LUK 22
22
Ram tau Leo huri vei vagamate i Jisas
1A tarogi mo kakarani huri na hinagai bereti siaga, ngehi u ware ve a Hinagai Halegagaliu. 2Ira muei rugurugu ko ira huhui talo Leo hora noi Mosis ram hike huri ve ran ue rorongogi Jisas, huri ingere ram matagugi na sinobu.
I Judas mo ladoutu vena Rono na leoi gai Jisas
3I Setan mo ahu lolo loloi Judas u warea ve i Iskariot, ingeie gatagale denire hangavulu domwagi gairue. 4I Judas mo mwalue mo vano mo laqalaqa meire muei rugurugu ko meire leogoro soldia talo Sara Gogona, huri ve vin siregi Jisas wuraha lawera. 5Ingere ram rong garea huri ko ram waratau ve rain bete na homu lawea. 6I Judas mo masinge mwerehi ko mo hikesi na mahogi u garea vena rongo na leoi gai Jisas lune a sinobu rahe ilo tea.
I Jisas mo vai vagatai ve rain geni na Hinagai Halegagaliu
7A ranigi hi mo vomai lo taroi hinagai bereti siaga ram wehi na natui sibsib huri na Halegagaliu lolona. 8I Jisas mo hora Bita tona Jon mo veve lawera vena, “Neri vano, neri vai vagatai na Halegagaliu huri ve dai geni.”
9Rom huie vena, “?Gom lado ve gori vei vagataie logo?”
10Mo veve vena, “Neri vano lo togagi venue, ko neri haqe na tangaloi mo wali na vurugi wei, neri hurie ko vin ehu lolo hava vale, 11neri veve lawe na tagi vale vena, ‘A Huhui mo veve lawego vena, ?A mahoi vale hurieu nge hilogo, ve gain geni na Halegagaliu meire noku rorongtagi aie? 12Ko nge vin haharagi lawe gimiu na mahoi vale lawua namawe, u vei vagatai beno na tanoi gaganie aie. Neri vei vagatai huri gide aie.”
13Ingere rom vano rom haqe na gineu doluegi mwerehi i Jisas u veve lawera, ko ingere rom vai vagatai na hinagai Halegagaliu aiehi.
A Gaganie Revirevi nona Huqe
14Lo taro u vomai, i Jisas mo toga lo tanona meire nona gaihora lo tanoi gaganie, 15ko mo veve lawera vena, “Nam tarani garagara ve nain geni na Hinagai Halegagaliu ngaha mei gimiu siu nai gagarasi. 16Nam veve lawe gimiu vena, nain he gani na hinaga ngaha tea taligu vin dadari vin vagahorongi na iloiloi hinaga hi lo mwasoana garaqa God mo ratahigi lolona.”
17Siu i Jisas mo lai na laha, mo vevegareagi God, siu mo veve vena, “Nen lai ngaha, nen bete vatavatahagi gimiu. 18Nam veve lawe gimiu vena den hibagataha nain he inu te taligu dena waen ngaha vin dadari a mwasoana garaqa God mo Ratahigi lolona vin vomai.”
19Siu mo lai na bereti, mo vevegareagi God hurie, mo vise vurivurie, mo bete lawera, mo veve vena, “Nge ngaha a betuku [mo lai huri gimiu. Nen vai mwere ngaha gina ladotaligu hurieu ginie.” 20Mwerehi vage lo tagui gaganie mo bete na laha lawera, mo veve vena, “A laha ngaha a varatau garaqa noi God a daiku mo vai siagaginie, a daiku hi vin hale huri gimiu.]
21“Nge nen leo, gatagale den gimiu mo toga meieu lo tanoi gaganie vin rongo na leoi geku. 22Huri ineu i Netui Tangaloi nain mate mwere i God u lado vagatai, nge a hahagavi huri na tangaloi hi vin siregieu!”
23Siu ingere ram tauvuigi ram vui huiginire vena ihine hi vin vei mwerehi.
