Yohanes 12
12
Eng kécéi i Yesus sinolo in solo mawou manam
(Mat. 26:6-13; Mrk. 14:3-9)
1Enemé' ngando ka'i en témpona in endo wangko' Paska, si Yesus icateka'o an doong Betania am paento'an i Lazarus si tou tinou sumawel i Yesus am papaté. 2Am bitu sé tou tumu'tul ing kakanen wengi i Yesus, wo si Marta sumémbong sumelewir iséra. Si Lazarus wo sé tou walina makan mewali-wali wo si Yesus. 3#Luk. 7:37-38 Wo indon i Maria en solo mawou manam sangaperua in liter. En solo itu sosor keli em bééna, niéma' an tinanem si patuulen i narwastu. Wo solon i Maria eng kécéi i Yesus maké in solo itu wo lapenna im buukna. Wo an untep im balé itu wuta im boua in solo itu.
4Taan esaan asé murit i Yesus, makangaran i Yudas Iskariot si sumarakan oka si Yesus kumua, 5“Kéitu réén en solo mawou manam itu ra'ica aiwangkér? Sa iwangkér em bééna telu ngaatus dinar, en doit itu ro'na iwéténg a sé tou lengéi.” 6Aicua i Yudas in taniitu ra'ica ampa'paan sia masalé' tumawang sé tou lengéi taan ampa'paan sia rombit. Sia sumangkum mengaindo in doit kas si pengaéma' ai sia.
7Taan icua i Yesus, “Iwayao mio' si Maria méma' in taniitu a Yaku! Niéma'na en itu en tumu'tul in endo Yaku icubur sa. 8#Ul. 15:11 Ampa'paan sé tou lengéi kasake' mewali-wali wo icamu, taan Aku ra'ica' oka tatap mewali-wali wo icamu.”
Sé kikiiten é imam mawasa-wasa e maté si Lazarus
9Kelian ulit sé tou Yahudi luminga sa si Yesus am Betaniao, ampa'paan in ituo séra mangé am bitu en suméré si Yesus. Wo icasalé' éra ka'i suméré si Lazarus, si tinou sumawel i Yesus an uner é tou imaté. 10Wo sé kikiiten é imam mawasa-wasa e maté si Lazarus, 11ampa'paan sia tinou sumawel i Yesus si mangémai cumeli sé tou Yahudi maéman a si Yesus, wo ra'io masalé' kumiit ai séra.
Si Yesus sinungkul in arui wo iparayo-rayo an Yerusalem
(Mat. 21:1-11; Mrk. 11:1-11; Luk. 19:28-40)
12Asi woondona mai, kelian tou en luminga sapaoka si Yesus am bawayaano i maai an Yerusalem. An tutuw itu séra imali'uso am bitu ampa'paan matawio en endo wangko' Paska. 13#Mzm. 118:26 Séra mindo in lala-lalaina im palem, wo mangé sumungkul si Yesus ang karapi in suara taangko',
“Hosana!
Irayoo Sia si mai ang karapi i ngaran i Amang Kasuruan.
Irayoo si Colano é Israel!”
14Wo si Yesus makéré esa keledai wo'bas, wo Sia lumukut am bawo i celedai itu, tanu si aipatic ang Kitap Le'nas:
15 #
Za. 9:9 “Tioo maindé', éi tou Yerusalem,#12:15 “Tou Yerusalem”: An teks aseli aicua “Mangala'un Sion.” En Sion itu ngaran in tolaina si an Yerusalem.
séréno, si Colano miow ang karoro'ano maai
wo makalukut am bawo i celedai wo'bas.”
16An tutuw i Yesus muntep an Yerusalem makalukut am bawo i celedai wo'bas, sé murit-Na ra'ipé' makailek ing kaangéan im pakasa eng kamamualian itu. Taan kekawus i Yesus tinou sumawel am papaté wo iparayo-rayo wo pasiri-siriin, kata'néiano éra pakasa sé imamualio a si Yesus itu wo kinailekano éra e nats itu aipatico ang Kitap Le'nas.
17Kelian sé tou mewali-wali wo si Yesus an tutuw Sia tumowa si Lazarus kumesot ang kubur wo itumou sumawel sia an uner é tou imaté, ipengua-ngua éra a sé tou walina sapa e imamuali a si Lazarus. 18Ampa'paan in ituo keli en tou mangé sumungkul si Yesus, ampa'paan lininga éra andumoro' in tuus kakaya'kaan itu. 19Wo sé tou Farisi mengkuanan si esa wo sé walina, “Kita ra'ica toro méma' sapa-sapa! Sérén, icumelio sé tou mengakiit Sia.”
Si Yesus kumua in andumoro' im papaté-Na
20An uner é tou Yahudi sé imangé an Yerusalem en tuma'néi in endo wangko' Paska, awéan ka'i piraan tou Yunani. 21Sé tou Yunani itu imangé a si Filipus tou Betsaida an sangkum ing Galilea, wo icua éra ai sia, “Tuang, icasalé' ami woo meta'up wo si Yesus.”
22Si Filipus mangé kumua in itu a si Andreas. Wo séra in dua mewali-wali mangé kumua in itu a si Yesus.
23Wo icua i Yesus ai séra, “Maayo en témpona si Toyaang i Tou iparayo-rayo wo pasiri-siriin.#12:23 “Témpona i Toyaang i Tou iparayo-rayo wo pasiri-siriin”: tumuru' in témpona ing kepaté i Yesus. 24En ulitna icua-Ku mangé ai camu, sa en lulumbo ra'ica ayusew an tana' wo maté, en lulumbo itu kasake' esa. Taan sa en lulumbo itu maté, en lulumbo itu méé oka keli wua'na. 25#Mat. 10:39, 16:25; Mrk. 8:35; Luk. 9:24, 17:33 Taniitu ka'i wo icamu, si séike' e menonou asaloke in owakna in esa, ra'ica kéréanna eng katouan akar ing kauré-uré. Taan si séi si méé ing katouanna asi cayo'baan anio' eng kumiit Yaku, sia menonou oka akar ing kauré-uré. 26Si séike' en sumelewir Yaku musti kumiit Yaku. Wo am bisake' en angéan-Ku, am bitu ka'i awéan si maselewir Yaku. Si séi e maselewir Yaku sia siriin oka i Amang-Ku.”
27Icua ka'i i Yesus, “Wendu keli Aku. Ra'io kailekan-Ku sapa si musti icua-Ku. O Amang, tawangenai wo émaano mai Aku ra'ica mendam in oras ing kasusaan anio'. Taan Aku ra'ica toro mekiupus tanu siitu, ampa'paano i mendam ing kawenduan anio' Aku mai ang kayo'baan anio'. 28O Amang, ituru'o mai a sé tou eng kawangko' ing kawasa-Mu.”
Wo kalingaan en suara an sorga owo, “Aituru'-Kuo eng kawangko' ing kawasa-Ku wo ituru'-Ku oka ka'i sumawel eng kawangko' ing kawasa-Ku itu.”
29Kelian tou makatulung am bitu iluminga in suara itu. Awéan tou en icumua en itu erut ing guntur, wo awéan ka'i sé makua sa en itu suara é malaékat sé mapaar wo si Yesus.
30Wo icua i Yesus, “En suara itu aicua torona miow, ra'ica torona-Ku. 31Intarépé' an témponao si Amang Kasuruan makim sé tou ang kayo'baan anio', wo si kikiiten é sétang si makakawasa ang kayo'baan anio' iténdél oka ang kesot. 32Wo an tutuw-Ku airangka' ang kayu salip ang kayo'baan anio', émaan-Ku oka pakasa en tou maai a Yaku.” 33Si Yesus inumuwu' in taniitu eng kumua mulur tambisa Sia maté.
34 #
Mzm. 110:4; Yes. 9:6; Yeh. 37:25; Dan. 7:14 Wo icua é tou keli itu a si Yesus, “Kailekano ami ang Kitap Le'nas, si Mesias menonou oka akar ing kauré-uré. Tumambisa réén wona' icua-Mu si Toyaang i Tou musti irangka' ang kayu salip? Si séi réén si Toyaang i Tou itu?”
35Icua i Yesus ai séra, “Ra'io uré en témpona en sendot itu mewali-wali wo icamu. Anaé, maya'o mangé ang karoro'an en sendot itu awéané' wosama' eng kariréimbengan ra'ica kumawasa icamu. Si séiké' mangé si mawaya' ang kariréimbengan, ra'io kailekanna am bisa en angéanna. 36Anaé, ang karoro'an in sendot mewali-walipé' wo icamu, musti percayan iow en sendot itu wosama' kamu mamuali toya-toyaang in sendot.”
Kekawus i Yesus kumua in taniitu, Sia mangé an tampa si ra'- ica kailekan é tou keli.
Kelian tou Yahudi ra'ica maéman a si Yesus
37Mandé ka'i kelio eng kakaya'kaan niéma' i Yesus an dior é tou Yahudi, taan Sia ra'ica émanen éra. 38#Yes. 53:1 Sé tou Yahudi ra'ica maéman in taniitu, ampa'paan en Taar si aipatic i nabi Yesaya musti lekepen,
“O Kasuruan, si séi réén sé mercayao in abar si ipakua ami?
Wo a si séi réén eng kawasa i Casuruan aipapaturu'o?”
39Anaé ra'ica pinercaya éra ampa'paan si nabi Yesaya icumuao ka'i,
40 #
Yes. 6:10 “Niéma'o i Amang Kasuruan em beren éra mawola,
akar séra ra'io toro suméré,
wo ka'i kineté-Nao en até éra,
akar ra'io kailekan éra sé wutul.
Wo in taniitu, séra ra'ica mape'dis
wo ra'ica samaan-Ku.”
41Aicua i Yesaya in taniitu, ampa'paan indior sinérénao eng kawangko' i Yesus, wo ipengua-nguanao andumoro' Sia.
42Mandé in taniitu, kelike' asé kikiiten é tou Yahudi mercaya a si Yesus. Taan ra'ica kiim éra mangaku im paémanen a sé tou, ampa'paan caindé' éra péronen é tou Farisi e muntep am balé paapo'an é agama Yahudi. 43Ampa'paan si lébé icasalé' éra, irayo é tou wotaré irayo i Amang Kasuruan.
Sé tou akimen oka kiit i nunuwu' i Yesus
44Wo si Yesus kumua in taangko', “Si séike' e maéman a Yaku, sia ra'ica asalo mercaya a Yaku taan maéman ka'i a si Amang Kasuruan si mutusai Yaku mai ang kayo'baan anio'. 45Wo si séike' en suméréo Yaku, sia ka'i suméréo si Amang Kasuruan si mutusai Yaku. 46Yaku mayo ang kayo'baan anio' e mamuali sendot a sé tou, wosama' sé tou maéman a Yaku ra'ica mento' ang kariréimbengan. 47Sé tou luminga sé ipakua-Ku, taan ra'ica paémaanna, ra'ica Yaku e makim iséra. Ampa'paan Yaku mai ang kayo'baan anio' ra'ica i makim sé tou taan en lumowir séra. 48Taan si séike' eng kumélong Yaku wo ra'ica tumerima sé ipakua-Ku, séra ukumen oka i Amang Kasuruan asi endo kaka'puan kiit i nunuwu' sé aicua-Kuo. 49Ampa'paan e nunuwu'-Ku ra'ica an owak-Ku in esa owo, taan asi Amang si mutuso mai Yaku. Siao si rumu'du'o mai Yaku eng kumua sapa si musti icua. 50Wo kailekan-Ku em perénta-Na itu makawali sé tou ang katouan akar ing kauré-uré. Ampa'paan in ituo, sapa sé ipakua-Ku meputé wo si aicua i Amang a Yaku.”
Aktualisht i përzgjedhur:
Yohanes 12: TNT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
En Taar Weru a nunuwu' é Tontemboan @ LAI 2018