Mathayo 8
8
1Na ci bɛn piny ne kuur nom, go dun dit kuany cok. 2Ŋɛmka, go ran de abiɛl bɛn enɔŋ en, bii ku door, jiɛm, Ye Bɛnydit, na tɔ ne yipiɔu ba ɣa cɔk pial, e kaleu. 3Go yeciin thiu, ku jiɛk, ku jiɛm, Ye katɔ ne ɣapiɔu; ne yin pial. Go abiɛl dac jaal elantoŋtɛi. 4Ku yooke Yecu, Ye duɔne lek ran dɛ; lɔɔr dholdu, nyuɔthe rɔt bɛny de ka ke Nhialic, ku game miɔc ci loŋ de Mothe, bi kek ye nyic.
5Ɣɔn cen lɔ Kapernaum, go bɛny de lathkeer bɛn enɔŋ en, bii ku lɛŋ, 6jiɛm, Ye Bɛnydit, awundie ee dhiɛc piny ɣot, abec ee cath thueet, atok areet. 7Go yɔɔk, Ye an bi lɔ ba lɔ cɔk piɔl. 8Go bɛny de lathkeer dhuk jiɛm, Ye Bɛny, an ce piath a ba lɔ ɣondie: tom jam, ke awundie abi pial. 9Ɣan tɔ ne riɛric eya, ku an nɔŋ lathkeercie: na yɔɔk ŋɛk, Ya lɔɔr, e kalɔ; ku na yɔɔk ŋɛk, Ya bar, e kabɔ; ku na yɔɔk awundie, Ya loi kene, e kaloi. 10Na ci Yecu ye piŋ, ke gɛi, ku yook kɔc kuany yecok, Ye we ya yɔɔk neyic, ya ɣan ken gam diit yinla yok agut ci Yithrael. 11Ku we yɔɔk keek, ya juaac abi bɛn ciɛn ku bii tueŋ, ku bik nyuc kene Abraɣam, ku Yithak, ku Jakob, ne ceŋ de pan nhialic: 12ku wɛɛt ke ceŋ aabike ciɛc biyic ne cuɔlic: te bi ya te de dhieu ku nyi de lec. 13Ku yook Yecu bɛny de lathkeer, Ye lɔɔr tedu, gam cin e gam, eka bene ye luɔi yi. Ku go awut pial ne yethane.
14Te ci Yecu bɛn ɣon de Petero, go dhiɔm de Petero ŋem ne tɔ piiny nɔŋ guɔp alɛɛth. 15Go jak ciin, go alɛɛth lɔ piny: go rɔt jɔt ku le luɔɔi. 16Ɣɔn thei, ke kek bii kɔc juɛc ci jak rac ke dɔm: go jak rac ciec ne kegup ne wɛt, ku cɔk kɔc bec kedhia cɔk dem: 17bi ke cii Yithaya nebi luel bi ya yic, jiɛm, Ye kee ka ye wɔ niɔɔp laar, ku ɣɛɛc benyda.
18Ɣɔn ŋeme Yecu dun diit tɔ kene yen, go ke yɔɔk bi lɔ lɔŋti. 19Go dugɛr bɛn, ku yook, Ye Dupioc, yin ba ya kuany cok ne ɣan yin ke lɔ thin kedhia. 20Go Yecu yɔɔk, Ye awan aanɔŋ adhumken, ku diɛt nhial aanɔŋ ɣoot; ku Wen de raan acin te yen yenom kan. 21Ku yooke ran toŋ de kɔcpiocke, Ye Bɛnydit kɔn ɣa puɔl ba lɔ ba awa lɔ thiɔk. 22Go Yecu yɔɔk, Ye ye ɣa biɔth, ku ne kɔc ci thou thiɛk kɔcken ci thou.
23Te cen lɔ ne riaiic, go kɔckek piocke kuany cok. 24Ŋɛmka, go yom dit go tuɔl bɛɛr, agut te kum en riai piny ne atitiak; ku ci niin. 25Goki bɛn enɔŋ en, ku packi, jamki, Yi Bɛnydit, luak wɔ; wɔ diir. 26Go ke yɔɔk, Ye yeŋo riɔc we, we kɔc ke gam koor? Ku jɔt rɔt wɛɛi yom ku bar, go lɔ diu areet. 27Go kɔc gai, ku jamki, Yi ye ran ŋo yekene, ye yom kene bar welke piŋ?
28Na ci ɣet lɔŋti pan de Gadarai, go rɔm kene kɔc keerou nɔŋ gup jak rac, ku yiki kɔc cam areet, a go ciɛn ran ye teek leu yedhole. 29Ŋɛmka, goki coot areet, jamki, Yi yeŋo buk loi wɔne yin, yin Wen de Nhialic? ca bɛn ba wɔ luc aŋoot akɔl? 30Ku tɔ bioŋ diit de kuɔl mec ke ke nyuɛth. 31Go jak rac goki lɔŋ, jamki, Yi na ciec wɔ, ke yin tuɔce wɔ ne bioŋ de kuɔlic. 32Go ke yɔɔk, Ye lak. Goki bɛn bei, ku leki ne kuɔl yic: ku ŋɛmka, biok ebɛn ee riŋ piny te lɔ tiɛlaŋ bɛɛr, ku diirki ne piu yic. 33Go kɔc eke biok keek goki kat, leki bei, ku lek kaŋ luel kedhia, agut ke ci ke lɔny ne kɔc nɔŋ gup jak rac. 34Ŋɛmka, go baai ebɛn bɛn bik bi rɔm ke Yecu: na cik ye ŋem, ke lɛŋki bi jaal pinyden.
Aktualisht i përzgjedhur:
Mathayo 8: LEKJOT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© British and Foreign Bible Society 1940, 2017
Mësoni më shumë rreth versionit Lek Jot de Jecu Kritho 1940