Gn 2
2
1-2Yin wakeb c'ual max watx'nej Dios satcan, tx'otx' tx'otx', c'al masanil tzet ay bay. Axa yet is suk c'ual xin, max xew Dios yin masanil tzet max watx'nej. 3Max pojcan el Cham jun yet suk c'ual tol yet Cham yayji, c'al yuj yoc watx'ilok anima, yujtol a yet jun c'ual tu' max xew Cham yin masanil tzet max watx'nej.
Yet ayic' nak winak xol awbejal te' bay Edén
4Tix wal yabixal tzet max yun yesnelay aj satcan c'al tx'otx' tx'otx' ti'. Yet max yesnen aj Jehová Dios satcan c'al sat tx'otx' tx'otx', 5c'amto c'al junok te te', tamwal ac'un chi ajolok, yujtol c'amtoc'al nab chi ay yiban tx'otx' tx'otx' yuj Jehová. C'amto c'apax mactxel chi mulnaj yiban tx'otx'. 6Asan xin, ay xob tx'otx' chi aji. A xob chi aj tu', chi ak'on ch'acay sat tx'otx'. 7A yet tu xin, max watx'nej Dios jun anima.*fn* A pokokal tx'otx' max yiajok cax max watx'neni. Lajwi tu xin, max xuontok Cham is cak'ek' yul is txam. Axca tu' max yun yiquisbi ajok.
8Max yaw c'apax Cham jun awbejaltelak bay jun lugar chi yik Edén, yetc'ulal bay chi ajol c'u. A tu' max yacan octok Cham nak winak max watx'nej tu'. 9Max yak'on ch'ib Cham masanil te te' manxa watx'ilok yili sat chi yak'a', te' tol watx' loji. A nan xol jun awbejal te tu', a tu' ay jun te' chi ak'on k'inalej, c'al jun te' chi ak'on ojtaknelay el watx'il c'al yobal.
10A bay Edén tu', chi ajol jun a' aej chi aon oc yal masanil awoj. Axa yet chi el a' bay Edén tu', canpojan max yuttok ba a'. 11A jun a' babel chi yik Pisón, a ton a' chi ec' oyoyok yul tx'otx' chi yik Havila, bay ay oro. 12A ch'en oro ay bay jun lugar tu' caw wal watx' ch'en. Ay c'apax juntzan te te' ay is k'olal caw wal sumumi yoc jab. Ay c'apax juntzan ch'en ch'en chi yik ónice. 13Axa a' yet is cab chi yik Gihón. A ton a' ti' chi ec' oyoyok yul tx'otx' chi yik Cus. 14Axa a' yet is yox chi yik Tigris. A ton a' chi ec' bay yichcanil tx'otx' Asiria. Axa a' yet is can xin, a ton a' chi yik Éufrates.
15Max yaontok Jehová Dios nak winak bay xol te awbejal te' bay Edén tu' yuj mulnaj nak c'al yuj tayneni, 16max yal Cham bay nak axca ti';
—Chi je' cha lo' sat te te' ti' masanil; 17axa pax te' tol chi ak'on ojtaknelay el watx'il c'al yobtakil xin, manchak a lo sat te'; tatol ok a lo' sat te', a yet tu' wal yel ok ach camok, ẍi Cham bay nak.
18Max yalon pax Jehová Dios: Man watx'ok yayji nak winak is tx'oklil; palta ok in watx'nej junok is yetbi nak, tol is moj wali yet chi colwaj yetok, ẍi Cham. 19Yuj tu xin, a masanil no no' max watx'nej Cham bay sat tx'otx' tx'otx' ti', no xolakteal no', c'al masanil no tz'iquin, max yitok Dios bay nak winak, a ton Adán yet chi yaon oc is bi junjun no', axa is bi junjun no' max yaoc tu', ac'ala' ton ayoc is biok no' tinani'. 20Max yaoc nak bi masanil no', no xolakteal no', c'al no tz'iquin, c'al no jobbejal no'. Palta c'am junok xol no no' tu' max je' yoc yetbiok nak c'al colwajwomok. 21Axa yiontek Cham jun miman wayan yiban nak tu'. Yet wal c'aynak el c'ul way xin, max yion eltek Cham jun bakil motx nak, lajwi tu' max makchencan bay max yi' eltek tu'. 22A ton yetok jun bakil is motx nak tu', max watx'nej Cham ix ix, cax max yaoncan oc yul k'ab nak. 23Axa yet max yilon oc nak ix, max yalon nak axca ti':
A jun ti' wal yel in chibejal, in bakil, yujtol win max eltek yuj Dios, xan ix*fn* chi yika', ẍi nak.
24Yuj tu xin, a nak winak ok bekcan is mam c'al is txutx, yuj junanen ba nak yetok yistzil, xan axca wal tol junxanej mimanilejal chi yuncan el eb cawanil.
25C'am is pichil eb cawanil, palta c'am chi q'uixwi eb bay junjun.
Zvasarudzwa nguva ino
Gn 2: ATBYK89
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Kanjobal (Q’anjob’al) © Sociedad Bíblica de Guatemala 1989