MATÌÙT 7
7
“Hit en ùkùm it aike inoba housak lek,” ìlùk yogoisasike wene
(Luk.6:37-38,41-42)
1Atì'nogo yogoisasikesik he, aike mel yogoisasike:
“At Ala nen ùkùm hinoba hìlìk weagathinabinogo ìlùk he, hit en apùnì aike ùkùm inoba hìlìk weagarinapùp o. 2Hit en ùkùm it aike inoba hegesep atì hak, at Ala nen atì'nogoat ùkùm hinoba hegein o. Nen, hit en ìlìreke walhìlìk it aike wogisegesep atì hak, at Ala nen ìlìreke atì baat walogo wokhisegeinat o. 3Hit hinokawerek hineilekenma e hùko oake palek mene werek atì hìthakìgì'legat he, it hinerùgì hinagaiya'lak aike ineilekenma ìlìngeken hamùlùk mene kìlìk were'ma wokhùogolùk kelagisìkì lagep atì nahalok. 4Hinokawerek hineilekenma e hùko mene palek walurek logolìgat he, hinerùgì hinagaiya'lak atì yogoisìkì logolìk,
Heilekenma ìlìngeken kike mene atì wokheak, ìlùk usak nogo? 5Hinogat oba nek hano salek logolìk hinetaùken pìre yì rì! Hinokawerek hineilekenma e palek hùko mene atì tak wokhakìlìk en, hineileken arat lìa aga halok he, hobuk hinerùgì hinagaiya'lak ineilekenma ìlìngeken werek mene atì elok wokhogoin o,” ìlùk yogoisasike.
6Atì'nogo yogoisasikesik he, aike mel yogoisasike:
“Ala hesik hisagarek mene atì yeke wogotenem hobuk lagak hogo aik en lìbìlhinabinogo ìlùk, wogotùp o. Nen, hinalìlìke hano oko apik mene atì, wam wogotenem esok en lìlìbùk warogo laksanogo ìlùk, wogotubat o,” ìlùk yogoisasike.
Ala kìno yogotenem esuk holherek wene
(Luk.11:9-13)
7-8Atì'nogo yogoisasikesik aike mel yogoisasike:
“It apùnì inebe lopok en Ala kìno yogotenem he, at en inebe lopok wogisikerek enek atì. Nen, it aike inebe lopok en yì mene tì mene at oba heratenem he, inebe lopok herakagarek enek atì. Nen, it aike inebe lopok en kwe ane papagathikenem he, at en inebe lopok kwe hùrisikerek enek atì. Atì nen he, hit he, Ala kìno yogotì logoino. Yogotì logoumo, wokhisegeinat o. Hano mene at oba heratì logoino. Heratì logoumo herasugunat o. Nen, kwe ane papagathìkì logoino. Papagathìkì logoumo re, at en kwe hùthikegeinat o. 9Hit aike hinagainapùrì nen,
Sùpùrùk horotì mene nele, iko halok, inopaselak en he, helep mene wogisegesep nogo? 10Ì a, at he,
Ikan nele, iko halok, walo mene wogisegesep nogo a? Legat o. 11Hit hinoabùt weak hagatesep meneat he, inagainapùrì hano mene wogisagarek atì hinelumo re, hano mene wogisegesep o. Atì hak he, hinopase Ala pogot oba mene atì re, kìno yogosugun mene hùgì motok hano mene wogisegein lek nogo? Wogisegeinat o. 12Hit hina'la nen,
It aike nen tì'nogo hano haga'ninabilep e, ìlùk akegesep atì hagat, hit en it atì atì'nogoat hagarinapì logoino o. Wene Ala nen Musa ayoko hìlìk ninasuk wasike wene atì mel, it Ala nen inayoko hikenem ane yogoisìkì lagaukwa wene atì mel, lapuk hogo esin he, atìat o,” ìlùk yogoisasike.
“Kwe hamùlùkkwe kini,” ìlùk yogoisasike wene
(Luk.13:24)
13Atì'nogo yogoisasikesik, aike mel yogoisasike:
“Wea'ma nong aka lagaikarek atì, kwe ape palek atì hùkoat. Nen, kwe ebe yago ba lagaikarek atì esako langsegatma re, apùnì apigat kìlì'lùgì. Atì nen he, hit kwe hamùlùgat keloksek yago atì ba ki lani. 14Kwe hanoma lagaikarekkwe atì re, ape palek atì hamùlùgat. Nen, ebe lagaikarek atì motok kìlìk-keloksek nogo nen he, apùnì apik ki lasak lek en he, inebe hamùlùgat enek kìlì'lùgì,” ìlùk yogoisasike.
