Genesisi 24:12-65

Pakurirana nevamwe

Genesisi 24:12-65 Bhaibheri Dzvene MuChiShona Chanhasi (BDSC)

Akanyengetera akati, “Haiwa Jehovha, Mwari watenzi wangu Abhurahama, itai kuti ndibudirire nhasi, muitire tenzi wangu Abhurahama zvakanaka. Onai, ndimire parutivi petsime rino, uye vanasikana vavanhu vomuguta rino vari kubuda vachiuya kuzochera mvura. Ngazviitike kuti pandinoti kumusikana, ‘Ndapota, tura chirongo chako kuti ndinwewo mvura,’ uye iye akati, ‘Inwai henyu uye ndichanwisawo ngamera dzenyu’ ngaave iye wamasarudzira muranda wenyu Isaka. Naizvozvo ndichaziva kuti maitira tenzi wangu zvakanaka.” Asati apedza kunyengetera, Rabheka akasvika nechirongo chake papfudzi rake. Akanga ari mwanasikana waBhetueri mwanakomana waMirika, mukadzi waNahori mununʼuna waAbhurahama. Musikana akanga akanaka kwazvo, ari mhandara; hakuna murume akanga ambovata naye. Akaenda kutsime, akazadza chirongo chake akadzokazve. Muranda akamhanya akandosangana naye akati, “Ndapota, ndipewo mvura shoma shoma yokunwa kubva muchirongo chako.” Iye akati, “Inwai henyu, ishe wangu,” akakurumidza kutura chirongo mumaoko ake uye akamupa kuti anwe. Shure kwokumupa mvura kuti anwe, akati, “Ndichachererawo ngamera dzenyu mvura, kusvikira dzapedza kunwa.” Saka akakurumidza kudururira mvura yaiva muchirongo chake muchinwiro, akamhanyira kutsime zvakare kundochera imwe mvura zhinji, akachera yakakwanira ngamera dzake. Asina chaakataura, murume uyu akamutarisisa kuti azive kuti Jehovha akanga aita kuti rwendo rwake rubudirire here kana kuti kwete. Ngamera dzakati dzapedza kunwa, murume uya akatora mhete yegoridhe yapamhino yairema hafu yeshekeri nezvishongo zviviri zvamaoko zvairema mashekeri gumi. Ipapo akamubvunza akati, “Uri mwanasikana waaniko? Ndapota, dondiudzawo, kumba kwababa vako kungaita nzvimbo yedu yokuvata here?” Akamupindura akati, “Ndiri mwanasikana waBhetueri, mwanakomana waMirika akaberekera Nahori.” Uye akatizve, “Tine uswa hwakawanda namashanga, uyewo nenzvimbo yenyu yokuvata.” Ipapo murume uya akakotamira pasi akanamata Jehovha, akati, “Jehovha ngaarumbidzwe, Mwari watenzi wangu Abhurahama, iye asina kurega kuita zvakanaka nokutendeka kwake kuna tenzi wangu. Kana ndirini, Jehovha akanditungamirira parwendo rwangu akandisvitsa kumba kwehama dzatenzi wangu.” Musikana akamhanya akandoudza veimba yamai vake pamusoro pezvinhu zvose izvi. Zvino Rabheka akanga ane hanzvadzi yainzi Rabhani, uye iye akakurumidza kubuda akaenda kumurume uya kutsime. Akati achingoona mhete yemhino nezvishongo mumaoko ehanzvadzi yake, uye anzwa Rabheka achitaura zvakanga zvarehwa nomurume uyu kwaari, akabuda akaenda kumurume akamuwana amire pangamera pedyo netsime. Akati, “Uya iwe wakaropafadzwa naJehovha. Wakamirireiko pano? Ndatogadzira imba nenzvimbo yengamera.” Saka murume uya akaenda kumba, uye ngamera dzakaturwa. Uswa namashanga zvakavigirwa ngamera, uye iye navanhu vake vakavigirwa mvura kuti vashambe tsoka dzavo. Zvokudya zvakaiswa pamberi pake, asi iye akati, “Handingatongodyi kusvikira ndakuudzai zvandinoda kureva.” Rabhani akati, “Tiudze hako zvino.” Saka iye akati, “Ndiri muranda waAbhurahama. Jehovha akaropafadza tenzi wangu kwazvo, uye ava mupfumi. Akamupa makwai nemombe, sirivha negoridhe, varandarume navarandakadzi, ngamera nembongoro. Sara mukadzi watenzi wangu akamuberekera mwanakomana panguva yokukwegura kwake, uye akamupa zvinhu zvose zvaanazvo. Uye tenzi wangu akaita kuti ndipike mhiko, uye akati, ‘Haufaniri kutorera mwanakomana wangu mukadzi kubva kuvanasikana vavaKenani, munyika yandigere, asi enda kumhuri yababa vangu uye nokuimba yangu, undotorera mwanakomana wangu mukadzi ikoko.’ “Ipapo ndakabvunza tenzi wangu ndikati, ‘Ko, kana mukadzi akasauya neni?’ “Akapindura akati, ‘Jehovha, iye wandinofamba pamberi pake, achatuma mutumwa wake newe uye achaita kuti rwendo rwenyu rubudirire, kuti uwanire mwanakomana wangu mukadzi, paunoenda kuimba yokwangu, kumhuri yababa vangu. Zvino, kana wasvika kuimba yokwangu, iwe uchasunungurwa pamhiko kunyange vakaramba kumupa kwauri, uchasunungurwa pamhiko yangu.’ “Pandasvika patsime nhasi, ndati, ‘Haiwa Jehovha, Mwari watenzi wangu Abhurahama, kana muchida, ndapota ndipeiwo kubudirira parwendo rwandafamba. Tarirai, ndimire parutivi petsime iri; kana musikana akabuda kuzochera mvura uye ndikati kwaari, “Ndapota rega ndinwe mvura shoma shoma kubva muchirongo chako,” uye kana iye akati kwandiri, “Inwai henyu, uye ndichachererawo ngamera dzenyu,” ngaave iye asarudzirwa mwanakomana watenzi wangu naJehovha.’ “Ndisati ndapedza kunyengetera mumwoyo mangu, Rabheka auya, ane chirongo chake papfudzi rake. Aenda kutsime uye akachera mvura, uye ini ndikati kwaari, ‘Ndapota ndipewo mvura ndinwe.’ “Akurumidza kutura chirongo chake papfudzi rake akati, ‘Inwai henyu, uye ndichanwisa ngamera dzenyuwo.’ Saka ndanwa mvura, uye anwisawo ngamera. “Ndamubvunza ndikati, ‘Uri mwanasikana waaniko?’ “Iye ati, ‘Ndiri mwanasikana waBhetueri mwanakomana waNahori, waakaberekerwa naMirika.’ “Ipapo ndaisa mhete pamhino yake nezvishongo mumaoko ake, uye ndakotama pasi ndikanamata Jehovha. Ndarumbidza Jehovha, Mwari watenzi wangu Abhurahama, uyo akanditungamirira munzira yakarurama kuti ndiwane muzukuru womununʼuna watenzi wangu kuti ave mukadzi womwanakomana wake. Zvino kana muchaitira zvakanaka nokutendeka kuna tenzi wangu, ndiudzei; uye kana zvisizvo, ndiudzei, kuti ndigoziva kwokuenda.” Rabhani naBhetueri vakapindura vakati, “Izvi zvinobva kuna Jehovha; isu hatina chinhu chatingataura kwauri, chakaipa kana chakanaka. Hoyu Rabheka; mutore uende, uye ngaave mukadzi womwanakomana watenzi wako, sokutungamirirwa kwawaitwa naJehovha.” Muranda waAbhurahama akati anzwa zvavakataura, akakotama pasi pamberi paJehovha. Ipapo muranda akabudisa goridhe nezvishongo zvesirivha nenguo dzokufuka akazvipa kuna Rabheka; uye akapawo zvipo zvomutengo mukuru kuhanzvadzi yake nokuna mai vake. Ipapo iye navarume vakanga vanaye vakadya vakanwa, uye vakararapo usiku uho. Akati amuka mangwanani, akati, “Ndiregei hangu ndichienda kuna tenzi wangu.” Asi hanzvadzi yake namai vake vakapindura vakati, “Regai musikana agare nesu mazuva angaita kana gumi; ipapo mungazoenda henyu.” Asi akati kwavari, “Musandirambidza, sezvo zvino Jehovha akandipa kubudirira parwendo rwangu. Ndiregei hangu ndiende kuna tenzi wangu.” Ipapo vakati, “Regai tidane musikana timubvunze nezvazvo.” Saka vakadana Rabheka vakamubvunza vakati, “Uchaenda here nomurume uyu?” Iye akati, “Ndichaenda.” Saka vakaendesa hanzvadzi yavo Rabheka, pamwe chete nomureri wake nomuranda waAbhurahama navanhu vake. Uye vakaropafadza Rabheka vakati, “Iwe hanzvadzi yedu, uve mai wavazhinji vave zviuru nezviuru; vana vako ngavatore masuo avavengi vavo.” Ipapo Rabheka navasikana vake vakagadzirira vakatasva ngamera dzavo vakaenda nomurume uya. Saka muranda akatora Rabheka akabva aenda. Zvino Isaka akanga achibva kuBheeri Rahai Roi, nokuti akanga achigara kuNegevhi. Humwe usiku akabuda akaenda musango kuti ambondorangarira, uye paakasimudza meso ake, akaona ngamera dzichiswedera, naRabhekawo akasimudza meso ake akaona Isaka. Akaburuka kubva pangamera yake uye akabvunza muranda akati, “Ndianiko murume ari musango uyo ari kuuya kuzosangana nesu?” Muranda akapindura akati, “Nditenzi wangu.” Saka akatora chifukidzo akazvifukidza.

Genesisi 24:12-65 Shona Bible 1949, revised 2002 (SNA2002)

akati, “Jehovha, Mwari watenzi wangu Abhurahamu, ndifambisei henyu zvakanaka nhasi; muitire tenzi wangu Abhurahamu ngoni. Tarirai ndimire patsime remvura, vakunda vavanhu veguta vobuda kuzochera mvura. Zvino ngakuitwe kuti musikana wandichati kwaari, ‘Nditurirewo chirongo chako, ndinwe’; kana akati, ‘Inwai henyu, namakamera enyu ndichaanwisawo;’ ngaave iye wamakatsaurira muranda wenyu Isaka; naizvozvo ndichaziva kuti makaitira tenzi wangu ngoni.” Zvino wakanga asati apedza kutaura, Rabheka, wakaberekerwa Bhetueri, mwanakomana waMirika, mukadzi waNahori, mun'una waAbhurahamu, wakasvika ane chirongo pafudzi rake. Zvino musikana uyu wakanga akanaka kwazvo pameso ake, mhandara isina kumboziviwa nomurume; akaburukira kutsime, akazadza chirongo chake, akakwirazve. Ipapo muranda wakamhanyira kundosangana naye, akati, “Dondipawo mvura pachirongo chako, ndinwe.” Iye akati, “Inwai henyu, ishe wangu;” akakurumidza kutura chirongo chake paruoko rwake, akamunwisa. Wakati apedza kumunwisa, akati, “Ndichacherera makamera enyuwo kusvikira aguta.” Akakurumidza, akadurura mvura yakanga iri muchirongo chake muchinwiro; akamhanyira kutsime kundocherazve, akacherera makamera ake ose. Murume akamutarisisa, anyerere, kuti azive kana Jehovha amufambisa zvakanaka parwendo rwake, kana kwete. Makamera akati apedza kunwa murume akatora chindori chendarama chakaita hafu yeshekeri rimwe rendarama pakurema kwacho, nezvishongo zviviri zvamaoko zvakaita mashekeri ane gumi pakurema kwazvo; akati, “Uri mukunda waaniko? Ndiudze hako. Kumba kwababa vako kune pokuvata here?” Iye akati, “Ndiri mukunda waBhetueri, mwanakomana waMirika, waakaberekera Nahori.” Akati kwaariwo, “Tinahwo uswa hwakaoma nezvokudya zvizhinji, nopokuvatawo.” Murume akakotamisa musoro wake, akanamata Jehovha. Akati, “Jehovha, Mwari watenzi wangu Abhurahamu ngaakudzwe, asina kurega nyasha dzake nokutendeka kwake kuna tenzi wangu; kana ndirini, Jehovha wakandifambisa, akandisvitsa kuimba yehama dzatenzi wangu.” Ipapo musikana wakamhanya, akandoudza veimba yamai vake mashoko iwaya. Zvino Rabheka wakanga ane hanzvadzi yainzi Rabhani; Rabhani akabuda, akamhanyira kumurume kutsime. Nokuti wakati achiona chindori nezvishongo pamaoko ehanzvadzi yake, achiti, “Ndizvo zvakataura murume kwandiri,” akaenda kumurume akamuwana amire pamakamera patsime. Akati, “Pinda, iwe, wakaropafadzwa naJehovha; unomirireiko kunze? Nokuti ndagadzira imba nenzvimbo yamakamera.” Murume akapinda mumba; akasunungura makamera akapa makamera uswa hwakaoma nezvokudya; nemvura kuti ashambidze tsoka dzake netsoka dzavarume vaakanga anavo. Ipapo zvokudya zvakaiswa pamberi pake kuti adye; asi iye akati, “Handingadyi ndisati ndambotaura mashoko angu.” Akati, “Taura hako.” Iye akati, “Ndiri muranda waAbhurahamu. Jehovha wakaropafadza tenzi wangu kwazvo; wava mukuru; wakamupa makwai, nemombe, nesirivha, nendarama, navaranda, navarandakadzi, namakamera, nembongoro. NaSara, mukadzi watenzi wangu, wakaberekera tenzi wangu mwanakomana pakukwegura kwake; ndiye waakapa zvose zvaanazvo. Tenzi wangu akandipikisa, akati, ‘Usatorera mwanakomana wangu mukadzi kuvanasikana veKenani, pandigere munyika yavo; asi uende kune veimba yababa vangu nokuhama dzangu unotorera mwanakomana wangu mukadzi ikoko.’ Ndikati kuna tenzi wangu, ‘Zvimwe mukadzi haangatendi kunditevera.’ Iye akati, ‘Jehovha wandinosifamba pamberi pake, achatuma mutumwa wake newe, akufambise zvakanaka parwendo rwako; unotorera mwanakomana wangu mukadzi kuhama dzangu nokune veimba yababa vangu; uchasunungurwa pakupika kwako kwandiri kana wasvika kuhama dzangu; kana vakaramba kukupa iye, uchasunungurwa pakupika kwako kwandiri.’ Zvino ndakasvika nhasi kutsime, ndikati, ‘Jehovha, Mwari watenzi wangu Abhurahamu, kana muchida kundifambisa zvakanaka parwendo rwangu rwandinofamba, tarirai, ndimire patsime remvura; zvino ngazviitwe, kuti musikana anobuda kuzochera mvura,’ wandichati kwaari, ‘Dondipawo zvimvura pachirongo chako, ndinwe,’ iye akati kwandiri, ‘Inwai henyu, imi, uye ndichacherera makamera enyuwo,’ iye ave mukadzi wakatsaurirwa mwanakomana watenzi wangu naJehovha. Zvino ndisati ndapedza kutaura mumwoyo mangu, ndikaona Rabheka achiuya aine chirongo chake pafudzi rake; akaburukira kutsime, akachera; ndikati kwaari, ‘Dondipawo, ndinwe.’ Iye akakurumidza, akatura chirongo chake pafudzi rake, akati, ‘Inwai henyu, uye ndichanwisa makamera enyuwo’; ini ndikanwa, akanwisa makamerawo. Zvino ndakamubvunza, ndikati, ‘Uri mukunda waaniko?’ Iye akati, ‘Ndiri mukunda waBhetueri, mwanakomana waNahori, waakaberekerwa naMirika;’ ipapo ndakaisa chindori mumhino dzake, nezvishongo pamaoko ake. Ndikakotamisa musoro wangu, ndikanamata Jehovha, ndikatenda Jehovha, Mwari watenzi wangu Abhurahamu, iye wakandifambisa panzira yakarurama, kuti nditorere mwanakomana watenzi wangu mukunda womun'una watenzi wangu, kuti ave mukadzi wake. Zvino kana muchida kuitira tenzi wangu mwoyochena nokutendeka, mundiudze; kana musingadi, mundiudze, kuti ndiende kurudyi kana kuruboshwe.” Ipapo Rabhani naBhetueri vakapindura vakati, “Chinhu ichi chinobva kuna Mwari. Isu hatigoni kutaura kwauri zvakaipa kana zvakanaka. Tarira, Rabheka ari pamberi pako, umutore uende, kuti ave mukadzi wake, sezvakarehwa naJehovha.” Zvino muranda waAbhurahamu wakati anzwa mashoko avo, akakotamira pasi pamberi paJehovha; muranda akabudisa zvishongo zvesirivha, nezvendarama, nenguo; akazvipa Rabheka; akapawo hanzvadzi yake namai vake nhumbi dzinokosha. Vakadya, vakanwa, iye navarume vaakanga anavo; vakagarapo usiku hwose, vakamuka mangwanani; iye akati, “Regai, ndiende kuna tenzi wangu.” Asi hanzvadzi yake namai vake vakati, “Musikana achimbogara nesu mazuva zvimwe ane gumi, agozoenda hake.” Asi iye wakati kwavari, “Musandidzora henyu, Jehovha zvaakandifambisa zvakanaka parwendo rwangu; regai ndiende kuna tenzi wangu.” Ivo vakati, “Ngatidane musikana, tinzwe muromo wake.” Vakadana Rabheka, vakati kwaari, “Uchaenda nomurume uyu here?” Akati, “Ndichaenda.” Ipapo vakatendera Rabheka, hanzvadzi yavo, nomureri wake, kuti vaende nomuranda waAbhurahamu, navanhu vake. Vakaropafadza Rabheka, vakati kwaari, “Iwe, hanzvadzi yedu, uve mai vezviuru zvamazana; vana vako ngavave varidzi vamasuo avavengi vavo.” Rabheka akasimuka, navasikana vake, vakatasva makamera, vakatevera murume uyo; muranda akatora Rabheka, akaenda parwendo rwake. Zvino Isaka wakanga achibva nenzira yeBheeri-rakai-roi; nokuti wakanga agere kunyika yenyasi. Isaka akabuda kundorangarira kusango nenguva yamadekwana; akasimudza meso ake, akatarira, akaona makamera achiuya. Rabheka akasimudzawo meso ake; akati achiona Isaka, akaburuka pakamera rake. Akati kumuranda, “Murume uyu, anofamba musango kuzosangana nesu ndianiko?” Muranda akati, “Nditenzi wangu;” iye akatora chokufukidzira chiso chake, akazvifukidza.

Genesisi 24:12-65 Bhaibhiri Idzva rechiShona rine Dhuterokanonika (SCLBD)

Akanamata achiti, “Tenzi, Mwari waAbhurahamu, vatenzi vangu, nzwirai tsitsi vatenzi vangu Abhurahamu, mundibatsire ndiwane zvandafambira. Onai ndimire pano patsime pachauya vanasikana vavanhu vomuguta rino kuzochera mvura. Zvino musikana wandinenge ndati nditekerewo mvura ndinwe, kana iye akapindura achiti, ‘Inwai zvenyu uye ndichapawo ngamera dzenyu mvura yokunwa,’ iyeyo ngaave musikana wamakasarudzira muranda wenyu Isaki. Ndizvo zvichandiratidza kuti maitira mwoyochena vatenzi vangu.” Asati ambopedza kutaura pakabva pasvika Ribheka mwanasikana waBhetueri. Bhetueri uyu akaberekwa naMirika, mudzimai waNahori munun'una waAbhurahamu. Ribheka akasvika akatakura chirongo chake papfudzi. Zvino musikana uyu aiva nechimiro chakanaka kwazvo, iri mhandara isina kumbosangana nomurume. Akapinda mutsime akazadza chirongo chake nemvura akabuda. Muranda uyu akamhanyira kwaari akati, “Regai ndingonyavawo pahuro nemvura yokunwa yomuchirongo chenyu.” Musikana akati, “Inwai zvenyu tenzi wangu.” Akakurumidza kutura chirongo chake pasi ndokumubatira achinwa. Kuzoti amupa mvura, musikana akati, “Chiregai zvenyu nditekerewo ngamera dzenyu mvura, dzinwe dzigute.” Akabva atora mvura yaiva muchirongo chake akaidururira mokuti dzinwire, ndokumhanyira kutsime kundocherera ngamera dzake dzose mvura yokunwa. Murume akatarisisa anyerere achida kuziva kuti chokwadi Tenzi anditungamirira kuwana zvandafambira here, kana kuti kwete. Kuzoti ngamera dzake dzanwa dzaguta muranda uyu akatora mhete yendarama yairema sechidimbu chapakati napakati cheshekeri, ndokushongedza Ribheka. Akamupawo makoza maviri endarama airema mashekeri gumi. Muranda akati, “Uri mwana waaniko? Ko tingawanawo here pokurara kumba kwababa venyu?” Iye akati, “Ndiri mwana waBhetueri akaberekwa naMirika, mudzimai waNahori.” Akatiwo, “Tine zvose zvakawanda, mashanga nezvokudya zvezvipfuwo uye pokurara paripo.” Murume uyu akapfugama akanamata Tenzi achiti, “Ngaarumbidzwe Tenzi, Mwari watenzi wangu Abhurahamu nokuti akaramba akatendeka, akaita zvaakatsidzira tenzi wangu. Kana ndirini, Tenzi anditungamirira akandisvitsa kumusha kwehama dzatenzi wangu.” Musikana uyu akabva amhanyira kumba kwamai vake, ndokundovaudza zvose. Ribheka aiva nehanzvadzi yake yainzi Rabhani. Rabhani akamhanyira kumurume uye, kutsime, nokuti akanga aona hanzvadzi yake iine mhete, namakoza mumaoko ayo, akanzwawo kutaura kwaiita Ribheka achiti, “Ndizvo zvandaudzwa nomurume iyeyo.” Ndopaakamhanyira kumurume uya, akamuwana amire patsime paya nengamera dzake. Rabhani akati, “Titambireika vanyakukomborerwa naTenzi! Ko manga muchadarirei kumirira kunze kunze kuno uku. Izvozvi tatokugadzirirai imba nepokutenhera ngamera.” Saka murume uyu akandopinda mumba. Rabhani akasunungura ngamera dziya, akamupa mashanga nezvokudya zvengamera. Akapawo murume uyu navaaiva navo mvura yokushamba tsoka. Vakamuperekera zvokudya, asi iye akati, “Handingadyi ndisati ndataura mashoko angu.” Rabhani akati, “Tipire zvako tinzwe.” Iye akati, “Ndiri muranda waAbhurahamu. Tenzi akakomborera vatenzi vangu kwazvo zvokuti vakapfuma zvikuru. Vane hwai, mombe, sirivha, ndarama, navaranda vechirume nevechikadzi nengamera namadhongi mazhinji. Sara, mudzimai wavatenzi vangu, kunyange akanga achembera zvake, akaberekera vatenzi vangu mwana mukomana. Ivo vatenzi wangu vakapa mwana wavo iyeyo zvinhu zvose zvavanazvo. Zvino vatenzi vangu vakandiitisa mhiko vachiti, ‘Usatsvakire mwana wangu mukadzi mukati mevanasikana verudzi rwevaKanani vane nyika yandigere. Asi enda kumusha kwababa vangu, kuhama dzangu undotsvakira mwana wangu mukadzi ikoko.’ Ndakati kuna vatenzi vangu. ‘Zvimwe mukadzi wacho acharamba kuuya neni.’ Ivo vatenzi vangu ndokuti, ‘Tenzi wandinogara ndichinamata muupenyu, achatuma mutumwa wake akuperekedze kuti zvaunofambira zvibudirire, undotorera mwana wangu mukadzi kuhama dzangu kumusha kwababa vangu. Kana wasvika kuhama dzangu, vakaramba kukupa mukadzi iyeyo, uchasunungurwa zvako pamhiko yangu.’ “Pandasvika patsime nhasi uno ndati, ‘Tenzi, Mwari wavatenzi vangu Abhurahamu, nditungamirireiwo ndigowana zvandafambira.’ Zvino zvandimire patsime pano, kana pakauya musikana kuzochera mvura ndikamuti, ‘Dondipawo mvura muchirongo chako ndinwe,’ kana iye akati, ‘Inwai zvenyu, ndichatekerawo ngamera dzenyu mvura yokunwa,’ iyeyo ngaave mukadzi akasarudzirwa mwana wavatenzi vangu naTenzi. Zvino ndisati ndapedza kunamata nechemumwoyo ndabva ndaona Ribheka achiuya akatakura chirongo pamapfudzi ake, ndokusvikopinda mutsime, ndokuchera mvura. Ini ndamuti, ‘Dondipawo mvura yokunwa.’ Pakarepo iye abva atura chirongo chake pamafudzi akati, ‘Inwai zvenyu, uye ndichapawo ngamera dzenyu mvura yokunwa.’ Ndanwa ndokubva iye apawo ngamera dzangu dzikanwa. Ipapo ndamubvunza ndichiti, ‘Ko nhai, uri mwana waaniko?’ Iye ati, ‘Ndiri mwana womwana waNahori, baba vangu ari Bhetueri aberekwa naMirika mudzimai waNahori.’ Ini ndabva ndaisa mhete pamhuno yake namakoza mumaoko ake. Ndapfugama ndikanamata Tenzi, ndikarumbidza Tenzi wavatenzi vangu Abhurahamu nokuti anditungamirira kuti ndinange kuhama yavatenzi vangu Abhurahamu kuti ndiwanire muroora wavatenzi vangu. Zvino kana imi muchida kuva vanhu vakatendeka vanoita zviri pachokwadi kuna vatenzi vangu ndiudzei. Asi kana musingadi, ndiudzeiwo zvangu ndione zvokuita.” Ipapo Rabhani naBhetueri vakapindura vachiti, “Zvinhu izvi zvabva kuna Tenzi. Isu hapana chatingataure. Ribheka ndiyeyu ari pano mutore zvako uende naye, andova mudzimai womwanakomana wavatenzi vako sokutaura kwakaita Tenzi.” Muranda waAbhurahamu paakanzwa zvavakataura akapfugama pasi akanamata Tenzi. Muranda uyu akabva abudisa zvishongo zvesirivha nezvendarama nehanzu dzokupa Ribheka. Akaburitsawo zvipo zvinokosha ndokupa amai vaRibheka nehanzvadzi yake Rabhani. Muranda uyu navarume vaakanga anavo vakadya, vakanwa, ndokurarapo usiku ihwohwo. Kuzoti vamuka mangwanani akati, “Chiregai ndichidzokera zvangu kuna vatenzi vangu.” Hanzvadzi yake naamai vake vakati, “Regai timboti garei nomusikana uyu nguva yakati kuti kana mazuva angaite gumi zvawo agoti oenda zvake.” Asi iye akati, “Dai machirega zvenyu kundinonotsa, onai Tenzi andipa zvandafambira. Chiregai zvenyu ndidzokere kuna vatenzi vangu.” Ivo vakati, “Regai tidaidze mhandara yacho tinzwe.” Vakadaidza Ribheka vakati kwaari, “Unoda kuenda nomurume uyu here?” Iye akati, “Hongu ndinoda.” Vakabvumidza Ribheka mwana wavo kuenda. Akaenda nomuranda wechikadzi nyakumurera. Vakaenda nomuranda waAbhurahamu pamwechete navanhu vake. Vakakomborera Ribheka vachiti, “Dai iwe mwana wedu ukava amai vamazana akazanirana avanhu! Zvizvarwa zvako ngazvikurire maguta avavengi vazvo.” Ribheka navasikana vake vaimushandira vakagadzirira zvokusumuka, vakatasva ngamera dzavo, vakaenda nomurume uye vachimutevera. Muranda uyu ndiko kutora kwaakaita Ribheka akabva aenda zvake. Ipapo Isaki akanga achangotama kuBheerirahairoi, ava kugara kuNegevhu. Ava manheru, Isaki akaenda musango achimbondoti avarairwe zvake achifunga. Akasumudza musoro akaona ngamera dzichiuya. Ribheka akati tarisei, paakaonawo Isaki akabva akurumidza kuburuka pangamera yake, ndokubvunza muranda uyu achiti, “Ko murume uyo ari kuuya nomusango umo kuzochingurana nesu ndiani?” Muranda akati, “Ndivatenzi vangu.” Ribheka akatora dhuku rake akazvifukidza kumeso.

Genesisi 24:12-65 Baiberi Magwaro Matȿene aMŋari 1949 (Doke) (SUB1949)

akati: Jehova, Mŋari watenzi waŋgu Abrahama, ndifambisei henyu ɀakanaka nhasi; muitire tenzi waŋgu Abrahama ŋgoni. Tarirai ndimire patsime remvura, ʋakunda ʋaʋanhu ʋeguta ʋoɓuɗa kuzocera mvura. Ɀino ŋgakuitwe kuti musikana wandicati kwaari: Nditurire ʋo ciroŋgo cako, ndinwe; kana akati: Inwai henyu, namakamera enyu ndicaanwisa ʋo; ŋgaaʋe iye wamakatsaurira muranda wenyu Isaka; naiɀoɀo ndicaziʋa kuti makaitira tenzi waŋgu ŋgoni. Ɀino wakaŋga asati apedza kutaura, Rebeka, wakaɓerekerwa Betueri, mŋanakomana waMirka, mukadzi waNahori, munuŋuna waAbrahama, wakaȿika aneciroŋgo pafudzi rake. Ɀino musikana uyu wakaŋga akanaka kwaɀo pameso ake, mhandara isina‐kumbozibga nomurume; akaɓurukira kutsime, akazadza ciroŋgo cake, akakwira ɀe. Ipapo muranda wakamhanyira kundosoŋgana naye, akati: Ƌondipa ʋo ɀimvura paciroŋgo cako, ndinwe. Iye akati: Inwai henyu, ishe waŋgu; akakurumidza kutura ciroŋgo cake paruʋoko rwake, akamunwisa. Wakati apedza kumunwisa, akati: Ndicacerera makamera enyu ʋo kuȿikira aguta. Akakurumidza, akaɗurura mvura yakaŋga iri muciroŋgo cake mucinwiro; akamhanyira kutsime kundocera ɀe, akacerera makamera