Kuziva Mwari Anogara Nekusingaperi

Zvibatanidze Kuchitubu Cheupenyu

Kuratidza Simba Rekutenda

Murwi Wechikristu

Vadzidzi vaJesu

Makaponeswa Nenyasha

Kuona Nyasha Dzamwari Muvamwe Vanhu

Kushingirira Chinangwa

HATISIIWE TIRI TEGA

Kuropafadzwa Kwakapfuurisa

Biblica® Bhaibheri Dzvene Rakasununguka MuChiShona Chanhasi™, Chikamu chinonzwika nenzeve

<div class="version vid32 iso6393sna" data-vid="32" data-iso6393="sna">
 <div class="book bk2SA">
 <div class="chapter ch11" data-usfm="2SA.11">
 <div class="label">11</div><div class="s1">Dhavhidhi naBhatishebha</div><div class="p"> 1Munguva yechirimo, madzimambo paanoenda kundorwa, Dhavhidhi akatuma Joabhu navaranda vamambo nehondo yose yeIsraeri. Vakandoparadza vaAmoni uye vakakombawo Rabha. Asi Dhavhidhi akasara muJerusarema.</div><div class="p"> 2Zvino rimwe zuva madekwana Dhavhidhi akamuka pamubhedha wake akafamba pamusoro pedenga romuzinda. Aripo padenga akaona mukadzi aishamba. Mukadzi uyu akanga akanaka kwazvo, 3uye Dhavhidhi akatuma munhu kundobvunza nezvomukadzi uyu. Murume akatumwa akati, &#8220;Ko, uyu haasi Bhatishebha here mwanasikana waEriamu mukadzi waUria muHiti?&#8221; 4Ipapo Dhavhidhi akatuma nhume kundomutora. Akauya kwaari, iye akarara naye; nokuti akanga azvinatsa pakusachena kwake. Ipapo akadzokera kumba kwake. 5Mukadzi uyu akabata pamuviri ndokubva atuma shoko kuna Dhavhidhi achiti, &#8220;Ndava nemimba.&#8221;</div><div class="p"> 6Saka Dhavhidhi akatuma shoko kuna Joabhu akati, &#8220;Nditumire Uria muHiti.&#8221; Saka Joabhu akamutumira kuna Dhavhidhi. 7Uria akati asvika kwaari, Dhavhidhi akamubvunza kuti Joabhu aiva akadini hake, zvose navarwi uye kuti hondo yaifamba sei. 8Ipapo Dhavhidhi akati kuna Uria, &#8220;Enda hako kuimba yako unoshamba tsoka dzako.&#8221; Naizvozvo Uria akabva pamuzinda wamambo, uye achangoenda, mambo akamutumira chipo. 9Asi Uria akarara pasuo romuzinda navaranda vose vatenzi wake akasaenda kumba kwake.</div><div class="p"> 10Zvino Dhavhidhi paakaudzwa kuti, &#8220;Uria haana kuenda kumba kwake,&#8221; akamubvunza akati, &#8220;Hauna kubva parwendo here? Sei usina kuenda kumba kwako?&#8221;</div><div class="p"> 11Uria akati kuna Dhavhidhi, &#8220;Areka navaIsraeri pamwe chete navaJudha vagere mumatende, uye tenzi wangu Joabhu navanhu vaishe wangu vari mumisasa kusango. Ko, ini ndaigozoenda sei kumba kwangu kuti ndidye ndichinwa nokurara nomudzimai wangu? Zvirokwazvo noupenyu hwenyu, handingaiti chinhu chakadaro!&#8221;</div><div class="p"> 12Ipapo Dhavhidhi akati kwaari, &#8220;Chigara hako pano kwezuva rimwe chete, mangwana ndigokutendera hangu kuti udzokere.&#8221; Naizvozvo Uria akagara muJerusarema zuva iroro neraitevera. 13Akakokwa naDhavhidhi, akadya nokunwa naye, uye Dhavhidhi akaita kuti adhakwe. Asi ava madekwana Uria akabuda akandovata panhoo yake pamwe chete navaranda vatenzi wake; haana kuenda kumba kwake.</div><div class="p"> 14Chifumi chamangwana Dhavhidhi akanyora tsamba kuna Joabhu akaituma naUria. 15Akanyora mairi achiti, &#8220;Isa Uria pamberi paya panorwiwa zvinotyisa zvikuru. Ipapo iwe umusiye ari oga kuti abayiwe afe.&#8221;</div><div class="p"> 16Saka Joabhu paakanga akakomba guta, akaisa Uria panzvimbo yaaiziva kuti ndipo paiva navarume voumhare. 17Varume veguta pavakabuda vakarwa naJoabhu, vamwe vevarume vehondo yaDhavhidhi vakakundwa; uye Uria muHiti akafawo.</div><div class="p"> 18Joabhu akatumira Dhavhidhi mashoko amafambiro akanga aita hondo. 19Akarayira nhume achiti, &#8220;Kana wapedza kurondedzera kuna mambo mafambiro aita hondo, 20hasha dzamambo dzingakwira, uye angangokubvunza achiti, &#8216;Ko, sei maswedera pedyo zvakadaro neguta muchirwa? Manga musingazivi here kuti vaizokupfurai nemiseve vari parusvingo? 21Ndianiko akauraya Abhimereki mwanakomana waJerubhi-Bhesheti? Haasi munhukadzi here akakanda guyo pamusoro pake richibva parusvingo, zvokuti akafira paTebhezi? Sei maswedera pedyo norusvingo?&#8217; Kana akakubvunza izvi, ipapo uti kwaari, &#8216;Muranda wenyu Uria muHiti afawo.&#8217;&#8198;&#8221;</div><div class="p"> 22Nhume yakaenda, uye yakati yasvika, yakaudza Dhavhidhi zvose zvayakanga yarayirwa naJoabhu. 23Nhume yakati kuna Dhavhidhi, &#8220;Varume avo vatikurira vakatibudira pachena, asi isu tavasairira kusvikira vasvika pasuo reguta. 24Ipapo vapfuri vapfura varanda venyu vari parusvingo, uye vamwe vavaranda vamambo vafa. Uyewo, muranda wenyu Uria muHiti afa.&#8221;</div><div class="p"> 25Dhavhidhi akarayira nhume achiti, &#8220;Uti kuna Joabhu, &#8216;Izvi ngazvirege kukushungurudza; munondo haubayi rutivi rumwe asi nokunouyawo wabaya. Ramba uchirwisa guta uriparadze.&#8217; Taura izvi kuna Joabhu kuti umukurudzire.&#8221;</div><div class="p"> 26Zvino mukadzi waUria paakanzwa kuti murume wake akanga afa, akamuchema. 27Zvino mazuva okuchema akati apera, Dhavhidhi akamuuyisa kumba kwake, akava mukadzi wake, uye akamuberekera mwanakomana. Asi chinhu ichi chakaitwa naDhavhidhi hachina kufadza Jehovha.</div>
 </div>
 </div>
</div>

Shona Contemporary Bible Copyright © 2005, 2018 by Biblica, Inc.® Used by permission. All rights reserved worldwide. Bhaibheri Dzvene MuChiShona Chanhasi Copyright © 2005, 2018 Biblica, Inc.® Mvumo yokushandisa ndima yakapiwa. Kodzero dzose dziripo.

