Mwa 18
18
Ngai Ayatha Avalaamu Kana ka Kavĩsĩ
1Mwĩai Ngai nĩwaumĩlĩĩle Avalaamu e vakuvĩ na ũla mũtĩ mũtheu wa Mamile. Avalaamu ailyĩ nthĩ mũomonĩ wa ĩeema yake mũthenya kwĩ kũvyũ mũno. 2#Aevl 13.2 Nĩwookĩlilye metho na oona andũ atatũ maũngyĩ mbee wake. Yĩla wamonie nĩwasembie kuma mũomonĩ wa ĩeema akamathaũe. Nĩwakumanie atina nthĩ na ũthyũ amanenge ndaĩa 3na asya atĩĩ, “Anene makwa, nĩmwĩsũva mũikavĩtũke mũtesĩlĩte kwakwa nyie mũthũkũmi wenyu. 4Ekai nĩmũetee kĩw'ũ mũthambe maũũ; na mũithũmũa vaa ungu wa mũtĩ ũũ. 5O ta ũu ekai nĩmũetee kĩndũ mũye nĩ kana mũkwate vinya na mũyĩendeea na kyalo kyenyu nĩkwĩthĩwa nĩmwooka vaa kwa mũthũkũmi wenyu.”
Andũ asu nĩmasũngĩie mamwĩa atĩĩ, “Nũseo, ĩka ũndũ wasya.”
6Avalaamu nĩwaendie mĩtũkĩ alika ĩeemanĩ na eea Sala, “Osa kĩlo ta mĩongo ĩlĩ sya mũtu ũla mũseo ũue mĩkate na mĩtũkĩ.” 7Nĩwaendie ekalaatĩte vala ve indo syake na oosa kasalũ kaseo kanou. Nĩwakanengie mũthũkũmi wake akathĩnza na akaua mĩtũkĩ. 8Avalaamu nĩwoosie mauta ma ĩia ya ng'ombe na ĩia, na nyama sya kala kasalũ na amaetee lĩu ũsu. Andũ asu maiya Avalaamu aĩ vau ungu wa mũtĩ vakuvĩ namo aimathũkũma.
9Nĩvo ĩndĩ makũlilye Avalaamu atĩĩ, “Aĩva Sala mũka waku.”
Nake asũngĩa, “E vaya ĩeemanĩ.”
10 #
Alo 9.9
Ũmwe wamo nĩweeie Avalaamu atĩĩ, “Ĩvinda ta yĩĩ mwakanĩ ũla wũkĩte ngasyoka kũũ ĩngĩ na Sala mũka waku akeethĩwa e na kana ka kavĩsĩ.”
Sala nĩweethukĩĩsye e mũomonĩ wa ĩeema yĩla yaĩ ĩtina wa mũndũ ũsu. 11Avalaamu na Sala maĩ akũũ mũno na Sala nĩwavĩtũkĩte ĩvinda ya kũsyaa. 12#1Vet 3.6 Kwoou Sala nĩwathekie na asũanĩa asya, “Nyie nĩ mũkũũ na nditonya kwĩthĩwa na ũtanu wa kũmanyana kĩ-mwĩĩ na mũtumĩa wakwa nũndũ o nake nĩ mũkũũ.”
13Mwĩai Ngai nĩwamũkũlilye Avalaamu atĩĩ, “Sala atheka nĩkĩ na kũkũlya, ‘Kwa w'o nyie ngasyaa na nĩ mũkũũ?’ 14#Lk 1.37 Nĩũkũlya, ve ũndũ wĩ vinya mũno ũkethĩa ndũtonyeka kwa Mwĩai Ngai? Ngasyoka kũũ ĩngĩ ĩvindanĩ yĩla naweta mwakanĩ ũla wũkĩte na Sala akeethĩwa e na kana kavĩsĩ.”
15Sala nĩwakwatiwe nĩ w'ĩa na kwoou akaĩa asya, “Ndinatheka.”
Ĩndĩ Mwĩai Ngai amwĩa, “Nĩw'o we nĩwatheka.”