A vui garogi huri na tanoi lawua
24Ira rorongtagi ram tauvuigi ram vui garogi huri ve ihine vin lei na tanoi lawua garagara denire. 25I Jisas mo veve lawera vena, “A ratahigi talolo ure ngaha ram huqegi goro na nora sinobu, ko ira tomtomuegi ram lai na henagi ve ‘A Buluana nora Sinobu.’ 26Nge ngaha vin he mwerehi tea mei gimiu. Ne ihine hi den gimiu u lawua garagara vin mwere na mwalakelo, ko a tomtomuegi vin mwere na tangaloi tabanagi. 27?Ihine hi u lawua liu, ngehi mo toga mo gagani hogosie sige ngehi mo bete na hinaga lawea? Nen ilo ve a tangaloi hi mo toga mo gagani u lawua u liu. Nge ineu ngaha mei gimiu mwere ihine hi mo bete na hinaga.
28“Gimiu neu toga meieu lo tarogi ingere rau vagaromasigieu; 29ko mwere i Tamaku u bete na tanoi ratahigi laweau, mwerehi vage ineu nain bete na tanoi ratahigi lawe gimiu. 30Siu nein geni ko nein inu meieu lo tarogi vin vomai ngehi nain ratahigi aie, ko nein toga lo tanoi togatoga ratahigi huri nein vevegi na garogi a duvi Israel hangavulu domwagi gairue.
I Jisas mo veve tare huri ve i Bita vin tahae
31“Saemon, Saemon! Gon rongo! I Setan u nevu ko i God u siregi lawea ve vin vei lehi gimiu ve vin vilewahera rau esi den gimiu, mwere mo vilewahe na tagurui hinaga dena hinagagi. 32Tau ineu nau tataro beno hurigo ve a nomu ladohogo na mese soi. Ko lune goin tudori vomai meieu, gon vai siagagi retuemu taligu.”
33I Bita mo duvi vena, “Huqe, ineu nam rarai ve nai vano lo valei vauveu meigo ko nai mate meigo.”
34I Jisas mo duvi vena, “Bita, nam veve lawego vena, gaqarigi lolo bongi ngaha a toa vin he tarere te tau, nge iniko goin tahau vagatolu.”
A tangai mane, a gete ko a buei vuro
35Siu i Jisas mo veve lawera vena, “?Lune nau hora gimiu neu vano ve nein toretore nehe hako te tangai mane sige a gete ko a butu, tau igimiu neu mahogi lo hava gineu tea?”
Ngere ram duvi vena, “Hatie.”
36I Jisas mo veve vena, “Nge siserigi ngaha tare ve hine tea a nona tangai mane sige a nona gete vin hakovie. Tare ve hine tea hatie nona buei vuro garea vin sogagi na luqana ko vin voli na nona gena manei luqe hi. 37Huri nam veve lawe gimiu vena, mo eno ve vin vagahorongi na Reve reve Gogona luku, u veve vena, ‘Ingere rau velu bubuginie meire ue balu.’ Huri a tarogi u vomai beno ve vin vagahorongi na havai u reve hurieu.”
38Ira rorongtagi ram veve vena, “Leo, Huqe! Nge ngaha a buei vuro gairue!”
I Jisas mo veve vena, “U tatarise beno!”
I Jisas mo tataro lo Vusi Oliv
39I Jisas mo mwalue dena qatui venue hi ko mo vano mwerehi mo vai gesegi lo Vusi Oliv. Ko ira nona rorongtagi ram hurie. 40Lune mo vomai lo ute hi mo veve lawera vena, “Nen tataro vate vai nem soi lo kalikeli.”
41Siu mo dige beragi mala vagahao denire, mo sisiqeu ko mo tataro, 42mo veve vena, “Mama, tare ve a nomu tarani, gon lai vohogi na laha ngaha denieu. Nge hatie noku tarani nge a nomu tarani na eno lune.”
43A engsel ta eulu mo sereluae lawea ko mo vai siagagi na domine. 44Mo lolovono liu huri na rongogagarasi lolo domine, siu mo tataro siaga taligu, a raratongine mo hale sulo tano mwere na dai mo hale.
45Lune nge u tataro u rovo, nge mo labe, mo vano taligu lobera nona rorongtagi, mo haqera ram maturu, a vevenagi ingere ram hahagavi. 46Mo veve lawera vena, “?Huri havai gimiu nem maturu? Gimiu nen maraga, nen tataro vate vai nem soi lo kalikeli.”
