Génesis 35
35
Bedele jamö Jacobo a cua
lä majölayono wei tä a̦
1Yai Bada tänö Jacobo a yömölama.
—Wa fa shu̦luculonö, Bedele jamö wa dolequea fa co̦bofälönö, ö̦jamö a da bälöicudu. Ö̦jamö, camiyä Yai Bada ya nija yalo bä lä dodoblamou wei bä maqueblamobä, täcö da i̦tacö. Ö̦jamö lä cafä nija ya jaba da damolalui cä ya, a̦iyofä Esaunö wa shäö mlaobä wa lä doculayono wei däjä —a nowa tama.
2Einaja a fa cunö, Jacobonö cama ebä yömölaö showadaoma. Cama ebä cadidiwä ma cui nija, shomi bä bluca lä yädämabono wei bä ma cui nija, abinaja bä nowa bluca tama.
—Shomi wama täbä nö idubö lä tabodi, täbä bluca da joyalöje. Ö̦jö täbä bufiblamobä täbämi. Ö̦jö wama täbä bluca fa joyaacönö, bä bluca ya̦lömoa da showadaolaluje, wamacö auobä. Wamacö camishibö ma cui, wama bä fa jayulalönö, au bä ja bä didio da nomöjöolalu. 3Ö̦jö däjä, bämacö fa shu̦luculonö, Bedele jamö bämacö dolecou da co̦ofälö, Yai Bada nija yalo bä lä dodoblamou wei bä maqueblamobä, ya täcö i̦taabä. Ya nö beblalou yaio däjä, camanö wale bayeliblalema. Ö̦jönö wale jaba fa bayeliblalönö, ya juaaö bädaobä jamö ma cui, showadi wale ca̦i fa cuonö, wale ca̦i cua showaa lä cule —bä nowa tama.
4Einaja bä nowa talema yalo, shomi täbä nö idubö lä bufiblaö wejei, Jacobo nija täbä comi jöböquemaje. Bei bä yömöcacö jamö täbä modolewä lä juubono wejei täbä ma cui, täbä ca̦i jöbäa showaaquemaje. Siquemö jamö, defi bada lä ublaono wei defi cotä jamö, Jacobonö bä fe bluca yojoquefälöma.
5Jacobonö bä ca̦i lä jocälayono wei däjä, dodijidawä bä ca̦i jufälöma. Bä bälöjöwä fe lä fa̦yoono wei bä lä cui, Yai Bada tänö bä fa quilimalalönö, Jacobo bei ijilubö ebä nosi däbonomije.
6Canaana tä ulifi jamö Jacobo a fa waloicunö, Lusi jamö a waloquema, Bedele tä a̦fa ca̦i lä cule jamö. Ö̦jamö cama ebä ca̦i bluca lä cuono wei, bä ca̦i waloa showaquema. 7Bä ca̦i fa waloicunö, Yai Bada nija bä yalo lä dodoblamou wei bä maqueblamobä etäcö i̦taaquema. Bei a̦iyobönö a shäö mlaobä, Jacobo a lä doculayono wei däjä, ö̦jamö lä Yai Bada a damoa balölaliyoma. Ö̦jö cudeenö, Elebedele tä a̦fa ulifi jilaa nomöjöquema.
8Ö̦jamö lä bä waloo däjä, bä ö̦cölayoma. Lebeca a oshe lä nowamano wei, Debola a wa̦fa lä cuono wei, a bufi fa mlaicunö, a nomawä didiquemaje. Bedele tä ajede jamö, fii defi bada lä ublaono wei defi cotä jamö, a nomawä fa didicöjenö, Bämacö lä ö̦cölayono wei, bei defi a̦fa jilaa nomöjöquemaje.
9Badanalama jamö a culanö, Jacobo a co̦a lä co̦layono wei däjä, Yai Bada tä damoa co̦laliyoma. Jacobo a nia lä bayeliblamono wei etä a̦fa wäquema. 10Etä a̦ wäaö ja, abinaja Yai Bada a cuma.
—Jacobo wa wa̦fa ma cule ma cui, ö̦jö wa wa̦fa nia cudiomi. Isaeli wa wa̦fa yai cuobä —a fa cunö, Isaeli a wa̦fa cua nomöjöquema.
11Abinaja Yai Bada tänö a nowa ca̦i tama.
—Yai Bada ya nö lä wa̦lojaö wei, ei cä ya. A da balalö. Ijilufä bä nodiwä ca̦i balaö nomöjöobä. Ijilufä bä nodiwä nija, bä nia bälöaö lä lojodoo wei bä nia yaio. Bä nia bälöblamou yaiblamou cuaaö. Bada bänö bä nia ca̦i lä bälöo wejei, afä ai bä nia cublou juo. 12Ablaamö, Isaacö cäcöbö nija ya tä a̦fa ulifi lä wäqueno wei, cafänö wa tä ulifi tabou nomöjöobä, ya tä nia ulifi jöbäaö. Ijilufä bä nodiwä lä cuinö, tä ulifi ca̦i tabou nodiablalou nomöjöobeje —Jeobaanö a nowa tama.
13Ö̦jö däjä, Yai Bada tänö Jacobo a yömölaa fa jödödölönö, a tabi feiquefälöma. 14Yai Bada tänö Jacobo a wa̦ lä wayomano wei jamö, maa ma fa dälänö, ma i̦taquema. Cama nija Yai Bada a lä damolaliyono wei tä ulifi damamobä, ma fa i̦tacönö, toubä lä coamou wei toubänö, ma fe löblalema. Ai toubä dabönö, ma fe ca̦i löblaö nomöjölayoma. 15Yai Bada tänö a wa̦ wayomama yalo, Jacobonö Bedele tä a̦fa ulifi jilaquema.
Laquela a bufi lä
mlaqueno wei tä a̦
16Ö̦jö däjä, Bedele jamö bä shu̦lucua fa co̦lunö, bä alayoma. Eflada jamö bä blajawä juu showao däjä, Laquela a ninimoma. E nini balaö däjä, a bufi nö bleaama. 17Ijilu a yai ninibou däjä, a suwä lä bayeliblano wei e a̦ fama.
—A quili dijä. Fei däjä ijilufä aifä a faö co̦a waiquia lä cule —a suwä cuma.
18A cuma ma cui, Laquela a bufi mlao lä ajedeono wei däjä, moli a wa̦ fa falunö, bei ijilubö e a̦fa fa wäcönö, a nomaa showalayoma. A nö ninili bleaalanö a tablalema yalo, Benoni a wa̦fa jilaquema. Ö̦jö ma cui, bä fö̦önö, shomi a wa̦fa jilaa nomöjöquema. Bejamino a wa̦fa li yai jilaquema.
19Ö̦jö cudeenö, Laquelanö ijilu a taö ja, a doblou fa mlacunö, a waicoma. Eflada yo shadia mö lä cule jamö yo casö ja, a nomawä didiquemaje. Eflada tä lä cui, Belena tä a̦fa ca̦i ulifi jilabouje. 20Laquela a lä didile jamö, Jacobonö maa ma i̦taquema. Ö̦jö maa ma lä i̦tale jamö, “Eja Jacobonö bei suwäbö e didibou”, täbä bufi tamabä, ma i̦taquema. Fei däjä showawä ma cui, ma i̦taa showaa.
21Isaeli a jocäa fa co̦lunö, a wa̦yumö aa co̦layofälöma. Yalo bä blajawä dablabeje, täbä ösöwä döcöblaabä, täcö matacali tabi fa feidalönö, ö̦jö tä bayäcäladi jamö, bä bälöblaa majöquema.
Isaeli bei ijilubö ebä bluca
lä cuono wei tä a̦
22Ö̦jamö Isaeli a bälöblao showao däjä, bei ijilubö Lubeni e lä cui, e nofi jo̦wa jushuama. Isaeli a nosie juamobä a suwä ja, a wa̦fa yacao ji̦lilema. Bila a wa̦fa suwä lä cuono wei.
Jacobo bei ijilubö 12 ebä cuoma. 23Leami nija, bei ijilubö 6 ebä cuoma. Jacobonö jaba a lä taqueno wei, Lubeni e a̦fa cuoma. Ö̦jö a nodi jamö, Simeoni, Lewi, Judawä, Isacala, Sabulono bä cuo nodioma.
24Laquela nija, bei ijilubö bolacabö ecöbö cuo mö feduoma. José a tablaö fa balölonö, Bejamino a tablaö nomöjölayoma.
25Laquela a nosie juamobä a suwä Bila lä cui nija, bei ijilubö bolacabö ecöbö cuo mö feduoma. Dani a tablaö balölayoma. Nefitali a tablaö nomöjölayoma.
26Leami a nosie juamobä a suwä Siliba lä cui nija, bei ijilubö bolacabö ecöbö cuo mö feduo showaoma. Cadö a tablaö fa balölonö, Aselo a tablaö nomöjölayoma. Badanalama jamö, Jacobo bei ijilubö ebä bluca lä wawälayono wei, ö̦jö bä waiquiwä cuoma.
Isaacö a bufi wa̦lobada
lä mlaqueno wei tä a̦
27Bä fö̦ö Isaacö nijamö, Jacobo a co̦layoma. Mamle tä ulifi jamö a co̦layoma, Eblono tä ajede jamö. Ö̦jamö Ablaamö a jaba fa bälöonö, bei ijilubö Isaacö a ma cui, ö̦jamö e bälöo nomöjöoma. 28Isaacö a demi bälöo showao däjä, lasha 180 a fa famalönö, 29ya̦cumö a wa̦lobada fö̦shöacö mladaliyoma, cama bä nö badabö lä culaliyono weinaja showawä. Bei ijilubö ecöbönö bä fö̦ö e nomawä didiböquema, Esau, Jacobo cäcöbö lä cuinö.
Aktualisht i përzgjedhur:
Génesis 35: GUU
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
©2012, All Rights Reserved