<div class="version vid32 iso6393sna" data-vid="32" data-iso6393="sna">
 <div class="book bk2SA">
 <div class="chapter ch12" data-usfm="2SA.12">
 <div class="label">12</div><div class="s1">Natani anotsiura Dhavhidhi</div><div class="p"> 1Jehovha akatuma Natani kuna Dhavhidhi. Paakasvika kwaari, akataura akati, &#8220;Pakanga pane varume vaviri mune rimwe guta, mumwe akanga akapfuma mumwe ari murombo. 2Mupfumi uyu akanga ana makwai mazhinji kwazvo uye nemombe zhinji, 3asi murombo akanga asina chinhu kusara kwegwayana rimwe chete raakanga atenga. Akarirera, rikakura naye navana vake. Raidya pamwe chete naye, richinwira pamukombe waayinwira, uye richirara pamaoko ake. Rakanga rakaita somwanasikana kwaari.</div><div class="p"> 4&#8220;Zvino muenzi aipfuura hake akasvika kumupfumi uya, asi mupfumi uyu haana kuda kubata rimwe ramakwai ake kana mombe kuti agadzirire zvokudya mupfuuri uyu akanga asvika kwaari. Asi iye akatora gwayana romurombo akarigadzirira uya akanga asvika kwaari.&#8221;</div><div class="p"> 5Dhavhidhi akatsamwira munhu uyu zvikuru kwazvo akati kuna Natani, &#8220;Chokwadi naJehovha mupenyu, munhu akaita zvinhu zvakadai anofanira kufa! 6Anofanira kuripira gwayana iri kakapetwa runa pamusoro, nokuti akaita zvinhu zvakadai akasava netsitsi.&#8221;</div><div class="p"> 7Ipapo Natani akati kuna Dhavhidhi, &#8220;Ndimi munhu uyo! Zvanzi naJehovha: Mwari weIsraeri: &#8216;Ndakakuzodza kuti uve mambo weIsraeri, uye ndakakununura kubva paruoko rwaSauro. 8Ndakapa kwauri imba yatenzi wako, uye vakadzi vatenzi wako ndakavaisa mumaoko ako. Ndakakupa imba yaIsraeri neyaJudha. Uye dai zvose izvi zvakava zvishoma, ndaidai ndakakupa zvimwezve. 9Ko, wakazvidzirei shoko raJehovha nokuita zvisakarurama pamberi pake? Wakauraya Uria muHiti nomunondo uye ukatora mukadzi wake ukamuita wako. Wakamuuraya nomunondo wavaAmoni. 10Naizvozvo, munondo hauchazobvi mumba mako, nokuti wakandizvidza uye ukatora mukadzi waUria muHiti kuti ave wako.&#8217;</div><div class="p"> 11&#8220;Zvanzi naJehovha: &#8216;Kubva mumba mako chaimo ndichauyisa njodzi pamusoro pako. Ndichatora vakadzi vako iwe wakatarira ndigovapa kuno mumwe ari pedyo newe, uye acharara navo masikati machena. 12Iwe wakaita muchivande, asi ini ndichazviita masikati machena pamberi peIsraeri yose.&#8217;&#8198;&#8221;</div><div class="p"> 13Ipapo Dhavhidhi akati kuna Natani, &#8220;Ndakatadzira Jehovha.&#8221;</div><div class="p">Natani akapindura akati, &#8220;Jehovha akuregerera chitadzo chako. Haungafi hako kwete. 14Asi nokuda kwokuti waita izvi, waita kuti vavengi vaJehovha vamuzvidze kwazvo, mwanakomana uyu wauchaberekerwa achafa.&#8221;</div><div class="p"> 15Mushure mokunge Natani adzokera kumba, Jehovha akarova mwana akaberekerwa Dhavhidhi nomukadzi waUria, akabva arwara. 16Dhavhidhi akanyengeterera mwana kuna Mwari. Akatsanya uye akapinda mumba make akapedza usiku nousiku akarara pasi. 17Vakuru veimba yake vakamira paakanga ari, vachida kuti amuke pasi paakanga ari, asi iye akaramba, uye haana kuda kuti adye navo.</div><div class="p"> 18Pazuva rechinomwe mwana akafa. Varanda vaDhavhidhi vakatya kumuudza kuti mwana akanga afa, nokuti vakafunga kuti, &#8220;Apo mwana paakanga achiri mupenyu, takataura naDhavhidhi asi haana kuda kutiteerera. Zvino tichamuudza sei kuti mwana afa? Achazvikuvadza zvikada.&#8221;</div><div class="p"> 19Dhavhidhi akaona kuti varanda vake vakanga vachizevezerana ndokubva aziva kuti mwana akanga afa. Akabvunza akati, &#8220;Mwana afa kanhi?&#8221;</div><div class="p">Vakapindura vakati, &#8220;Hongu afa.&#8221;</div><div class="p"> 20Ipapo Dhavhidhi akamuka pasi paakanga ari. Mushure mokunge ashamba, akazora mafuta, uye akapfeka zvimwe zvipfeko, akapinda mumba maJehovha akanamata. Ipapo akaenda kumba kwake, akakumbira zvokudya vakamupa, akadya.</div><div class="p"> 21Varanda vake vakamubvunza vakati, &#8220;Ko, muri kuitirei zvinhu zvakadai? Mwana paakanga achiri mupenyu makatsanya uye mukachema, asi zvino mwana afa, momuka modya!&#8221;</div><div class="p"> 22Iye akapindura akati, &#8220;Apo mwana paakanga achiri mupenyu, ndakatsanya uye ndikachema. Ndaifunga kuti, &#8216;Ndiani anoziva? Zvimwe Jehovha angandinzwira nyasha akaita kuti mwana ararame.&#8217; 23Asi zvino zvaafa, ndichatsanyireiko? Ko, ndingamudzosazve here? Ini ndichaenda kwaari, asi iye haangadzoki kwandiri.&#8221;</div><div class="p"> 24Zvino Dhavhidhi akanyaradza mukadzi wake Bhatishebha, akaenda kwaari akandorara naye. Akabereka mwanakomana, vakamutumidza kuti Soromoni. Jehovha akamuda; 25uye nokuti Jehovha akamuda, akatuma shoko nokuna Natani muprofita kuti amutumidze kuti Jedhidhia.</div><div class="p"> 26Zvino Joabhu akandorwa naRabha wavaAmoni uye akatora nhare yamambo. 27Ipapo Joabhu akatuma nhume kuna Dhavhidhi, achiti, &#8220;Ndarwisa Rabha ndikatora nzvimbo inobva mvura yeguta iri. 28Naizvozvo unganidzai varwi vose mukombe guta mugorikunda. Zvikasadaro ini ndichatora guta, uye rinozotumidzwa zita rangu.&#8221;</div><div class="p"> 29Naizvozvo Dhavhidhi akaunganidza hondo yose ndokubva aenda kuRabha, akandorirwisa akaritora. 30Akabvisa korona pamusoro wamambo wavo, kurema kwayo kwaisvika tarenda rimwe chete#12:30 makirogiramu angaita 34 uye yakanga yakanamirwa mabwe anokosha, uye yakaiswa pamusoro waDhavhidhi. Akapamba zvinhu zvizhinji kwazvo kubva muguta iri 31uye akabudisa vanhu vakanga varimo, akavapa basa ravaishanda namajeko, mapiki namatemo, uye akavapa basa rokukanya zvidhina. Akaita izvi kumaguta ose avaAmoni. Ipapo Dhavhidhi nehondo yose vakadzokera kuJerusarema.</div>
 </div>
 </div>
</div>

