1 Madzimambo 3:1-28
1 Madzimambo 3:1-28 Bhaibheri Dzvene MuChiShona Chanhasi (BDSC)
Soromoni akaita ukama naFaro, mambo weIjipiti akawana mwanasikana wake. Akauya naye kuGuta raDhavhidhi kusvikira apedza kuvaka muzinda wake netemberi yaJehovha, norusvingo runopoteredza Jerusarema. Asi, vanhu vakanga vachibayira zvibayiro panzvimbo dzakakwirira nokuti hapana temberi yakanga yati yavakirwa zita raJehovha. Soromoni akada Jehovha akafamba nomumitemo yababa vake Dhavhidhi, asi akabayira nokupisa zvinonhuhwira panzvimbo dzakakwirira. Zvino mambo akaenda kuGibheoni kundobayira, nokuti ndiyo yaiva nzvimbo yakakwirira huru, Soromoni akabayira zvipiriso zvinopiswa zvinokwana chiuru paaritari. PaGibheoni Jehovha akazviratidza kuna Soromoni usiku muchiroto, Mwari akati, “Kumbira chipi nechipi chaunoda kuti ndikupe.” Soromoni akapindura akati, “Makaratidza muranda wenyu, baba vangu Dhavhidhi, tsitsi dzenyu huru nokuti akanga akavimbika kwamuri uye akarurama uye akachena mumwoyo. Muchiri kumuratidza unyoro hwenyu hukuru uye mamupa mwanakomana kuti agare pachigaro chake chokutonga iye nhasi. “Zvino, Jehovha Mwari wangu, makaita muranda wenyu mambo panzvimbo yababa vangu Dhavhidhi. Asi ini ndinongova hangu mwana mudiki uye handizivi mashandiro andingaita mabasa angu. Muranda wenyu ari pakati pavanhu venyu vamakasarudza, vanhu vazhinji kwazvo, vasingagoni kuverengwa nokuwanda kwavo. Naizvozvo ipai muranda wenyu mwoyo unonzwisisa kuti atonge vanhu venyu, kuti ndikwanise kuziva zvakanaka nezvakaipa; nokuti ndiani angagone kutonga vanhu venyu vakawanda kudai?” Jehovha akafara nokuti Soromoni akanga akumbira chinhu ichi. Naizvozvo Jehovha akati kwaari, “Sezvo wakumbira chinhu ichi ukasazvikumbirira upenyu hurefu kana upfumi, ukasakumbira kuti vavengi vako vaurayiwe, asi wakumbira kunzwisisa pakutonga zvakarurama, ndichaita zvawakumbira. Ndichakupa mwoyo wakachenjera unonzwisisa, zvokuti hakuna kumbova nomumwe akafanana newe uye hakuchazova nomumwe akafanana newe mushure mako. Pamusoro pezvo, ndichakupawo zvausina kukumbira, zvose upfumi nokukudzwa, zvokuti muupenyu hwako hapana mumwe anozoenzana newe pakati pamadzimambo. Kana ukafamba munzira dzangu nokuteerera mitemo yangu nemirayiro yangu sezvakaita Dhavhidhi baba vako, ndichakupa upenyu hurefu.” Ipapo Soromoni akamuka, akabva aziva kuti kwakanga kuri kurota. Akadzokera kuJerusarema, akamira pamberi peareka yesungano yaJehovha akabayira zvipiriso zvinopiswa, akabayirawo zvipiriso zvokuwadzana. Ipapo akaitira varanda vake vose mutambo. Zvino vakadzi vaviri vaiva zvifeve vakauya kuna mambo vakamira pamberi pake. Mumwe wavo akati, “Ishe wangu, mukadzi uyu neni tinogara muimba imwe chete. Ini ndakapona mwana iye aripowo. Zvino nezuva rechitatu mushure mokuberekwa kwomwana wangu, mukadzi uyu akaponawo mwana. Takanga tiri toga; hapana mumwe munhu akanga ari mumba kunze kwedu isu vaviri. “Usiku ihwohwo mwana womukadzi uyu akafa, nokuti akavata pamusoro pake. Saka akamuka pakati pousiku akatora mwanakomana wangu kubva parutivi pangu, ini muranda wenyu ndivete. Akamuisa pachipfuva chake akaisa mwanakomana wake akafa pachipfuva changu. Pandakamuka mangwanani kuti ndiyamwise mwanakomana wangu ndakaona kuti akanga afa; asi pandakazotarisisa mangwanani, ndakaona zviri pachena kuti haasiriye mwanakomana wandakanga ndapona.” Asi mukadzi mumwe uya akati, “Kwete, mwanakomana mupenyu ndowangu, mwanakomana akafa ndowako.” Asi wokutanga akaramba akati, “Kwete, akafa ndowako; mupenyu ndiye wangu.” Naizvozvo vakaitirana nharo pamberi pamambo. Ipapo mambo akati, “Mumwe anoti, ‘Mwanakomana wangu ndiye mupenyu, uye mwanakomana wako ndiye akafa,’ mumwewo achiti, ‘Kwete! Mwanakomana wako ndiye akafa, uye mwanakomana wangu ndiye mupenyu.’ ” Ipapo mambo akati, “Nditorerei munondo.” Naizvozvo vakauya nomunondo kuna mambo. Akati, “Chekai mwana mupenyu napakati mugopa hafu kuno mumwe uye imwe hafu kuno mumwe.” Mukadzi aiva nomwana mupenyu akanzwira mwanakomana wake tsitsi akati kuna mambo, “Ndapota ishe wangu, mupei zvenyu mwana ari mupenyu! Musamuuraya!” Asi mumwe wacho akati, “Iwe neni hapana ari kuzomuwana. Muchekei napakati!” Ipapo mambo akapa mutongo wake akati, “Ipai mwana mupenyu kumukadzi wokutanga. Musamuuraya; ndiye mai vake.” VaIsraeri vose vakati vanzwa matongero akanga aita mambo, vakatya mambo, nokuti vakaona kuti uchenjeri hwaibva kuna Mwari hwaiva maari, kuti atonge zvakarurama.
1 Madzimambo 3:1-28 Shona Bible 1949, revised 2002 (SNA2002)
Zvino Soromoni wakaita ukama naFarao, mambo weIjipiti, akawana mukunda waFarao, akamuisa kuguta raDhavhidhi, kusvikira apedza kuvaka imba yake neimba yaJehovha, norusvingo runopoteredza Jerusaremu. Asi vanhu vakabayira zvibayiro pamatunhu akakwirira, nokuti kusvikira mazuva iwayo zita raJehovha rakanga richigere kuvakirwa imba. Soromoni akada Jehovha, akafamba nemitemo yababa vake Dhavhidhi; asi wakabayira zvibayiro nokupisa zvinonhuwira pamatunhu akakwirira. Zvino mambo akaenda Gibheoni kundobayirapo; nokuti ndiwo wakanga uri mutunhu mukuru wakakwirira; Soromoni akabayira paaritari iyo zvipiriso zvinopiswa zvine chiuru chimwe. Jehovha akazviratidza kuna Soromoni paGibheoni nokurota usiku. Mwari akati, “Kumbira chaunoda kuti ndikupe.” Soromoni akati, “Makaitira muranda wenyu Dhavhidhi, baba vangu, unyoro hukuru, zvaakafamba pamberi penyu nezvokwadi, nokururama, nomwoyo wakanaka kwamuri; mukamuchengeterawo unyoro uhu hukuru, zvamakamupa mwanakomana kugara pachigaro chake choushe, sezvazvakaita nhasi. Zvino Jehovha Mwari wangu, makaita muranda wenyu mambo panzvimbo yababa vangu Dhavhidhi, asi ndiri mwana hangu, handizivi mutowo wokubuda nawo kana kupinda nawo. Muranda wenyu uri pakati pavanhu venyu vamakatsaura, vanhu vazhinji kwazvo, vasingagoni kurahwa kana kuverengwa nokuwanda kwavo. Naizvozvo ipai muranda wenyu mwoyo unonzwisisa, kuti nditambe mhaka dzavanhu