ake ose. Murume akamutarisisa, anyerere, kuti aziʋe kana Jehova amufambisa ɀakanaka parwendo rwake, kana kwete. Makamera akati apedza kunwa, murume akatora cindori cendarama cakaita hafu yeshekeri rimŋe rendarama pakurema kwaco, neɀishoŋgo ɀiʋiri ɀamaʋoko ɀakaita mashekeri anegumi pakurema kwaɀo; akati: Uri mukunda waaniko — Ndiʋudze hako. Kumba kwaɓaɓa ʋako kunopokuʋata here? Iye akati: Ndiri mukunda waBetueri, mŋanakomana waMirka, waakaɓerekera Nahori. Akati kwaari ʋo: Tinabgo ʋuswa bgakawoma neɀokudya ɀizhinji, nopokuʋata ʋo. Murume akakotamisa musoro wake, akanamata Jehova. Akati: Jehova, Mŋari watenzi waŋgu Abrahama ŋgaaʋoŋgwe, usina‐kurega nyasha dzake nokutendeka kwake kunatenzi waŋgu; kana ndirini, Jehova wakandifambisa, akandiȿitsa kuimba yehama dzatenzi waŋgu Ipapo musikana wakamhanya, akandoʋudza ʋeimba yamai ʋake mashoko iwaya. Ɀino Rebeka wakaŋga anehanɀadzi yainzi Rabani; Rabani akaɓuɗa, akamhanyira kumurume kutsime. Nokuti wakati aciʋona cindori neɀishoŋgo pamaʋoko ehanɀadzi yake, nokunzwa ʋo mashoko aRebeka, hanɀadzi yake, aciti: Ndiɀo ɀakataura murume kwandiri, akaenda kumurume, akamuwana amire pamakamera patsime. Akati: Pinda, iwe, wakaropafadzwa naJehova; unomirireiko kunze — Nokuti ndagadzira imba nenɀimbo yamakamera. Murume akapinda mumba; akasunuŋgura makamera, akapa makamera ʋuswa bgakawoma neɀokudya; nemvura kuti ashambidze tsoka dzake netsoka dzaʋarume ʋaakaŋga anaʋo. Ipapo ɀokudya ɀakaiswa pamberi pake kuti adye; asi iye wakati: Handiŋgadyi ndisati ndambotaura mashoko aŋgu. Akati: Taura hako. Iye akati: Ndiri muranda waAbrahama. Jehova wakaropafadza tenzi waŋgu kwaɀo; waʋa mukuru; wakamupa makwai, neŋombe, nesirveri, nendarama, naʋaranda, naʋarandakadzi, namakamera, nemboŋgoro. NaSara, mukadzi watenzi waŋgu, wakaɓerekera tenzi waŋgu mŋanakomana pakukwegura kwake; ndiye waakapa ɀose ɀaanaɀo. Tenzi waŋgu akandipikisa, akati: Usatorera mŋanakomana waŋgu mukadzi kuʋanasikana ʋeKanani, pandigere munyika yaʋo; asi uende kunaʋeimba yaɓaɓa ʋaŋgu nokuhama dzaŋgu, undotorera mŋanakomana waŋgu mukadzi ikoko. Ndikati kunatenzi waŋgu: Ɀimŋe mukadzi haaŋgatendi kunditeʋera. Iye akati: Jehova wandinosifamba pamberi pake, ucatuma mutumŋa wake newe, akufambise ɀakanaka parwendo rwako; undotorera mŋanakomana waŋgu mukadzi kuhama dzaŋgu nokunaʋeimba yaɓaɓa ʋaŋgu; ucasunuŋgurwa pakupika kwako kwandiri kana waȿika kuhama dzaŋgu; kana ʋakaramba kukupa iye, ucasunuŋgurwa pakupika kwako kwandiri. Ɀino ndakaȿika nhasi kutsime, ndikati: Jehova, Mŋari watenzi waŋgu Abrahama, kana muciɗa kundifambisa ɀakanaka parwendo rwaŋgu rwandinofamba, tarirai, ndimire patsime remvura; ɀino ŋgaɀiitwe, kuti musikana unoɓuɗa kuzocera mvura, wandicati kwaari: Ƌondipa ʋo ɀimvura paciroŋgo cako, ndinwe, iye akati kwandiri: Inwai henyu, imi, ʋuye ndicacerera makamera enyu ʋo, iye aʋe mukadzi wakatsaurirwa mŋanakomana watenzi waŋgu naJehova. Ɀino ndisati ndapedza kutaura mumŋoyo maŋgu, ndikaʋona Rebeka aciʋuya aneciroŋgo cake pafudzi rake; akaɓurukira kutsime, akacera; ndikati kwaari: Ƌondipa ʋo, ndinwe. Iye akakurumidza, akatura ciroŋgo cake pafudzi rake, akati: Inwai henyu, ʋuye ndicanwisa makamera enyu ʋo; ini ndikanwa, akanwisa makamera ʋo. Ɀino ndakamubvunza, ndikati: Uri mukunda waaniko — Iye akati: Ndiri mukunda waBetueri, mŋanakomana waNahori, waakaɓerekerwa naMirka; ipapo ndakaisa cindori mumhino dzake, neɀishoŋgo pamaʋoko ake. Ndikakotamisa musoro waŋgu, ndikanamata Jehova, ndikaʋoŋga Jehova, Mŋari watenzi waŋgu Abrahama, iye wakandifambisa panzira yakarurama, kuti nditorere mŋanakomana watenzi waŋgu mukunda womunuŋuna watenzi waŋgu, kuti aʋe mukadzi wake. Ɀino kana muciɗa kuitira tenzi waŋgu noʋunyoro nokutendeka, mundiʋudze; kana musiŋgaɗi, mundiʋudze, kuti ndiende kurudyi kana kuruɓoshwe. Ipapo Rabani naBetueri ʋakapindura, ʋakati: Cinhu ici cinobva kunaMŋari: isu hatigoni kutaura kwauri ɀakaipa kana ɀakanaka. Tarira, Rebeka uri pamberi pako, umutore, uende, kuti aʋe mukadzi wake, seɀakarebga naJehova. Ɀino muranda waAbrahama wakati anzwa mashoko aʋo, akakotamira pasi pamberi paJehova; muranda akaɓuɗisa ɀishoŋgo ɀesirveri, neɀendarama, neŋguʋo; akaɀipa Rebeka; akapa ʋo hanɀadzi yake namai ʋake nhumbi dzinokosha. Ʋakadya, ʋakanwa, iye naʋarume ʋaakaŋga anaʋo; ʋakagara’po ʋusiku