Lukas 9
9
Si Yesus imutus sé sangapulu' rua murit-Na
(Mat. 10:5-15; Mrk. 6:7-13)
1Tinowa i Yesus sé sangapulu' rua murit-Na wo wéan-Na ing kaketeran wo ing kawasa ai séra wosama' ro'na musér sé roh léwo' wo sumama' in saki-sakit é tou. 2Kumawus angé in itu, yutus-Na séra mangé kumua in abar andumoro' i Amang Kasuruan Kumawasa tanu Kolano wo ka'i sumama' sé tou sumakit. 3#Luk. 10:4-10 Wo icua i Yesus ai séra, “Tioo maali sapa-sapa am bawayaan iow, tioo maali weka', pawalunan kuma'pa kakanen, roit kuma'pa karai ipasawel. 4Sa awéan tumerima icamu muntep am balé éra, mentoo mio' an tampa itu akar kamu kumesot am bitu. 5#Kis. 13:51 Wo sa ra'ica wana en tumerima icamu, itela'uo mio' eng kota éra itu wo itangkaro mio' en awu ang kécéi iow,#9:5 Kumiit ing kanaramen é tou Yahudi, an tutuw éra kumesot an sangkum é tou ra'ica Yahudi, ipatangkar éra en awu ang kécéi wo ang karai éra. Ampa'paan paweroten éra sapaoka sé tou ra'ica Yahudi wo sé tou an sangkum éra itu najis. Asi tuus anio' icua i Yesus a sé murit-Na tangkaro mio' en awu ang kécéi, siituo en tuus a sé tou Yahudi sapaoka séra ra'ica tumerima in Taar i Casuruan. En itu tumuru' sapaoka anggapen i Amang Kasuruan séra itu najis wo sa séra ra'ica mape'dis ukumen-Na oka. Sérén ang Kisah Para Rasul 13:51. tanu tata'néi sapaoka séra ra'ica kiim tumerima si Amang Kasuruan.”
6Kumawus in itu sé murit i Yesus mangé an doo-roong eng kumua in Abar Kaaruien i Amang Kasuruan wo ka'i sumama' in sakit é tou am bisake' en angéan éra.
Si Herodes wo si Yesus
(Mat. 14:1-12; Mrk. 6:14-29)
7 #
Mat. 16:14; Mrk. 8:28; Luk. 9:19 An tutuw i Herodes#9:7 Si Herodes anio' toyaang i Herodes Wangko' si rumu'du' e maté pakasa sé toyaang am Betlehem an tutuw i Yesus tumou. Sérén a Matius 2:16-18. makatimboi ing kakawasaan an sangkum ing Galilea, sia luminga in andumoro' im pakasa ing kinamamualian sé niéma' i Yesus. Sia ra'io makaaté in sama' ampa'paan awéan tou mengakua sapaoka si Yohanes Mabaptis tinouo sumawel an unér é tou imaté. 8Awéan ka'i sé mengakua sapaoka si nabi Elia imapaturu'o sumawel. Wo ka'i awéan sé mengakua esaan a sé nabi indior itumou sumawel.
9Taan icua i Herodes, “Indior airu'du'kuo tou e mokol in do'kos i Yohanes. Anaé, si séi réén wona' si Tou anio'? Ampa'paan kelio sé liningaku andumoro' sé niéma'-Na.” Ampa'paan in ituo si Herodes rumaméji meta'up wo si Yesus.
Si Yesus méé kanen a sé lima ngariwu tou
(Mat. 14:13-21; Mrk. 6:30-44; Yoh. 6:1-14)
10An tutuw sé murit ayutus i Yesus imaréngo mai sumawel wo isisil éra ai Sia pakasa sé tinawoio éra. Wo uwasen i Yesus séra sumingkir mewali-wali mangé an esa kota makangaran im Betsaida akar séra oka in esa. 11Taan kinailekanke' é tou keli en tampa siningkiran angé i Yesus wo sé murit-Na wo sé tou itu mangé kumiit i Sia. Wo teriman i Yesus sé tou keli itu wo icua-Na ai séra andumoro' i Amang Kasuruan kumawasa tanu kolano wo ka'i sumama' sé tou sumakit.
12An tutuw imatawio im bengi, sé sangapulu' rua murit i Yesus mai ai Sia. Icua éra, “Amang, asi tampa anio' lulu in tou, aweso taré iru'du'o sé tou keli anio' mangé mangéré kakanen wo walé loséran an doo-roong an sangkum am bia'i.”
13Taan icua i Yesus a sé murit-Na, “Séra musti wéan iow kanen!”