Avalaamu Ayĩsũva Ngai Ndakanange Sondomu
16Yĩla andũ asu atatũ maumie kwa Avalaamu, nĩmaendie melekele Sondomu, na Avalaamu aendany'a namo amaumaaĩtye. 17Mwĩai Ngai nĩwasũanĩie na eekũlya atĩĩ, “Nyie nĩnaĩlĩte kũvitha Avalaamu kĩla ngilĩlye kwĩka? 18Nzyawa syake ikatw'ĩka mbaĩ nene ya andũ me vinya na kwĩsĩla vala ũĩ ngaathima andũ ma mbaĩ syonthe ĩũlũ wa nthĩ. 19Nĩmũnyuvĩte nĩ kana eaĩae syana na nzyawa syake imbĩw'ae na kwĩkaa ũla ũseo na waĩlu. Ethĩwa makeeka ũu, nakwa ngeeka maũndũ onthe ala namwathie.”
20Nĩvo ĩndĩ Mwĩai Ngai weeie Avalaamu atĩĩ, “Ve maũndũ maingĩ mathũku nĩw'ĩte ala mekwĩkwa nĩ andũ ma Sondomu na Ngomola na naĩ syoo nĩ nthũku mũno. 21Nĩngũtheea kw'o ngamanye kana maũndũ asu ngwĩw'a nĩ ma w'o.”
22Elĩ ma ala andũ atatũ nĩmaendeeie na kyalo melekele Sondomu, ĩndĩ Mwĩai Ngai nĩwatiiwe e na Avalaamu. 23Avalaamu nĩwathengeeie Mwĩai Ngai na amũkũlya atĩĩ, “Kwa w'o we nũkwananga ala aseo na ala athũku? 24Kethĩwa ve andũ alũngalu mĩongo ĩtano ndũanĩ ĩsu no ũmyanange? We ndũekana nayo kwondũ wa kũtangĩĩa andũ asu mĩongo ĩtano? 25Ndũkeke ũndũ ta ũsu; ndũkoae ala alũngalu vamwe na ala athũku. Weeka ũu ala alũngalu meĩthĩwa makanw'a ũndũ ũmwe na ala athũku. Ndũkeke ũu. Mũsili wa andũ onthe ĩũlũ wa nthĩ no nginya akeka ũla waĩlĩte.”
26Mwĩai Ngai asya atĩĩ, “Ngethĩa andũ alũngalu mĩongo ĩtano Sondomu, ndyananga ndũa ĩsu yonthe kwondũ wamo.”
27Avalaamu nĩwaneenie ĩngĩ asya atĩĩ, “Ame Mwĩai Ngai ndekea kwa kũendeea kũneena naku na ũkũmbaũ, o na kau nyie nĩo mũndũ. 28Vakethĩwa andũ alũngalu mĩongo ĩna na atano vandũ va asu mĩongo ĩtano, nowanange ndũa yonthe ya Sondomu nũndũ atano nĩmaoleka?”
Mwĩai Ngai amũsũngĩa, “Ndiananga ndũa ya Sondomu ethĩwa ngeethĩa andũ mĩongo ĩna na atano alũngalu.”
29O ĩngĩ Avalaamu nĩwaneenie na Mwĩai Ngai amwĩa, “Nao vakethĩwa andũ o mĩongo ĩna?”
Mwĩai Ngai asũngĩa amwĩa, “Ndimyananga ethĩwa ngeethĩa andũ alũngalu mĩongo ĩna.”
30Avalaamu asya, “Ame Mwĩai Ngai ndũkathate ĩndĩ eka nĩneene naku ĩngĩ. Nao vakethĩwa andũ alũngalu mĩongo ĩtatũ?”
Mwĩai Ngai asũngĩa amwĩa, “Ndimyananga ethĩwa ngeethĩa andũ alũngalu mĩongo ĩtatũ.”
31Avalaamu asya, “Ame Mwĩai Ngai ndekea kwa kũendeea kũneena naku na ũkũmbaũ. Nao vakethĩwa andũ alũngalu mĩongo ĩlĩ?”
Mwĩai Ngai asũngĩa amwĩa, “Ndiananga ndũa ĩsu ethĩwa ngeethĩa andũ mĩongo ĩlĩ alũngalu.”
32Nĩvo ĩndĩ Avalaamu waisye atĩĩ, “Ame Mwĩai Ngai ndũkathate. Nĩneena ĩngĩ o ĩmwe. Nao vakethĩwa andũ alũngalu ĩkũmi?”
Nake Mwĩai Ngai asũngĩa amwĩa, “Ndiananga ndũa ĩsu ethĩwa ngeethĩa andũ alũngalu ĩkũmi.” 33Mwĩai Ngai amina kũneena na Avalaamu nĩwaendie amũtia, nake Avalaamu asyoka mũsyĩ kwake.
Aktualisht i përzgjedhur:
Mwa 18: KAMBA
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
BIBLE SOCIETY OF KENYA © 2011