SENESI 7
7
Lomaki
1Nee ui leva e te Eteleno kia Noe: Ulu ki te aleka, ia koe mo tou famili; koteuhi kua au sio e ke agatonu toko tahi i oku mua i te taitupu aeni. 2E ke too anai kia koe ni hoai manu e fitu i te u manu maa fuli, he manu tagata mo he manu fafine; mo he hoai manu e tahi i te u manu uli fuli, he manu tagata mo he manu fafine; 3pea mo ni hoai manu foki e fitu o te u manulele o te lagi, he manu tagata mo he manu fafine, o tupu ke ke fakamauli onatou faahiga i oluga o te kele katoa. 4Koteuhi, kei toe pe ni aho e fitu, pea e au fakato anai te ua ki te kele ia aho e fagofulu pea mo po e fagofulu, pea e au pulihi anai i oluga o te kele te u mea fuli ae nee au fakatupu.
5Nee fai leva e Noe te u mea fuli ae nee fakatotonu e te Eteleno kia ia.
6Nee tau onogeau ia Noe, i te aho ae nee to ai leva te lomaki vai ki te kele. 7Pea nee ulu leva ia Noe ki te aleka mo ona foha, mo tona ohoana pea mo te u ohoana o ona foha, o tupu ke natou mauuli mai te lomaki vai. 8Ko te u manu maa pea mo te u manu uli, mo te u manulele pea mo te u manu liliki ae nee taka i oluga o te kele, 9nee omai leva kia Noe, o taki taumatua, ko he manu tagata mo he manu fafine, o mulimuli ki te mea ae nee fakatotonu e te Eteleno kia Noe.
10Hili te u aho e fitu, nee to leva te lomaki ki te kele. 11I te tau onogeau o te mauli o Noe, i te lua mahina, i te aho hogofulu ma fitu o te mahina, i te aho aia, nee mapuhi leva te u matapuna fuli o te moana lahi ki oluga, pea nee ava leva te u matapa o te atu lagi. 12Pea nee to leva te ua ki te kele ia aho e fagofulu mo po e fagofulu. 13I te aho totonu aia nee ulu leva ki te aleka ia Noe, mo Semi, mo Kami, mo Safeti, ko te u foha o Noe, mo te ohoana o Noe, pea mo te u ohoana e toko tolu o te u foha o Noe mo natou: 14io natou, mo te u manu fuli o mulimuli ki onatou faahiga, manu lalahi o mulimuli ki onatou faahiga, mo manu liliki o mulimuli ki onatou faahiga, mo te u manu totolo o mulimuli ki onatou faahiga, pea mo te u manulele o mulimuli ki onatou faahiga, mo manulele liliki fuli, pea mo manu pakakau fuli. 15Nee natou feulufi fuli leva ki te aleka kia tafa o Noe, o taki taumatua, te u mea fuli ae nee tukumanava. 16Nee ulu leva he manu tagata mo he manu fafine i te u faahiga manu kehekehe, o mulimuli ki te mea ae nee fakatotonu e te Atua kia Noe. Pea nee mapunui leva e te Eteleno te matapa i muli o Noe.
17Nee to leva te lomaki ki te kele ia aho e fagofulu. Nee hake leva te vai ki oluga o lagai te aleka, pea nee maanu leva ia ia i oluga o te fenua. 18Nee lelesili hake leva te vai ki oluga, pea nee mafola leva ia ia i oluga o te kele katoa, kae nee maanu leva te aleka i oluga o te vai. 19Nee lelesili hake leva te vai ki oluga, o kaku ki te temi ae nee fakalaka ai leva ia i oluga o te u tumutumu o te u mouga maoluga fuli ae nee tuu i lalo o te lagi. 20Nee fakalaka leva te vai i oluga o te u tumutumu o te u mouga maoluga i ni meta e fitu mo te vaelua: nee pupuli leva te u mouga maoluga fuli i te vai.
21Nee mamate leva te u mea fuli ae nee mauli i te kele, tatau i te u manulele, mo te u manu lalata, mo te u manu fuli o te vao, mo te u manu totolo fuli o te kele, pea mo te u tagata fuli. 22Nee mamate leva te u mea fuli ae nee tukumanava, ae nee natou mau he manava i onatou pogaihu, pea nee mauli i te kele moamoa. 23Nee mamate leva te u mea fuli ae nee mauli i oluga o te kele, mai te tagata o kaku ki te manu lalata, mo te u manu totolo pea mo te u manulele o te lagi: nee tamatei fuli leva natou ke puli i te kele. Nee toe pe ia Noe mo natou ae nee nonofo mo ia i te aleka. 24Nee nofo leva te vai i oluga o te kele ia aho e teau nimagofulu.
Aktualisht i përzgjedhur:
SENESI 7: WB2011
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland