KAOBAK 3
3
Mütei Ngüha alebü
1 #
2 Kor 11.3 Tou Bunyubou Mühghaei kümbü meisiau pendou yo ka pinyu kho aei khüpbülangbü kikei. Haoei yaksanyu to laukei, “Tükde Mühghaüei ka to bamanga kibü buhek den che ka ongkei teshau laukei sai?”
2Yaksanyuei pinyu to jongaiko laukei, “Bamang kabü buhek pendou shaula thükkei, 3lausikei laobou bamang jenyua ki, kho buhek ka teshau hoba temeiti khei ayinglonga kan hailabü,” dogo Mühghaüei laukei.
4Lausikei pinyuei yaksanyu to jongaiko laukei, “Maimaitham kan ühailabü. 5Aieilausi ladang kanei ho shaulaje kheijineitham kan nyek iplabü hoba kan Mühghaü tegü maibü amaibü ngeko yeilabü, dogo Mühghaüei ngekei.”
6 #
1 Tim 2.14 Ladang yaksanyuei bunyu kabü buhek kho shaula maibü hoba nyekto loubü hoba songsihon hapla dühlabü che dogo hapbei, saoei kheian shaukei hoba saoei laolakei kukei hoba haoei shaukei. 7Kheijinei haosi ham nyek ipbei, hoba haosi mütkong dogo ngean apbei; hoba haosiei bhukyik shiyoan haosieibü mang küplepbei.
8Kheijinei Bunyubou Mühghaü chaloua yemphanga bamanga paibü langh haosiei ditkei hoba haosi Bunyubou Mühghaü thedang ka bamanga kibü buphanga hukei. 9Lausikei Bunyubou Mühghaüei Adam ngako laukei, “No lanei k?”
10Haoei jongaikei, “Ngei bamanga kaibü ngüh ditan ngo mütkong yingbüei hatko hukei.”
11 #
Rom 5.12 Hobaje haoei laukei, “No mütkong dogo ka to aoei lenkei? Ngei ka to teshau dogo laubü buhek kho ka nyi shaukei sai?”
12Kheijinei müt khoei laukei, “Laobou yaksa nyi kü yoa kila kukei, saoei kho buhek kü la kukei hoba ngei shaukei.”
13 #
1 Tim 2.13 Kheijinei Bunyubou Mühghaüei yaksanyu to laukei, “Nyi ho ai kümbei?” Yaksanyuei laukei, “Pinyuei ngo khüpettikei hoba ngei shaukei.”
Mühghaüei Matjem Ngekletkubü
14Kheijinei Bunyubou Mühghaüei pinyu to laukei, “Nyi hai kümabü langkeibü meisiau pendou hoba yangsikok pendou to no shedsikhau yinglabü; shimungei no shanlabü hoba kaibü langkei salang sünga thamngu shaulabü. 15#Gal 4.4 Hobaje ngei no si yaksanyu kanglanga hoba kaibü lilabü si saoeibü lilabü kanglanga dangbou phokulabü; haoei kaibü khu naknyinkulabü hoba nyi haoeibü youdema püplabü.”
16Haoei yaksanyu to laukei, “Ngei no na shia künbü onat aei yeitilabü; hoba no na hapbü onat aei yeitilabü; khei yingasikei no kaibü lao to dühbü kilabü, hoba haoei ka thüka songdaklabü.”
17 #
Rom 8.20-22 Hobaje Adam to haoei laukei, “Ngei teshau laubü bunyu laobou ka nyi ka yakeibü ngüha leko shaukei ka hangshong kaonyua shedsikhau bauda. Kaibü salang sünga khünei hüanmangan shausiyung haplabü. 18ka la sang si jak angbü yemtikulabü, hoba nyi khübü yamkabü pikshik shaulabü. 19No kao la ayeingai shongko jembü thenyek ka lem longan ong shausiyung haplabü; aieilausi no kao ka sungenkei hoba no kao ki, hoba nyibou no kao la yeilabü.”
20Adamei#ADAM: tetlabü Khunakshousi haoyak la Ev#EV: tetlabü Langkeibü nyenkukei, aieilausi sao khunakshousi pendoueibü nyu ki. 21Bunyubou Mühghaüei Adam si haoyak la phekhonei mangyuk shian yukkukei.
Adam si Ev Bamang ka Sattibü
22 Bunyubou Mühghaüei laukei, “Chühashi, müt kho sen tegü maibü amaibü ngeko yeia; haoei tou ik shingan langkeibü buhek ka kheian shauko ponpen langkei akitilabü.” 23Hibü Bunyubou Mühghaüei laobou kao ka hao sungenkei, kho thutila shanga hao Eden bamang ka sattikei. 24Kho tegü haoei müt kho shian sattikei; hoba langkeibü bunyu lomla Eden bamang chaangbou aenei kaakyembü kherabim hoba pendou ae sepeibü jajalalabü inlou che phokei.
Zvasarudzwa nguva ino
KAOBAK 3: CHANGBSI
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Chang Naga Bible - SAOPOBÜ LAI
Copyright © The Bible Society of India, 2002.
Used by permission. All rights reserved worldwide.