Génesis 30
30
Ai cäcöbö nija, bei ijilubö
bä lä taqueno wei tä a̦
1Laquela a shinoco nö bleaama. Bei amiyobö nija, Jacobo bei ijilubö ebä möö fa ayaonö, bei amiyobö a nofi wa̦liboma. Bä fe̦yalobö Jacobo nija, abinaja e cuma.
—Camiyä nija, ijilu a taa mö da feduba, bufi wa̦lidiwä tänö ya nomaö mlaobä —a cuma.
2Laquela a wa̦ ja, Jacobo a jushuo fe balojooma. Abinaja e cuma.
—Ijilu a ja, Yai Bada tänö wa bayeliblaimi waiquiwä ja, ¿wedinaja camiyä ya li fa cuaanö, a li cublou fe yadiobä? Ijilu bä lä cublou wei, Yai Bada cama tä li mayo ma cui, ¿wedi tä tabä camiyä wale a̦fa li taö dicoo? —bei suwäbö nija e cuma.
3Ö̦jö däjä, Laquela a nosie juamobä e suwä lä cui, bei fe̦yalobö nija a nabä shömöquema.
—Quiji a suwä lä cui, a da dälä. Bila nija ijilu wa bä taaö ja, ya bä yacabou weicätä —a cuma.
4Inaja a cuu ja, bei fe̦yalobönö Bila a dälema. A fa dälönö, ö̦jö nija ijilu a tama. 5A fa shibönabölönö, Bila nija Jacobo bei ijilubö e cublaliyoma. 6Ö̦jö däjä, Laquela a wa̦ fama.
—Yai Bada tänö wale bejedimou fa dalalönö, wale bayeliblalema. Wale a̦ ca̦i ji̦lilema. Ijilu ya yacabou fe yadiobä, wale dobälema —a cuma.
Yai Bada tänö Laquela a bejedimou dalalema yalo, bei ijilubö Dani e a̦fa jilaquema.
7Laquela a nosie juamobä e suwä lä cui, Bila a lä cui, a shibönaböa fa co̦lunö, Jacobo bei ijilubö ai a tablaö co̦layoma. 8Ö̦jö däjä, Laquela a wa̦ faö co̦oma.
—Amiyä a doblao ayao mlaobä, Jeobaa nija ya wa̦ fama. Ya wa̦ nö fa wa̦lojodalunö, fei däjä ya doblao —a cuma.
Inaja a bufi cuma cudeenö, ijilu Nefitali a wa̦fa jilaquema.
9Ö̦jö däjä, Leami a shibönaböö co̦daaimi ja, a nosie juamobä e suwä lä cui, Siliba a lä cui, bei fe̦yalobö nija a nabä shömöquema. Ijilu e taabä, Jacobo nija a suwä jöböquema. 10Jacobonö Siliba a fa shibönabömalönö, ijilu a tablalema. 11Bei ijilubö a fa tablalönö, Leami a wa̦ fama.
—Fei däjä ya bufi nia lä doblao wei, ¡tä cublou bälayou lä cufe! —a cuma.
Inaja a bufi cuma yalo, ijilu a lä cublaliyono wei a lä cui, Cadö a wa̦fa jilaquema.
12Ö̦jö däjä, Siliba a lä cui, Leami a nosie juamobä e suwä lä cui, a shibönaböa fa co̦lunö, ö̦jö nija, Jacobo bei ijilubö ai e cublou co̦layoma. 13E cua fa co̦icunö, Leami a bufi doblaloma.
—¡Fei däjä ya bufi doblao dodijiwä! Ai bä suwä ma cuinö, ya bufi lä doblalou wei, ¡wale a̦fa nia malä wayoaö wejei! —a cuma.
Inaja a cuma yalo, Aselo a wa̦fa ijilu jilaquema.