Inapeliagat lalinaparek wene
(Luk.6:43-44)
15Atì'nogo yogoisasikesik, aike mel yogoisasike:
“It aike inapeliagat Ala ane yogoisagarek mene salek hinoba wìrìk he, hina'la kagalinogo ìlùk, hinepe hebelogo logoino o. It atì inelokoken wam topa warn ena mene hake hagarogo nen wesugun meneat he, inetaùken a'la re, yeke lo yeke anini weak mene hake wesugun o. 16 Yì e tì e eken ìterek atì ba, ero enagat haga'lagarek atì hak, it en hagathinabugun atì ba, inoabùt enagat haga'lasìgìn atì. E pakì alok weak meneat he, eken he, hele anggur hano mene eken hake irì'mo palharek nogo? Ì a, at he, hele mùl alok weak meneat he, eken he, e ara hano mene eken hake irì'mo palharek nogo? Lek o. 17E hano mene halok he, eken he, hano meneat ìterek o. Nen, e weak mene halok he, eken atì'nogoat weak mene ìterek o. 18E hano meneat he, eken he, e weak mene eken isu hak aike isusak lek. Atì hak he, e weak meneat he, eken he, e hano mene eken isu hak aike isusak legat. 19Yì e tì e eken hano ìterek lek mene atì re, ero mùkogo re, etumo motok laksagarek o. 20Atì hak he, it apùnì atì'nogo hagathinabugun atì ba, inoabùt enagat haga'lasigin,” ìlùk yogoisasike.
“Higit hogo hagatì'lek inape ba nek umo hanoma kusak lek,” ìlùk yogoisasike wene
(Luk.13:25-27)
21Atì'nogo yogoisasikesik, mel yogoisasike:
“Hit apùnì nen, an yogonetì logolìk he,
Ninoe, ninoe, ìlùk ìkì lagep atì ba hinebe obogat, an nopase pogot oba mene awe a'ma hisikere'ma atoma kugun lek. We, it aike, at Ala a'la akikerek mene higit hogo hagarì'lùgì mene atìat ki logoin o. 22O wùrep oba haga'lasigin atì sapùl he, apùnì apik noba wìrìk he, yi'nogo yogonesugun:
Ninoe. Nit he, hat hetage baat wene hano yakùlisìgìk, mokareke oabùt weak mene apùnì ina'la kìlìk were'ma henogo wulaksìgìk, hagasusak lek mene elalinat apigat hagatìk, hagarìk nìkì lago amanogo lek? ìlùk ugun meneat he, 23an nen pak hogo yì'nogo yogoisegein:
Hit hinebe an nokot o. Weak motok hagarìk nìkì lagep mene atì nera'lu ya logogùp o. Pùgùlakani, ìlùk yogoisegein o,” ìlùk yogoisasike.
“Ap inebe pìre nen o wusukwa,” ìlùk oba lìrogo yogoisasike wene
(Luk.6:47-49)
24Atì'nogo yogoisasikesik, aike mel yogoisasike:
“Halok he, sa nen, an nane atì asuk holìk higit hogo hagate halok, at en yì hake hagasigin o. Ap aike etaùken werek mene nen o helep oba louk hogo wùsikomo, 25moso apik pi wagìk, i hu apik wagìk, sogoi apik hunha wagìk, isike meneat he, o a'nogo helep oba louk hogo wùsikesi'mo nogo nen he, tukwak hogo lagì'lek kamo isike atì hagat hagasigin o. 26Mene re, sa nen an nane atì asuk holhì logolìgat he, higit hogo hagarì'logo lek halok, yì hake hagasigin. Ap aike etaùken lek mene nen o i al oba louk hogo wùthìlì'mo, 27moso apik pi wagìk, i hu apik wagìk, sogoi apik hunha wagìk, ìkì logolìk, o a'nogo wasikomo, sa'nok hogo wolok laga logolìk motok mesa'lapuk hogo weagathesike atì hagat o,” ìlùk yogoisasike.
Inasuk holhukwasik he, hogorasukwa wene
(Mrk.1:22; Luk.4:32)
28-29Yesùt en wene atì'nogo ìlìk waga lagaikesik wene elùgùn warogo isikomo re, it apùnì apik amanogo nen he,
“Egi! Wene ike atì, it ap Ala ane helal waganek esewerek mene nen yogonisagarek hake ìlì'logo lek o. We, at en he, wene ebe esewerek mene nen u hak ike atì, nayùk e!” ìlùk hogorasukwa.
Aktualisht i përzgjedhur:
MATÌÙT 7: LAIDNI
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr