Logoja YouVersion
Ikona e kërkimit

लूका 22

22
यीशु उन विरूद्ध साजीश
(मत्ती २६:१-५; मरकुस १४:१-२; यूहन्ना ११:४५-५३)
1अखमीरी रोट्टी अन हाब्ब जो फसह कहलुसतद, हात्‍ती ईरोद; 2अदिक प्रधान याजक अदिक नियम इन गुरु ई मात इन खोज दा ईरोर कि यीशु उक ह्यांग कोंद बुटेव, पर आंदुर लॉकुर से अंजतोगोर.
यहूदा अन्द विश्वासघात
(मत्ती २६:१४-१६; मरकुस १४:१०,११)
3आग शैतान यहूदा दा समुस्त, जो इस्करियोती कहलुस्तान अदिक हन्नेळ चेलागोळ दा आळुकु आगतोगोन. 4आव यहूदा दा होगकु प्रधान याजकगोळ अदिक मंदिर इन पहरेदारगोळ्द सरदारगोळ सांगुळ मातचीत माळदुन कि यीशु उक याता प्रकार आंदुर कय देल हुळसुस्यार. 5आंदुर खुश आदुर, अदिक आऊक पैस्या कोळोर साटी तयार आदुर. 6आव मान्स कोंडुन, अदिक मौका ढुंढ्सली कुरतुन कि याग भीळ ईरतीदील रा आऊक आंदुर कय देल हुळसुस कोंडेव.
चेलागोळ्द सांगुळ फसह अन आखरी भोज
(मत्ती २६:१७-२५; मरकुस १४:१२-२१; यूहन्ना १३:२१-३०)
7आग अखमीरी रोट्टी इन हाब्ब इन दिन बत्‍त, यारदा फसह म्यांडा अन्द पाड्डा अन्द बलि कोळोद जरूरी ईरोद. 8यीशु पतरस अदिक यूहन्ना अक ईद अनकु कळुदुन: “होगकु नाम फसह अन्द ऊमोद तयारी माळी.”
9आंदुर आऊन से केळदुर, “नी यल चाहासत्या कि नाव इदरी तयार माळेव?”
10आव आंदुर से अंदुन, “नोळी, नगर दा प्रवेश माळतेला अच ऊंद मंळसा नीर इन माळका नेगुकु नीमी सिक्यान; याता मान्ना दा आव होदान नीव आऊन हिंद होटोगेतीर, 11अदिक आ मान्ना अन स्वामी से अनेतीर: ‘गुरु नीन से अनतान कि अद पाऊनागोळ्द कमरा यल आद यदुर दा ना तान चेलागोळ सांगुळ फसह अन्द भोजन तिनाईन?’ 12आव नीमी ऊंद सजुस्द धोळ्द म्याकुच इन कमरा तोरस्यान; अल्या तयारी माळेतीर.
13“आंदुर होगकु, ह्यांग यीशु आंदुर से अंदिदुन, हांग अच नोळदुर अदिक फसह अन्द भोजन तयार माळदुर.”
प्रभु उन आखरी भोज
14याग घळी होट्ट बत्‍त, रा आव चेलागोळ सांगुळ ऊमली कुरतुन. 15अदिक आव आंदुर से अंदुन, “नान हापाळ इच्छा ईरोद कि दुख भोगसोर से पयले ईद फसह अन्द भोजन नीम सांगुळ तिनाईन. 16यतिकी ना नीम से अनतीन कि यागासताका अद परमेश्वर उन राज्य दा पुरा आगाल आगासताका ना अदरी यागलु तिनतीदील.”
17आग यीशु कटोरा हुळकु धन्यवाद माळदुन अदिक अंदुन, “इदरी हुडी अदिक आपस दा वाट्स कोमी. 18यतिकी ना नीम से अनतीन कि यागासताका परमेश्वर उन राज्य बराल्द आगासताका ना अंगुर इन रास्सा ईगी टु यागलु कुडुतीदील.”
19बाक आव रोट्टी हुळदुन, अदिक धन्यवाद माळकु मुरदुन, अदिक आंदरी ईद अनतेला कोट्टुन, “ईद नांद शरीर हुन जो नीम साठी कोटकु आगतद: नांद याद इन साठी ईदा माळतोगी.” 20ईदा रीति देल आव भोजन इन बाद्दा कटोरा भी ईद अनतेला कोट्टुन, “ईद कटोरा नांद आ खुन इन व्हाशोद वाचा हुन. जो नीम साठी वाहुसकु आगतद.
