Хьунухь 15
15
Аллагьдинни Ибраман икьрар
1И вакъиаяр кьиле фейи са тӀимил вахтунилай Ибрамаз ахварай Ребби акуна ва адан гафарин ван хьана:
«КичӀе жемир, Ибрам.
Зун – ви къалхан я.
Ви савкьват лап булди жеда».
2Ибрама лагьана: «Зи Агъа тир Ребби! Ви савкьватар зи квез я, зун аялар авачиз рекьидатӀа? Зи варис Шамдай тир Элиэзер я».
3«Вуна заз веледар ганач кьван, – лагьана Ибрама – гьавиляй зи килфетдик кваз уьмуьр тухузвайди зи ирсдарни жеда!»
4И чӀавуз Ибрамаз Реббидин гафарин ван жеда: «Ваъ, адакай ви варис жедач: ви варис ви тумуникай аладда!»
5Реббиди Ибрам алачухдикай къецел акъудна ва адаз лагьана:
«Килиг кван цавуз,
гьисаб ая гъетер:
вавай абур вири гьисабиз жедани?»
«Ви несилни, – лагьана Реббиди, – кьадардиз гьа икьванди жеда!»
6Ибрама Реббидихъ иман авуна – Реббидини им адан гьахъ-михьивал яз кьабулна.
7Реббиди Ибрамаз лагьана: «Зун, и чилин иесивал авунин мураддалди ам ваз гун патал, вун Халдейдин Урдай иниз гъайи Ребби я». 8«Зи Агъа тир Ребби! – лагьана Ибрама, – и чил заз жедайдан лишан вуч я?» 9Реббиди лагьана: «Зи патав инал пуд йисан дуьгве, пуд йисан цӀегь, пуд йисан гьер, тӀапӀас ва са лифни гъваш».
10Ибрама гьайванар гъана ва абур гьар сад кьве патахъ пайна, паярни сад садан къаршида эцигна. Къушар ада пайи паяр авунач. 11Къузгъунар лув гана кӀватӀ хьана, амма Ибрама абур чукурна.
12Рагъ акӀайла Ибрам кӀеви ахварин кӀеме гьатнавай. Зурба ва пис кичӀ акатна адаз хаф янай.
13Реббиди Ибрамаз лагьана: «Ваз чир хьухь, ви несилар гъурбатда масанай атана ацукьнавайбур яз хьана, кьуд виш йисуз лукӀвиле ва зулумдик кваз жеда. 14Амма абур лукӀвиле тур халкьдин гьахъ-дуван За ийида – ахпа ви несилар анай экъечӀна хъфида, чебни девлет авай инсанар яз.
15Вунни секиндиз бан-бубайрин кьилив рекье гьатда,
Агьил яшдин гьуьрмет авай кьуьзек яз суруз эвичӀда.
16Ви эвледрин анжах кьуд лагьай несил иниз хкведа, вучиз лагьайтӀа амарийрин гунагьар гьеле чпин дережадив агакьнавач».
17Рагъ акӀана ва йиф алукьна. И вахтунда гум алай мангъал ва цӀай квай лаш пайда хьана ва кьве патахъ пай авунвай гьайванрин арадайтӀуз фена.
18И юкъуз Реббиди Ибрамахъ галаз икьрар кутӀунна: «Мисридин селдилай гатӀунна чӀехи вацӀ Эфратдал кьван авай вири чилер За ви несилрин ихтиярда твада, 19къабилийрин, къенизийрин, къадманийрин, 20хетийрин, перизийрин рефайрин, 21амарийрин, къенанвийрин, гиргашийрин, ябусвийрин вири чилер».
Aktualisht i përzgjedhur:
Хьунухь 15: ЛезПК
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© Институт перевода Библии, 2010-2024