mawũã bedꞌeasia bedꞌeama ũbea, aramaʉ̃ne maʉ̃ burubꞌara wakusa erdasia ʉ̃treba. 17Pedrora izhikusa krĩcha kꞌobꞌasia mawũã kꞌãĩmokꞌaradꞌe kĩrãkꞌa ũdubʉrʉra sãwũãta. Maʉ̃ne Cornelioba zokꞌakuadꞌabara Simón de sãmata widꞌidꞌape zesidꞌa puerta maẽ. 18Mobe iabꞌa trʉ̃nape widꞌisidꞌa Simón mama bꞌʉ kꞌawuaita abꞌaʉta Pedrota.
19Pedrobara kꞌãĩmokꞌaradꞌe kĩrãkꞌa ũdudꞌata krĩcha nʉmʉne Jawurebiaba mawũãsia: Bʉra ũmakĩrãrã ũbeaba jʉrʉ panʉã. 20Mawũẽ piradrʉpe udꞌubꞌaedua, mobe ne krĩcha ẽã ãzhi bawara wãrũã, mʉã bʉma zokꞌakuasia.
21Mawũãĩ Pedrora ũmakĩrãrã kꞌopanʉĩnu udꞌubꞌaebʉrʉta Cornelioba zokꞌakuadꞌaidꞌu duguepe mawũãsia: Mʉta izhia marãba jʉrʉ panʉrã. ¿Marã kꞌãrẽã zebʉda?
22Mawũãĩ ãzhara mawũãsidꞌa: Cornelio soldaorã nokꞌota biata bꞌʉbara Daizeze wawia bꞌʉa, izhira judíorã jõmaʉ̃ba bia jara bꞌea. Ángelba maʉ̃ã jarasia bʉta izhi dedꞌa jũẽbimarẽã bʉ bedꞌeata ũrĩĩta.
23Mawũãnaĩ deidꞌu wãbigasia. Nrũẽma piradrʉpe wãsia ãzhi bawara. Mebẽrã ʉ̃kʉrʉba kꞌopaya wãsidꞌa Jope pʉwʉrʉdꞌebemaba.
24Nrũẽma jũẽsidꞌa Cesarea pʉwʉrʉidꞌu. Corneliobara ãzhira jʉ̃ã bꞌasia trʉ̃kuape zhi mebẽrãta dewara izhi bawara zhibiarãta. 25De nʉmʉĩnu Pedro jũẽbʉrʉdꞌera Corneliobara orrape izhi jẽrũ maẽ sãkꞌokꞌodꞌe kꞌobꞌesia, aramaʉ̃ne zhi zromane edasia. 26Maʉ̃ne Pedrobara piradrʉbibʉrʉta mawũãsia: Piradrʉrua, mʉsidꞌa beubarita bꞌʉa.
27Izhi ũme bedꞌea deidꞌu wãbʉrʉdꞌera zhãrã bio ũdusia zhi jʉredꞌape kꞌobꞌeta. 28Mawũẽ mawũãsia: Marãbara kꞌawua bꞌea judíobara sãwũã igarata ãĩbemata orraira, mawũãmina Daizezeba mʉãã ũdubisia miõta jara ẽbamarẽã ne mitiata. 29Maʉ̃ba mʉta trʉ̃naĩ zesia ne jara ẽã. Mawũẽ mʉã widꞌiya: ¿Mʉrã kꞌãrẽã zebibʉda?
30Mawũãĩ Corneliobara mawũãsia: Ewari kĩmarẽ babʉrʉa mʉ naʉ̃ ʉ̃madaudꞌe nekꞌo ẽã zhiwidꞌi bꞌadꞌata, a las tres mʉzhi dedꞌa zhiwidꞌi nʉmʉne mʉã ũdusia ũmakĩrãta mʉ kĩrãbita nʉmebʉrʉta wua ʉ̃nata jʉ̃ bꞌʉta. 31Maʉ̃bara mawũãsia: Cornelio, bʉ zhiwidꞌi bꞌʉra zhi ũrĩma, zuburia bꞌeta bʉa ne bari dia bꞌʉra bude nʉmʉkꞌãrĩã Daizezebara. 32Mawũẽ zhãrãta zokꞌadua Jope pʉwʉrʉedꞌa, aramaʉ̃ne zebirua Simónta, maʉ̃ abꞌaʉta Pedroa, maʉ̃ bꞌʉa Simón abada dedꞌa, ne eta bi-ia obari maẽ bꞌʉa pusa kꞌaita. Maʉ̃ta zebʉrʉdꞌera bʉaa bedꞌeaya. 33Mawũãĩ mʉãrã zhãrãta zokꞌasia bʉma, mawũẽ bʉra bia zebʉrʉa. Kꞌõbebai daira jõma nama Daizeze kĩrãbita kꞌobꞌea jõma ũrĩnaĩta Daizezeba bʉaa jaramarẽã jaradꞌata.
34Mawũãĩ Pedrobara mawũãsia: Mʉãrã wãrãne kꞌawuabʉrʉa Daizezebara zhãrã awuara eda ẽãta. 35Awuarabʉrʉ zhãrã jõma izhima biga izhi wawia kꞌãrẽ sãwũã oi bꞌʉdꞌe obꞌʉra. 36Daizezebara Israel bꞌea bedꞌeata jarabuebʉrʉta bedꞌea biata adu-a bꞌeaidꞌebemata jarasia Jesucristodꞌeba, maʉ̃ta jõmaʉ̃ Nokꞌoa. 37Marãbara kꞌawua bꞌea sãwũã trʉ̃poadꞌata Judea drua jõma, mawũã trʉ̃poasia Galileadꞌeba, buru kꞌoedꞌamarẽã jaradꞌa tẽã Juanba. 38Kꞌawua bꞌea sãwũã Daizezebara Jawurebiata diabʉrʉba zarea bꞌʉdꞌata Jesús Nazaredꞌebema, aramaʉ̃ne maʉ̃bara biata o nimiba ãtõmiã edre zuburia bꞌeta jõma bꞌebi bꞌasia Daizezeta bꞌʉdꞌeba izhi ũme. 39Daibara jõma ũdusidꞌa Jesúsba Judea druadꞌe Jerusalénne odꞌara, izhira cruzdꞌe ʉ̃tʉ kꞌachi beasidꞌa. 40Maʉ̃ Jesúra Daizezebara beudꞌata ewari ũbeadꞌe piradrʉbipe ũdubigasia. 41Ũdubiga ẽbasia zhãrã jõmaʉ̃ã, awuarabʉrʉ daia ũdubigasia Daizezebara daira maʉ̃ kꞌarea jʉrʉdꞌaba nawedꞌa. Daira izhi bawara nekꞌosidꞌa baniã dosidꞌa beudꞌata piradrʉdꞌa tẽã. 42Daira zokꞌakuasia zhãrãã jaradꞌamarẽã izhira Daizezebara bedꞌea araa obarita bꞌidꞌapʉta zokꞌai bꞌerãĩta beudꞌarãĩta. 43Maʉ̃ Jesúsdꞌebemata jarasidꞌa Daizezeba bedꞌeata jarabibarirã jõmaʉ̃ba, jarasidꞌa jõma izhidꞌebemata ĩjãbʉdara kꞌazhiruata biodꞌebara bedꞌea ne ẽã duaneĩta izhidꞌeba.
44Pedro mawũã bedꞌea kꞌobꞌʉdꞌe Jawurebiara zesia izhi bedꞌeata ũrĩ kꞌobꞌe jõmaʉ̃ne. 45Judíorã Jesúsdꞌebema ĩjã bꞌeta Pedro bawara zedꞌabara bia akʉdruasidꞌa mawũã Daizezeba judíorã ẽãta bꞌeabidꞌa diabʉrʉba Jawurebiata. 46Ãzhara ũrĩsidꞌa bedꞌea awuara bedꞌea kꞌobꞌeta, Daizeze ibia jara kꞌobꞌeta. 47Mawũẽ Pedrobara mawũãsia: ¿Iabꞌaʉbara naʉ̃rã buru kꞌoebi ẽã nʉma bꞌeika naʉ̃rãbara kꞌãwũã Jawurebia jidabʉdara dazhirãne kĩrãkꞌa?
48Aramaʉ̃ne buru kꞌoedꞌamarẽã jarasia Nokꞌo Jesús trʉ̃neba. Maʉ̃nerã Pedroa zuburia bedꞌeasidꞌa bꞌemarẽã ewari ʉ̃kʉrʉedꞌa.
Aktualisht i përzgjedhur:
Hechos 10: cto
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2012, Wycliffe Bible Translators, Inc. All rights reserved.