21“पर नोळी, नानी हुळसुसावाळा अन कय नान सांगुळ मेज मा आद. 22यतिकी मंळसा अन पार रा जसा आऊन साठी ठहरूस्कु आग्याद, हांग अच आव सोत्‍तान, पर हाय आ मंळसा मा यार्द द्वारा आव हुळसुस्कु आदान!”
23आग आंदुर आपस दा विचार माळली कुरतुन कि नाम दा टु याव आन, जो ईद क्याल्सा माळ्यान.
सब से यक्कुल महान याव?
24 # मत्ती १८:१; मरकुस ९:३४; लूका ९:४६ आंदुर्दा ईद वाद-विवाद भी आत कि आंदुर दा टु याव धोड्डेव सम्सकु आगतान. 25यीशु आंदुर से अंदुन, “गैरयहूदीगोळ्द राजा आंदुर मा प्रभुता माळतार; अदिक जो आंदुर मा अधिकार ईटतार, आंदुर उपकार माळावाळेर कहलुस्तार. 26#मत्ती २३:११; मरकुस ९:३५#मत्ती २०:२५-२७; मरकुस १०:४२-४४लेकीन नीव हिंग आगबाळेतीर; उलटा जो नीम दा धोड्डेव आन, आव स्याणेव उन घाई अदिक जो स्याणा आन, आव सेवक उन घाई आगुल. 27#यूहन्ना १३:१२-१५धोड्डेव याव आन, आव जो ऊमोर साटी कुर्तकु आन, या आव जो स्यावा माळतान? येन आव ईला जो ऊमली कुर्तकु आन? लेकीन ना नीम न्याड्या सेवक उन घाई आईन.
28“नीव आंदुर हुईर, जो नान परीक्षागोळ दा लगातार नान सांगुळ ईतीर; 29अदिक ह्यांग नान आप्प नानी राज्य मा अधिकार कोटान, हांग अच ना भी नीमी हांग अच अधिकार कोळतीन, 30#मत्ती १९:२८ताकी नीव नान राज्य दा नान मेज मा तिनी-कुडी, उलटा सिंहासनगोळ मा कुर्तकु इस्त्राएल इन हन्नेळ वंशगोळ्द न्याय माळी.
पतरस उन इनकार
(मत्ती २६:३१-३५; मरकुस १४:२७-३१; यूहन्ना १३:३६-३८)
31“शमौन, हे शमौन! शैतान नीम लॉकुरी परखुसोर साटी आग्या बेळ कोंडान कि बेकार दा टु वळ्लेर इक अलग माळुल ह्यांग केईवाळा गोदी दा टु फरकंडा अलग माळतान, 32लेकीन ना नीन साठी विनती माळदीन कि नीन विश्वास गोर्त आगबाळुल; अदिक याग नी वापस बंद्या, रा तान वार्टुर इक हिम्मत कोळेत.”
33पतरस यीशु से अंदुन, “हे प्रभु, ना नीन सांगुळ बंदीगृह दा होगली, अदिक सायली भी तयार आईन.”
34यीशु अंदुन, “हे पतरस, ना नीन से अनतीन कि ईंद हुंज कुग्गतिदील आगासताका नी मुर घन नांद इनकार माळ कोंड्या कि नी नानी जान्साल.”
चीला, झ्वारा, अदिक तलवार
35 # मत्ती १०:९,१०; मरकुस ६:८,९; लूका ९:३; १०:४ बाक यीशु आंदुर से अंदुन, “याग ना नीमी चीला, झ्वारा, अदिक जुता बिना कळीदीन, रा येन नीमी यातोदारा वस्तु उन कमी आगीत?”
“आंदुर अंदुर, यातोदु वस्तु उन ईला.”
36आव आंदुर से अंदुन, “लेकीन ईग यार्द हात्‍ती चीला आद आव अदरी हुडुल अदिक हांग अच झ्वारा भी, अदिक यार्द हात्‍ती तलवार ईला ईतीदाद आव तान कपळा मारकु ऊंद कोंड कोमुल.” 37यतिकी ना नीम से अनतीन, कि ईद जो लिख्सकु आद: “अद अपराधीगोळ सांगुळ आळुकु आग्याद, अदुर्द नान दा पुरा आगोद जरूरी आद; यतिकी नान बारा दा लिख्सद मातगोळ पुरा आगदुर मा आव.”
