Psalmet 10:12-18

Ngrihu, o ZOT, ngrije dorën, o Perëndi, e mos i harro skamnorët. Pse i paudhi e përçmon Perëndinë e thotë me vete: «Ti nuk do të më shqyrtosh?». Por ti ke parë, se ti e sheh ligësinë dhe brengën, ti i peshon me dorën tënde. Te ti mbështetet fatkeqi, ti je ndihmësi i jetimit. Thyeja krahun të paudhit e të ligut, hetoje për paudhësinë gjer në fund. ZOTI mbretëron përjetë, por kombet zhduken nga toka e tij. Dëshirën e të përulurve ti e dëgjon, o ZOT, ua forcon zemrën e bën kujdes, që t'i japësh të drejtë jetimit e të shtypurit, që njeriu i dheshëm të mos tmerrojë më askënd.