Khuurakikha 3
3
Shishoonako shishanyoowa
1 #
Makh 2.24; Bimb 12.9; 20.2 Indemu niyo yaba iyikasuusakasuusa naabi khuufuurakho tsisolo tsitsiindi tseesi Umukasya Wele aakhola. Shifukhu shitweela yeetsa isi umukhasi, yaamureeba iri, “Ilala Wele aabalomela ari mukhalyakho lituunda lyoosi khukhwaama khu kuusaala kwoosi kwe mu mukuunda ta?”
2Umukhasi naye waakilamwo ari, “Ifwe Wele aakhulomela ari khunyala khwaalya lituunda khukhwaama khu kuusaala kwoosi kwe mu mukuunda, 3ne khuurusakho aakhulomela ari khukhalyakho lituunda khukhwaama khu kuusaala kukuuli akari mu mukuunda ta. Aakhulomela ari khukhalyakho namwe khwaakuwaambakho ta. Isho siinga khushikhola, khukhaafwe.”
4Indemu nayo yeelamwo iri, “Khuufwa, simukhaafwe ta! 5Lwekhuuba Wele waamanya ari, inywe siinga mulyakho lituunda khukhwaama khu kuusaala ukwo, tsimoni tseenywe tsilibiimbuka, mube nga Wele umweene, munyale khuumanya buulayi ni buubi.”
6Aryo umukhasi waabona nga lituunda lili liilayi naabi khuulya, ni khuumanya ndi tsimoni tsinyala tsaabiimbukha, khuufuna kamakhula. Shikila abukula lituunda waalya. Lwanyuma waabukula liliramile waaliwa umuseetsa weewe, naye waalya. 7Khaangukho boombi ni baamala khuulya bari, beebona nga bali bukhuna. Lwanyuma kila beenabila kamasaafu ke kimisaala kimifigi, beekholelamwo bye khuukwaara.
8Uri tsinyaanga tse angoloobe, nga antsye awoleelile buulayi, umusaani n'umukhasi weewe baawulila luswaaki, nga Umukasya Wele akyeendakakho mu mukuunda. Baryo baarya luukali naabi, kila batsya beebisa iyo mu misaala kye mu mukuunda. 9Ne Umukasya Wele waalaanga umusaani nga amureeba ari, “Uli waheena?”
10Umusaani naye weelamwo ari, “Ise nga nimbuliile luswaaki, nga uli khuukyeenda mu mukuunda, naarya naabi, naatsya neebisa, lwekhuuba imbeele bukhuna.”
11Wele naye waamwiilamwo ari, “Naanu umweene ukhubooleele iwe ari uli bukhuna? Waaliile khu kuusaala kweesi ise nakhulakila ndi ukhalyakho ta?”
12Umusaani waamwiilamwo ari, “Umukhasi isi iwe waambeele khuuba ni nase, niye uwumbeele lituunda khukhwaama khu kuusaala nase naalya.”
13 #
2 Kor 11.3; 1 Tim 2.14 Umukasya Wele waareeba umukhasi ari, “Shiina shino sheesi ukholile?”
Umukhasi naye weelamwo ari, “Indemu niyo iyimbomeele, nenyoola nga naaliile.”
Wele akhala kumusaango
14Aryo kila Umukasya Wele alomela indemu ari,
“Lwekhuuba iwe waakholile shishiindu shishifwaana shiri, mu bisolo byoosi,
nga bibyaayo namwe ibyo bye mwirome,
iwe wenyene niye uuli khuufuna shitaambiso shino.
Iwe kane waalamile aasi khu luta lwoowo, naluundi ulyatsake lifukhuulu,
biifukhu byoosi bye buulamu bwoowo.
15 #
Bimb 12.17
Naluundi, indi khuutsya khurawo buusiku akari oowo n'umukhasi yuno,
ni akari e babetsukhulu boowo ni babeewe.
Mutweela khu betsukhulu beewe alikhutwaanga kumurwe,
ni nawe uli muluma isukunyi.”
16Lwanyuma kila Umukasya alomela umukhasi naye ari,
“Indi khuulooselakho khu butsiina bwoowo bwe khuusaala umwaana,
ulisaalila babaana mu butsiina buukali.
Abe byakhaba biryo, kane ube nga ushiwotooma khuubatsaka n'umuseetsa woowo,
ni naye kane abe nga niye ukhuwula iweewe.”
17 #
Heb 6.8
Umukasya waalomela Adamu naye ari,
“Iwe urekeeresile byeesi umukhasi woowo akhubooleele,
waalya lituunda khukhwaama khu kuusaala
kweesi nakhulakila khuulekha khulyakho ta.
Ni nashiryo, naatsubile liloba lweesho sheesi ukholile.
Kane urekanatsake busa nio unyalise khuufuna bye khuulya,
buulamu bwoowo bwoosi.
18Khu liloba kane khutsowatsakekho kamawa ni kamaraakalu,
ni nawe kane ulyaatsake bilimwa bye mu mukuunda.
19Kane uraambatsake naabi ukyesemulile, nio ufune bye khuulya,
khukhwoolesa n'uliilayo mwiloba mweesi waama.
Iwe wakholebwa khukhwaama mwiloba,
uryo uli liiloba busa,
ni mu liloba lyeene nimwo mweesi uliikobolayo.”
20Adamu waatwiikha umukhasi weewe lisiina ari Eva,#3.20 Eva: Mu Luheburaniya bari Haawa, shishimanyisa “umulamu.” lwekhuuba niye maayi we babaandu baalamu boosi.
21Lwanyuma Umukasya Wele waakholela Adamu n'umukyelama weewe bikwaaro khukhwaama mu mahaafu ke bisolo, waabakwaarisa.
22 #
Bimb 22.14
Kila Umukasya Wele aloma ari, “Ari umusaani uyu wekyelile nga mutweela khuusifwe, waamanyile khukhwaawulawo shiilayi ni shiibi. Aryo s'ali ni khuufukiilisibwa khuutsanuusa kumukhono kweewe luundi, waabuta lituunda khukhwaama khu kuusaala kwe buulamu, shishiinyala shaamunyalisisa khuumenyawo biilo ni biilo.” 23Aryo kila Umukasya Wele amuwoona khuurura mu mukuunda kwa Edeni, khuutsya ibulafu, atsye alime khu liloba mweesi aabuumbibwa. 24Musaambo iyo, Wele waawoonamwo umusaani, lwanyuma khu luwaande lwe bwaama inyaanga we kumukuunda kwa Edeni ukwo, waarayo bibuumbe bibili bibiilikho tsindaaha, ni lurima lulumweekhamweekha, khuukhiinga kumukhoosi kukuutsya khu kuusaala kwe buulamu.
Aktualisht i përzgjedhur:
Khuurakikha 3: LCE
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Lumasaaba Catholic Bible © The Bible Society of Uganda, 2017.