38आंदुर अंदुर, “हे प्रभु, ईल येढ्ढ तलवारगोळ आव.”
आव आंदुर से अंदुन, “हापाळ आव.”
जैतुन इन पहाळी मा यीशु उन प्रार्थना
(मत्ती २६:३६-४६; मरकुस १४:३२-४२)
39आग यीशु व्हार्या होटकु तान रीति इन अनुसार जैतून इन पहाळी मा होदुन, अदिक चेलागोळ आऊन हिंद आगेदुर. 40आ जागा दा होगकु आव आंदुर से अंदुन, “प्रार्थना माळी कि नीव परीक्षा दा बिळबाळी.”
41आव आंदुर से अलग लगभग कल्ल भीळोद ईट दुर ताका होदुन अदिक ट्वांगरा टेक्सकु प्रार्थना माळली कुरतुन, 42“हे आप्पा, अगर नी चाहास्या रा ईद दुख देल तुम्द कटोरा अक नान हात्‍ती टु सर्कुसबुळ, तरी भी नान ईला लेकीन नीन इच्छा पुरा आगुल.” 43आग स्वर्ग दा टु ऊंद स्वर्गदूत आऊक कांळ्सदुन जो आऊक सामर्थ्य कोळतोगोन. 44आव हापाळ व्याकुल आगकु मात्‍त यक्कुल वेदना देल प्रार्थना माळली कुरतुन; अदिक आऊन पच्ची रा खुन इन धोळ्द-धोळ्द बुंद इन घाई धरती मा बिळतोगोद.
45आग आव प्रार्थना माळकु येद्दुन अदिक तान चेलागोळ्द हात्‍ती बंदकु आंदरी उदासी इन मारा देल मिंग्त नोळदुन 46अदिक आंदुर से अंदुन, “येती मिंगेतीर? येळी, प्रार्थना माळी कि नीव परीक्षा दा बिळबाळी.”
यीशु उक ध्वाका देल हुडुकु आगोद
(मत्ती २६:४७-५७; मरकुस १४:४३-५०; यूहन्ना १८:३-१२)
47यीशु ईद अंत अच ईरोन कि ऊंद भीळ बत्‍त, अदिक आ हन्नेळ दा टु ऊंद यार्द हेसुर यहूदा ईरोद आंदुर्द मुंद मुंद बरोन. आव यीशु उन हात्‍ती बंदुन कि आऊन गाल्ला अन्द चुम्मा ताकोम सकुल. 48यीशु आऊन से अंदुन, “हे यहूदा, येन नी चुम्मा ताकोमकु मंळसा अन पार उक हुळसुसली बंद्या?”
49आऊन चेलागोळ जो यीशु उन सांगुळ ईरोर याग नोळदुर कि येन आगावाळा आद, रा अंदुर, “हे प्रभु, येन नाव तलवार नळसेव?” 50अदिक आंदुर दा टु ऊंद मंळसा महायाजक ऊंद दास मा तलवार नळ्सकु आऊन ऊम्मा किव हार्स बुट्टुन.
51इदुर मा यीशु अंदुन, “ईग बस माळी.” अदिक आऊन किव इक मुटकु आऊक वळ्लीद माळदुन.
52आग यीशु प्रधान याजकगोळ अदिक मंदिर इन पहरेदारगोळ्द सरदारगोळ अदिक पुरनियागोळ से, जो आऊन मा येरकु बंदीदुर, अंदुन, “येन नीव नानी विद्रोह जान्सकु तलवारगोळ अदिक कोलगोळ हुडुकु होटीर? 53#लूका १९:४७; २१:३७याग ना मंदिर दा हर रोज नीम सांगुळ ईरीन, रा नीव नानी हुडोद कोशिश माळीदील; पर ईद नीम समय आद, अदिक अंधकार इन राज आद.”
पतरस उन इनकार
(मत्ती २६:५७,६९-७५; मरकुस १४:५३,५४,६६-७२; यूहन्ना १८:२५-२७)