Leami nija, ijilu bä
cublou lä co̦ono wei tä a̦
14Abinaja tä cublaliyoma. Nii bä taöje däjä, Lubeni a falayoma. A fa falönö, jole jole cäcö ni lä cle̦deli wei cäcö fa dalalönö, bä nöö Leami nijamö cäcö ca̦i co̦layoma. Jole jole cäcö liyäjäwä fa dalalönö, bei amiyobö Leami nija, Laquela a nacoma.
—Ami. Ijilufänö jole jole cäcö ca̦i lä co̦blalufe cäcö ja, ai cäcö mashi da shelelebayo —a cuma.
15Einaja a cuma ma cui, bä amiyobö e fa jushudalunö a wa̦ fama.
—Iba wa̦lo a lä cui wa läa waiquilema. ¿Wedi tabä, “Inaja lä waiquiwä”, wa bufi li cuimi? ¿Wedi tä tabä u̦asimi jole jole ecö ja, wa li nacou dicoblaa cule?
—Ja̦o —Laquela a cuma—. Ijilufä jole jole ecö nowa ja, fe̦yalofä Jacobo sho, wafäcö yacao fe jalubä, ö̦jö lä —a cuma.
16Nii bä tabeje jamö Jacobo a juma, a weyade co̦imaö däjä, Leami a aa mö fa balönö, abinaja a nowa taö mö baoma.
—Fei däjä camiyä sho bäfäcö mio fe jalubä. Ijiluyänö jole jole cäcö lä däleno wei cäcö ja, Laquela a bufi fa waiyonö, ya ecö jöböquema. Ö̦jö cäcö nowa ja, camiyä sho bäfäcö cuo fe jalubä —a cuma.
Einaja a fa cunö, cama Leami sho cäcöbö cuo fe fa jalunö, 17Leami a shibönaböa showalayoma. Yai Bada tänö Leami a nacou fa ji̦lilänö, ijilu a ja, a bayeliblaö co̦oma. Cama nija, Jacobo bei ijilubö e cublou co̦layoma. Jaba däjä 4 ebä ma cuono wei ma cui, 5 e yädäblaliyoma. 18Abinaja Leami a cuma.
—Fe̦yaloyä nija, camiyä ya nosie juamobä ya suwä noshi fa ö̦jödabonö, fei däjä Yai Bada tänö tä nowa co̦maquei lä cufe —a cuma.
Einaja a cuma yalo, Isacala a wa̦fa ijilu jilaquema.
19Leami a shibönaböa fa co̦lunö, ijilu a tablaö co̦oma. Ö̦jö däjä, cama nija, Jacobo bei ijilubö 6 ebä cublaliyoma. 20Bei ijilubö 6 ebä cublou ja, abinaja Leami a cuma.
—Fei däjä, Yai Bada tänö wale dobäö dodijia lä cule. Fei däjä, iba wa̦lo a lä cuinö, ya lä dodijaö wei tä a̦fa nia wäyäö. Cama ijilubö 6 ya ebä tabou malä waiquile —a cuma.
Inaja a fa cunö, cama ijilu e lä tablaleno wei, Sabulono a wa̦fa ijilu jilaquema.
21Ö̦jö a nodi jamö, bä tää e tablaö fa nomöjölonö, Dina a wa̦fa jilaquema.
Laquela nija ijilu a ya̦cumö
lä cuqueno wei tä a̦
22Ö̦jö däjä, Yai Bada tänö Laquela a nofi fa jaducubonö, a wa̦ ji̦lilema. Ijilu a ja, a bayeliblalema. 23A fa bayeliblalönö, a shibönabölayoma. Bei ijilubö e tablalema. Bei ijilubö e fa tablalönö, abinaja a cuma.
—Fei däjä, ya noca lä flecamou wei tä lä cui, Yai Bada tänö tä mladamalei lä cufe. 24Jeobaanö wale bayeliblaö fa co̦onö, ijiluyä ai a yädäblou co̦obä —a fa cunö, bei ijilubö José a wa̦fa jilaquema.
Labanonö bei fecamabö
e lä wasöno wei tä a̦
25Laquelanö bei ijilubö José a tablaö fa waiquilonö, bä shö̦ö Labano nija, Jacobo a wa̦ fama.
—Showabe. Ya co̦o bufijou a lä cule. Fei däjä, wale shömaö da showadao, camiyä ya yai ulifibö jamö, ya co̦o showadaobä. 26Iba suwä cäcöbö noshi da ö̦jödabo. Ö̦jö cäcöbö nowa ja, cafä nija dodijidawä ya lä ojodamodino wei, wa tä malä dale. Ö̦jö cäcöbö sho, ijiluyä bä sho, yamacö bluca co̦jamöbä, yamacö da shöma —bä shö̦ö nija a cuma.
27Ö̦jö ma cui, abinaja bä shö̦ö e cuma.
—Wale a̦ ji̦lia da balölä, ¿ö̦jö tawä? Äyämö cafä wa cua yalo, Jeobaa nija ya bayeliblamou dodijia lä cule. Ö̦jö tä ja, ya bufi malä daobe. Ya tä malä möö wei. 28Wa tä lä bufii wei, wa tä a̦fa yubou ja, bäfä dobäö wä —bä shö̦ö e cuu läoma.
29—Ja̦o. Cafä nija dodijidawä ya lä ojodamou wei, wale malä dale —Jacobonö a nowa tama—. Camiyänö bäfä bayeliblalanö, afä yalo bä malä blucablalufe. 30Ya waloonomi showao däjä, yalofä bä bluca cuono ma mlai ma cui, bä balaö dodijia lä cule. Wale lä lämabou wei tä bädawä ma cui ja, ö̦jö tä ja, Jeobaa nija wa malä bayeliblamole. Ö̦jö ma cui, abinaja ya bufi cuu “¿Wedi tabä iba ya bä yai bayeliblaö mlai ja, shomi täbä nija bei ya li cudia cule?” ya bufi cuu —Jacobo a cuma.
Jacobonö yalo oni ebä
nia lä yaiano wei tä a̦
31Labano a wa̦ fe blacäjoma.
—U̦asi. ¿Wedi ya tä fa jöbäcönö, wale li bayeliblaö showao fe yadiobä? —a nowa tama.
—Ma —Jacobo a cuma—. Wedi wa tä fa jöböbanö mlai. Wale a̦ fa ji̦lilänö, “Ja̦o”, wa cuu ja, ya yanöcöquei. ¿Ö̦jö tawä? Dodijidawä bä iyabä, afä ya bä yalo lulubou co̦o weicätä. Ya bä nowamaö co̦o weicätä.
32’Abinaja ya nia cuaaö —Jacobo a cuma—. Afä yalo bä lä cule jamö, fei däjä ya juu shoqueaö fa cuaanö, bä bluca lä oni wei, iba ya bä nia yaiblamaö. Oweja bä ma cui, shibo bä ma cui, bä bluca lä quilishabö wei, bä bluca lä badijii, iba ya bä tabobä. Oweja bä wai lä ö̦shö wei, ya bä ca̦i dälei. Ö̦jö bä yalo nowa ja, cafä nija ya ojodamou fe yadio weicätä.
33’¿Ö̦jö tawä? —a cuma—. Cafänö wale bejedimou dablabä, ya wa̦. Obi ma cui, “¡Iba yalo bä tomöa fa da dodijileno wei!”, wa bufi cuu ja, wa bä möablala. Iba yalo bä nijamö, bä quilishabö lä mlai wa bä dablaö coyocoo bädao ja, bä badijiwä lä mlai wa bä dablaö coyocoo bädao ja, bä ö̦shö lä mlai wa bä wai dablaö coyocoo bädao ja, “¡Iba bä li tomölema lä!”, wa bä nofi tadabä, ö̦jö lä —bä shö̦ö e nowa tama.
