Génesis 40
40
Bada ai cäcöbö fe lä
labono wejei tä a̦
1Tä nö fa dedejeblalunö, Ejidoteli bada a yai lä cui a jushudaliyoma. Cama ecöbö lä yädämabono wei ecöbö doblou fa mlacunö, a jushuoma. Ai a lä cuinö, bada anö nashiwä toubä coabä, showadi e toubä li tama. Ai a mö feduwä lä cuinö, bada a iyabä, ebä nii taö mö feduoma.
2Ö̦jö cäcöbö nija, bada a jushuoma. Bei toubä tabeje jamö a lä läono wei a ma cui nija, nii ebä tabeje jamö a läo mö lä feduono wei a ma cui nija, ö̦jö cäcöbö nija a fa jushudalunö, 3cäcöbö fe laquema. Bada a nowamabeje bä sodado ca̦i lä cule e yafi ja, cäcöbö fe laquema, José a fe lao lä waiquiono wei jamö. 4Ö̦jö däjä, sodado bä ca̦i lä cuono wei a lä cuinö, José a nosiemama, cäcöbö fe lä laqueno wei cäcöbö bayeliblabä.
Ö̦jamö cäcöbö fe lao showao däjä, tä nö dedeama.
Josénö tabi tabi cäcöbö a̦
lä wawämano wei tä a̦
5Ö̦jö däjä, abinaja tä cublaliyoma. Cäcöbö fe laobä jamö, cäcöbö tabimoa fe jalulayoma. Ejidoteli a bada amishi coamabä, nashiwä e toubä lä tano wei a bada lä cui, a tabimolayoma. A iyamabä a bada mö feduwä lä cui, ö̦jö a ca̦i tabimoa mö fedua showalayoma. Tabi täcöbö a̦ wawämamobä täcöbö a̦ bolacaoma.
6Cäcöbö bayeliblabä, José a waloa fa fenablaicunö, cäcöbö bufi wa̦lidiwä dalalema. 7¿Ö̦jö tawä? Bada a nija cäcöbö lä yädäono wei, cäcöbö bufi wa̦lidiwä fa dalalönö, Josénö cäcöbö wa̦lima. José bada e lä cui e yafi ja, bä fe bluca laoma. Ö̦jamö Josénö cäcöbö wa̦lii ja, abinaja a cuma.
—¿Wedinaja wafäcö li fa cuaanö, wafäcö bufi li wa̦lidiwä? —a cuma.
8—Yafäcö fa tabimolunö, yafäcö bufi doblaa mlaa lä cube —cäcöbö cuma—. Yafälecö a̦fa tabi wawämabä tä cuami cudeenö, yafäcö bufi wedinajamou.
—Wafäcö lä tabimolayono wei, tä a̦fa da wäböba. ¿Ö̦jö tawä? Täbä a̦fa majali wawämabä, Yai Bada tä malä cule —Josénö cäcöbö nowa tama.
9Einaja a fa cunö, bada nashiwä e toubä tabeje jamö a lä läono wei a lä cuinö, José nija tä a̦ tabi wäyäma. Abinaja a cuma.
—Ya mamo mötale ja, uba ya shitocu majali dalalema. 10Ö̦jö shitocu ja, 3 ya shitocu boco majali dalalema. Ö̦jö shitocu boco ja, täcö a̦co majali faa fa balöblaalunö, jole jole cäcö majali cublou showadalayoma. Ö̦jö däjä, uba cäcö majali faa fa nomöjölönö, cäcö majali wacäa showadalayoma. 11Bada a yai lä cuinö ubä coabä, ji̦shima ya e majali ca̦i däbou fa showaonö, ö̦jö e ji̦shima ja, uba ya e ubä majali a̦fufaö lä cublei. Bada a nija, ya e ubä befi ca̦i majali jöbäa cadidia showadaquema —a cuma.
12—Bei —José a cuu nomöjöoma—. Bäfä a̦ tabi wawämaö a lä cule. 3 wa shitocu boco majali lä dalaleno wei, 3 tä mö didi jömamou. 13¿Ö̦jö tawä? 3 wa fe didi cublou däjä, bada a yai lä cuinö, wa nia co̦amaö. Wa jaba lä ojodamono wei jamö, wa nia läamaö co̦o. Cama nashiwä wa e toubä befi ca̦i jaba jöbäaö lä cuono weinaja, inaja wa e toubä nia jöböaö cuo co̦o.
14Abinaja José a ca̦i cuma.
—Dodijidawä wa cuo co̦o däjä, wale nofi da jaducubo. Wale da bayeliblalö, ¿ö̦jö tawä? Bada a yai lä cui nija, wale a̦fa da wäyä. Eja ya cafe lä quefule jamö, camiyä wale ca̦i jujeblaö mö feduobä. 15Ebleo yamacö ulifibö jamö ya ma cuono wei ma cui, wale fa dälejenö ya malä culayoi. Eja ma cui, ya fe nia lä lao wei tä cuami —a cuma.
16Bada nii ebä tabeje jamö a läo mö lä feduono wei a lä cui, tä a̦ dodijidawä fa ji̦lilänö, cama a lä tabimono wei tä a̦ ca̦i wäyäö mö feduo showadaoma.
—Camiyä ya ca̦i tabimou mö feduoma —José nija a cuma—. Shode 3 ya febä majali yojoboma. 17Feyaca fe jamö, bada nii yaama ebä lä cui, ya ebä majali bluca didia dalalema. Ö̦jö ma cui, fe lä feyacaono wei fe jamö, biyomö bänö ebä nii majali wamaje.
18—Bei —José a cuu co̦oma—. Bäfä a̦ tabi wawämaö a lä cule. 3 wa febä shode majali lä dalaleno wei, 3 tä mö didi cua. 19¿Ö̦jö tawä? 3 tä mö didi fa cublalunö, bada a yai lä cuinö, cafä wa nia co̦amaö. Wa fa co̦malönö, bei wa olafi nata fa tamacönö, fii fi jamö wa nia yauamaö. Biyomö wa bä majali iyaö lä dalaleno wei, cafä wa ya̦jicö wabeje, ö̦jö bä li cuoma —Josénö a nowa tama.
20¿Ö̦jö tawä? Bolacabö tä mö didi fa cublalunö, bada a yai lä cuinö, lasha ai a faa co̦malema yalo, a bufi doblaloma. A bufi fa doblalonö, cama ebä ca̦i iyabä, ebä nacaalalema. Ebä ca̦i bluca mamo mötale ja, cama nii ebä tabeje jamö a lä läono wei a lä cui, a co̦malema. Nashiwä e toubä tabeje jamö a läo mö lä feduono wei a lä cui, ö̦jö a ca̦i co̦a showamalema.
21Nashiwä e toubä tabeje jamö a jaba lä läono wei a lä cui, a ajedea fa co̦malönö, a läa co̦maquema. Bada a nija, nashiwä e toubä befi ca̦i jaba jöbäaö lä cuono weinaja, inaja showawä e toubä jöböaö cuo co̦oma. 22Ö̦jö ma cui, bada nii ebä tabeje jamö a läo mö lä feduono wei a lä cui, bei olami nata fa tamacönö, fii fi jamö a yaua showadamaquema, Josénö cäcöbö tabi wawämaö ja, a lä cuno weinaja showawä.
23Ö̦jö ma cui, bada nashiwä e toubä tabeje jamö a lä läono wei a lä cuinö, José a nofi jaducubou mlai ja, a nofi mojodubou dicooma.
Aktualisht i përzgjedhur:
Génesis 40: GUU
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
©2012, All Rights Reserved