मरकुसो 1
1
युहना बपतिस्मा रंड्राढो प्रचार
(मत्ती 3:1-12; लूको 3:1-18)
1परमेश्वरो योह यीशु मसीहू पाहठी रूठे खबरो शुरूआत झांह ठ्रोह शुई। 2छना यशायाह भविष्यवक्ता ओ#1:2 परमेश्वरो गप्पा रेड्रा मीहतिंङ कंड्रा पवित्रशास्त्रारिंङ च़ेहसी तोह, परमेश्वरे एनोह योह मसीहू हखा दिह कुट्री लेहती, “रेड्रु! गेह कांह तुईज़ी घेंङौ इच्च़ा दूत बि च़रपोग, अंऊ कांह थल्जी मीहतु सेहम त्यार लोहतो।” 3सुनसान ठाहरीरिंङ इच्च़ा मीहू हऊषेपि सग थापि लेहकी तोह कि, “प्रभु ऊ स्वागतो थल्जी केनातु सेहम तेयार लंहि दंङ केनाहतिंङ सुधारेतुंई।”
4दंङ दिह भविष्यवाणी बि पूरा लहचे इच्च़ा मीह अति अतु मिन यूहन्ना तोहई। दुह यरदन बेंड़ीऊ नुरेच़ि इच्च़ा सुनसान ठाहरीरिंङ अंज़े प्रचार लहच़ी लेहती कि, “एनोह-एनोह पापो दोरच़ी माफिऊ थल्जी मदम कहमो दोरच़ी सेहम किर्ज़ुंई दंङ बपतिस्मा#1:4 बपतिस्मा इच्च़ा पवित्र शुहचे शुह। दिह ज़िंदगीरी इच्च़ा फेरा लेहपच़ी। दिह पाप ब्याड़ा लेह ए परमेश्वरो अमरिंङ जोईमी इच्च़ा निशानी शुह। इच्च़ा मीहू अन्द्रेऊ पवित्र आत्माबि पवित्र आत्माऊ बपतिस्मा कुट्री। लेहप्तुंई।” 5यहुदिया प्रदेशो, दंङ यरूशलेम शहरो महसे मीहरे यूहन्ना ओ प्रचार रेड्रिमी थल्जी अच़ा अतिरे, अपेहल दोच़ी एनोह पाप मनेके च़रति दंङ यूहन्नाज़ि दोतिंङ यरदन बेंडीरिंङ बपतिस्मा रेह च़रति। 6यूहन्ना ऊंठो च़मो बणाएष्री खमज़ेर लेहच़ाते दंङ एनोह उम रिंङ च़मो छ़िर लेचा बंङज़ते, दंङ टिट ए बंणो यमा ज़ोवा लाहते। 7दंङ दुह कुट्री लेहती, “गिऊ थल दुह अंजा शुह, अंऊ गिह्बी ला मोह्ड़े तो, गेह दिऊ जोगे माह शूक कि कोंङा शुहचे दोऊ बुटो तस्मा युफोग, 8गेह ता केतिंङ ती रंङ साते बपतिस्मा रंदेग, दंङ दुह केतिंङ पवित्र आत्मा रंङ बपतिस्मा रमतो।”
यीशु बपतिस्मा ए परीक्षा
(मत्ती 3:13-17; लूको 3:21-22)
9दुह ध्याड़ा रिंङ अपेहल युहना ज़ि बपतिस्मा रंड्राते, दंङ यीशु गलील प्रदेशो नासरत नगरो दोरच़ी अंज़े यरदन बेंड़ीऊ कछंङ इलि दंङ यूहन्ना ओ दोरच़ी बपतिस्मा लेहप्चिरी। 10अंऊ मुका यीशु ती ज़ि हुंच़े तोरिंङ अति, दोहथल दोई सर्ग अल्सी दंङ पवित्र आत्मा कबूतरो ठ्रोह एनोह टोईच़ी अपि तंङतो। 11दंङ सर्गंङज़ि परमेश्वरो सग अति कि, “का गिऊ प्यारे योह शुनाह। दंङ गेह करंङ साते खुश तोतोग।”
12यीशु बपतिस्मा लेहप्च़िमी दोहथल ए पवित्र आत्माज़ि दुह सुनसान ठाहरीरिंङ रेंज़ा इलि। 13दुह सुनसान ठाहरीरिंङ निह्नजा ध्याड़ा शेताने यीशु परीक्षा लेहतिर। दंङ दुह दोहर बंणो कवचि-कवचि जीवा रंङ साते बंङज़ाते, दंङ स्वर्गदूतारे दोऊ सेवा टहल लज़ी तोईरे।
यीशु सेवा कमो शुरूआत
(मत्ती 4:12-17; लूको 4:14-15; यहून्न 4:43-45)
