Maliko 2
2
U Yesu akumupozya umuntu umulemazu
(Mat. 9.1-8; Luk. 5.17-26)
1Bo ghachilapo amasiku manandi u Yesu akanyokela ku Kapelinahumu, ipangwi likasata ukuti ali munyumba yiyo akikalaghamo bwila. 2Abantu abinji bakabungana poka mupaka ubuzilo bukamala posi na palubinjilo bulo. Bo u Yesu akulumbilila Amazyu kukwabo, 3abanavuli folo bakafika kukwache banyamuye umuntu umulemazu, bo alambalaye pachibonde. 4Bakapotwa pakufika nawe papipi nu Yesu pakuti mukaba ichilundilo. Po bakapela ubwazi pachisonje icha nyumba yila, nukumwisizya pabuzilo bubo u Yesu akabapo bo alambalaye pachibonde. 5Bo u Yesu ennya ulwitiko lwabo, akamubuzya umuntu umulemazu yula akati, “Wee mwana wane, imbibi zyako zyahobokeliwa.”
6Abamanyisi bamo aba Ndaghilo babo bakaba palapala bakanda pakwilalusya bene mumoyo ghabo ukuti, 7“Nkimba choni chicho akunena bunubu? Akumusamula u Chala! Nkimba ate we Chala mwene, yuyo angahobokela imbibi?”
8Loli u Yesu akazimanya zizyo bakinong'onagha mumoyo ghabo, po akabalalusya akati, “Nkimba choni chicho mukwinong'ona bunubu mumoyo ghinyu? 9Nkimba chili ko kwiyi chicho chipepe, pakumubuzya umuntu umulemazu uyu ukuti, ‘Imbibi zyako zyahobokeliwa,’ pamo pakumubuzya ukuti, ‘Nyamuka, nyamula ichibonde chako, endagha?’ 10Loli inkwiza pakubasimikizizya ukuti u Mwana uwa Muntu ali nu bulaghili pachisu ichapasi pano ubwakuhobokela imbibi.” Po akamubuzya umuntu umulemazu yula akati, 11“Inkukubuzya, nyamuka, nyamula ichibonde chako bwelagha.”
12Bo abantu bosi bakumwennya, umuntu yula akanyamuka, akasenda ichibonde chache nukubwela. Abantu bosi bakaswigha nkani nukumuchindika u Chala ukuti, “Tutachenizyepo nalumolumo ichi!”
U Yesu akumwitizya u Levi
(Mat. 9.9-13; Luk. 5.27-32)
13U Yesu akabuka sona mulubazu ulwa Nyanja iya Galileya. Ichilundilo icha bantu chikiza kukwache, po akanda pakubamanyizya. 14Bo u Yesu akwenda, akamwennya umusonkezya sonko, u Levi umwana uwa Alufeyo, bo ikaye munyumba iyakusonkelamo umusonko. Akamubuzya akati, “Nkonka.” Po u Levi akanyamuka pakumukonka.
15Bo u Yesu akulya munyumba iya Levi,#2.15 munyumba iya Levi: Pamo munyumba iya Yesu. pakaba abasonkezya sonko abinji na bantu abambibi, babo bakalyanga nawe poka na bamanyili bache, pakuti babo bakamukonkagha bakaba binji. 16Abamanyisi bamo aba Ndaghilo, babo bakaba ba Falisayi, bakennya ukuti u Yesu ali pakulya na bantu abambibi poka na basonkezya umusonko, po bakabalalusya abamanyili bache bakati, “Nkimba choni chicho akulya na bantu banaba?”
17Bo u Yesu ivwa zinizi akabamula akati, “Abantu abapuma batakumulonda umughanga, loli bene babo babine. Ntizite pakwitizya abantu abagholosu ukuti bapinduke, loli nizite pakwitizya abantu abambibi.”
Bakumulalusya u Yesu nizya kutuzya pakulya
(Mat. 9.14-17; Luk. 5.33-39)
18Akabalilo kamo abamanyili aba Yohani Uwalozyo naba Falisayi bakatuzya pakulya. Abantu bamo bakiza kwa Yesu nukumulalusya ukuti, “Nkimba choni chicho abamanyili aba Yohani Uwalozyo na bamanyili aba ba Falisayi bakutuzya pakulya, loli abamanyili bako batakutuzyapo pakulya?”
19U Yesu akamula akati, “Nkimba chingabombiwa ukuti abayeni aba pasendwa batuzye pakulya bo umwenesendwa ali poka nabo? Awe! Pene papo umwenesendwa ali nabo batangatuzya. 20Loli isiku likwiza lilyo umwenesendwa bakwiza pakumwefyako kukwabo, po bakwiza ukutuzya pakulya.
21“Nayumo umuntu yuyo angagambika ichigamba ichipya pamwenda umukali, pakuti ichigamba ichipya chila chingatunkana nukuzepula umwenda umukali nukupela ubwazi ubukulu. 22Nayumo umuntu yuyo angapungulila uvinyo umupya mutunyambi utwa makwela utwakale. Nanti angabomba bunubu, uvinyo angazepula utunyambi, po vyosi vibili, uvinyo nu tunyambi vikwiza pakunanganika. Loli uvinyo umupya apunguliliwe mutunyambi utupya.”
Bakumulalusya u Yesu nizya Isiku Ilyakutuzya
(Mat. 12.1-8; Luk. 6.1-5)
23 #
Ukk. 23.25
Pisiku limo Ilyakutuzya u Yesu akadumusannyanga mumaghunda agha ngano. Bo bakwenda, abamanyili bache bakanda pakupulula imitu iya ngano. 24Po aba Falisayi bakamulalusya u Yesu bakati, “Nkimba choni chicho abamanyili bako bakubomba zizyo zititikiziwe pakubombiwa Pisiku Ilyakutuzya?”
25 #
1 Sam. 21.1-6
U Yesu akamula akati, “Nkimba mutabelengitepo zizyo u Devedi na bantu bache bakabomba pakabalilo kako bakaba ni zala, loli batakaba ni chakulya nachimo? 26#Lev. 24.9Bo u Abiyatala we Muputi Usongo, u Devedi akinjila mu Nyumba iya Chala nukulya ichibama chicho chikabikiwa kwa Chala ukuti chibanje chakwiyipa. Ukuyana ni Ndaghilo zyitu, umuputi mwene we yuyo itikiziwe pakulya ichibama chila. Loli u Devedi akalya nukubapako abantu bache.”
27Pabumalilo u Yesu akati, “Isiku Ilyakutuzya likapeliwa ukuti limwavwe umuntu; umuntu atakapeliwa pakuba muzya uwa Isiku Ilyakutuzya. 28Polelo u Mwana uwa Muntu we Mwene uwa Isiku Ilyakutuzya.”
Aktualisht i përzgjedhur:
Maliko 2: LMBNT2016
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
The copyright is jointly and equally held by:
©️ The Bible Society of Malawi, 2014
©️ The Word for the World International, 2014
Mësoni më shumë rreth versionit Ulufingo Ulupya