Génesis 39
39
Bodifalo nijamö José a
lä cuono wei tä a̦
1Bei. Isimali nodiwä ebänö, Ejido jamö José a ca̦i fa dömöbalufälöjenö, Ejidoteli nija, Bodifalo a wa̦fa lä cuono wei nija, a nomöjöquemaje. Ö̦jö Bodifalo a lä cuinö, blada bä ja, a dälema. Ö̦jö a lä cui, Ejidoteli bada a nija, a yädäoma. Bada a nowamabeje, ö̦jönö bä sodado ca̦i cuoma.
2Jeobaanö José a ca̦i fa cuonö, a bayeliblamou fe yadioma. A bayeliblamoma cudeenö, a dodijaö fe yadioma. José a lä tabono wei, Ejidoteli a lä cui e yano ja, a cuo cadidioma. 3Ö̦jamö a fa cuonö, cama bada e lä cui, a bufi jaducublaliyoma. Jeobaanö José a ca̦i lä cuono wei, tä dalalema. Jeobaanö a bayeliblama cudeenö, José showadi a lä dodijano wei tä ca̦i daa showalalema. 4Ö̦jö cudeenö, José a fa nofilänö, a nofi ojodaboma. Cama nija showadi a ojodamobä, a ajedea showadalema. Cama e yafi jamö a läobä a tamaquema. Cama etäbä bluca lä tabono wei etäbä nowamabä, a bada tablamalema.
5Cama etäbä nowamabä, a fa lämacönö, Bodifalo cama a bayeliblamou mö feduoma. Ö̦jö a Ejidoteli lä cui, José a nowa ja, Jeobaanö a bayeliblaö fe balojooma. A fa bayeliblalönö, yafi jamö bä bluca lä tabono wei bä ma cui, bä dodijidawä cuoma. Sibo jamö bä bluca tabou mö lä feduono wei bä ma cui, bä ca̦i bluca dodijidawä cuo mö feduoma.
6Inaja tä fa cuonö, jödödöwä täbä bluca lä tabono wei täbä nowamabä, José a lämabou showaoma. José a nofi mölabou dodijioma yalo, cama ebä nofi jalujubonomi. Ö̦jö täbä ja a yabäcou mlai, a nia lä iyano wei tä ja, a bufi shino cadidiablaloma.
Bada a suwäbönö José a fe lä lamaqueno wei tä a̦
Bei. José a lä cui, a dodijidaoma. A liyäjäoma. 7Ya̦cumö, cama bada bei suwäbö e lä cui, José nija a bufi waiyoma.
—Bei. Bäfäcö da yacao —a cuma.
8A cuma ma cui, a wa̦ juanomi. Cama bada bei suwäbö e nija, abinaja José a shino cuma.
—Camiyä ya yai läo yalo, iba bada e yafi jamö, bluca täbä cua ma cule, täbä nofi jaluboimi. Camiyä wale nofi mölabou dodijio cudeenö, bluca bä lä tabole ya ebä nowamabä, wale lämabou lä cule. 9Ei yafi ja, camiyä ya wa̦ faö ja, cama a ma cui, a wa̦ läomi. Bluca bä lä tabole bä ma cui, camiyä nija bä noshi umaboimi. Cama wa e li yalo, wa noshi nia yai umabou. ¿Ö̦jö tawä? Wa lä cufe tä dodijidawämi waiquiwä. Yai Bada tä lä cui, ya tä nö ca̦i waiblabö mlai —José a cuma.
10Suwä a lä cuinö, showadi José a ma washudino wei ma cui, a wa̦ ji̦lianomi. A ca̦i ajedou bädaonomi. 11Ö̦jö ma cui, abinaja tä cublaliyoma. A ojodamobä, yafi jamö José a lucälayoma. Ai täbä wa̦lo cuo fa mlacunö, a yafi blocooma. 12Ö̦jö däjä, ö̦jö suwä a lä cuinö, José camishi ecö ja, i̦cali a juwäa showadalema.
—Bäfäcö da yacao —a cuma.
A ma cuno wei ma cui, José a jucäo ja, suwä anö cäcö lä juwäale cäcö fa dacöfälönö, sibo jamö lobe a docua showadalayofälöma. 13Suwä a lä cuinö, a docuu fa dalalönö, José camishi ecö däbou showaoma cudeenö, 14a nosie juamobä ebä wa̦lo lä ajedeono wei ebä nija, a jole co̦möma. Ö̦jö bä fa läläaimanö, José a wa̦fa wäyäö mö baoma.
—¡Ei camishi cäcö da möyoje! Fe̦yaloyänö, quiji ebleo a fiya lä cui, a ajedea fa dicomalänö, bämalecö nö waiblaö dodijia lä cule. Wale nia fa juwäanö a ma icubeno wei ma cui, i̦cali ya si̦lalamoma. 15Ya lä si̦lalamou wei ya wa̦ ja, a fa quililalunö, cama ecö fa dacöfälönö, sibo jamö a docua showalayofälöma —bä nowa tama.
16Einaja a fa cunö, José camishi ecö ajedebou showao däjä, bada a nö daboma. 17Ö̦jö däjä, ai täbä nija tä a̦ jole wäyäö cuo lä balöono weinaja, bei fe̦yalobö e ma cui nija, tä a̦ wäyäö cuo nomöjöoma.
—Cafä wa nosie juamobä, ö̦jö ebleo wa fiya lä ajedemabole a lä cuinö, wale nia fa juwämanö, a icua dicobema. 18A ma icubeno wei ma cui, i̦cali ya si̦lalamou ja, a quililaliyoma. Camiyä nija camishi ecö fa dacöfälönö, ei ecö malä cui. Sibo jamö a docua showalayofälöma —a jole cuma.
19José e bada lä cuinö, bei suwäbö a wa̦ ja, a jushudaliyoma. A nosie juamobä a lä cui nija, bä suwäbö a nia jole lä juwämamono wei tä a̦ fa ji̦lilänö, a jushudou fe balojolayoma. 20José a juwäa fa showalänö, a shi wa̦limaquema. Bada a yai lä cuinö täbä fe lamabobä jamö, José a ca̦i fa didicönö, a fe laquema.
José a dodijaö fe lä
yadiono wei tä a̦
21Ö̦jamö a fe ma laqueno wei ma cui, Jeobaanö showadi José a ca̦i cuo showaoma. Showadi a nofimama yalo, a nofimaö showaoma. ¿Ö̦jö tawä? Täbä fe lä laono wei jamö a bada lä läono wei a lä cui, Jeobaanö a bufi tamalema, José a nofi ojodabobä. 22Ö̦jö däjä, bada anö José a nofi mölaboma yalo, a lämaquema. Ai bä fe lao mö lä feduono wei jamö, José a läo mö feduobä a tamaquema. Ö̦jamö tä bluca lä tamono wei, cama Josénö tä bluca tama. 23Jeobaa a lä cuinö, José a ca̦i cuoma yalo, a dodijama. A ojodamobä jamö, bada a läobä tä ma cuono wei ma cui, cama a läo mlai ja, José a shino yai läoma. Tä taö lä bädao wei tä ma cui ja, showadi Jeobaanö a fa bayelibonö, tä dodijidaoma.
Aktualisht i përzgjedhur:
Génesis 39: GUU
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
©2012, All Rights Reserved