Génesis 2
2
1Ko jañaa jueꞌe Ndo Dio binchechjian Ndo ngajni ko nunthe, ko kain thi jii. 2Ko ngain nchaꞌon yatuxin, Ndo Dio ujuexin binchechjian Ndo kain, ko binchejugaꞌa Ndo ixin kain xra bincheꞌe Ndo. 3Ko Ndo Dio binchenchaon nchaꞌon yatuxin ko ndachro Ndo ixin nchaꞌon jiꞌi naa nchaꞌon anto renthe, ixin ngain nchaꞌon yaa binchejugaꞌa Ndo ixin kain xra jeꞌe Ndo bincheꞌe Ndo. 4Ko jaꞌin kuꞌen are Nchaa ná Dio binchechjian ngajni ko nunthe.
Adán ko Eva
Ko are Nchaa ná Dio binchechjian nunthe ko ngajni, 5xra xruꞌin ka yua ko ka chunda tsee beꞌe, ixin Nchaa ná Dio xra ruanꞌa chrin nguii ngataꞌa nunthe, ko xrabeꞌa xii runchencheꞌe xra nunthe. 6Ko ngain nunthe bagachrjeduxin tjao, ko jañaa bakuntjao nguii ngataꞌa nunthe. 7Kuthimejan Nchaa ná Dio binchechjian xii kunixin nche ko banuthe Ndo ngain chinthjon ko jañaa bechon xa, ko xii kjan naa thi jichon.
8Kuthimejan Nchaa ná Dio kjuenga ntha thuchjuin ngain nunthe dithuꞌe nu thi chrinxin nchaꞌon, ko nunthe mee diꞌin Edén, ko bakeꞌe Ndo nthiꞌa thi xii binchechjian Ndo. 9Ko Nchaa ná Dio bincheꞌe ixin bangi kain ntha thuchjuin chrjuin te ko nchao rune ni thuchjuiin ntha. Kai bakeꞌe Ndo ngusine nunthe mee naa ntha thuchjuin dajon thuchjuin nchegechon ni kainxin nchaꞌon, kai naa ntha thuchjuin nchekinxin ni thi jian ko thi jianꞌa.
10Ko ngain Edén chrinxin jinda ko bakinga nda, ko banchetjao nguii nunthe Edén, ko nda jiꞌi noo chjeeya nda. 11Ko naa nda chjeeya, mee biꞌin Pisón, ko nda jiꞌi bakingarianda nda nguii nunthe biꞌin Havila, ko ngain nunthe jiꞌi beꞌe chia oro. 12Ko juxon oro jian beꞌe ngain nunthe jiꞌi, kai beꞌe nthaa bagajon chingo xraa tsjuka ko chrjuin xrajni ko kai beꞌe xro ónice. 13Ko nda yuxin chjeeya biꞌin Gihón; nda yaa bakingarianda nda nguii nunthe diꞌin Cus. 14Ko nda ninxin dichjeeya biꞌin Tigris o Hidekel, ko nda jiꞌi bakinga nda nu nunthe Asiria, nu thi chrinxin nchaꞌon. Ko nda nunxin dichjeeya biꞌin Éufrates.
15Ko Nchaa ná Ndo Dio bakeꞌe xii ngain nunthe Edén ixin runcheꞌe xra ko rugenda nunthe. 16Ko Nchaa ná Dio kuetuꞌan ngain thi xii ko ndachro: «Jaꞌa nchao sinthe thuchjuiin kain ntha jii ngain nunthe Edén, 17aro sintheꞌa thuchjuiin ntha nchekinxin ni thi jian ko thi jianꞌa, ko ndua thi rindathjo ixin ja̱ sinthe tho yaa, ndaseꞌen.»
18Kuthimejan, Nchaa ná Dio ndachro: «Jeꞌa jian ixin xii jiꞌi jeꞌo seꞌe. Icha nchao sinthachjiaan naa thi sakao ko tsjengijna.» 19Ko Nchaa ná Dio jinche binchechjianxin Ndo kain kuxiigo ko kain kunthua tjanga ngajni, ko binchechieꞌen Ndo ba ngain Adán ixin rukjee kexreen rugiꞌin kain ba, ko inchin biꞌin ba, jañaa chunxinxin ni ba jai. 20Ko jañaa Adán ndachro kexreen biꞌin kain kuxiigo ko kain kunthua, aro binchueꞌa kensen rugakao ko rukjengijna jeꞌe. 21Mexinxin Nchaa ná Dio kuenjua Adán ngain naa kuthachrin anto suji, ko are tajijua bantsjeꞌe Ndo naa nthanthakuin, ko kjan kuejee Ndo thi xiree nthauꞌe. 22Ko thi nthanthakuin xa bachrjeꞌe xa, Nchaa ná Dio binchechjian naa nchrii, ko binchechieꞌen Ndo nchra ngain xa. 23Ko Adán ndachro:
«Nchrii jiꞌi luruna kunchjianxin nchra ko nthauꞌe nchra inchin nthauꞌna, mexinxin siꞌin nchra “nchrii” ixin nthanthakuin na kunchjianxin nchra.»
24Mexinxin xii sachrjendeꞌe ndudee ko janee, ixin thi xii ko thi nchrii ndarrukjan na̱ xraa nakua chujni.
25Ko thi xii ko thi nchrii thulucho nthao binthe, ko bechunxinꞌa na̱ juasuaxin.
Aktualisht i përzgjedhur:
Génesis 2: plsNT
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
© 2017, Wycliffe Bible Translators, Inc. All rights reserved.