<div class="version vid32 iso6393sna" data-vid="32" data-iso6393="sna">
 <div class="book bk2SA">
 <div class="chapter ch13" data-usfm="2SA.13">
 <div class="label">13</div><div class="s1">Amunoni naTamari</div><div class="p"> 1Munguva iyoyo, Amunoni mwanakomana waDhavhidhi akachiva Tamari, hanzvadzi yaAbhusaromu mwanakomana waDhavhidhi yakanga yakanaka kwazvo.</div><div class="p"> 2Amunoni akatambudzika kusvikira pakurwara pamusoro paTamari hanzvadzi yake, nokuti hazvaigona kuti amuite chimwe chinhu.</div><div class="p"> 3Zvino Amunoni aiva neshamwari yake yainzi Jonadhabhu mwanakomana waShimea, mukoma waDhavhidhi. Jonadhabhu akanga ari munhu aiva namano. 4Akabvunza Amunoni akati, &#8220;Seiko, iwe mwanakomana wamambo, uchipunyaira mangwanani oga oga? Haungandiudzewo here?&#8221;</div><div class="p">Amunoni akati kwaari, &#8220;Ndinoda Tamari, hanzvadzi yomunun&#700;una wangu Abhusaromu.&#8221;</div><div class="p"> 5Jonadhabhu akati, &#8220;Enda unorara unyepedzere kurwara. Zvino kana baba vako vauya kuzokuona, uti kwavari, &#8216;Ndinokumbira kuti hanzvadzi yangu Tamari auye andipe zvokudya. Ndinoda kuti agadzire zvokudya ini ndichiona kuti ndimuone uye ndigodya zvichibva mumaoko ake.&#8217;&#8198;&#8221;</div><div class="p"> 6Saka Amunoni akavata pasi akanyepedzera kurwara. Zvino mambo paakauya kuzomuona, Amunoni akati kwaari, &#8220;Ndinokumbira kuti Tamari hanzvadzi yangu auye andibikire chingwa chakaisvonaka ndichiona, kuti ndigodya zvichibva mumaoko ake.&#8221;</div><div class="p"> 7Dhavhidhi akatumira shoko kuna Tamari kumba kwamambo akati, &#8220;Enda kumba kwehanzvadzi yako Amunoni umugadzirire zvokudya.&#8221; 8Zvino Tamari akaenda kumba kwaAmunoni hanzvadzi yake, uyo akanga akarara pasi. Akatora mukanyiwa, akakanya, akaumba chingwa uye akachibika iye achiona. 9Akatora pani ndokumupa chingwa, asi iye akaramba kudya.</div><div class="p">Amunoni akati, &#8220;Vanhu vose ngavabude muno.&#8221; Saka vanhu vose vakabuda. 10Amunoni ndokubva ati kuna Tamari, &#8220;Uya nezvokudya muno mumba mangu mokurara ndidye zvichibva muruoko rwako.&#8221; Zvino Tamari akatora chingwa chaakanga abika akaenda nacho mumba yokurara yehanzvadzi yake Amunoni. 11Asi akati achimupa kuti adye, iye akamubata akati, &#8220;Uya urare neni, hanzvadzi yangu.&#8221;</div><div class="p"> 12Iye akati kwaari, &#8220;Kwete, hanzvadzi yangu! Usandichinya. Chinhu chakadai hachifaniri kuitwa muIsraeri! Usaita chinhu chakaipa zvakadai. 13Ko, ini ndichavei? Uchava somumwe wamapenzi akaipa muIsraeri. Ndapota, taura namambo; haangamborambi kuti ndiroorwe newe.&#8221; 14Asi iye akaramba kumuteerera, uye nokuti akanga ane simba kumudarika, akamubata chibharo.</div><div class="p"> 15Ipapo Amunoni akabva amuvenga nokuvenga kukuru kwazvo, akamuvenga kupfuura kumuda kwaaiva ambomuita. Amunoni akati kwaari, &#8220;Muka uende!&#8221;</div><div class="p"> 16Iye akati kwaari, &#8220;Kwete! Kundidzinga muno kwakashata kudarika zvawatondiita nechakare.&#8221;</div><div class="p">Asi iye akaramba kumuteerera. 17Akadana muranda wake akati kwaari, &#8220;Dzinga mukadzi uyu abve muno uye ukiye mukova kana achinge abuda.&#8221; 18Ipapo muranda wake akamubudisa panze akakiya mukova shure kwake. Akanga akapfeka nguo yaikosha zvikuru yaipenya, nokuti ndidzo nguo dzaipfekwa navanasikana vamambo vaiva mhandara. 19Tamari akazvizodza madota akabvarura nguo inokosha yaakanga akapfeka. Akabata musoro wake ndokuenda achichema zvikuru.</div><div class="p"> 20Hanzvadzi yake Abhusaromu akati kwaari, &#8220;Ko, ndiAmunoni, hanzvadzi yako, anga anewe here? Chinyarara zvako, hanzvadzi; iye ihanzvadzi yako. Usanyanyozvidya mwoyo nazvo.&#8221; Uye Tamari akagara mumba maAbhusaromu hanzvadzi yake, akava mukadzi akasurukirwa.</div><div class="p"> 21Zvino mambo Dhavhidhi akati anzwa zvose izvi, akatsamwa kwazvo. 22Abhusaromu haana kana kumbotaura shoko kuna Amunoni, rakanaka kana rakaipa; akavenga Amunoni nokuti akanga akanyadzisa hanzvadzi yake Tamari.</div><div class="s1">Abhusaromu anouraya Amunoni</div><div class="p"> 23Mushure mamakore maviri; vaveuri vamakwai aAbhusaromu pavakanga vari paBhaari Hazori pedyo nomuganhu weEfuremu, akakoka vanakomana vose vamambo kuti vauye ikoko. 24Abhusaromu akaenda kuna mambo akandoti, &#8220;Muranda wenyu aita kuti vaveuri vauye. Ndapota, ko, mambo namakurukota ake haangauyi kuzova neni here?&#8221;</div><div class="p"> 25Mambo akapindura akati, &#8220;Kwete, mwanakomana wangu. Hatifaniri kuenda tose; tingazova mutoro kwauri.&#8221; Kunyange zvazvo akamugombedzera, akaramba kuenda, asi akamuropafadza.</div><div class="p"> 26Ipapo Abhusaromu akati, &#8220;Kana zvisingaiti, chitenderai henyu munun&#700;una wangu Amunoni kuti aende nesu.&#8221;</div><div class="p">Mambo akamubvunza akati, &#8220;Ko, iye anoendereiko nemi?&#8221; 27Asi Abhusaromu akavanyengetedza, saka akazotendera Amunoni navanakomana vose vamambo kuti vaende navo.</div><div class="p"> 28Abhusaromu akarayira vanhu vake akati, &#8220;Teererai! Kana Amunoni anwa waini zvokuti haachabviri nokufara uye ini ndikati kwamuri, &#8216;Urayai Amunoni,&#8217; ibvai mamuuraya. Musatya. Handizini ndakurayirai here? Simbai mutsunge mwoyo.&#8221; 29Saka vanhu vaAbhusaromu vakaita kuna Amunoni sokurayirwa kwavakanga vaitwa naAbhusaromu. Ipapo vana vose vamambo vakasimuka, vakatasva manyurusi avo vakatiza.</div><div class="p"> 30Vachiri munzira kudaro, shoko rakasvika kuna Dhavhidhi richiti, &#8220;Abhusaromu auraya vanakomana vose vamambo; hapana kana mumwe zvake asara.&#8221; 31Mambo akasimuka, akabvarura nguo dzake akazvambarara pasi; ipapo varanda vake vose vakauya vaine nguo dzakabvaruka vakamira paari.</div><div class="p"> 32Asi Jonadhabhu mwanakomana waShimea, mukoma waDhavhidhi, akati, &#8220;Ishe wangu ngaarege kufunga kuti vauraya machinda ake ose; Amunoni oga ndiye afa. Izvi zvakagara zviri muurongwa hwaAbhusaromu kubvira musi wakabatwa chibharo hanzvadzi yake Tamari naAmunoni. 33Naizvozvo zvino Ishe wangu mambo ngaarege kuzvidya mwoyo neshoko rokuti vanakomana vose vamambo vafa. Amunoni oga ndiye afa.&#8221;</div><div class="p"> 34Panguva iyoyo, Abhusaromu akatiza.</div><div class="p">Zvino murume akanga amire akarinda akatarira kumusoro akaona vanhu vazhinji mumugwagwa nechokumavirazuva kwake, vachiburuka norutivi rwegomo. Nharirire iyi yakaenda ikandoudza mambo kuti, &#8220;Ndiri kuona varume kunzira yeHoronaimu, kurutivi rwegomo.&#8221;</div><div class="p"> 35Jonadhabhu akati kuna Mambo, &#8220;Tarirai, vanakomana vamambo vasvika; zvaitika sokutaura kwomuranda wenyu.&#8221;</div><div class="p"> 36Akati achipedza kutaura, vanakomana vamambo vakabva vapinda, vachiungudza zvikuru. Zvino mambo pamwe chete navaranda vake vakachema neshungu kwazvo.</div><div class="p"> 37Abhusaromu akatiza akaenda kuna Tarimai mwanakomana waAmihudhi, mambo weGeshuri. Asi mambo Dhavhidhi akachema pamusoro pomwanakomana wake mazuva ose.</div><div class="p"> 38Mushure mokunge Abhusaromu atiza akaenda kuGeshuri, akandogarako kwamakore matatu. 39Uye mweya wamambo wakashuva kwazvo kuenda kuna Abhusaromu, nokuti zvino akanga anyaradzwa pamusoro porufu rwaAmunoni.</div>
 </div>
 </div>
</div>