bgose, ʋakamuka maŋgwanani; iye akati: Regai, ndiende kunatenzi waŋgu. Asi hanɀadzi yake namai ʋake ʋakati: Musikana acimbogara nesu mazuʋa ɀimŋe anegumi, agozoenda hake. Asi iye wakati kwaʋari: Musandidzora henyu, Jehova ɀaakandifambisa ɀakanaka parwendo rwaŋgu; regai ndiende kunatenzi waŋgu. Iʋo ʋakati: Ŋgatiɗane musikana, tinzwe muromo wake. Ʋakaɗana Rebeka, ʋakati kwaari: Ucaenda nomurume uyu here — Akati: Ndicaenda. Ipapo ʋakatendera Rebeka, hanɀadzi yaʋo, nomureri wake, kuti ʋaende nomuranda waAbrahama, naʋanhu ʋake. Ʋakaropafadza Rebeka, ʋakati kwaari: Iwe, hanɀadzi yeɗu, uʋe mai ʋeɀuru ɀamazana; ʋana ʋako ŋgaʋaʋe ʋaridzi ʋamasuʋo aʋaʋeŋgi ʋaʋo. Rebeka akasimuka, naʋasikana ʋake, ʋakataȿa makamera, ʋakateʋera murume uyo; muranda akatora Rebeka, akaenda parwendo rwake. Ɀino Isaka wakaŋga acibva nenzira yeBeeri‐rakai‐roi; nokuti wakaŋga agere kunyika yenyasi. Isaka akaɓuɗa kundoraŋgarira kusaŋgo neŋguʋa yamaɗekwana; akasimudza meso ake, akatarira, akaʋona makamera aciʋuya. Rebeka akasimudza ʋo meso ake; wakati aciʋona Isaka, akaɓuruka pakamera rake. Akati kumuranda: Murume uyo, unofamba musaŋgo kuzosoŋgana nesu ndianiko — Muranda akati: Nditenzi waŋgu; iye akatora cokufukidzira ciso cake, akaɀifukidza.

Genesisi 24:12-65 Bhaibhiri Idzva rechiShona (SCLB)

Akanamata achiti, “Tenzi, Mwari waAbhurahamu, vatenzi vangu, nzwirai tsitsi vatenzi vangu Abhurahamu, mundibatsire ndiwane zvandafambira. Onai ndimire pano patsime pachauya vanasikana vavanhu vomuguta rino kuzochera mvura. Zvino musikana wandinenge ndati nditekerewo mvura ndinwe, kana iye akapindura achiti, ‘Inwai zvenyu uye ndichapawo ngamera dzenyu mvura yokunwa,’ iyeyo ngaave musikana wamakasarudzira muranda wenyu Isaki. Ndizvo zvichandiratidza kuti maitira mwoyochena vatenzi vangu.” Asati ambopedza kutaura pakabva pasvika Ribheka mwanasikana waBhetueri. Bhetueri uyu akaberekwa naMirika, mudzimai waNahori munun'una waAbhurahamu. Ribheka akasvika akatakura chirongo chake papfudzi. Zvino musikana uyu aiva nechimiro chakanaka kwazvo, iri mhandara isina kumbosangana nomurume. Akapinda mutsime akazadza chirongo chake nemvura akabuda. Muranda uyu akamhanyira kwaari akati, “Regai ndingonyavawo pahuro nemvura yokunwa yomuchirongo chenyu.” Musikana akati, “Inwai zvenyu tenzi wangu.” Akakurumidza kutura chirongo chake pasi ndokumubatira achinwa. Kuzoti amupa mvura, musikana akati, “Chiregai zvenyu nditekerewo ngamera dzenyu mvura, dzinwe dzigute.” Akabva atora mvura yaiva muchirongo chake akaidururira mokuti dzinwire, ndokumhanyira kutsime kundocherera ngamera dzake dzose mvura yokunwa. Murume akatarisisa anyerere achida kuziva kuti chokwadi Tenzi anditungamirira kuwana zvandafambira here, kana kuti kwete. Kuzoti ngamera dzake dzanwa dzaguta muranda uyu akatora mhete yendarama yairema sechidimbu chapakati napakati cheshekeri, ndokushongedza Ribheka. Akamupawo makoza maviri endarama airema mashekeri gumi. Muranda akati, “Uri mwana waaniko? Ko tingawanawo here pokurara kumba kwababa venyu?” Iye akati, “Ndiri mwana waBhetueri akaberekwa naMirika, mudzimai waNahori.” Akatiwo, “Tine zvose zvakawanda, mashanga nezvokudya zvezvipfuwo uye pokurara paripo.” Murume uyu akapfugama akanamata Tenzi achiti, “Ngaarumbidzwe Tenzi, Mwari watenzi wangu Abhurahamu nokuti akaramba akatendeka, akaita zvaakatsidzira tenzi wangu. Kana ndirini, Tenzi anditungamirira akandisvitsa kumusha kwehama dzatenzi wangu.” Musikana uyu akabva amhanyira kumba kwamai vake, ndokundovaudza zvose. Ribheka aiva nehanzvadzi yake yainzi Rabhani. Rabhani akamhanyira kumurume uye, kutsime, nokuti akanga aona hanzvadzi yake iine mhete, namakoza mumaoko ayo, akanzwawo kutaura kwaiita Ribheka achiti, “Ndizvo zvandaudzwa nomurume iyeyo.” Ndopaakamhanyira kumurume uya, akamuwana amire patsime paya nengamera dzake. Rabhani akati, “Titambireika vanyakukomborerwa naTenzi! Ko manga muchadarirei kumirira kunze kunze kuno uku. Izvozvi tatokugadzirirai imba nepokutenhera ngamera.” Saka murume uyu akandopinda mumba. Rabhani akasunungura ngamera dziya, akamupa mashanga nezvokudya zvengamera. Akapawo murume uyu navaaiva navo mvura yokushamba tsoka. Vakamuperekera zvokudya, asi iye akati, “Handingadyi ndisati ndataura mashoko angu.” Rabhani akati, “Tipire zvako tinzwe.” Iye akati, “Ndiri muranda waAbhurahamu. Tenzi akakomborera vatenzi vangu kwazvo zvokuti vakapfuma zvikuru. Vane hwai, mombe, sirivha, ndarama, navaranda vechirume nevechikadzi nengamera namadhongi mazhinji. Sara, mudzimai wavatenzi vangu, kunyange akanga achembera zvake, akaberekera vatenzi vangu mwana mukomana. Ivo vatenzi wangu vakapa mwana wavo iyeyo zvinhu zvose zvavanazvo. Zvino vatenzi vangu vakandiitisa mhiko vachiti, ‘Usatsvakire mwana wangu mukadzi mukati mevanasikana verudzi rwevaKanani vane nyika yandigere. Asi enda kumusha kwababa vangu, kuhama dzangu undotsvakira mwana wangu mukadzi ikoko.’ Ndakati kuna vatenzi vangu. ‘Zvimwe mukadzi wacho acharamba kuuya neni.’ Ivo vatenzi vangu ndokuti, ‘Tenzi wandinogara ndichinamata muupenyu, achatuma mutumwa wake akuperekedze kuti zvaunofambira zvibudirire, undotorera mwana wangu mukadzi kuhama dzangu kumusha kwababa vangu. Kana wasvika kuhama dzangu, vakaramba kukupa mukadzi iyeyo, uchasunungurwa zvako pamhiko yangu.’ “Pandasvika patsime nhasi uno ndati, ‘Tenzi, Mwari wavatenzi vangu Abhurahamu, nditungamirireiwo ndigowana zvandafambira.’ Zvino zvandimire patsime pano, kana pakauya musikana kuzochera mvura ndikamuti, ‘Dondipawo mvura muchirongo chako ndinwe,’ kana iye akati, ‘Inwai zvenyu, ndichatekerawo ngamera dzenyu mvura yokunwa,’ iyeyo ngaave mukadzi akasarudzirwa mwana wavatenzi vangu naTenzi. Zvino ndisati ndapedza kunamata nechemumwoyo ndabva ndaona Ribheka achiuya akatakura chirongo pamapfudzi ake, ndokusvikopinda mutsime, ndokuchera mvura. Ini ndamuti, ‘Dondipawo mvura yokunwa.’ Pakarepo iye abva atura chirongo chake pamafudzi akati, ‘Inwai zvenyu, uye ndichapawo ngamera dzenyu mvura yokunwa.’ Ndanwa ndokubva iye apawo ngamera dzangu dzikanwa. Ipapo ndamubvunza ndichiti, ‘Ko nhai, uri mwana waaniko?’ Iye ati, ‘Ndiri mwana womwana waNahori, baba vangu ari Bhetueri aberekwa naMirika mudzimai waNahori.’ Ini ndabva ndaisa mhete pamhuno yake namakoza mumaoko ake. Ndapfugama ndikanamata Tenzi, ndikarumbidza Tenzi wavatenzi vangu Abhurahamu nokuti anditungamirira kuti ndinange kuhama yavatenzi vangu Abhurahamu kuti ndiwanire muroora wavatenzi vangu. Zvino kana imi muchida kuva vanhu vakatendeka vanoita zviri pachokwadi kuna vatenzi vangu ndiudzei. Asi kana musingadi, ndiudzeiwo zvangu ndione zvokuita.” Ipapo Rabhani naBhetueri vakapindura vachiti, “Zvinhu izvi zvabva kuna Tenzi. Isu hapana chatingataure. Ribheka ndiyeyu ari pano mutore zvako uende naye, andova mudzimai womwanakomana wavatenzi vako sokutaura kwakaita Tenzi.” Muranda waAbhurahamu paakanzwa zvavakataura akapfugama pasi akanamata Tenzi. Muranda uyu akabva abudisa zvishongo zvesirivha nezvendarama nehanzu dzokupa Ribheka. Akaburitsawo zvipo zvinokosha ndokupa amai vaRibheka nehanzvadzi yake Rabhani. Muranda uyu navarume vaakanga anavo vakadya, vakanwa, ndokurarapo usiku ihwohwo. Kuzoti vamuka mangwanani akati, “Chiregai ndichidzokera zvangu kuna vatenzi vangu.” Hanzvadzi yake naamai vake vakati, “Regai timboti garei nomusikana uyu nguva yakati kuti kana mazuva angaite gumi zvawo agoti oenda zvake.” Asi iye akati, “Dai machirega zvenyu kundinonotsa, onai Tenzi andipa zvandafambira. Chiregai zvenyu ndidzokere kuna vatenzi vangu.” Ivo vakati, “Regai tidaidze mhandara yacho tinzwe.” Vakadaidza Ribheka vakati kwaari, “Unoda kuenda nomurume uyu here?” Iye akati, “Hongu ndinoda.” Vakabvumidza Ribheka mwana wavo kuenda. Akaenda nomuranda wechikadzi nyakumurera. Vakaenda nomuranda waAbhurahamu pamwechete navanhu vake. Vakakomborera Ribheka vachiti, “Dai iwe mwana wedu ukava amai vamazana akazanirana avanhu! Zvizvarwa zvako ngazvikurire maguta avavengi vazvo.” Ribheka navasikana vake vaimushandira vakagadzirira zvokusumuka, vakatasva ngamera dzavo, vakaenda nomurume uye vachimutevera. Muranda uyu ndiko kutora kwaakaita Ribheka akabva aenda zvake. Ipapo Isaki akanga achangotama kuBheerirahairoi, ava kugara kuNegevhu. Ava manheru, Isaki akaenda musango achimbondoti avarairwe zvake achifunga. Akasumudza musoro akaona ngamera dzichiuya. Ribheka akati tarisei, paakaonawo Isaki akabva akurumidza kuburuka pangamera yake, ndokubvunza muranda uyu achiti, “Ko murume uyo ari kuuya nomusango umo kuzochingurana nesu ndiani?” Muranda akati, “Ndivatenzi vangu.” Ribheka akatora dhuku rake akazvifukidza kumeso.