venyu, ndizive kutsaura pakati pezvakanaka nezvakaipa; nokuti ndianiko anogona kutamba mhaka dzavanhu venyu ava vakawanda?” Zvino kutaura uku kwakafadza Ishe, kuti Soromoni wakakumbira chinhu ichi. Ipapo Mwari akati kwaari, “Zvawakumbira chinhu ichi, ukasazvikumbirira upenyu hwamazuva mazhinji, kana kuzvikumbirira pfuma, kana kukumbira kuti vavengi vako vafe; asi wakazvikumbirira kungwara, kuti unzwisise kutamba mhaka; tarira, ndaita sezvawataura; tarira ndakupa mwoyo wakangwara, unonzwisisa; naizvozvo hakuna kumbova nomumwe wakafanana newe, kana shure kwako hakungazovi nomunhu ungafanana newe. “Ndakupawo zvausina kukumbira, pfuma nokukudzwa; naizvozvo hakungazovi mumwe pakati pamadzimambo ungafanana newe pamazuva ako ose. “Kana ukada kufamba nenzira dzangu, nokuchengeta mitemo yangu nemirairo yangu, sezvakafamba baba vako Dhavhidhi, ipapo ndichawanza mazuva ako.” Ipapo Soromoni akamuka, akaona kuti kwakanga kuri kurota; akaenda Jerusaremu, akamira pamberi peareka yesungano yaJehovha, akabayira zvipiriso zvinopiswa, akabayiriwo zvipiriso zvokuyananisa, akaitira varanda vake vose mutambo. Zvino vakadzi vaviri, vaiva zvipfeve, vakasvika kuna mambo, vakamira pamberi pake. Mumwe mukadzi akati, “Haiwa, ishe wangu, ini nomukadzi uyu tigere paimba imwe; ini ndikapona mwana ndigere naye paimba. Zvino ini ndakati ndapona mazuva matatu, mukadzi uyu akaponawo, tigere pamwechete; kwakanga kusino mweni nesu mumba, asi isu vaviri toga mumba. Zvino mwana womukadzi uyu akafa usiku, nokuti wakavata pamusoro pake. Akamuka pakati pausiku, akatora mwanakomana wangu parutivi rwangu, murandakadzi wenyu avete, akamuradzika pachipfuva chake, akaradzika mwana wake wakafa pachipfuva changu. Zvino ndakati ndichimuka mangwanani kuzomwisa mwana wangu, ndikawana akafa; asi ndakati ndichimucherekedza mangwanani, wonei haazi mwanakomana wangu, wandakabereka.” Ipapo mumwe mukadzi wakati, “Kwete, asi mupenyu ndiye mwanakomana wangu, wakafa ndiye mwanakomana wako;” uyu akati, “Kwete, asi wakafa ndiye mwanakomana wako, mupenyu ndiye mwanakomana wangu.” Vakataura saizvozvo pamberi pamambo. Ipapo mambo akati, “Mumwe unoti, ‘Mwanakomana wangu ndouyu mupenyu, mwana wako ndiye wakafa;’ mumwezve unoti, ‘Kwete, asi mwanakomana wako ndiye wakafa, mupenyu ndiye mwanakomana wangu.’ ” Mambo akati, “Nditorerei munondo.” Vakauya nomunondo kuna mambo. Mambo akati, “Gurai mwana mupenyu napakati, mupe mumwe rutivi rumwe, nomumwe rumwe rutivi.” Ipapo mukadzi waiva mai womwana mupenyu akataura kuna mambo, nokuti mwoyo wake wakava pamusoro pomwanakomana wake, akati, “Haiwa, ishe wangu, mumupe henyu mwana mupenyu, regai kumuuraya.” Asi mumwe wakati, “Ngaachirega kuva wangu kana wako, mugurei.” Ipapo mambo akapindura, akati, “Mumupe mwana mupenyu, regai kumuuraya; ndivo mai vake.” VaIsiraeri vose vakanzwa kutonga kwamambo, vakatya mambo; nokuti vakaona kuti kungwara kwaMwari kwaiva maari, kuti atambe mhaka zvakanaka.
1 Madzimambo 3:1-28 Bhaibhiri Idzva rechiShona rine Dhuterokanonika (SCLBD)
Soromoni akaita ukama naFarao mambo weIjipiti hwokuroorerana, akaroora mukunda waFarao. Akamboenda naye muGuta raDhavhidhi kusvikira apedza kuvaka imba yake nembawo yaTenzi nokukomberedza Jerusaremu norusvingo. Izvozvo vanhu vainge vachipirira zvibayiro panzvimbo dzakatunhumara dzokuteurira nokuti hakuna imba yakanga yati yavakwa yokuisa zita raTenzi. Soromoni aida Tenzi achitevedza mirao yababa wake Dhavhidhi, kutongoti chete aipira zvibayiro nokupisira rusenzi panzvimbo dzakatunhumara dzokuteurira. Mambo uyu akaenda kuGibheoni kundopira chibayiro ikoko nokuti ndiyo yakanga iri nzvimbo huru yakatunhumara yokuteurira. Soromoni aiwanzopira mipiro yokupisa chiuru paatari. Kwakareko kuGibheoni Tenzi akazviratidza kuna Soromoni mukurota usiku. Mwari akati, “Kumbira chaungade kuti ndikupe.” Soromoni akati, “Makaitira baba wangu Dhavhidhi muranda wenyu mwoyochena mukuru kwazvo pamusana pokuti vaiva munhu akatendeka kwamuri akarurama ari pachokwadi mwoyo wake uri kwamuri. Mwoyochena wenyu mukuru kwazvo makaramba uinaye mukamupawo mwanakomana wokugara pachigaro choumambo nhasi uno. Zvino Tenzi Mwari wangu, imi ndimi makaita kuti ini muranda wenyu ndive mambo panzvimbo pababa wangu Dhavhidhi, asi ini ndiri mwana muduku handigoni kutungamira. Ini muranda wenyu ndiri pakati pavanhu venyu vamakasarudza rudzi rukuru kwazvo runa vanhu vasingaverengeki kana kuverengetwa. Dai mukachindipawo ini muranda wenyu mwoyo unonzwisisa kuti ndiwane matongero vanhu venyu ndichanyatsoona pakanaka nepakaipa nokuti ndiani angakwanise kutonga vanhu venyu ava vakawanda kudai?” Tenzi akafadzwa nezvakanga zvakumbirwa naSoromoni. Mwari akati kwaari, “Pamusana pokuti wakumbira izvi ukarega kuzvikumbirira upenyu urefu kana upfumi kana kukumbira kuti vavengi vako vafe, ukazvikumbirira kunzwisisa kuti uwane matongero, chinzwa zvawakumbira ndozvandava kukuitira. Ndinokupa ungwaru nomwoyo unonzwisisa zvokuti hapana kumboita mumwe akaita sewe kana kuzovazve nomumwe akaita sewe. Uye ndinokupawo zvimwe zvausina kukumbira zviviri izvi zvinoti upfumi nechiremera zvokuti hapana mumwe mambo angazomboenzaniswawo newe upenyu hwako hwose. Kana ukafamba mumakwara angu ukachengeta mirao nemitemo yangu sezvaiita baba wako Dhavhidhi ndichakupa upenyu urefu.” Soromoni ndiye kwake pepu, ndokuti, “A-a inga kurota zvako.” Akaenda kuJerusareu akandomira pamberi pebhokisi raTenzi rechitenderano akapira mipiro yokupisa nemipiro yokuwadzana. Akazoitirawo makurokota ake ose mabiko. Pfambi mbiri dzakauya kuna mambo dzikamira paari. Imwe yadzo yakati, “Changamire ini nomukadzi uyu tigere tose mumba imwechete. Ndakasununguka mwana iye aineni mumba imomo. Mazuva matatu akati apera ini ndasununguka, mukadzi uyu akasunungukawo. Takanga tiri toga pauviri hwedu mumba imomo musina mumwe. Mukadzi uyu mwana wake mukomana akafa usiku nokuti iye akamutsitsirira. Iye akamuka pakati pousiku ndokutora mwana wangu mukomana parutivi pangu, ini muranda wenyu ndiri kutsi kwehope akamurarisa mumaoko ake. Akararisa mwana wake mukomana akafa parutivi pangu. Ndakati mukei mangwanani kuti ndichiyamwisa mwana wangu wanei akafa. Asi ndakazonyatsomutarisa kwaedza ndikaona kuti haasiri iye mwana wangu wandakabereka.” Asi mumwewo wacho akabva ati, “Aiwa, mupenyu uyu ndiye mwana wangu, wako ndiye wafa.” Mumwe ndokuti, “Kwete kani wako ndiye wafa, wangu mupenyu.” Ndokukakavadzana kwavaiita pana mambo. Mambo akati, “Uyu ari kuti, ‘Mwana wangu mupenyu wako ndiye wafa,’ uyuwo achiti, ‘Aiwa wako ndiye wafa wangu mupenyu.’ ” Mambo ndokuti, “Nditorerei bakatwa!” Saka vakauya nebakatwa kwaari. Mambo akati, “Chekai mwana iyeyo nepakati muvape, muti uyu chidimu uyu chidimu.” Pamusana pokunzwa mwoyo kurwadza amai vomwana mupenyu uyu vakati kuna mambo, “Changamire chimupai zvenyu mwana mupenyu iyeyu musambomuuraya zvenyu.” Asi mumwe wacho akati, “Ngaarege kuva wako kana wangu ngaatodimurwa.” Mambo akati, “Mwana mupenyu uyu ngaapiwe mukadzi uyu, musamuuraye, ndivo amai vake ivava.” Isiraeri yose yakanzwa mutongero wainge waitwa namambo zvikaita kuti vatye mambo, nokuti vakanga vaona kuti aiva noungwaru hwaMwari pakutonga.
1 Madzimambo 3:1-28 Baiberi Magwaro Matȿene aMŋari 1949 (Doke) (SUB1949)
Ɀino Soromoni wakaita ʋukama naFarao, mambo weEgipita, akawana mukunda waFarao, akamuisa kuguta raDavidi, kuȿikira apedza kuʋaka imba yake neimba yaJehova, noruȿiŋgo runopoteredza Jerusarema. Asi ʋanhu ʋakaɓayira ɀiɓayiro pamatunhu akakwirira, nokuti kuȿikira mazuʋa iwayo zita raJehova rakaŋga ricigere kuʋakirwa imba. Soromoni akaɗa Jehova, akafamba nemitemo yaɓaɓa ʋake Davidi; asi wakaɓayira ɀiɓayiro nokupisa ɀinonhuwira pamatunhu akakwirira. Ɀino mambo akaenda Gibeoni kundoɓayira’po; nokuti ndiwo wakaŋga uri mutunhu mukuru wakakwirira; Soromoni akaɓayira paartari iyo ɀipiriso ɀinopiswa ɀinecuru cimŋe. Jehova akaɀiratidza kunaSoromoni paGibeoni nokurota ʋusiku. Mŋari akati: Kumbira caunoɗa kuti ndikupe. Soromoni akati: Makaitira muranda wenyu Davidi, ɓaɓa ʋaŋgu, ʋunyoro