<div class="version vid32 iso6393sna" data-vid="32" data-iso6393="sna">
 <div class="book bk2SA">
 <div class="chapter ch14" data-usfm="2SA.14">
 <div class="label">14</div><div class="s1">Abhusaromu anodzokera kuJerusarema</div><div class="p"> 1Zvino Joabhu mwanakomana waZeruya akaziva kuti mwoyo wamambo wakanga woshuva Abhusaromu. 2Saka Joabhu akatuma munhu kuTekoa kuti andouya nomukadzi akanga akachenjera kubva ikoko. Akati kwaari, &#8220;Ita somunhu ari pakuchema. Upfeke nguo dzokuchema uye usazvizora mafuta. Uite somukadzi ava namazuva akawanda ari pakuchema vakafa. 3Ipapo ugoenda kuna mambo undotaura mashoko aya kwaari.&#8221; Uye Joabhu akaisa mashoko mumuromo make.</div><div class="p"> 4Mukadzi akabva kuTekoa akati asvika kuna mambo, akawira pasi nechiso chake, kuri kupa rukudzo, akati, &#8220;Ndibatsireiwo, nhai mambo!&#8221;</div><div class="p"> 5Mambo akamubvunza akati, &#8220;Watambudzwa neiko?&#8221;</div><div class="p">Iye akati, &#8220;Zvirokwazvo ndiri chirikadzi; murume wangu akafa. 6Zvino ini muranda wenyu ndakanga ndina vanakomana vaviri. Vakarwa vari vaviri musango, uye hapana aivapo kuti avarandutsire. Mumwe akarova mumwe uye akamuuraya. 7Zvino mhuri yose yamukira murandakadzi wenyu. Vari kuti, &#8216;Tipei uyo akauraya munun&#700;una wake, kuti timuuraye nokuda kwoupenyu hwomunun&#700;una wake waakauraya; kunyange tichizobvisa mudyi wenhaka zvakare.&#8217; Saka vachadzima zimbe rangu rimwe ranga rasara, vakasasiyira murume wangu zita kana rudzi panyika.&#8221;</div><div class="p"> 8Mambo akati kumukadzi, &#8220;Enda hako kumba kwako, ini ndicharayira shoko pamusoro pako.&#8221;</div><div class="p"> 9Asi mukadzi weTekoa akati kwaari, &#8220;Ishe wangu mambo, mhosva ngaive kwandiri nokuimba yababa vangu, uye mambo nechigaro chake choushe ngazvirege kuva nemhosva.&#8221;</div><div class="p"> 10Mambo akapindura akati, &#8220;Kana munhu akataura chinhu kwauri, uya naye kwandiri, haangozokunetsizve.&#8221;</div><div class="p"> 11Iye akati, &#8220;Naizvozvo mambo ngaataure naIshe Mwari wake kuti mutsivi weropa arege kuramba achiparadza, kuti mwanakomana wangu arege kuparadzwa.&#8221;</div><div class="p">Mambo akati, &#8220;NaJehovha mupenyu, hapana ruvhudzi rumwe rwomwanakomana wako ruchawira pasi.&#8221;</div><div class="p"> 12Ipapo mukadzi uya akati, &#8220;Tenderai muranda wenyu kuti ataure shoko kuna ishe mambo wangu.&#8221;</div><div class="p">Iye akati, &#8220;Taura hako.&#8221;</div><div class="p"> 13Mukadzi uya ndokuti, &#8220;Zvino seiko makarongera vanhu vaMwari zvakadai? Kana mambo vachitaura zvakadai, havasi kuzvipa mhosva here, nokuti mambo havana kudzosa mwanakomana uya akambenge adzingwa. 14Semvura yadeukira pasi, isingazogoni kudyorerwa, saizvozvo tinofanira kufa. Asi Mwari haaurayi munhu; pachinzvimbo chaizvozvo anotoronga zano rokuti akadzingwa arege kuraswa zvachose naye.</div><div class="p"> 15&#8220;Zvino ini ndauya kuzotaura izvi kuna ishe mambo wangu nokuti vanhu vandityisidzira. Murandakadzi wenyu akafunga akati, &#8216;Rega ndinotaura namambo zvimwe vangaitira muranda wavo zvaanokumbira. 16Zvimwe mambo vangabvuma kurwira murandakadzi wavo kubva paruoko rwomunhu anotsvaka kuparadza zvose ini nomwanakomana wangu kuti tirege kugara nhaka yatakapiwa naMwari.&#8217;</div><div class="p"> 17&#8220;Zvino murandakadzi wenyu anoti, &#8216;Ndinokumbira kuti shoko rashe mambo wangu rindinyaradze, nokuti ishe wangu mambo akafanana nomutumwa waMwari pakuziva zvakanaka nezvakaipa. Jehovha Mwari wenyu ngaave nemi.&#8217;&#8198;&#8221;</div><div class="p"> 18Ipapo mambo akati kumukadzi, &#8220;Usandivanzira hako shoko randichakubvunza.&#8221;</div><div class="p">Mukadzi akati, &#8220;Ishe mambo wangu ngavataure havo.&#8221;</div><div class="p"> 19Mambo akabvunza akati, &#8220;Ko, ruoko rwaJoabhu harusi kubatsirana newe pazvinhu zvose izvi here?&#8221;</div><div class="p">Mukadzi akapindura akati, &#8220;Noupenyu hwenyu, ishe wangu mambo, hapana munhu angatendeukira kurudyi kana kuruboshwe kubva pane zvinenge zvataurwa nashe mambo wangu. Ichokwadi, muranda wenyu Joabhu ndiye andirayira kuti ndiite izvi uye ndiye aisa mashoko ose aya mumuromo womurandakadzi wenyu. 20Muranda wenyu Joabhu akaita izvi kuti ashandure mamiriro ezvinhu. Ishe wangu ano uchenjeri sehwomutumwa waMwari, anoziva zvose zvinoitika panyika.&#8221;</div><div class="p"> 21Mambo akati kuna Joabhu, &#8220;Zvakanaka chose, ndichaita saizvozvo. Chienda, unouya nejaya Abhusaromu.&#8221;</div><div class="p"> 22Joabhu akawira pasi nechiso chake achipa rukudzo, uye akaropafadza mambo. Joabhu akati, &#8220;Nhasi muranda wenyu aziva kuti awana nyasha pamberi penyu, ishe wangu mambo, nokuti mambo aita zvandakumbira ini muranda wake.&#8221;</div><div class="p"> 23Saka Joabhu akaenda kuGeshuri akandouya naAbhusaromu kuJerusarema. 24Asi mambo akati, &#8220;Anofanira kuenda kuimba yake; haafaniri kuona chiso changu.&#8221; Saka Abhusaromu akaenda kumba kwake akasaona chiso chamambo.</div><div class="p"> 25MuIsraeri mose makanga musina murume airumbidzwa navanhu nokuda kworunako rwake saAbhusaromu. Kubva kumusoro wake kusvikira kutsoka dzake pakanga pasina panonzi apa pakaipa. 26Pose paaigurira bvudzi rake, aigurira bvudzi rake nguva nenguva parainge rava kumuremera, airiyera, uye uremu hwaro hwaisvika mashekeri mazana maviri#14:26 makirogiramu angaita 2.3 kana zvichierwa nechiereso chamambo.</div><div class="p"> 27Abhusaromu akaberekerwa vanakomana vatatu nomwanasikana mumwe chete. Zita romwanasikana rainzi Tamari, uye akanga ari mukadzi akanaka pachiso.</div><div class="p"> 28Abhusaromu akagara kwamakore maviri muJerusarema asina kumboona chiso chamambo. 29Ipapo Abhusaromu akadana Joabhu kuti amutume kuna mambo, asi akaramba kuenda kwaari. Saka akatumazve shoko kechipiri, asi akaramba kuuya. 30Ipapo akati kumuranda wake, &#8220;Onaka, munda waJoabhu wakaganhurana nowangu, uye ane bhari imomo. Enda unoupisa.&#8221; Naizvozvo varanda vaAbhusaromu vakapisa munda.</div><div class="p"> 31Ipapo Joabhu akaenda kumba kwaAbhusaromu akandoti kwaari, &#8220;Ko, varanda vako vapisirei munda wangu?&#8221;</div><div class="p"> 32Abhusaromu akati kuna Joabhu, &#8220;Tarira, ndakatuma shoko kwauri ndikati, &#8216;Uya kuno kuti ndikutume kuna mambo unobvunza kuti, &#8220;Ko, zvino ndakabvirei hangu kuGeshuri? Zvingadai zviri nani dai ndanga ndichiriko zvangu!&#8221;&#8198;&#8217; Naizvozvo, ndinoda kuona chiso chamambo, uye kana ndine mhosva yechimwe chinhu, ngavandiuraye havo.&#8221;</div><div class="p"> 33Saka Joabhu akaenda kuna mambo akandotaura saizvozvo. Ipapo mambo akadana Abhusaromu, uye akauya akasvikokotamisa uso hwake pasi pamberi pamambo. Uye Mambo akatsvoda Abhusaromu.</div>
 </div>
 </div>
</div>

<div class="version vid32 iso6393sna" data-vid="32" data-iso6393="sna">
 <div class="book bk2SA">
 <div class="chapter ch15" data-usfm="2SA.15">
 <div class="label">15</div><div class="s1">Abhusaromu anomukira</div><div class="p"> 1Mushure mechinguva, Abhusaromu akazvigadzirira ngoro yamabhiza navarume makumi mashanu kuti vamhanye mberi kwake. 2Aimuka mangwanani achindomira parutivi rwenzira yainanga pasuo reguta. Paiti kana munhu akauya kuna mambo kuzotambirwa mhosva yake, Abhusaromu aimudana oti kwaari, &#8220;Ko, iwe uri weguta ripi?&#8221; Iye aipindura achiti, &#8220;Muranda wenyu anobva kuno rumwe rwamarudzi avaIsraeri.&#8221; 3Ipapo Abhusaromu aizoti kwaari, &#8220;Tarira, mashoko ako akanaka uye ndeechokwadi, asi hapana mumiririri wamambo anganzwe nyaya yako.&#8221; 4Uye Abhusaromu aizoti, &#8220;Dai vaindiita zvavo mutongi munyika muno! Zvaizoti munhu wose anenge ane chichemo kana nyaya aizouya kwandiri uye ndaizoona kuti aitirwa zvakarurama.&#8221;</div><div class="p"> 5Zvaizotizve, kana munhu akaswedera kwaari akamupfugamira, Abhusaromu aimutambanudzira ruoko rwake, omubata uye omutsvoda. 6Abhusaromu aiitira izvi kuvaIsraeri vose vaiuya kuna mambo kuzotambirwa mhosva dzavo, nokudaro akaita kuti varume vose vomuIsraeri vamude.</div><div class="p"> 7Mushure mamakore mana, Abhusaromu akati kuna mambo, &#8220;Nditenderei kuti ndiende kuHebhuroni ndinozadzisa mhiko yandakaita kuna Jehovha. 8Muranda wenyu paakanga achigara paGeshuri muAramu, ndakaita mhiko iyi, &#8216;Kana Jehovha akandidzosera kuJerusarema, ndichamunamata ndiri muHebhuroni.&#8217;&#8198;&#8221;</div><div class="p"> 9Mambo akati kwaari, &#8220;Enda norugare.&#8221; Iye akabva aenda kuHebhuroni.</div><div class="p"> 10Ipapo Abhusaromu akatuma nhume muchivande kumarudzi ose avaIsraeri kundoti kwavari, &#8220;Kana muchinge manzwa hwamanda yarira, ipapo daidzirai muchiti, &#8216;Abhusaromu ava mambo muHebhuroni.&#8217;&#8198;&#8221; Varume mazana maviri vokuJerusarema vakanga vaperekedza Abhusaromu. 11Vakanga vakokwa uye vakangoendawo vasina zvavaiziva, vasina zvavaiziva pamusoro pezvakanga zvarongwa. 12Abhusaromu paakanga achipa zvipiriso akadanawo Ahitoferi muGiro, gurukota raDhavhidhi, kuti auye kubva kuGiro, guta raaigara. Ipapo urongwa hwokumukira mambo hwakabva hwasimba, uye vanhu vakatevera Abhusaromu vakaramba vachiwanda.</div><div class="s1">Dhavhidhi anotiza</div><div class="p"> 13Nhume yakauya ikaudza Dhavhidhi kuti, &#8220;Varume veIsraeri vatorwa mwoyo naAbhusaromu.&#8221;</div><div class="p"> 14Ipapo Dhavhidhi akati kumakurukota ake ose aiva naye muJerusarema, &#8220;Uyai! Ngatitizei, zvikasadaro tose hapana angapunyuka kubva kuna Abhusaromu. Tinofanira kubva pano izvozvi, kana tikasadaro angatibata akatiparadza uye akarwisa guta nomunondo.&#8221;</div><div class="p"> 15Makurukota amambo akapindura akati, &#8220;Varanda venyu vakazvipira kuita chipi nechipi chinenge chasarudzwa naishe mambo wedu.&#8221;</div><div class="p"> 16Mambo akaenda, veimba yake vose vachimutevera; asi akasiya varongo vake gumi kuti vachengete muzinda wamambo. 17Saka mambo akabuda akaenda, vanhu vose vakamutevera, vakandomira pane imwe nzvimbo yaiva chinhambwe. 18Vanhu vake vose vakapfuura pamberi pake, pamwe chete navaKereti navaPereti vose, uye namazana matanhatu ose avaGiti avo vakanga vabva naye kuGati, vakafamba vachipfuura napamberi pamambo.</div><div class="p"> 19Mambo akati kuna Itai muGiti, &#8220;Ko, wauyireiwo nesu? Dzokera unogara naMambo Abhusaromu. Uri mutorwa iwe, wakadzingwa kumusha kwako. 20Wakauya nezuro chaiye, zvino nhasi ndingaita kuti udzungaire nesu here, uye ini ndisingazivi chaiko kwandinoenda? Dzokera, utore hama dzako dzose. Ngoni nokutendeka ngazvive newe.&#8221;</div><div class="p"> 21Asi Itai akapindura mambo akati, &#8220;Ndinopika naJehovha mupenyu, uye ndinopika naishe wangu mambo mupenyu, pana ishe wangu mambo, kunyange zvikareva upenyu kana kufa, ipapo muranda wenyu ndipo paachava.&#8221;</div><div class="p"> 22Dhavhidhi akati kuna Itai, &#8220;Enda hako, famba.&#8221; Nokudaro Itai muGiti navanhu vake nemhuri dzose dzaiva naye vakafamba vachienda mberi.</div><div class="p"> 23Nyika yose yakachema kwazvo vanhu vose pavakanga vachipfuura. Namambowo akayambuka mupata weKidhironi, uye vanhu vose vakafamba vakananga kurenje.</div><div class="p"> 24Zadhoki akanga aripowo, uye vaRevhi vose vakanga vanaye vakanga vakatakura areka yesungano yaMwari. Vakagadzika areka yaMwari pasi, Abhiatari akapa zvipiriso kusvikira vanhu vose vabuda muguta.</div><div class="p"> 25Ipapo mambo akati kuna Zadhoki, &#8220;Dzosera areka yaMwari muguta. Kana ndikawana nyasha pamberi paJehovha, achandidzosa uye achaita kuti ndione zvakare panzvimbo paanogara. 26Asi kana iye akati, &#8216;Handifadzwi newe,&#8217; zvose ndakazvigadzirira; ngaandiitire hake zvaanenge achida.&#8221;</div><div class="p"> 27Mambo akatizve kuna Zadhoki muprista, &#8220;Ko, hauzi muoni here? Dzokera muguta norugare, nomwanakomana wako Ahimaazi naJonatani mwanakomana waAbhiatari. Iwe naAbhiatari, endai navanakomana venyu. 28Ini ndichandomira pamazambuko erenje kusvikira shoko rasvika kwandiri kubva kwamuri.&#8221; 29Ipapo Zadhoki naAbhiatari vakatora areka yaMwari vakadzokera kuJerusarema vakandogarako.</div><div class="p"> 30Asi Dhavhidhi akaramba achikwira Gomo reMiorivhi, akaenda achichema: aiva akafukidza musoro wake asina shangu. Vanhu vose naivowo vakanga vakafukidza misoro yavo vachichema vachikwidza. 31Zvino Dhavhidhi akaudzwa kuti, &#8220;Ahitoferi ndiye mumwe wavapanduki vana Abhusaromu.&#8221; Saka Dhavhidhi akanamata achiti, &#8220;Haiwa Jehovha, shandurai henyu mazano aAhitoferi kuti ave upenzi.&#8221;</div><div class="p"> 32Dhavhidhi paakasvika pamusoro, vanhu pavaisinamata Mwari vari, Hushai muAriki akanga akamumirira, nguo yake yakabvaruka uye ane guruva mumusoro. 33Dhavhidhi akati kwaari, &#8220;Kana iwe ukaenda neni, uchava mutoro kwandiri. 34Asi kana ukadzokera kuguta ukandoti kuna Abhusaromu, &#8216;Ini ndichava muranda wenyu, imi mambo; ndaiva muranda wababa venyu kare, asi zvino ndichava muranda wenyu,&#8217; ipapo ungandibatsira kuti ukanganise zano raAhitoferi. 35Vaprista Zadhoki naAbhiatari vanenge vasiri pamwe chete newe here? Iwe uvaudze zvose zvaunenge uchinzwa zvichirongwa mumuzinda wamambo. 36Vana vavo vaviri, Ahimaazi mwanakomana waZadhoki naJonatani mwanakomana waAbhiatari, varikowo. Uvatume kwandiri nezvose zvaunenge wanzwa.&#8221;</div><div class="p"> 37Saka shamwari yaDhavhidhi, Hushai, akasvika kuJerusarema Abhusaromu paakanga achipinda muguta.</div>
 </div>
 </div>
</div>