14थोडे़ ध्याड़ो थल अपेहल यूहन्ना बि हेरोदेस रज्ज़ाज़ि जेलंङ केहच़ी च़रते, दंङ यीशु गलील प्रदेशो हखा अति दंङ मीहतु बिचंङ परमेश्वरो राज्यो पाहठी रूठे खबर रंड्री लेहती। 15दंङ कुतोह, “ध्याड़ा पूरा शुहचे इलि, परमेश्वरो राज पिचे अन्ज़े तोत; मदम कमो दोरच़ी सेहम किर्ज़ुंई दंङ दि रूठे खबरो टोईच़ी विशवास लांही।”
मछुवे तिंङ बुलाच़ी
(मत्ती 4:18-22)
16इच्च़ा ध्याड़ा अपेहल यीशु गलीलो झीलो मुखंङ य्वाते, दोई शमौन ए दोऊ कवचि न्वा अन्द्रियासबि झीलंङ जाल केहट्री तंङाहते; छना कुचे दोरे म्हच चुमज़ारे तोईरे। 17यीशुज़ि दोतंङ साते कुतोह, “गिऊ थले अतंई दंङ गिऊ चेला बणेक्तुंई, गेह केतिंङ कमोग कि मीहतिंङ छना गिऊ चेला बणाएपोंई।” 18दोच़ी दोहथल दोपहल एनोह कम ब्याड़ा लहज़ा दंङ दोऊ चेला बणेक्पिमी थल्जी दोऊ थले जोज़ि लेहतिरे। 19यीशुज़ि दोरच़ी फोअरे तुंखा इलजे थल झुह्ट ऊई न्वारे तंङाते दोतु मिन याकूब ए यूहन्ना तोहई दोरे जब्दीऊ योह तोईरे दोकु झुल्ला मछवारा तोईरे दोरे किशतीऊ टोईच़ी बंङज़ा एनोह जाल ठीक लहच़ी लेहकी तोईरे। 20छना ए यीशुज़ि दोतंङ साते कुतोह, “गिऊ थले अतंई दंङ गिऊ चेला बणेक्तुंई” दंङ दुरेह दोहपल ए एनोह बाहबि मज़दूरा रंङ साते दोर्तिंङ ए किशतीरिंङ केट्रा, दोऊ चेला बणेक्पिमी थल्जी दोऊ थले जोज़ि लेहतिरे।
माजी आत्मा ग्रस्त मीहबी ठीक लहज़ी
21दोऊ थल यीशु ए दोऊ चेलारे कफरनहूम नगरंङ अन्देर, दंङ दुह ऊई अरामो ध्याड़ारिंङ दुह यहुदी सभा घरबारंङ इलजे धर्मिक शिक्षा रंड्री लेहकी। 22दंङ मीह दोऊ धर्मिक शिक्षा रंङ हेरान शुईरेह। छना कुचे ता दुह यहुदी शास्त्रीतु ठ्रोह मशुह, दंङ अधिकारी तु ठ्रोह धर्मिक शिक्षा रंड्राते। 23दंङ दोहपल दोहर इच्च़ा मीह तोहई, दोऊ अंद्रेग मांजी आत्मा तोहई। दुह मांजी आत्मे हाऊष रेह कुंई, 24“हे नासरत ओ यीशु, ञेंतिंङ करंङ साते छी कम? छि केई ञेंतिंङ सच़िमी थल्जी अन्देन आ? गेह का सेका, का अरी शुनाह? का परमेश्वरो पवित्र योह।”
25यीशुज़ि दुह मांजी आत्माबि रोषेके कुतोह, “चुपे तो! दंङ दि मीहू दोरच़ी हुंच़ा इला।” 26दंङ दुह मांजी आत्मा ए दुह पिरोके च़रति, दंङ दुह जोरे हाऊष रंड्रा दोऊ दोरच़ी हुंच़ा इलि। 27भत्ते मीहरे अंऊ यहुदी सभा घरबारंङ तोईरे हेरान शुहचे इलि, दंङ ऐनाह तु विचङ रुहक्च़ी लेहतिरे, “दी छी ठ्रोह शिक्षा शुह? न्येचि तुई अपेहल ला अतिंङ ला झांह ठ्रोह अधिकारंङ साते शिक्षा रंड्री तंङसी माह, दोई अधिकारंङ साते मांजी आत्माबि ला हुकुम रंड्रते। दंङ दोच़ी ला दोऊ गप्पा मनेक्च़ातेर।” 28दंङ यीशु पाहठी दि गप्पा गलील प्रदेशो भत्ते ठाहरीरिंङ मेहू ठ्रोह फेलेके इलि।
महस टेहषी दोतिंङ ठीक लहज़ी
(मत्ती 8:14-17; लूको 4:38-41)
29यीशु दोथल यहुदी सभा घरबारंङ ज़ि हुंच़ा, याकूब ओ यूहन्ना रंङ साते शमौन ओ अन्द्रियासो चुंखा इलि। 30दंङ दुह मुक्का शमौनो युग बुखारंङ टेचे बिस्तरारिंङ तोहई, दंङ दुह चुंखी मीहच़ी दि पाहठी गप्पा दोहपल ए यीशु हखा कुतोह। 31दंङ यीशुज़ि दोऊ कछंङ इलजे दोऊ गुहड़ चुम्ज़ा दोबि खड़े लहतो, दंङ दोऊ बुखार ठीक शुहचे इलि, दंङ दोहथल ए दुह दोतु सेवा टहल लहज़ी लेहती।