bgukuru, ɀaakafamba pamberi penyu neɀokwaɗi, nokururama, nomŋoyo wakanaka kwamuri; mukamuceŋgetera ʋo ʋunyoro ubgu bgukuru, ɀamakamupa mŋanakomana kugara pacigaro cake coʋushe, seɀaɀakaita nhasi. Ɀino, Jehova Mŋari waŋgu, makaita muranda wenyu mambo panɀimbo yaɓaɓa ʋaŋgu Davidi, asi ndiri mŋanana haŋgu, handiziʋi mutoʋo wokuɓuɗa nawo kana kupinda nawo. Muranda wenyu uri pakati paʋanhu ʋenyu ʋamakatsaura, ʋanhu ʋazhinji kwaɀo, ʋasiŋgagoni kurabga kana kuʋereŋgwa nokuwanda kwaʋo. Naiɀoɀo ipai muranda wenyu mŋoyo unonzwisisa, kuti nditambe mhaka dzaʋanhu ʋenyu, ndiziʋe kutsaura pakati peɀakanaka neɀakaipa; nokuti ndianiko unogona kutamba mhaka dzaʋanhu ʋenyu aʋa ʋakawanda? Ɀino kutaura uku kwakafadza Ishe, kuti Soromoni wakakumbira cinhu ici. Ipapo Mŋari akati kwaari: Ɀawakumbira cinhu ici, ukasaɀikumbirira ʋupenyu bgamazuʋa mazhinji, kana kuɀikumbirira fuma, kana kukumbira kuti ʋaʋeŋgi ʋako ʋafe; asi wakaɀikumbirira kuŋgwara, kuti unzwisise kutamba mhaka; tarira, ndaita seɀawataura; tarira, ndakupa mŋoyo wakaŋgwara, unonzwisisa; naiɀoɀo hakuna‐kumboʋa nomumŋe wakafanana newe, kana shure kwako hakuŋgazoʋi nomunhu uŋgafanana newe. Ndakupa ʋo ɀausina‐kukumbira, fuma nokukudzwa; naiɀoɀo hakuŋgazoʋi mumŋe pakati pamadzimambo uŋgafanana newe pamazuʋa ako ose. Kana ukaɗa kufamba nenzira dzaŋgu, nokuceŋgeta mitemo yaŋgu nemirairo yaŋgu, seɀakafamba ɓaɓa ʋako Davidi, ipapo ndicawanza mazuʋa ako. Ipapo Soromoni akamuka, akaʋona kuti kwakaŋga kuri kurota; akaenda Jerusarema, akamira pamberi peareka yesuŋgano yaJehova, akaɓayira ɀipiriso ɀinopiswa, akaɓayira ʋo ɀipiriso ɀokuyananisa, akaitira ʋaranda ʋake ʋose mutambo. Ɀino ʋakadzi ʋaʋiri, ʋaiʋa ɀifeʋe, ʋakaȿika kunamambo, ʋakamira pamberi pake. Mumŋe mukadzi akati: Haiwa, ishe waŋgu, ini nomukadzi uyu tigere paimba imŋe; ini ndikapona mŋana ndigere naye paimba. Ɀino ini ndakati ndapona mazuʋa matatu, mukadzi uyu akapona ʋo, tigere pamŋe cete; kwakaŋga kusinomŋeni nesu mumba, asi isu ʋaʋiri toga mumba. Ɀino mŋana womukadzi uyu akafa ʋusiku, nokuti wakaʋata pamsoro pake. Akamuka pakati poʋusiku, akatora mŋanakomana waŋgu parutiʋi rwaŋgu, murandakadzi wenyu aʋete, akamuradzika pacifuʋa cake, akaradzika mŋana wake wakafa pacifuʋa caŋgu. Ɀino ndakati ndicimuka maŋgwanani kuzomŋisa mŋana waŋgu, ndikawana akafa; asi ndakati ndicimucerekedza maŋgwanani, ʋonei haazi mŋanakomana waŋgu, wandakaɓereka. Ipapo mumŋe mukadzi wakati: Kwete, asi mupenyu ndiye mŋanakomana waŋgu, wakafa ndiye mŋanakomana wako; uyu akati: Kwete, asi wakafa ndiye mŋanakomana