<div class="version vid32 iso6393sna" data-vid="32" data-iso6393="sna">
 <div class="book bk2SA">
 <div class="chapter ch16" data-usfm="2SA.16">
 <div class="label">16</div><div class="s1">Dhavhidhi naZibha</div><div class="p"> 1Dhavhidhi akati afamba chinhambwe chiduku pamusoro pegomo, akaona Zibha, muranda waMefibhosheti akamumirira. Akanga ane mbongoro mbiri dzakanga dzakatakudzwa mazana maviri ezvingwa, nezana ramakeke amaonde nedende rewaini.</div><div class="p"> 2Mambo akabvunza Zibha akati, &#8220;Ko, wauyirei nezvinhu izvi?&#8221;</div><div class="p">Zibha akapindura akati, &#8220;Mbongoro ndedzeveimba yamambo kuti vatasve, zvingwa nemichero ndezvavarume kuti vadye, uye waini ndeyokupedza nyota yeavo vanga vaneta nokuda kwerenje.&#8221;</div><div class="p"> 3Mambo akabvunza akati, &#8220;Ko, muzukuru watenzi wako aripi?&#8221;</div><div class="p">Zibha akati kwaari, &#8220;Ari kugara muJerusarema, nokuti anoti iye, &#8216;Nhasi veimba yaIsraeri vachandidzorera umambo hwasekuru vangu.&#8217;&#8198;&#8221;</div><div class="p"> 4Ipapo mambo akati kuna Zibha, &#8220;Tarira, zvose zvanga zviri zvaMefibhosheti zvava zvako.&#8221;</div><div class="p">Zibha akati, &#8220;Ndinozvideredza. Dai ndawana nyasha pamberi penyu, ishe wangu mambo.&#8221;</div><div class="s1">Shimei anotuka Dhavhidhi</div><div class="p"> 5Mambo Dhavhidhi paakanga ava kusvika kuBhahurimi, mumwe murume aibva kurudzi rumwe chete nemhuri yaSauro akabudamo. Zita rake ainzi Shimei mwanakomana waGera, uye aituka paaibuda. 6Akapotsera mabwe kuna Dhavhidhi namakurukota ose amambo, kunyange zvazvo varwi vose navachengeti vake vakanga vari kurudyi nokuruboshwe rwake. 7Shimei akatuka achiti, &#8220;Ibva kuno, ibva kuno, iwe munhu weropa, munhu akaipa! 8Jehovha akuripira ropa rose rawakadeura muimba yaSauro, uyo wawakatorera chigaro chokutonga. Jehovha apa ushe kumwanakomana wako Abhusaromu. Wasvika pakuparara nokuti uri munhu weropa!&#8221;</div><div class="p"> 9Ipapo Abhishai mwanakomana waZeruya akati kuna mambo, &#8220;Ko, iyi imbwa yakafa ingatukirei ishe mambo wangu? Regai ndiende ndinodimura musoro wake.&#8221;</div><div class="p"> 10Asi mambo akati, &#8220;Ko, ini nemi takafanana pakudii, imi vanakomana vaZeruya? Ko, kana achituka nokuti Jehovha ati kwaari, &#8216;Tuka Dhavhidhi,&#8217; ndiani angati, &#8216;Ko, unoitirei izvi?&#8217;&#8198;&#8221;</div><div class="p"> 11Ipapo Dhavhidhi akati kuna Abhishai namakorokota ake ose, &#8220;Mwana wangu, anova wenyama yangu chaiyo, ari kuda kundiuraya. Ko, kuzoti uyu zvake, muBhenjamini! Musiyei akadaro; regai atuke, nokuti Jehovha amutuma. 12Zvichida Jehovha angaona kutambura kwangu uye zvimwe angandiripira zvakanaka nokuda kwokutukwa kwandiri kugamuchira nhasi.&#8221;</div><div class="p"> 13Ipapo Dhavhidhi navanhu vake vakaramba vachifamba nenzira, Shimei paakanga achifamba ari kuno rumwe rutivi rwegomo, achituka achingoenda achipotsera matombo kwaari achimupfumburira guruva. 14Mambo navanhu vose vaiva naye vakasvika kwavaienda vaneta. Akazororapo.</div><div class="s1">Zano raHushai naAhitoferi</div><div class="p"> 15Panguva iyi, Abhusaromu navarume vose veIsraeri vakasvika muJerusarema, uye Ahitoferi aiva naye. 16Zvino Hushai muAriki, shamwari yaDhavhidhi, akaenda kuna Abhusaromu akandoti kwaari, &#8220;Mambo ngaararame nokusingaperi! Mambo ngaararame nokusingaperi!&#8221;</div><div class="p"> 17Abhusaromu akabvunza Hushai akati, &#8220;Urwu ndirwo rudo rwaunoratidza shamwari yako here? Sei usina kuenda neshamwari yako?&#8221;</div><div class="p"> 18Hushai akati kuna Abhusaromu, &#8220;Kwete, iye akasarudzwa naJehovha, navanhu ava uye navarume vose veIsraeri, ini ndichava wake, uye ndicharamba ndinaye. 19Zvakarezve, ndingagoshandira aniko? Ko, handifaniri kushandira mwanakomana? Sezvandaishandira baba venyu, saizvozvo ndichakushandirai.&#8221;</div><div class="p"> 20Abhusaromu akati kuna Ahitoferi, &#8220;Tipewo zano rako. Toita sei?&#8221;</div><div class="p"> 21Ahitoferi akapindura akati, &#8220;Vatai navarongo vababa venyu avo vakasiyiwa vakachengeta muzinda wamambo. Ipapo Israeri yose ichanzwa kuti mazviita chinhu chinonhuhwa mumhuno dzababa venyu, uye maoko avanhu vose vanokutsigirai achasimbiswa.&#8221; 22Ipapo vakamisira Abhusaromu tende pamusoro pedenga remba, uye akavata navarongo vababa vake vaIsraeri vose vachiona.</div><div class="p"> 23Zvino mumazuva iwayo zano raipiwa naAhitoferi raiita seromunhu anobvunza kuna Mwari. Ndizvozvo zvaifungwa naDhavhidhi pamwe chete naAbhusaromu pamusoro pamazano aipiwa naAhitoferi.</div>
 </div>
 </div>
</div>

<div class="version vid32 iso6393sna" data-vid="32" data-iso6393="sna">
 <div class="book bk2SA">
 <div class="chapter ch17" data-usfm="2SA.17">
 <div class="label">17</div><div class="p"> 1Ahitoferi akati kuna Abhusaromu, &#8220;Regai ndisarudze varume zviuru gumi nezviviri ndigosimuka usiku huno nditevere Dhavhidhi. 2Uye ndichamurwisa achakaneta uye asina simba. Ndichamutyisidzira, uye ipapo vanhu vose vaanavo vachatiza. Ndichauraya mambo chete. 3Ndichadzosera vanhu vose kwamuri. Kufa kwomunhu wamunotsvaka kuchareva kudzoka kwavose; ipapo vanhu vose vachava norugare.&#8221; 4Shoko iri rakafadza Abhusaromu navakuru vose veIsraeri.</div><div class="p"> 5Asi Abhusaromu akati, &#8220;Danaiwo Hushai muAriki, kuti tigonzwa kuti anoti kudii.&#8221; 6Hushai akati asvika kwaari, Abhusaromu akati, &#8220;Ahitoferi apa zano iri. Toita zvaareva here? Kana zvisizvo, tipewo pfungwa yako.&#8221;</div><div class="p"> 7Hushai akapindura Abhusaromu akati, &#8220;Zano ramapiwa naAhitoferi harina kunaka panguva ino. 8Munoziva baba venyu navanhu vavo; varwi, uye vanotyisa kunge bere rabvutirwa vana varo. Pamusoro pezvo, baba venyu murwi ano ruzivo; havangavati namauto usiku. 9Kunyange izvozvi vakavanda mubako kana pane imwe nzvimbo. Kana vakatanga kurwa navarwi venyu, ani naani anonzwa nezvazvo achati, &#8216;Pakati pavarwi vanotevera Abhusaromu paurayiwa vanhu.&#8217; 10Ipapo kunyange murwi akashinga kwazvo, ane mwoyo wakaita soweshumba, achati rukutu nokutya, nokuti vaIsraeri vose vanoziva kuti baba venyu murwi uye kuti vose vavanavo vakashinga.</div><div class="p"> 11&#8220;Saka zano rangu nderiri: VaIsraeri vose, kubva kuDhani kusvikira kuBheerishebha, vakawanda sejecha rokumhenderekedzo dzegungwa, ngavaungane kwamuri, iyemi pachenyu muchivatungamirira kundorwa. 12Ipapo tichavarwisa kwose kwavanenge vari, uye tichawira paari sedova rinowira pasi. Hakuna kana mumwe wavo zvake achasara ari mupenyu. 13Kana akadzokera muguta, ipapo vaIsraeri vose vachauya namabote kuguta iroro, uye ticharizvuzvurudzira pasi kumupata kusvikira pasisina kunyange nechimedu charo chingawanikwa.&#8221;</div><div class="p"> 14Abhusaromu navarume vose veIsraeri vakati, &#8220;Zano raHushai muAriki riri nani pane raAhitoferi.&#8221; Nokuti Jehovha aida kukonesa zano rakanaka raAhitoferi kuitira kuti auyise njodzi pamusoro paAbhusaromu.</div><div class="p"> 15Ipapo Hushai akati kuna Zadhoki naAbhiatari, vaprista, &#8220;Ahitoferi arayira Abhusaromu navakuru veIsraeri kuti vaite ichi nechocho. 16Zvino chituma shoko nokukurumidza uye uudze Dhavhidhi kuti, &#8216;Musavata pamazambuko omurenje usiku huno; yambukai musamborega, nokuti mambo navanhu vose vaanavo vangamedzwa.&#8217;&#8198;&#8221;</div><div class="p"> 17Jonatani naAhimaazi vakanga vachigara paEni Rogeri uye mumwe murandakadzi ndiye aifanira kundovazivisa, uye ivo vachienda kundoudza Mambo Dhavhidhi, nokuti havazaifanira kuonekwa vachipinda muguta. 18Asi mumwe mujaya akavaona ndokubva andoudza Abhusaromu. Saka vaviri ava vakabva nokukurumidza vakaenda kumba yomumwe murume aiva muBhahurimi. Akanga ane tsime muruvazhe, uye vakapinda mariri. 19Mukadzi wake akatora chifukidzo akachiwaridza pamusoro pomuromo wetsime uye akayanika zviyo pamusoro pacho. Hakuna akaziva chinhu pamusoro pazvo.</div><div class="p"> 20Varume vokwaAbhusaromu vakati vasvika kumukadzi akanga ari pamba, vakabvunza vakati, &#8220;VanaAhimaazi naJonatani varipi?&#8221;</div><div class="p">Mukadzi akati kwavari, &#8220;Vayambuka rukova.&#8221; Varume vakatsvaka asi havana munhu wavakawana, saka vakadzokera kuJerusarema.</div><div class="p"> 21Shure kwokunge varume ava vaenda, vaviri vaya vakakwira vakabuda mutsime uye vakaenda kundozivisa Mambo Dhavhidhi izvozvo. Vakati kwaari, &#8220;Simukai izvozvi muyambuke rwizi urwu; Ahitoferi apa zano rokuti nerokuti pamusoro penyu.&#8221; 22Saka Dhavhidhi navanhu vose vakanga vanaye vakasimuka vakayambuka Jorodhani. Kuchiedza, hapana akanga asara asati ayambuka Jorodhani.</div><div class="p"> 23Ahitoferi akati aona kuti zano rake rakanga risina kutevedzwa, akaisa chigaro pambongoro yake akaenda kumba kwake muguta rokwake. Akaronga zvose zveimba yake ndokubva azvisungirira. Saka akafa uye akavigwa muhwiro rababa vake.</div><div class="p"> 24Dhavhidhi akaenda kuMahanaimi, uye Abhusaromu akayambuka Jorodhani navarume vose veIsraeri. 25Abhusaromu akanga agadza Amasa kuti ave mutungamiri wehondo pachinzvimbo chaJoabhu. Amasa akanga ari mwanakomana womumwe murume ainzi Jeteri, muIsraeri akanga awana Abhigairi, mwanasikana waNahashi uye ari munun&#700;una waZeruya mai vaJoabhu. 26VaIsraeri naAbhusaromu vakadzika misasa yavo munyika yeGireadhi.</div><div class="p"> 27Dhavhidhi akati asvika kuMahanaimi, Shobhi mwanakomana waNahashi aibva kuRabha ravaAmoni, naMakiri mwanakomana waAmieri weRo Dhebha, uye Bhazirai muGireadhi wokuRogerimi 28vakauya nenhoo nembiya nemidziyo yevhu. Vakauyawo negorosi nebhari, upfu hwakatsetseka nezviyo zvakakangwa, nyimo nenyemba, 29uchi namafuta, makwai uye noruomba rwaibva mumukaka wemhou, kuti Dhavhidhi navanhu vake vadye. Nokuti vakati, &#8220;Vanhu vava nenzara, vaneta uye vava nenyota murenje.&#8221;</div>
 </div>
 </div>
</div>