54बाक आंदुर यीशु उक हुडुकु ओतुर, अदिक महायाजक उन मान्या तंदुर. पतरस दुर दुर टु उच आऊन हिंद-हिंद नळुतोगोन; 55अदिक याग आंदुर आंगुळ दा बेक्‍की होत्‍ताकु ऊंद ऊज्या कुरतुर, रा पतरस भी आंदुर न्याड्या दा कुरतोदुन. 56आग ऊंद दासी आऊक सिगळी इन उजुळ दा कुर्त नोळकु अदिक आऊक वळ्लीसा नोळकु अनली कुरतुर, “ईव भी रा यीशु उन सांगुळ ईरोन.”
57लेकीन पतरस ईद अंदकु इनकार माळदुन, “हे आर्त, ना आऊक अरालीन.”
58थ्वाळासा समय इन बाद्दा यावारा दुसरा मंळसा आऊक नोळकु अंदुन, “नी भी रा आंदुर दा टु ऊंद हुय.”
पतरस अंदुन, “हे मंळसा, ना आलच.”
59बाक मात्‍त ऊंद घंटा अन्द बाद्दा ऊंद मंळसा भरोसा माळकु अंदुन, “जरूर ईव भी रा आऊन सांगुळ ईरोन, यतिकी ईव गलीली हुन.”
60पतरस अंदुन, “हे मंळसा, ना जान्सालीन कि नी येन अनेत्या!”
आव अनतेला अच ईरोन कि तुरन्त हुंज कुग्त. 61आग प्रभु तिर्गकु पतरस उन दी नोळदुन, अदिक पतरस उक प्रभु उन आ मात याद बत्‍त जो आव अंदिदुन: “ईंद हुंज इन कुग्गोर से पयला, नी मुर घन नान इनकार माळ्या.” 62अदिक आव व्हार्या होटकु हुदक्या कोट कोटकु वर्लदुन.
यीशु उन अपमान
(मत्ती २६:६७,६८; मरकुस १४:६५)
63जो मंळसागोळ यीशु उक हुडुकु ईरोर, आंदुर आऊन मज्याक हार्सकु आऊक बडुली कुरतुर; 64आंदुर आऊन कण्णगोळ मा पट्टी कटकु आऊन से केळदुर, “भविष्यवाणी हेळ कि नीनी याव बळदुन!” 65अदिक आंदुर आऊन अपमान माळकु आऊन विरोध दा हापाळ सा मातगोळ अंदुर.
महासभा अन्द मुंद यीशु
(मत्ती २६:५९-६६; मरकुस १४:५५-६४; यूहन्ना १८:१९-२४)
66याग हागुल आत रा लॉकुर्द स्याणा अदिक प्रधान याजक अदिक नियम इन गुरु जमा आदुर, अदिक यीशु उक तान महासभा दा तनकु केळदुर, 67“येन नी मसीह हुय? रा नाम से अंद बुळ!”
यीशु आंदरी उत्‍तर कोट्टुन, “अगर ना नीम से अनाईन, तरी भी नीव विश्वास माळतीदील; 68अदिक अगर ना सवाल केळाईन रा नीव उत्‍तर कोळतीदील. 69लेकीन ईगी टु ना मंळसा अन पार सर्वशक्तिमान परमेश्वर उन ऊमा कय दी कुर्तकु ईराइन.”
70इदुर मा सप्पा मुंदुर अंदुर, “रा येन नी परमेश्वर उन पार हुय?”
यीशु उत्‍तर कोट्टुन, “नीव खुद अच अंतीर, कि ना हुईन.”
71आग आंदुर अंदुर, “ईग नामी गवाही इन येन जरवत आद; यतिकी नाव खुद आऊन बाय देल केळ कोंडेव.”

Aktualisht i përzgjedhur:

लूका 22: NTHaa20

Thekso

Ndaje

Copy

None

A doni që theksimet tuaja të jenë të ruajtura në të gjitha pajisjet që keni? Regjistrohu ose hyr

Devocione dhe Plane Leximi falas për लूका 22

YouVersion përdor cookie për të personalizuar përvojën tuaj. Duke përdorur faqen tonë të internetit, ju pranoni përdorimin tonë të cookies siç përshkruhet në Politikën tonë të Privatësisë