Matayo 16
16
1Kyasia Vafarisayo na Vasadukayo vakanshea vakamwaala. Vakantereva avaoruse kiringisyo kyukye iṛuvewu. 2Nae kavaaṛua kavaia: Ukwawuń munumbuaa: Nnu tiifo ngesa, amu iṛuvewu litondoṛye. 3Kukankya mukanumbua: Nnu ikabaa fua ya kiṛuṛumu, amu iṛuvewu litondoṛye, amu na iṛumbe lifumbye. Ini mwishi imanya fa iṛuvewu na imanya ifaavanisa, kake myorusye ya mikonu ii mutaimanyi. 4Ufwari lu ukasha na waaisi lufurie ilolya myorusye. Kake luniingwaa myorusye ndi kita myorusie ilya ya mwauya fisuku Yona. Kavatia-wo kaenda.
5Neeli vanalosho vandeitika kwa kulya, vakakooya vanrekyo iimboo mikate ya kishawu. 6Llyo Yesu avaia: Kulleń na ikwiisa kidooka kya Vafarisayo na Vasadukayo! 7Nawo vakavingana wo veni na veni veenumbuaa: Eeba ni ili tarekyo iimboo mikate. 8Llyo Yesu amanya makusaṛo awo kavaia: Muṛe vandu va ikusura yaangu, naamu ki mukee ivingana mu veni na veni, mfulya kitaare mweemboo mikate? 9Ini mwamaaṛukyo ndi ana nta mukumbuye mikate ilya iraanu yawuurusa vandu valya fiku firaanu na mikusha ilya mundeishuṛa fibeṛeshu ikee inga? 10Ana nta mukumbuye mikate ilya mfungare yawuurusa vandu valya fiku fiini na mikusha ilya mundesańiṛya kasa iifilee? 11Kyavaań are kitaare mukee yaṛukyo̱ nkilya narera, mumanyi sheeli kitaare nkiimba kya mikate? Kyasia kusembekeń nnu kidooka kya Vafarisayo na Vasadukayo! 12Llyo kindevaaṛukya vakamanya, sheeli avaia vakuringe kiimba kya kidookye kya mikate ndi, kake vakuringe miloshye ya Vafarisayo na Vasadukayo.
13Kyasia ili Yesu andefika muṛiń wa Kaisaria ya Filipo, kauṛa vanalosho vamwi eevaiaa: A vandu vanumbuaa Mwana wa nndu yye i? 14Vanalosho vakanumbua: Veefo vanumbua: Ni Yohane mbatisa. Na vengi vakanumbua: Ni Elia. Na vengi vakanumbua: Ni Yeremia ana ni umwi wa vaauya fisuku. 15Yesu kavauṛa: A ini munumbuaa nkee i? 16Simon Petiro kaaṛua kanumbua: Iwe ni iwe Kristo Mwana wa Iṛuva muni muu. 17Yesu kaaṛua kamwia: Kukee wa ngoma, Simon wa Yona, amu muyawili na usao amakii ikurambuya ifi ndi, kake nNde yakwa wa iṛuvewu yye ankurambuya. 18Nań nakwia: Iwe ni iwe Petiro, na kwa ule ya iwe li ntanyaa-wo numba yakwa, yyo siṛi yakwa. Na myaango ya vafu iivingaa ndi. 19Nań nkuniingyaa ngyufunguo ta umangi lwa iṛuvewu. Na kilya kyoose kwankifinga ia isangeń, na iṛuvewu kyammaa ifingwa. Na kilya kyoose kwankiboṛomua ia isangeń, na iṛuvewu kyammaa iboṛomulwa. 20Llyo andevavasa vanalosho vamwi nnu, vatandeia nta nndu sheeli yye Kristo.
21Kuuka kyeeri kyo Yesu kabooka yorusa vanalosho vamwi, sheeli kyawara aende Yerusalemu andelisyo-fo ngyukiva shiingi mmasiingo a uruka na valosha vanini na vaaṛia va mitisine. Na iwalwa awalwa, na nkonu wa kararu aṛukaa. 22Llyo Petiro anrwaa kyaanya kabooka innaya eemwiaa: Tia Nndumi, ifi nta fitakuvie ndi! 23Yesu kaaṛukya Petiro kamwia: Uya numa yakwa, Satana! Kukee kituva kyakwa! Amu iwe kukee ikusaṛa mboni ta iṛuvewu ndi kita ikusaṛa ta kivandu da.
24Llyo Yesu aia vanalosho vamwi: Nndu afurie ishisoṛa niń, akwime mikae yamwi, akurike nsalaba wamwi na ishisoṛa niń. 25Amu nndu afurie ikiṛa muu wamwi auretaa. Na nndu aretaa muu wamwi kiimba kyakwa aukiṛaa. 26Nkiki kyelekaa nndu, kwakooya awaraa isanga lyoose na mbusha yayo kareta nrima wamwi? Ana nkiki nndu aniingyaa ataue nrima wamwi? 27Ili Mwana wa nndu akaa ashe aṛee unini lwa Ndee andu emwi na vamalaika vamwi, llyo asheavyaa nndu woose kiińańani na mitanye yamwi. 28Nkue namuia: Kari ka iva vaselele ia vayo vatalolyaa ufu, nkumande valolyaa Mwana wa nndu eeshaa akee na unini lwamwi lwa umangi.
Aktualisht i përzgjedhur:
Matayo 16: RWK72
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.