<div class="version vid32 iso6393sna" data-vid="32" data-iso6393="sna">
 <div class="book bk2SA">
 <div class="chapter ch18" data-usfm="2SA.18">
 <div class="label">18</div><div class="s1">Kufa kwaAbhusaromu</div><div class="p"> 1Dhavhidhi akaunganidza varume vakanga vanaye uye akagadza pamusoro pavo vatungamiri vezviuru navatungamiri vamazana. 2Dhavhidhi akatumira varwi achiita kudai: chikamu chimwe chete kubva muzvitatu chavo chichitungamirirwa naJoabhu, chimwe chikamu chimwe chete kubva muzvitatu chichitungamirirwa nomunun&#700;una waJoabhu ainzi Abhishai mwanakomana waZeruya, uye chikamu chimwe chete kubva muzvitatuzve chichitungamirirwa naItai muGiti. Mambo akataurira vanhu kuti, &#8220;Zvirokwazvo neni pachangu ndichafamba nemi.&#8221;</div><div class="p"> 3Asi vanhu vakati, &#8220;Imi hamufaniri kuenda; kana tikamanikidzirwa kutiza, havambovi nehanya nesu. Kunyange kana hafu yedu ikafa, havambovi nehanya; asi imi munokosha sesu tiri zviuru gumi. Zvingava nani zvino kuti imi mutitsigire muri muguta.&#8221;</div><div class="p"> 4Mambo akati, &#8220;Ndichaita zvose zvamunoona zvakakunakirai.&#8221;</div><div class="p">Saka mambo akamira parutivi rwesuo pakanga pachifamba varume vose vachibuda namapoka amazana neezviuru. 5Mambo akarayira Joabhu, Abhishai naItai akati, &#8220;Munzwire henyu jaya nyasha, iye Abhusaromu nokuda kwangu.&#8221;</div><div class="p"> 6Varwi vakafamba vachipinda musango kuti vandorwa navaIsraeri, uye hondo yakarwiwa mudondo raEfuremu. 7Imomo hondo yeIsraeri yakakundwa navanhu vaDhavhidhi, uye pakava nokufa kukuru zuva iroro, varume zviuru makumi maviri vakafa. 8Kurwa kwakapararira panyika yose, uye dondo rakauraya vanhu vazhinji pazuva iro kukunda munondo.</div><div class="p"> 9Zvino zvakaitika kuti Abhusaromu akasangana navanhu vaDhavhidhi. Akanga akatasva nyurusi rake, uye nyurusi parakapinda napasi pamatavi makobvu omuti mukuru womuouki, musoro waAbhusaromu wakabatwa mumuti. Akasiyiwa akarembera mudenga, nyurusi raakanga akatasva rikaramba richienda.</div><div class="p"> 10Mumwe wavarume akati aona izvi, akati kuna Joabhu, &#8220;Ndaona Abhusaromu akarembera mumuti womuouki.&#8221;</div><div class="p"> 11Joabhu akati kumurume akanga amuudza izvozvo, &#8220;Watii? Wamuona? Seiko usina kumubayira pasi pakare ipapo? Ipapo ndingadai ndazokupa mashekeri gumi#18:11 magiramu angaita 115 esirivha nebhanhire romurwi.&#8221;</div><div class="p"> 12Asi murume uyu akati, &#8220;Kunyange dai chiuru chamashekeri#18:12 makirogiramu angaita 11 chakanga chayerwa mumaoko angu, handaigona kusimudzira mwanakomana wamambo ruoko rwangu kuti ndimuuraye. Mambo akakurayirai imi, Abhishai naItai isu tichizvinzwa achiti, &#8216;Mudzivirire jaya Abhusaromu nokuda kwangu.&#8217; 13Uye kana dai ndanga ndaisa upenyu hwangu panjodzi, uye hapana chakavanzika kuna mambo, imi maizomira kure neni.&#8221;</div><div class="p"> 14Joabhu akati, &#8220;Handinganonoki kudai nokuda kwako.&#8221; Saka akatora mapfumo matatu mumaoko ake akaanyudza mumwoyo maAbhusaromu, uye Abhusaromu achiri mupenyu mumuti womuouki. 15Uye vatakuri venhumbi dzokurwa nadzo dzaJoabhu gumi vakakomba Abhusaromu, vakamubaya, vakamuuraya.</div><div class="p"> 16Ipapo Joabhu akaridza hwamanda, uye varwi vakarega kutevera vaIsraeri, nokuti Joabhu akavamisa. 17Vakatora Abhusaromu vakamukanda mugomba guru raiva mudondo vakatutira murwi mukuru wamatombo pamusoro pake. Zvichakadaro, vaIsraeri vose vakatiza vakaenda kudzimba dzavo.</div><div class="p"> 18Panguva youpenyu hwake, Abhusaromu akanga atora mbiru akaimisa muMupata waMambo sechirangaridzo kwaari, nokuti akafunga akati, &#8220;Handina mwanakomana angayeuchidza vanhu zita rangu.&#8221; Akatumidza mbiru iyo zita rake, uye inonzi Mbiru Yokuyeuka Abhusaromu kusvikira nhasi.</div><div class="s1">Dhavhidhi anochema Abhusaromu</div><div class="p"> 19Zvino Ahimaazi mwanakomana waZadhoki akati, &#8220;Regai ndimhanye neshoko kuna mambo rokuti Jehovha amurwira kubva muruoko rwavavengi vake.&#8221;</div><div class="p"> 20Joabhu akati, &#8220;Hausiwe unoenda neshoko nhasi. Ungaenda hako neshoko pane dzimwe nguva, asi haufaniri kuita izvozvo nhasi, nokuti mwanakomana wamambo afa.&#8221;</div><div class="p"> 21Ipapo Joabhu akati kumuEtiopia, &#8220;Chienda undoudza mambo zvawaona.&#8221; MuEtiopia akakotama pamberi paJoabhu uye akamhanya achibvapo.</div><div class="p"> 22Ahimaazi mwanakomana waZadhoki akatizve kuna Joabhu, &#8220;Kunyange zvakadaro hazvo, ndapota regai ndimhanye nditevere muEtiopia.&#8221;</div><div class="p">Asi Joabhu akapindura akati, &#8220;Mwanakomana wangu, unodireiko kuenda? Hauna kana shoko richakupa mubayiro.&#8221;</div><div class="p"> 23Iye akati, &#8220;Kunyange zvakadaro hazvo, ndinoda kumhanya ini.&#8221;</div><div class="p">Saka Joabhu akati, &#8220;Mhanya!&#8221; Ipapo Ahimaazi akamhanya nomunzira yomubani akasiya muEtiopia.</div><div class="p"> 24Dhavhidhi paakanga agere pakati pamasuo maviri, murindi akakwira pamusoro pedenga resuo reparusvingo. Akati atarisa kunze, akaona murume achimhanya ari oga. 25Murindi akadanidzira kuna mambo akamuzivisa izvozvo.</div><div class="p">Mambo akati, &#8220;Kana ari oga, anofanira kunge ane shoko rakanaka.&#8221; Uye murume akaramba achingoswedera.</div><div class="p"> 26Ipapo murindi akaonazve mumwe murume achimhanya, akadanidzira kumutariri wesuo akati, &#8220;Tarira mumwe ari kumhanya ari oga!&#8221;</div><div class="p">Mambo akati, &#8220;Anofanira kunge achiuyawo neshoko rakanaka.&#8221;</div><div class="p"> 27Murindi akati, &#8220;Ndinoona sokuti wokutanga anomhanya saAhimaazi mwanakomana waZadhoki.&#8221;</div><div class="p">Mambo akati, &#8220;Munhu akanaka iyeye. Ari kuuya namashoko akanaka.&#8221;</div><div class="p"> 28Ipapo Ahimaazi akadanidzira kuna mambo achiti, &#8220;Rugare!&#8221; Akakotama pamberi pamambo akatsikitsira uso hwake pasi akati, &#8220;Jehovha Mwari wenyu ngaarumbidzwe! Akaisa kwamuri varume vakanga vachisimudzira maoko avo kuti varwe naishe wangu mambo.&#8221;</div><div class="p"> 29Mambo akabvunza akati, &#8220;Ko, jaya Abhusaromu mupenyu here?&#8221;</div><div class="p">Ahimaazi akati, &#8220;Ndakaona kunyongana kukuru panguva iyo Joabhu akanga oda kutuma muranda wamambo uye neni, muranda wenyu, asi handina kuziva kuti chaiva chii.&#8221;</div><div class="p"> 30Mambo akati, &#8220;Mira parutivi uye usabva pano.&#8221; Saka akasudurukira parutivi ndokumirapo.</div><div class="p"> 31Ipapo muEtiopia akasvika akati, &#8220;Ishe wangu mambo, inzwai mashoko akanaka! Jehovha akurwirai nhasi kuna vose vakakumukirai.&#8221;</div><div class="p"> 32Mambo akabvunza muEtiopia akati, &#8220;Ko, mujaya Abhusaromu mupenyu here?&#8221;</div><div class="p">MuEtiopia akapindura achiti, &#8220;Vavengi vashe wangu mambo navose vanokumukirai kuti vakukuvadzei ngavave sejaya iro.&#8221;</div><div class="p"> 33Mambo akadedera. Akakwira kukamuri yakanga iri pamusoro pesuo akachema. Paaifamba aiti, &#8220;Haiwa mwanakomana wangu Abhusaromu! Mwanakomana wangu, mwanakomana wangu Abhusaromu! Dai chete ndafa hangu ini pachinzvimbo chako! Haiwa Abhusaromu, mwanakomana wangu, mwanakomana wangu!&#8221;</div>
 </div>
 </div>
</div>

