Luka 10
10
Yesu okutuma entumwa makumi mushanju
1 #
Mat 10:7-16. Bwanyima y'ebyo Mukama waitu yaatoorana abandi makumi mushanju, yaabatuma babiri babiri, ngu bamwebembere bagyende omuri tauni zoona n'omu myanya yoona ei yaabaire naayenda kuhikamu. 2#Yoh 4:35; Mat 9:37, 38. Yaabagira ati: Eby'okugyesha ni bingi, kwonka abagyesi ni bakye; n'ahabw'ekyo mushabe Mukama w'eigyesha atume abagyesi omu kugyesha kwe. 3Mugyende; reeba, nimbatuma muri nk'entaama ahagati y'emishega. 4Mutatwara enshaho z'empiiha, n'obu zaakuba efurebe, nari enkaito; kandi mutagira ou mwaramutsya omu muhanda. 5Enju yoona ei muraataahemu, mubanze mugire muti: Obusingye bugume omu nju egi! 6Ku muraashangyemu omwana w'obusingye, obusingye bwanyu nibwija kuguma ahariwe; kwonka ku kiraabe kitari kityo, obusingye bwanyu nibwija kubagarukira. 7#1 Kor 9:5-14. Mugume omu nju egyo, murye kandi munywe ebi baraabagaburire; ahakuba omukozi ashemereire ebihembo bye; mutariruga omu nju mukagyenda nimuraararaara omu zindi. 8#1 Kor 10:27. Kandi tauni yoona ei muraataahemu, bakabaakiira, murye ebi baraabate omumaisho. 9Mukize abarwaire baamwo, mubagambire muti: Obukama bwa Ruhanga bubairiire haihi. 10Kwonka ku muraataahe omuri tauni yoona, bataabaakiira, mushohore omu nguuto zaayo, nimugira muti: 11#Byak 18:6. N'omucuucu ogw'omuri tauni yaanyu ogukwatsire omu bigyere byaitu, twagubakunkumurira; kwonka mumanye ngu obukama bwa Ruhanga bwahika haihi. 12Nimbagambira nti: Aha kiro ekyo ekifubiro kya Sodoma kiryaba ekirikubaasa kwemerwa okukira ekya tauni egyo.
13 #
Mat 11:21-23. Iwe Koraziini, oryakareeba! Naiwe Besesaida, oryakareeba! Ahabw'okuba eby'okutangaaza ebyakoreirwe omuriiwe, kuri noogira ngu bikakorerwa Tuuro na Sidoni, bakaabaire beeteisize kare, bashutami bajwaire ebiguniya, beeshukyeire eiju rya kashenda. 14Mumanye ngu aha kiro ky'okucwa orubanja ekifubiro kya Tuuro na Sidoni kiryaba ekirikubaasa kwemerwa okukira ekyanyu. 15Naiwe Kaperenaumu, nooyeraata ngu oryakuzibwa ohikye omu iguru? Ngaaha, oryagarurwa ahansi ohikye Okuzimu. 16#Yoh 5:23; 15:23. Orikuhurira imwe, biri niinye ahuriire; kandi orikwanga imwe, biri niinye ayangire; kandi orikuunyanga, biri ayangire Ogwo owantumire.
Okugaruka kw'entumwa makumi mushanju
17Abo beegi be makumi mushaju baagaruka n'okushemererwa, nibagira bati: Mukama waitu, na baadaimoni nibatworobera omu iziina ryawe. 18#Yoh 12:31; Kush 12:8, 9. Yaabagira ati: Ndeebire Sitaane naagwa nk'omurabyo okuruga omu iguru. 19#Mak 16:18; Zab 91:13. Reeba, naabaha obushoboorozi bw'okuribata enjoka na #10:19 N'akakooko akarikutoneza omukira. skorupio n'amaani goona ag'omuzigu; kandi tihariho kintu ekiribakora kubi. 20#Kur 32:32; Kush 3:5. Kwonka eki mutakishemerererwa baadaimoni okuboorobera; kureka mushemererwe ahabw'amaziina gaanyu kuhandiikwa omu iguru. 21#Mat 11:25-27. Omu shaaha egyo yaashemerererwa omu Mwoyo Orikwera, naagira ati: Ninkusiima, Taata, Mukama w'eiguru n'ensi, ahabw'okuba ebyo okabishereka abanyabwengye n'abarikwetegyereza, waabishuuruurira abaana bato. Eego, Taata, ahakuba ekyo nikyo waasiimire. 22Ebintu byona nkabiheebwa Tata; kandi tihariho orikumanya Omwana oku ari kureka Ishe, n'obu yaakuba orikumanya Ishe oku ari kureka Omwana, n'omuntu weena ou Omwana aikiriza kumumushuuruurira. 23#Mat 13:16, 17. Yaahindukira abeegi be, yaabagambira omu mubonano ati: Amaisho agarikureeba ebi murikureeba gaine omugisha. 24Nimbagambira nti: Baanabi n'abagabe baingi bakeetenga kureeba ebi murikureeba, tibaabireeba, kandi n'okuhurira ebi murikuhurira, tibaabihurira.
