Awˬ hkuiˉ puiˍ ve li‸ 13
13
Aˍbranˍ leh Lawˇtaˍ hpaˆ da‸ ve
1Aˍbranˍ lehˬ, yawˇ ve awˬ miˇ ma leh yawˇ ve ceˇ hkʼa peu-eˬ hta‸ shiˍ veu leh Eˇjiˇtu‸ mvuhˇmiˬ hkʼaw tawˆ kʼai peuˬ hkʼaw‸ nawˉ, Hkaˍnanˍ mvuhˇmiˬ awˬ hawˉ teˇ tawn lo kʼai ve yoˬ. Lawˇ taˍ htawˇ yawˇ geh kʼai ve yoˬ. 2Chi teˇ pawˆ Aˍbranˍ lehˬ paw sha jaˇ peuˬ. Yawˇ geh ceˇ caˬ hkʼa biˇ cawˬ leh, hpu shi htawˇ maˇ maˇ cawˬ ve yoˬ. 3Yawˇ oˇ kaˬ lo kʼaw‸ tu leh ponˬ laˬ htaˇ yawˇ Gʼuiˬsha hta‸ tuˉ tanˇ kuiˬ te jaw ve chehˇ kuiˬ leh, 4yawˇ aˉ po kʼo te chehˇ taˉ jaw ve Beˍteˍlaˆ venˇ leh Aˍiˆ venˇ awˬ kaˍ lo ca kʼaw‸ chehˇ kʼai ve yoˬ. Oˇ kaˬ lo yawˇ Gʼuiˬsha hta‸ oˉ kʼoˍ pui ve yoˬ.
5Lawˇ taˍ htawˇ, nuˇ, yawˬ, aˉ che‸ leh awˬ ceˬ paˍ teˇ hpaˍ hkʼa biˇ cawˬ ve yoˬ. 6Yawˇ huiˉ maˬ ceˇ cawˬ maˇ jaˇ leh, chehˇ kuiˬ chi a ciˉ maˇ kʼehˬ ve pa taw, 7Aˍbranˍ ve ceˇ hawˉ paˍ teˇ hpaˍ leh Lawˇtaˍ ve ceˇ hawˉ paˍ teˇ hpaˍ teˇ hkui teˇ hkui ya‸ da‸ ve yoˬ. (Awˬ yanˇ oˇ ve hkʼaw, oˇ kaˬ lo Hkaˍnaˍniˆ chaw leh Hpeˍraˍziˆ chaw hui chehˇ taˍ ve yoˬ)
8Chi hta‸ pa taw, Aˍbranˍ Lawˇtaˍ hta‸ kʼoˆ piˇ ve, ngaˬ huiˉ maˬ ve ceˇ hawˉ paˍ awˬ kaˍ lo ya‸ da‸ ve taˇ cawˬ piˇ. Awˬ lawn kʼo, ngaˬ huiˉ maˬ lehˬ awˬ viˉ awˬ nyi hpeh‸ ve yoˬ. 9Chi hta‸ pa taw, ngaˬ huiˉ maˬ hpaˆ da‸-a veuˬ. Nawˬ heuˆ gaˇ ve chehˇ kuiˬ hta‸ leuˆ yuˬ-o‸. Nawˬ teˇ hpawˇ kʼai ve kʼo, ngaˬ awˬ nu ve teˇ hpawˇ lo kʼai tuˬ yoˬ, teh‸ kʼoˆ piˇ ve yoˬ.
10Lawˇtaˍ lehˬ, Yawˇdanˍ iˉ kaˆ law hpawˇ lo chiˇ nyi ve yoˬ. Miˬguiˬ oˇ ve teˇ tawn lehˬ iˉ kaˆ hkʼa deh‸ gʼa leh Zawˇraˆ venˇ lo hkʼa gaˬ, Gʼuiˬsha ve hko hkʼa shuˍ maˇ kʼoˆ, Eˇjiˇtu‸ mvuhˇmiˬ hkʼa shuˍ maˇ kʼoˆ, hpeh‸ chehˇ ve hta‸ gʼa mawˬ ve yoˬ. (Chi ve lehˬ, Sawˉdonˍ leh Gawˇmawˇra‸ venˇ hta‸ Gʼuiˬsha maˇ te luˬ piˇ sheˬ htaˇ yoˬ) 11Chi hta‸ pa taw, Lawˇtaˍ lehˬ Yawˇdanˍ miˬ tawˬ kuiˬ hta‸ leuˆ yuˬ leh, mvuhˇ nyi tawˆ hpawˇ lo kʼai ve yoˬ. Hkʼe te leh yawˇ huiˉ maˬ hpaˆ da‸ ve yoˬ. 12Aˍbranˍ lehˬ, Hkaˍnanˍ mvuhˇmiˬ hkʼaw chehˇ taˉ ve yoˬ. Ya‸ hkʼaˇ, Lawˇtaˍ lehˬ venˇ teˇ hpaˍ cawˬ maˇ ve miˬ tawˬ kuiˬ lo kʼai leh, Sawˉdonˍ venˇ paˇ lo ca chehˇ ve yoˬ. 13Venˇ yaˇ oˇ ve teˇ hpaˍ haiˬ jaˇ leh, Gʼuiˬsha mehˆ gʼuˇ suhˍ venˇbaˆ uiˍ jaˇ ve chaw teˇ hpaˍ hpeh‸ ve yoˬ.
Aˍbranˍ Heˍbonˍ lo kʼai ve
14Lawˇtaˍ tawˆ kʼai peuˬ hkʼaw‸ nawˉ, Gʼuiˬsha Aˍbranˍ hta‸ chi hkʼe kʼoˆ piˇ ve yoˬ. Chi beu‸ nawˬ chehˇ taˍ kuiˬ lo huˉ taˍ leh hkʼaˬ hpawˇ chi hpawˇ lo chiˇ nyi hkʼa sheˬ. 15Nawˬ gʼa mawˬ ve mvuhˇmiˬ chi hkʼa peu-eˬ, nawˬ leh nawˬ ve awˬ ceuˬ awˬ hkʼaˇ teˇ hpaˍ hta‸ ngaˬ co co taiˍ taiˍ piˇ laˇ tuˬ yoˬ. 16Nawˬ ve awˬ ceuˬ awˬ hkʼaˇ teˇ hpaˍ lehˬ, gʼaw maˇ peuˬ htaˇ hkʼa gaˬ maˇ jaˇ ve je‸ meu-e hkʼa shuˍ hpeh‸ la tuˬ yoˬ. 17Nawˬ chi beu‸ tu leh mvuhˇmiˬ oˇ ve hta‸ ca toˇ nyi loˬ. Awˬ lawn kʼo, mvuhˇmiˬ oˇ ve ngaˬ nawˬ hta‸ piˇ laˇ ve yoˬ, teh‸ yawˇ hta‸ kʼoˆ piˇ ve yoˬ. 18Oˇ htaˇ Aˍbranˍ lehˬ yawˇ ve aˉ po kʼo hta‸ kʼaw‸ jiˆ leh Heˍbronˍ venˇ, Maˍreˍ ve maˉ kuˇ cehˬ lonˉ cawˬ kuiˬ lo ca chehˇ kʼai ve yoˬ. Oˇ kaˬ lo yawˇ Gʼuiˬsha hta‸ tuˉ tanˇ kuiˬ teˇ maˬ te ve yoˬ.
Zvasarudzwa nguva ino
Awˬ hkuiˉ puiˍ ve li‸ 13: LHBE
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Lahu Bible Edited © Thailand Bible Society and Bible Society of Myanmar, 2010, 2020.