Isowat é murit-Na, “Amang, awéan ai cami wayake' in lima roti wo rua sera', aluar sa icasalé' i Amang kami mangé tumeles ing kakanen em béé ai séra.” 14Séra icumua in taniitu ampa'paan am bitu awéan wona' lima ngariwu tuama ra'ipé' icauntep sé wéwéné wo sé toyaang.
Wo icua i Yesus a sé murit-Na, “Ru'du'o mio' sé tou itu lumukut sanga-sangareru', an esa ngareru' lima ngapulu' tou wona'.”
15Wo émaan é murit i Yesus sapa en airu'du'-Na wo pakasa sé tou lumukut. 16Kumawus in itu, indon i Yesus en lima roti wo rua sera'. Wo Sia kumanat angé an langit wo kumua i makapulu'sama' a si Amang Kasuruan. Kumawus in itu e roti wo en sera' itu te'bi-te'biin-Na wo iwéé-Na a sé murit-Na en yéké a sé tou keli itu. 17Wo sé tou keli itu kuman akar imawesu. Kumawusai in itu, umungen é murit i Yesus pakasa e roti imatela'u eng kakelina tiruw an sangapulu' rua wantang.
Si Petrus imangaku sapaoka si Yesus ituo si Mesias
(Mat. 16:13-19; Mrk. 8:27-29)
18Asi sangando tutuw i Yesus in esa masombayang wo mai sé murit-Na ai Sia. Wo si Yesus mamuéi ai séra, “Iciit im pakua é tou, si séi réén Aku anio'?”
19 #
Mat. 14:1-2; Mrk. 6:14-15; Luk. 9:7-8 Wo isowat éra, “Awéan sé makua si Yohanes Mabaptis, awéan ka'i sé makua si nabi Elia. Wo sé walina ka'i makua esaan asé nabi indior si tumou sumawel.”
20 #
Yoh. 6:68-69 Wo wuéien sumawel i Yesus ai séra, “Sa kiit icamu, si séi réén Aku?”
Isowat i Petrus, “Si Guruo si Mesias asi Amang Kasuruan owo!”
21Wo uli-ulit péronen i Yesus sé murit-Na wosama' ra'ica ipakua-kua éra en andumoro' in itu a si séike' mangé.
Si Yesus kumua in andumoro' im papaté-Na wo tambisa sa kumiit Sia
(Mat. 16:21-28; Mrk. 8:31–9:1)
22Kumawus in itu icua i Yesus ka'i, “Si Toyaang i Tou musti sumangkum oka ing kelian kawenduan wo Sia ra'ica tinerima é matu'a é tou Yahudi, sé kikiiten é imam wo sé makailek wutul in Torat. Sia patén éra oka, taan asi endo katelu touen sumawel i Amang Kasuruan.”
23 #
Mat. 10:38; Luk. 14:27 Wo icua ka'i i Yesus ai séra im baya, “Si séi e masalé' kumiiit Yaku, sia ra'ica toro kumiit ing kasalé'anna in esa, sia musti muléng in salipna susur in endo wo kumiito mai Yaku. 24#Mat. 10:39; Luk. 17:33; Yoh. 12:25 Ampa'paan si séike' e menonou toronake' in owakna in esa, sia ra'ica makéré ing katouan akar ing kauré-uré. Taan si séike' e méé ing katouanna eng kumiit Yaku, kéréanna oka eng katouan akar ing kauré- uré. 25Sapa en torona si esa tou makéré pakasa sé ang kayo'baan, taan niéma'nake' taré en owakna maté kuma'pa rumugi in owakna in esa? 26Ampa'paan si séike' e malawi' ampa'paan Yaku wo in sususuien-Ku, si Toyaang i Tou ka'i malawi' oka isia an tutuw-Na maai sumawel ang karapi ing kawasa wangko'-Ku wo ing kawasa wangko' i Amang-Ku wo sé malaékat le'nas.
27Wéan rékén sumama-sama'! Sé icua-Ku anio' ulit. An uner iow am bia'i, awéan sé ra'ipé' maté sa ra'ipé' suméré si Amang Kasuruan Kumawasa tanu Kolano.”
Si Yesus parayo-rayo wo pasiri-siriin am puruk ing kuntung
(Mat. 17:1-8; Mrk. 9:2-8)
28 #
2Ptr. 1:17-18 Kelangkoi angé wona' walu ngando kekawus i Yesus mengasusui andumoro' pakasa in itu wo towan-Na si Petrus, si Yohanes wo si Yakobus sumosor angé an esa kuntung en sumombayang. 29Wo ang karoro'an i Yesus masombayang ang kuntung itu, en amo-Na imawalinao wo eng karai-Na imakuloo menéla-nélap.