Mo rongo na leoi gai Jisas ko ram wiri bibie
47Lune i Jisas mo laqa mosigei, a sinobu ram dadari, i “?Judas, wa gom rongo na leoi gaku, i Netui Tangaloi, gina vano tuturedu lobei Jisas, mo sungunie, 48Jisas mo veve vena, “Judas, wa gom rongo na leoi gaku, i Netui Tangaloi, gina sunguni?”
49A rorongtagi hi ingere mei Jisas ram lehi na gineu hi vin vei, ram veve vena, “?Huqe, wa gain gilu gina nomai buei vuro ingere ngaha?” 50Ko gatagale denire mo tai vano lo tangaloi tabanagi noi rugurugu lawua ko mo tai sue na qerona lo matuana.
51Nge i Jisas mo veve vena, “!Mese, u rovo hi!” ko mo tango vano lo qeroi tangaloi hi ko mo garea taligu.
52Siu i Jisas mo veve lawera muei rugurugu ko ira leogoro soldia talo Sara Gogona ko ira tam tamaragai ngerehi rau vomai ve ran laie, mo vena, “?Gimiu nem vomai mena buei vuro ko a ruqi ve nein wiri bibieu, mwere huri ve ineu i uebalu? 53Vataha bongi nau toga mei gimiu lo Sara Gogona, nge ne he vai leo tea ve nen wiri bibieu. Nge ngaha a tarogi lawe gimiu ve nein vei mwere ngaha, lune a managi nona dodogi mo ratahigi.”
I Bita mo taha Jisas
54Ram wiri bibi Jisas, ram vano meie sulo valei rugurugu lawua, nge i Bita mo hurire mala vagahao denire. 55Rau huru na avi lolo livugei ara, ko i Bita mo bulu meire ram madinugi na avi hi. 56Lune a taqalugu gatagale a tangaloi tabanagi mo lehe hi mo toga lobei avi, mo leo bibie, mo veve vena, “A tangaloi ngaha vage nge mei Jisas.”
57Nge i Bita mo tahae, mo veve vena, “Vavine, na he iloe tea.”
58He ribi tea a tangaloi dolue vage mo lehi Bita, mo veve vena, “Iniko gatagale vage meire.”
Nge i Bita mo duvi vena, “Tuana, ineu hatie!”
59Siu a mahoi aho gatagale goro a tangaloi dolue vage mo veve siaga vena, “A hogo, a tangaloi ngaha ingeie mei Jisas, huri ingeie vage ta Kalili.”
60Nge i Bita mo duvi vena, “Tuana, nahe ilo na havai tea hi gom veve.”
Siserigi hi, lune mo laqa mosigei, a toa mo tarere. 61A Huqe mo tu dori mo leo bibi Bita, ko i Bita mo lado haqe na leoi Huqe hi u veve beno lawea vena, “A toa vin he tarere te tau lolo bongi ngaha, nge iniko goin tahau vagatolu. 62I Bita mo mwalue mo ngara.
Ram sovu Jisas ko ram talie
(Matiu 26.67,68; Mak 14.65)
63A tangaloi ram leogoro Jisas ram sovue ko ram talie. 64Ram vivi goro na matana, ram huie vena, “Gon tige ve ihine mo tutuhigo!” 65Ko ram veve asiesiginie gena leo u sao.
Ram lai Jisas sulo kot
(Matiu 26.59-66; Mak 14.55-64; Jon 18.19-24)
66Lolo robongi siaga ira tam tamaragai ko ira muei rugurugu ko ira huhui talo Leo hora noi Mosis ram sone bubugi, ko ram lai Jisas mo vomai lo nora Kansel ve rain veveginie. 67Ram veve vena, “Gon veve huri lawe gamai ve iniko i Kraes sige hatie.”
Mo duvi lawera vena, “Tare ve nam veve lawe gimiu, nein he ladohogogieu tea. 68Ko tare ve nain hui gimiu gina huihui, nein he duvieu tea. 69Nge den hibagataha ineu i Netui Tangaloi nain toga lo matuei God managi.”
70Ingere doluegi ram veve vena, “?Wa iniko hi i Netui God?”
Inge mo duvi lawera vena, “Igimiu nem veve ve ineu hi.”
71Ko ram veve vena, Da he tarani tea ira tangaloi ve rain veve hurie, nge igide siboda dam rongo na nona leo.
Aktualisht i përzgjedhur:
LUK 22: HNT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
Bible Society of the South Pacific, 2013