34—Inaja lä waiquiwä —Labano a cuma ma cui, 35ö̦jö däjä showawä, bä yalo lä oni wei bä fa yaiblamalönö, cama Labano bei ijilubö ebä nija, bä nabä li shömöa majöquema.
Shibo bä wa̦lo lä shedidii bä yaimaquema, bä lä badijii bä ca̦i. Shibo bä suwä lä quilishabö wei bä ca̦i yaiblamaö mö fedua showalayoma, bä au lä badijii bä ca̦i. Bä wai lä ö̦shö wei bä ca̦i yaiblamaö mö fedua fa showalonö, cama bei ijilubö ebänö bä yalo ca̦i cuobeje, bä nabä shömöquema. 36Ö̦jö däjä, Labanonö bä yalo ca̦i blajalayoma. Bolacabö bä fa miicufälönö, bä weyade lä waloqueno wei jamö, bä ca̦i yanöcöquema. Ö̦jö däjä, Labano oweja ebä lä feiblamaleno wei bä lä cui, dodijidawä bä iyabä, Jacobonö bä luluablalaö juoma.
Jacobo a nö wa̦lojaö
fe lä yadiono wei tä a̦
37Ö̦jö däjä, Jacobonö fii defibä u̦eshi lä au wei, defibä boco liyä däalalema. Fibä boco fa däalalönö, defibä jo̦tetea fa badijilönö, defibä au shedidilalema. 38Ö̦jö däjä, fibä lä badijilaleno wei fibä fa dälänö, yalo bä amishi coamabeje, showadi mau ubä lä löblaano wejei tä ja, defibä ca̦aquema. Yalo bänö defibä mölajenö bä amishi co̦oma. Bä amishi co̦obä jamö, showadi bä wamoma cudeenö, 39fibä lä oni wei defibä ja, bä mamo showalanö bä wamoma. Ö̦jö cudeenö, yalo bä oshe lä cublaliyono wei, bä bluca onioma. Yalo ai bä lä cui, bä badijiblaliyoma. Ai bä lä cui, bä quilishaböoma. Ai bä lä cui, bä shedidiwä badijioma.
40Jacobonö bä yalo lä oni wei bä nia balamaö fe fa yadionö, abinaja a ca̦i cuaama. Labano yalo ebä lä cui ja, suwä bä fa däalalönö, bä lä oni wei bä ja, bä coyocoquema. Bä yalo lä shedidii, bä yalo lä ö̦shö wei, ö̦jö bä mötale ja, bä coyocoaquema. Inaja a fa cuaanö, bä lä oni wei bä ja, bä mamo showalanö bä wamoma. Labano ebä yalo ja, Jacobonö cama ebä coyocomabou mlai ja, cama ebä lä oni wei bä li yaiblaö mö fedulayoma.
41Bä yalo bada lä blei bä wamou däjä, fii defi ca jamö bä yalo amishi lä co̦o wei jamö, showadi fibä ca̦aquema. Ö̦jö defibä ja, bä mamo showalanö bä wamobä. 42Ö̦jö ma cui, bä dodijidawä lä mlai bä wamou däjä, defibä ca̦abonomi. Inaja a fa cuaanö, bä bada lä blei bei ijilubö ebä lä cui, Jacobo ebä bluca oni cublaliyoma. Bä dodijidawä lä mlai bei ijilubö mö feduwä lä cui, bä onio fa mlacunö, Labano ebä li cuo mö feduoma.
43Inaja Jacobo a fa cuaanö, ¡bejedi lä a nö madofiböblaliyoma! Yalo ji̦ima bluca ebä cublaliyoma. Oweja bä ma cui, shibo bä ma cui, cameyo bä ma cui, bulo bä ma cui, ebä bluca fe balojooma. A nosie juamobä, yanowamö täbä ca̦i bluca däalalema. Suwä bä ma cui, wa̦lo bä ma cui, ebä bluca ca̦i cuo mö feduoma.
Aktualisht i përzgjedhur:
Génesis 30: GUU
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
©2012, All Rights Reserved