30Tumarépé'anke'mai awéan rua tou mapaar wo Sia, séra itu si Musa wo si Elia. 31Séra in dua mapaturu' in owak, kaséréan menéla-nélap. Séra mapaar ang karapi-Na andumoro' im papaté si sangkumen-Na oka an Yerusalem.
32Asi témpo itu si Petrus wo sé rua tou kara-karapina kinakili'an. Wo an tutuw séra mapolo, sérén éra si Yesus menéla-nélap wo ka'i sé rua tou makatulung an duru-Na.
33An tutuw é rua tou itu tumela'uo woo si Yesus wo icua i Petrus a si Yesus, “Guru, arui keli kami asi tampa anio'. Lébé loor itoor ami telu ténda. Esa torona i Guru, esa torona i Musa wo si esa ka'i torona i Elia.” Taan ra'ica kailekan i Petrus sapa en aicuana itu. 34Ang karoro'an i Petrus maroma' wo tumumpa mai eng kambung wo sumaput iséra, akar séra maindé'. 35#Yes. 42:1; Mat. 3:17, 12:18; Mrk. 1:11; Luk. 3:22 Wo an untep ing kambung itu kalingaan en suara makua, “Si anioo si Toyaang-Ku si sinisir-Ku. Lingano mangé Sia!”
36An tutuw en suara itu ra'io kalingaan, sérén éra en am bitu waya oka si Yesus in esa. Pakasa sé sinéré é telu murit am puruk ing kuntung asi témpo itu, asalo ipakapenes éra wo ra'ica ipasisi-sisil éra a sé tou walina.
Si Yesus sumama' si esa toyaang rinasuk i sétang
(Mat. 17:14-18; Mrk. 9:14-27)
37Asi woondona mai, an tutuw i Yesus wo sé telu murit-Na meroso asi kuntung itu wo mai sé tou keli a si Yesus. 38An uner é tou keli itu, awéan esa tuama maangko' mangé a si Yesus. Icuana, “Guru, pekiupusenku, mangé woo sérén i Guru si toyaangku tuama, siake' in esa en toyaangku. 39An tutuw si sétang rumasuk ai sia, tumarépé'anke' sia mengangko-ngangko' wo en owakna ipawali-walintuang i sétang wo em ba'ba'na ka'i mengalewa'. Si sétang itu ra'ica mento' mengoko-ngokoi sia wo ra'ica kiim kumesot an owak i toyaangku itu. 40Pinekiupuskuo a sé murit i Guru e musér si sétang itu, taan ra'ica kawooan éra.”
41Wo icua i Yesus, “Éi camu tou ra'ica maéman wo icasélé'kowo! Akar kawisa réén Aku musti mento' ang karapi miow wo talesen mengento-ngento' akar kamu maéman a Yaku?” Wo icua i Yesus a si amang itu, “Walio mai si toyaangmu itu!”
42An tutuw i toyaang itu mangé rumuru a si Yesus wo iwalintuang i sétang sia an tana' wo émaanna en owak i toyaang itu mene'da-ne'dai. Taan si sétang itu rinomaan i Yesus ang karapi in depet kumesot wo si toyaang itu makala'us masama'. Kumawus in itu isarakan sumawel i Yesus si toyaang itu a si amangna. 43aPakasa sé tou am bitu mangaya-ngaya'ka' isuméré ing kakawasaan wangko' i Amang Kasuruan.
Si Yesus kumua ing kumarua in andumoro' im papaté-Na
(Mat. 17:22-23; Mrk. 9:30-32)
43bAn tutuw é tou mangaya-ngaya'ka'pé' isuméré si niéma' i Yesus wo icua-Na a sé murit-Na. 44“Lingan wo wéan rékén sumama-sama' pakasa sé icua-Ku anio': Yaku si Toyaang i Tou, isarakan oka é tou a sé tou makakawasa.” 45Taan ra'ica kaangéan é murit i Yesus sapa en aicua-Na itu. En aicua i Yesus itu icaenepé' wosama' en itu ra'ica kailekan é murit-Na. Wo séra kenengke' mamuéi andumoro' in itu a si Yesus.
Si séi réén e mangko-wangko'
(Mat. 18:1-5; Mrk. 9:33-37)
46 #
Luk. 22:24 Asi makasa, sé murit i Yesus meindo-indoan roma' andumoro' si séi e mangko-wangko' an uner éra. 47Taan kailekan i Yesus sapa em pawero-weroten éra wo indon-Na mai si esa toyaang teké' wo itulung-Na an duru-Na. 48#Mat. 10:40; Mrk. 9:37; Luk. 10:16; Yoh. 13:20 Icua-Na a sé murit-Na, “Si séi en sumungkul si toyaang teké' anio' ang karapi in arui en até ampa'paan makiit Yaku, sia sumungkulo Yaku. Wo si tou isumungkul Yaku, sia isumungkulo si Amang Kasuruan si imutus Yaku. Anaé, si séi si mawerot in owakna tou wawa', siao itu si tou iparangka-rangka'.”
Si tou ra'ica mengasundur icamu sia itu karapi miow
(Mrk. 9:38-40)
49Icua i Yohanes a si Yesus, “Guru, sinéré ami si esa tou musér sétang maké i ngaran i Guru. Wo péronen ami sia wosama' ra'ica maké i ngaran i Guru ampa'paan sia itu ra'ica mengakiit icita.”
50Taan icua i Yesus ai séra, “Ra'ica toro kamu méro sia, ampa'paan si tou ra'ica masundur icamu, sia itu marapit ai camu.”
Sé tou Samaria ra'ica kiim tumerima si Yesus
51An tutuw matawio in oras i Yesus icaangkai an sorga, pinusé'-Nao sapaoka Sia maangé an Yerusalem. 52Wo yutus-Na piraan tou rumior angé ai Sia. Séra itu mangém wo muntep asi esa roong an Samaria en tumu'tul sapake' sé paperlun en da'ipé' mai si Yesus. 53Taan sé tou asi roong itu ra'ica kiim tumerima si Yesus, ampa'paan em paangéan i Yesus maangé an Yerusalem. #9:53 En tampa paapo'an é tou Yahudi a si Amang Kasuruan am Balé Le'nas an Yerusalem, wo en tampa é tou Samaria maapo' a si Amang Kasuruan, ang kuntung Gerasim an sangkum in Samaria. Ampa'paan in ituo, ra'ica teriman é tou Samaria sé tou Yahudi lumangkoi in sangkum éra e mangé maapo' am Balé Le'nas an Yerusalem. 54#2Raj. 1:9-16 An tutuw si Yakobus wo si Yohanes sé rua murit i Yesus itu i makailek sapaoka sé tou Samaria ra'ica kiim tumerima séra wo icua éra a si Yesus, “Tuang, icasalé'-Mu réén pangileken ami en api a mangé en sorga owo en tumumpa mai en tumunu iséra?”
55Taan téintengen i Yesus séra wo romaan-Na. 56Wo séra mangé an doong walina.
Sa kumiit si Yesus musti mauli-ulit
(Mat. 8:19-22)
57An tutuw i Yesus wo sé murit-Na lumala'us im bawaya', awéan esa tou kumua a si Yesus, “Guru, yaku masalé' kumiit si Guru am bisake' en angéan i Guru.”
58Isowat i Yesus ai sia, “Si serigala awéan wileng paento'an, taniitu ka'i sé burung awéan em parumunan. Taan si Toyaang i Tou ra'ica wana paento'an.” 59Wo icua i Yesus a si esa tou walina, “Kumiito mai Yaku!”
Taan isowat i tou itu, “Guru, wéanai kaloasan aku maréng am balé eng kumubur si amangku.”
60Wo isowat i Yesus ai sia, “Si tou ra'ica maéman a Yaku ipeputé wo sé tou imatéo. Anaé, iwayao mio' sé tou ra'ica maéman a Yaku mangé kumubur si tou imaté. Taan ko mangém wo ipakua-kuao mangé andumoro' ing Kakolanoan i Amang Kasuruan am bisa-wisake'.”
61 #
1Raj. 19:20 Awéan ka'i tou walina kumua a si Yesus, “Guru, yaku masalé' kumiit si Guru, taan wéanai kaloasan aku e mangé kumua a sé pamaléku wo aku maréng oka mai sumawel eng kumiit si Guru.”
62Wo isowat i Yesus a si tou itu, “Sé tou mapajéko ra'ica toro maréng in somoi. Eng kaangéanna tana'i, sé tou makiit Yaku tioo memero-merot in andumoro' sé walina, sa memero-merotke' in tanu siitu, ra'ica patus mamuali tou ang Kakolanoan i Amang Kasuruan.”
Aktualisht i përzgjedhur:
Lukas 9: TNT
Thekso
Ndaje
Kopjo
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
En Taar Weru a nunuwu' é Tontemboan @ LAI 2018