wako, mupenyu ndiye mŋanakomana waŋgu. Ʋakataura saiɀoɀo pamberi pamambo. Ipapo mambo akati: Mumŋe unoti: Mŋanakomana waŋgu ndoyuyu mupenyu, mŋana wako ndiye wakafa; mumŋe ɀe unoti: Kwete, asi mŋanakomana wako ndiye wakafa, mupenyu ndiye mŋanakomana waŋgu. Mambo akati: Nditorerei munondo. Ʋakaʋuya nomunondo kunamambo. Mambo akati: Gurai mŋana mupenyu napakati, mupe mumŋe rutiʋi rumŋe, nomumŋe rumŋe rutiʋi. Ipapo mukadzi waiʋa mai womŋana mupenyu akataura kunamambo, nokuti mŋoyo wake wakaʋabga pamsoro pomŋanakomana wake, akati: Haiwa, ishe waŋgu, mumupe henyu mŋana mupenyu, regai kumuʋuraya. Asi mumŋe wakati: Ŋgaacirega kuʋa waŋgu kana wako, mugurei. Ipapo mambo akapindura, akati: Mumupe mŋana mupenyu, regai kumuʋuraya; ndiʋo mai ʋake. ƲaIsraeri ʋose ʋakanzwa kutoŋga kwamambo, ʋakatya mambo; nokuti ʋakaʋona kuti kuŋgwara kwaMŋari kwaiʋa maari, kuti atambe mhaka ɀakanaka.
1 Madzimambo 3:1-28 Bhaibhiri Idzva rechiShona (SCLB)
Soromoni akaita ukama naFarao mambo weIjipiti hwokuroorerana, akaroora mukunda waFarao. Akamboenda naye muGuta raDhavhidhi kusvikira apedza kuvaka imba yake nembawo yaTenzi nokukomberedza Jerusaremu norusvingo. Izvozvo vanhu vainge vachipirira zvibayiro panzvimbo dzakatunhumara dzokuteurira nokuti hakuna imba yakanga yati yavakwa yokuisa zita raTenzi. Soromoni aida Tenzi achitevedza mirao yababa wake Dhavhidhi, kutongoti chete aipira zvibayiro nokupisira rusenzi panzvimbo dzakatunhumara dzokuteurira. Mambo uyu akaenda kuGibheoni kundopira chibayiro ikoko nokuti ndiyo yakanga iri nzvimbo huru yakatunhumara yokuteurira. Soromoni aiwanzopira mipiro yokupisa chiuru paatari. Kwakareko kuGibheoni Tenzi akazviratidza kuna Soromoni mukurota usiku. Mwari akati, “Kumbira chaungade kuti ndikupe.” Soromoni akati, “Makaitira baba wangu Dhavhidhi muranda wenyu mwoyochena mukuru kwazvo pamusana pokuti vaiva munhu akatendeka kwamuri akarurama ari pachokwadi mwoyo wake uri kwamuri. Mwoyochena wenyu mukuru kwazvo makaramba uinaye mukamupawo mwanakomana wokugara pachigaro choumambo nhasi uno. Zvino Tenzi Mwari wangu, imi ndimi makaita kuti ini muranda wenyu ndive mambo panzvimbo pababa wangu Dhavhidhi, asi ini ndiri mwana muduku handigoni kutungamira. Ini muranda wenyu ndiri pakati pavanhu venyu vamakasarudza rudzi rukuru kwazvo runa vanhu vasingaverengeki kana kuverengetwa. Dai mukachindipawo ini muranda wenyu mwoyo unonzwisisa kuti ndiwane matongero vanhu venyu ndichanyatsoona pakanaka nepakaipa nokuti ndiani angakwanise kutonga vanhu venyu ava vakawanda kudai?” Tenzi