Enfumu y'Omusamaria omunyambabazi
25 #
Mat 22:35-40; Mak 12:28-34. Omwegyesa w'Ebiragiro yaayemerera, yaamutega naagira ati: Mwegyesa, nkore ki okuhungura amagara agatahwaho? 26Yesu yaamugarukamu ati: N'enki ekihandiikirwe omu Biragiro? Oshoma ota? 27#Lev 19:18; Bir 6:5. Yaagarukamu ati: Kunda Mukama Ruhanga waawe n'omutima gwawe gwona, n'amagara gaawe goona, n'amaani gaawe goona, n'obwengye bwawe bwona; kandi na mutaahi waawe nk'oku oyekunda. 28Yesu yaamugira ati: Waagarukamu gye; kora otyo, noija kugira amagara. 29Kwonka ahabw'okwenda kweyoreka nk'ohikiriire, yaabuuza Yesu ati: Mutaahi wangye n'oha?
30Yesu yaamugarukamu ati: Omushaija akaba naaruga Yerusaalemu naashuma Yeriko; yaagwa omu bambuzi; baamujuura ebijwaro, baamuteera, baatsiga naayenda kufa. 31Kandi omunyamurwa omwe akaba naashuuma omu muhanda ogwo, yaamugwaho atakimanyire; ku yaamureebire, yaamwetantara, yaaraba aha rundi rubaju, yaagumizamu. 32N'Omuleevi atyo, ku yaahikire aha mwanya ogwo, yaamureeba, yaaraba aha rundi rubaju. 33Kwonka Omusamaria, owaabaire ari omu rugyendo rwe, ku yaizire, yaahika ahu yaabaire ari; ku yaamureebire, yaamugirira esaasi, 34yaamuhikaho, yaashuka amajuta na viinyo omu buhuta bwe, yaamushemba; bwanyima yaamutembya aha ndogoya ye, yaamuhitsya omu nju y'abagyenzi, yaamurwaza. 35Omu kasheeshe yaihayo edenaari ibiri, yaaziha mukama w'egyo nju, naagira ati: Omurwaze; ezi oraakorese okurenga aha zi nkutsigire, ku ndigaruka, ndyazikwihura. 36Nooteekateeka, n'oha ahari abo abashatu owaabaire mutaahi w'ogwo owaagwire omu bambuzi? 37Yaagira ati: N'ogwo owaamugiriire esaasi. Yesu yaamugira ati: Gyenda, naiwe okore otyo.
Ebya Mariza na Mariamu
38 #
Yoh 11:1; 12:2, 3. Baagumizamu omuhanda gwabo. Yaataaha omu kirorero; omukazi orikwetwa Mariza yaamutaasya omu nju ye. 39Kandi akaba aine omurumuna orikwetwa Mariamu; we yaashutama aha bigyere bya Mukama waitu, naahurira ebigambo bye. 40Kwonka Mariza akaba ayemereize omutima ahabw'emirimo mingi y'okuheereza; yaija ahari Yesu, yaamubuuza ati: Mukama wangye, tikirikukusaasa, murumuna wangye okumpenza emirimo? Mugambire ampwere. 41Mukama waitu yaamugarukamu ati: Mariza, Mariza, oyemereize omutima, noofa kubi n'ebintu bingi; 42#Mat 6:33. kwonka ekirikwetengwa ni kimwe kyonka. Mariamu we atooraine omugabo murungi ogutarimwakwa.
Aktualisht i përzgjedhur:
Luka 10: RR64
Thekso
Ndaje
Copy
A doni që theksimet tuaja të jenë të ruajtura në të gjitha pajisjet që keni? Regjistrohu ose hyr
The Bible in Runyankore-Rukiga © United Bible Societies, 1964