<div class="version vid32 iso6393sna" data-vid="32" data-iso6393="sna">
 <div class="book bk2SA">
 <div class="chapter ch19" data-usfm="2SA.19">
 <div class="label">19</div><div class="p"> 1Joabhu akaudzwa kuti, &#8220;Mambo anochema nokuungudza nokuda kwaAbhusaromu.&#8221; 2Uye kuhondo yose, kukunda kwezuva iro kwakashandurwa kukava kuchema, nokuti pazuva iro, mauto akazvinzwa zvichinzi, &#8220;Mambo anochema nokuda kwomwanakomana wake.&#8221; 3Varume vakapinda muguta vachiverevedza savanhu vanoverevedza vachinyara nokuti vatiza kubva kuhondo. 4Mambo akafukidza chiso chake akachema zvikuru achiti, &#8220;Haiwa mwanakomana wangu Abhusaromu! Haiwa Abhusaromu, mwanakomana wangu, mwanakomana wangu!&#8221;</div><div class="p"> 5Ipapo Joabhu akapinda mumba kuna mambo akati, &#8220;Nhasi manyadzisa vanhu vose, avo vachangoponesa upenyu hwenyu noupenyu hwavanakomana navanasikana venyu uye noupenyu hwavakadzi venyu navarongo venyu. 6Munoda avo vanokuvengai uye munovenga avo vanokudai. Mazviratidza pachena nhasi kuti vatungamiri vehondo navanhu vavo havarevi chinhu kwamuri. Ndinoona kuti maifarira kuti dai Abhusaromu ararama nhasi uye kuti dai tose zvedu tafa. 7Zvino budai munokurudzira vanhu venyu. Ndinopika naJehovha kuti kana mukasabuda, hakuna munhu achasara nemi usiku huno. Zvichava zvakaipisisa kwamuri kupinda njodzi dzose dzakakuwirai kubva pauduku hwenyu kusvikira zvino.&#8221;</div><div class="p"> 8Saka mambo akasimuka akandoisa chigaro chake pasuo. Vanhu vakati vaudzwa kuti, &#8220;Mambo agere pasuo,&#8221; vose vakauya pamberi pake.</div><div class="s1">Dhavhidhi anodzokera kuJerusarema</div><div class="p">Zvichakadaro, vaIsraeri vakanga vatizira kumisha yavo. 9Mumarudzi ose avaIsraeri, vanhu vose vakanga vachikakavadzana vachiti, &#8220;Mambo akatisunungura kubva muruoko rwavaFiristia. Asi zvino atiza nyika nokuda kwaAbhusaromu; 10uye Abhusaromu, uyo watakazodza kuti atitonge, afa muhondo. Saka munoregereiko kutaura nezvokudzosa mambo?&#8221;</div><div class="p"> 11Mambo Dhavhidhi akatuma shoko naZadhoki naAbhiatari, vaprista achiti, &#8220;Bvunzai vakuru veJudha kuti, &#8216;Seiko imi mava vokupedzisira kudzosa mambo kumuzinda wake, sezvo zvinotaurwa muIsraeri yose zvasvika pamba pake. 12Imi muri hama dzangu, muri venyama yangu chaivo uye veropa rangu. Saka maitireiko vokupedzisira kudzosa mambo?&#8217; 13Uye muti kuna Amasa, &#8216;Ko, iwe hauzi wenyama yangu uye weropa rangu here? Mwari ngaandirove, ngaarambe achidaro kwazvo, kana kubva zvino zvichienda mberi, iwe ukarega kuva mukuru wehondo yangu panzvimbo yaJoabhu.&#8217;&#8198;&#8221;</div><div class="p"> 14Akabata mwoyo yavarume vose veJudha vakaita sokunge vaiva munhu mumwe. Vakatuma shoko kuna mambo vachiti, &#8220;Dzokai, imi navanhu venyu mose.&#8221; 15Ipapo mambo akadzoka akasvika paJorodhani.</div><div class="p">Zvino vanhu veJudha vakanga vasvika kuGirigari kuti vaende kundosangana namambo vagomuyambutsa Jorodhani. 16Shimei mwanakomana waGera, muBhenjamini aibva kuBhahurimi, akakurumidza kuburuka navanhu veJudha kuti vandosangana naMambo Dhavhidhi. 17Akanga ane vaBhenjamini vaisvika chiuru, pamwe chete naZibha, mutariri weimba yaSauro, uye navanakomana vake gumi navashanu navaranda vake makumi maviri. Vakamhanyira kuJorodhani uko kwakanga kwava namambo. 18Vakayambuka rukova kuti vandotora veimba yamambo uye kuti vaite zvose zvaaida.</div><div class="p">Shimei mwanakomana waGera akati ayambuka Jorodhani, akawira pasi nechiso chake pamberi pamambo 19akati kwaari, &#8220;Ishe wangu ngaarege kundipa mhaka. Regai henyu kurangarira kukanganisa kwakaitwa nomuranda wenyu pazuva rakabva ishe wangu mambo paJerusarema. Mambo ngaazvidzime mundangariro dzake. 20Nokuti ini muranda wenyu ndinozviziva kuti ndakatadza, asi nhasi ndauya pano sewokutanga weimba yose yaJosefa kuti ndiburuke ndizosangana naishe wangu iye mambo.&#8221;</div><div class="p"> 21Ipapo Abhishai mwanakomana waZeruya akati, &#8220;Ko, Shimei haafaniri kuurayiwa nokuda kwaizvozvi here? Akatuka muzodziwa waJehovha.&#8221;</div><div class="p"> 22Dhavhidhi akapindura akati, &#8220;Ndineiko nemi, imi vanakomana vaZeruya zvokuti nhasi mava vavengi vangu! Pane munhu angafanira kufa muIsraeri nhasi here? Ko, handizivi here kuti nhasi ndiri mambo weIsraeri?&#8221; 23Saka mambo akati kuna Shimei, &#8220;Haungafi.&#8221; Uye mambo akamuvimbisa nemhiko.</div><div class="p"> 24Mefibhosheti muzukuru waSauro, akaburukawo kundosangana namambo. Haana kuva nehanya netsoka dzake kana kuguririra ndebvu dzake kana kusuka nguo dzake kubvira pazuva rakasimuka mambo kusvikira pazuva raakadzoka ari mupenyu. 25Paakasvika achibva kuJerusarema achindosangana namambo, mambo akamubvunza akati, &#8220;Wakaregereiko kuenda neni, Mefibhosheti?&#8221;</div><div class="p"> 26Iye akati, &#8220;Ishe wangu mambo, sezvo ini muranda wenyu ndiri chirema, ndakati, &#8216;Ndichaita kuti mbongoro yangu igadzikwe chigaro uye ndigoitasva, kuti ndigoenda namambo.&#8217; Asi Zibha muranda wangu akandipandukira. 27Uye akandorevera nhema muranda wenyu kuna ishe wangu mambo. Ishe wangu mambo akaita somutumwa waMwari; saka itai henyu zvinokufadzai. 28Zvizvarwa zvose zvasekuru vangu hazvifanirwi nechimwe chinhu asi rufu ruchibva kuna she wangu mambo, asi makapa muranda wenyu nzvimbo pakati paavo vanodya patafura yenyu. Saka ini ndine mvumo yeiko yokukumbirazve kuna mambo?&#8221;</div><div class="p"> 29Mambo akati kwaari, &#8220;Uchataurireiko zvakawanda? Ndinokurayira iwe naZibha kuti mugovane minda.&#8221;</div><div class="p"> 30Mefibhosheti akati kuna mambo, &#8220;Ngaatore hake zvinhu zvose, sezvo zvino ishe wangu mambo asvika kumusha ari mupenyu.&#8221;</div><div class="p"> 31Bhazirai muGireadhi akasvikawo achibva kuRogerimi kuti ayambuke Jorodhani namambo uye kuti amuperekedze panzira yake ikoko. 32Zvino Bhazirai akanga akwegura kwazvo, ava namakore makumi masere. Akanga achiriritira mambo panguva yaakanga agere paMahanaimi, nokuti akanga ari munhu akapfuma kwazvo. 33Mambo akati kuna Bhazirai, &#8220;Yambuka pamwe chete neni ugogara neni muJerusarema, uye ini ndichakuriritira.&#8221;</div><div class="p"> 34Asi Bhazirai akapindura mambo akati, &#8220;Makore manganiko andichararama, zvokuti ndingafanira kukwidza kuJerusarema namambo? 35Ndava namakore makumi masere. Ndichagona kuziva mutsauko pakati pechakanaka nechisina kunaka here? Ko, muranda wenyu achagona kuravira chaanodya nechaanonwa here? Ko, ndichagona kunzwa manzwi avarume navakadzi vanoimba here? Muranda wenyu achaitireiko kuti ave mumwe mutoro kuna ishe wangu mambo? 36Muranda wenyu achayambuka Jorodhani namambo kwenhambwe pfupi, asi mambo anondipireiko mubayiro wakadai? 37Regai muranda wenyu adzokere hake, kuti ndinofira muguta rangu pedyo nehwiro hwababa vangu namai vangu. Asi hoyu muranda wangu Kimihami. Ngaayambuke hake naishe iye mambo. Mumuitire henyu zvose zvinokufadzai.&#8221;</div><div class="p"> 38Mambo akati, &#8220;Kimihami achayambuka neni, uye ndichamuitira zvose zvinokufadza. Uye zvose zvaunoda kwandiri ndichakuitira.&#8221;</div><div class="p"> 39Saka vanhu vose vakayambuka Jorodhani, uye ipapo mambo akazoyambukawo. Mambo akatsvoda Bhazirai akamuropafadza, uye Bhazirai akadzokera kumba kwake.</div><div class="p"> 40Mambo akati ayambukira kuGirigari, Kimihami akayambuka naye. Mauto ose eJudha nehafu yavarwi veIsraeri vakanga vayambutsa mambo.</div><div class="p"> 41Uye varume vose veIsraeri vakauya kuna mambo vakati kwaari, &#8220;Hama dzedu, varume veJudha, vakabireiko mambo vakamuuyisa neimba yake mhiri kweJorodhani, pamwe chete navanhu vake vose?&#8221;</div><div class="p"> 42Varume vose veJudha vakapindura varume veIsraeri vachiti, &#8220;Takaita izvi nokuti mambo ihama yedu yapedyo. Seiko imi matsamwiswa nazvo? Tambodya here zvinhu zvamambo? Tambozvitorera kana chinhu chimwe chete here?&#8221;</div><div class="p"> 43Ipapo varume veIsraeri vakapindura varume veJudha vakati, &#8220;Tine migove gumi muna mambo; uye zvisiri izvozvo chete, Dhavhidhi ndowedu kukunda imi. Saka seiko imi muchitizvidza? Ko, hatizisu takatanga kutaura kuti mambo adzoke here?&#8221;</div><div class="p">Asi varume veJudha vakapindura nehasha kwazvo kupfuura varume veIsraeri.</div>
 </div>
 </div>
</div>

The Story of God: 30 Day Reading PlanChikamu

The Fall of King David

Rugwaro

Zvinechekuita neHurongwa uhu

Zvirongwa zvakada kufanana neichi