akafadzwa nezvakanga zvakumbirwa naSoromoni. Mwari akati kwaari, “Pamusana pokuti wakumbira izvi ukarega kuzvikumbirira upenyu urefu kana upfumi kana kukumbira kuti vavengi vako vafe, ukazvikumbirira kunzwisisa kuti uwane matongero, chinzwa zvawakumbira ndozvandava kukuitira. Ndinokupa ungwaru nomwoyo unonzwisisa zvokuti hapana kumboita mumwe akaita sewe kana kuzovazve nomumwe akaita sewe. Uye ndinokupawo zvimwe zvausina kukumbira zviviri izvi zvinoti upfumi nechiremera zvokuti hapana mumwe mambo angazomboenzaniswawo newe upenyu hwako hwose. Kana ukafamba mumakwara angu ukachengeta mirao nemitemo yangu sezvaiita baba wako Dhavhidhi ndichakupa upenyu urefu.” Soromoni ndiye kwake pepu, ndokuti, “A-a inga kurota zvako.” Akaenda kuJerusareu akandomira pamberi pebhokisi raTenzi rechitenderano akapira mipiro yokupisa nemipiro yokuwadzana. Akazoitirawo makurokota ake ose mabiko. Pfambi mbiri dzakauya kuna mambo dzikamira paari. Imwe yadzo yakati, “Changamire ini nomukadzi uyu tigere tose mumba imwechete. Ndakasununguka mwana iye aineni mumba imomo. Mazuva matatu akati apera ini ndasununguka, mukadzi uyu akasunungukawo. Takanga tiri toga pauviri hwedu mumba imomo musina mumwe. Mukadzi uyu mwana wake mukomana akafa usiku nokuti iye akamutsitsirira. Iye akamuka pakati pousiku ndokutora mwana wangu mukomana parutivi pangu, ini muranda wenyu ndiri kutsi kwehope akamurarisa mumaoko ake. Akararisa mwana wake mukomana akafa parutivi pangu. Ndakati mukei mangwanani kuti ndichiyamwisa mwana wangu wanei akafa. Asi ndakazonyatsomutarisa kwaedza ndikaona kuti haasiri iye mwana wangu wandakabereka.” Asi mumwewo wacho akabva ati, “Aiwa, mupenyu uyu ndiye mwana wangu, wako ndiye wafa.” Mumwe ndokuti, “Kwete kani wako ndiye wafa, wangu mupenyu.” Ndokukakavadzana kwavaiita pana mambo. Mambo akati, “Uyu ari kuti, ‘Mwana wangu mupenyu wako ndiye wafa,’ uyuwo achiti, ‘Aiwa wako ndiye wafa wangu mupenyu.’ ” Mambo ndokuti, “Nditorerei bakatwa!” Saka vakauya nebakatwa kwaari. Mambo akati, “Chekai mwana iyeyo nepakati muvape, muti uyu chidimu uyu chidimu.” Pamusana pokunzwa mwoyo kurwadza amai vomwana mupenyu uyu vakati kuna mambo, “Changamire chimupai zvenyu mwana mupenyu iyeyu musambomuuraya zvenyu.” Asi mumwe wacho akati, “Ngaarege kuva wako kana wangu ngaatodimurwa.” Mambo akati, “Mwana mupenyu uyu ngaapiwe mukadzi uyu, musamuuraye, ndivo amai vake ivava.” Isiraeri yose yakanzwa mutongero wainge waitwa namambo zvikaita kuti vatye mambo, nokuti vakanga vaona kuti aiva noungwaru hwaMwari pakutonga.