Genesi 46
46
Jakobe a ngu rurela tigoni ga Egipito
(Genesi 12:10-20; Matewu 2:13-15)
1Israyeli a di donga silo saye satshavbo a gu khuga a hongola, a vboha Bherisebha, aya paya avbo sirengo nya guphasele Nungungulu wa babe waye Isaki. 2Nungungulu a di ganela ga Jakobe khu ndroroni ni vbakari nya wutshigu, khuye: “Jakobe! Jakobe!”
Uye a di hakha, khuye: “Nyi womo avba.”
3Khavbo avbo, Nungungulu a di engedza, khuye: Eni kheni Nungungulu wa babe wago; u nga kanakani gu relela tigoni ga Egipito, kholu nyi na ya gu gira iyo litigo nya likhongolo. 4Eni furi wurumba wangu nyi na relela nago Egipito; gambe Eni nyi na gu gira u wuya khiyoyo; mandza ya Josefa ma na sega maho yago.
5Khavbo avbo, Jakobe a di khuga khu Bherisebha. Sanana sa Israyeli si di khiledza babe wawe Jakobe ni vagadzi vaye ni sanana sawe dzikaretani dzi nga rumedwago khu Faro gasi guta mu dzega. 6#Wona gambe: Mith 7:15. Va di dzega Jakobe ni situgulwana saye satshavbo, sifuyo sawe ni dzithomba va nga girago tigoni ga Khanani, va gu hongola Egipito. 7Sanana saye nya vama ni situgulwana saye nya vama, sanana saye nya vanyamayi ni situgulwana saye nya vanyamayi ni livelego laye latshavbo va di hongola naye tigoni ga Egipito.
Ndranga ya Jakobe tigoni ga Egipito
(Josuwa 19:1-5; 1 Dzikoronika 4:1—5:26; Mitengo 26:1-51)
8Aya khu malina ya sanana sa Israyeli, Jakobe ni sanana saye si bedego tigoni ga Egipito:
Rubheni, matiwula ya Jakobe;
9sanana sa Rubheni, khesi:
Enoki, Palu, Hezironi ni Karimi;
10sanana sa Simiyoni, khesi:
Jemuweli, Jabini, Owadhi, Jakimi, Zowari
ni Sawule, gyanana gya nyamayi nya Mukhanani;
11sanana sa Levhi, khesi:
Gerisoni, Khowati ni Merari; 12sanana sa Judha, khesi:
Eri, Onani, Sela, Peresi ni Zera.
Eri ni Onani, avo va fude tigoni ga Khanani;
sanana sa Peresi khesi:
Hezironi ni Hamuli;
13sanana sa Isakari, khesi:
Tola, Puwa, Joba ni Kimeroni;
14sanana sa Zebhuloni, khesi:
Seredi, Eloni ni Jaleyeli.
15Esi khu sanana sa Liya a velegedego Jakobe tigoni ga Padhani-Arani, gu diga Dhina, gyanana gyaye nya nyamahegyane. Tengo watshavbo nya sanana saye nya vama ni vanyamayi wu di tshanganisa magumararu na vararu vathu.
16Sanana sa Gadhi, khesi:
Zifiyoni, Hagi, Tshuni, Hesibhoni,
Eri, Arodi ni Areli;
17sanana sa Aseri, khesi:
Imina, Isivha, Isivi, Bheriya,
ni ndriyawe nya nyamayana, Sera;
sanana sa Bheriya, khesi:
Hebheri ni Malikiyeli.
18Esi khu sanana sa Zilipa githumi gya Laboni a nga ningago mwanaye Liya; khuye a nga velegago ni Jakobe tengo nya gutshanganise likhumi na livbandre na moyo vathu.
19Sanana sa Rakeli ngadza Jakobe, khesi:
Josefa ni Bhejami.
20 # Wona gambe: Gen 41:50-52. Asenati, gyanana nya nyamayi gya Potifera, muphasi nya mhamba wa Oni, velegide ni Josefa Manasi ni Efrayimi tigoni ga Egipito.
21Sanana sa Bhejami, khesi:
Bhela, Bhekeri, Asibheli, Gera, Nahamani,
Eyi, Rosi, Mupimi, Hupimi ni Aridhi.
22Esi khu sanana a velegidego Rakeli ni Jakobe, vatshavbo va gu tshanganisa likhumi na vana vathu.
23Gyanana gya Dhani khu Husimi.
24Sanana sa Nafitali, khesi:
Jazeyeli, Guni, Jazeri ni Silemi.
25Esi khu sanana sa Bhila, githumi gya Laboni a nga ningago mwanaye Rakeli; khuye a nga velega ni Jakobe tengo nya gutshanganise livbandre na vavili vathu.
26Tengo nya vathu vatshavbo nya ndranga ya Jakobe ni sanana sawe va bedego tigoni ga Egipito, gu diga vagadzi va sanana sa Jakobe, vatshavbo livbandre na limwedo magumi ni livbandre na moyo vathu. 27#Wona gambe: Mith 7:14. Gu landrela sanana sa Josefa, si velegidwego tigoni ga Egipito: Vathu vavili. Tengo watshavbo nya vathu va ndrangani ga Jakobe va hongodego Egipito: Livbandre na mavili magumi.
Jakobe a ngu manana ni mwanaye Josefa
28Jakobe a di rumela Judha gu thanga mbeli; gasi guya manana ni Josefa; gasi guti mabelelo muni Goseni; va di bela tigoni ga Goseni. 29Na va vbohide, Josefa a di ruma gu dongisela kareta yaye, a khuga a hongola Goseni gu khinga babe waye. Na mu wonide a di mu wugarela thamoni a gu lila gikhati nya gulaphe mawogoni gwaye.
30Israyeli a di embela Josefa, khuye: “Olu nyi ngu dzi kodza gufa, kholu nyi wonide khovbe yago, gukheni u nga gu vbanya!”
31Josefa a di embela vandriyaye ni ndranga yatshavbo ya babe waye, khuye: “Nyi ngu bwelela, gasi guya tivisa Faro. Nyi na mu embela, kheni: Vandriyangu ni ngamo yatshavbo ya babe wangu, va nga bani va vbanya tigoni ga Khanani, va dzude gasi guta vbanya vbafuvbi ni eni. 32Nyi na ya ganela kheni vathu vovo, vahavisi nya mitshambi, va na ni sifuyo; va dzude ni mitshambi yawe nya sirengo nya sidugwana ni esi nya sikhongolo, ni silo sawe satshavbo va nga bani vari naso. 33Gikhati Faro a na gu mi ranisago, a mi wudzisa gukhuye: Khu wevbini thumo wanu? 34Mu na mu hakhani, khenu: Sithumi sago vahavisi nya mitshambi, gukhugela wananani kala litshigu la muhuno. Vababe vathu navo va di thuma kharato. Khu magirelo yoyo mu na dzi kodzani guya vbanya tigoni ga Goseni, kholu Vagipiti va ngu nyenya vahavisi nya sirengo nya sidugwana.”
Aktualisht i përzgjedhur:
Genesi 46: BGE2014
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
A Bíblia em Gitonga © Bible Society in Mozambique, 2014.