32ञोंकोल कि टेमारिंङ अंऊ मुका आराम लहज़िमी ध्याड़ा योह्सा इलि, मीहज़ी भत्ते टेचे दोतिंङ दंङ दोतिंङ अतु अंद्रेग मांजी आत्मारेह तोहई, यीशु कछंङ हापी लेहकी तोईरे। 33कफरनहूम नगरो महसे मोह्ड़े भीड़ दुरेह चुंङो तुईज़ी ठ्रोहका शुहतेर। 34दोई महसे अंऊ महस पाहठी टेची तोईरे, अईन लहरी, महसे मांजी आत्मा हुन्दी, दंङ दोई मांजी आत्माबि कुट्री मा रेंहई, छना कुचे मांजी आत्मारे दुह सेचा तेर कि दिह परमेश्वरो योह शुह।
एकातंङ यीशु प्रार्थना लहज़ी
(मत्ती 4:23-25; लूको 4:42-44)
35मुन्जे सरके (भोर का ध्याड़ा) निरा बे तुई महस सरके दुह खड़े शुहचे दोरच़ी हुची, दंङ सुनसान ठहरि रिंङ इलजे दोहर प्रार्थना लहज़ी लेहकी तोहई। 36थोड़े टेमो थल शमौन ए दोऊ साथीज़ि खांई कि दुह दोतु बिचंङ माह दंङ दोरे दोबि पेट्री धकतिका इलिरे। 37अंऊ घाह दुह दोहरी, ता दोहरंङ साते कुतोह, “महसे मीहरे कनिङ पेट्री लेहकी तोतोर।” 38यीशुज़ि दोतंङ साते कुतोह, “अतंई हेनारेह दंङ देच़ि न्वेच़ि नगरंङ योई, कि गेह दोहर धर्मिक उपदेश (धर्मिक शिक्षा) लोहाग, छना कुचे ता गेह धरतीरिंङ दिऊ ए थल्जी अंज़े तोतोग कि गेह उपदेश रमोग।” 39दंङ यीशु ए दोऊ चेलारे गलील प्रदेशो महस ठाहरीरिंङ, यहुदी सभा घरबारंङ इलजे-इलजे धर्मिक उपदेश (धर्मिक शिक्षा) रंड्री लेहती, दंङ मांजी आत्मारे हुच़ि लेहतिरे।
कोढ़ो टेची मीहबी ठीक लहज़ी
(मत्ती 8:1-4; लूको 5:12-16)
40इच्च़ा ध्याड़ा इच्च़ा मीह यीशु ऊ कछंङ अति, दुह मीहबी कोढ़ो बीमारी तोहई। दंङ दोई एनोह पुष्टू भारेह बंङज़ा, दोहरंङ साते बिनती लहज़ी कुट्री लेहती, “हे गुरु! कनु हिटी तोह ता केई गिह्बी ठीक लेह तरपोन दंङ गेह धर्मिक रिवाज़ो हिसाबे शुद्ध शुहचे योग।” 41दोई दाह लहजे एनोह गुहड़ तुंखा लहतो, दंङ दोबि थोके कुतोह, “गेह ज़ुन्ज़ताग केई रुठे शुहचे इला।” 42दोह थल ए दोऊ कोढ़ शुद्ध शुहचे इलि, दंङ दुह ठीक शुहचे इलि। 43दंङ यीशुज़ि दुह मीहबी दोबि खबरदार लहच़ी दोहथल चरच़े च़रति दंङ कुतोह, 44“रेड्रु! दि गप्पा अतंङ साते ला थाकुड़ु, कि गेह कनिंङ ठीक लेह चरच़ातग, दंङ इलजे दीह गप्पा केनोह यहुदी पुरोहिता बि कंड्रु, कि काह ठीक शुहचे इलजी तोतोन। दंङ परमेश्वरो थल्जी दुह तग चढ़ाएतु कि अतु पाहठी मूसाज़ि तुईबे च़ेहसी तोहई, कि कनिंङ रिवाज़ो हिसाबे शुद्ध घोषित लोहर। दंङ भत्ते मीहतिंङ पता लेहके योतो कि काह ठीक शुहचे इलोन।” 45पर दुह मीह दुह ठाहरिरिंङ ज़ि अच़ा इलि दंङ भत्ते मीहतंङ साते कुट्री लेहती कि यीशुज़ि दोबि ठीक लेह चरच़तो। झांह लेह यीशु यहचा मीहतु तंङशी (खुल्म्खुला) नगरंङ इलि मरति, दंङ नगरो धकते सुनसान ठाहरीरिंङ बंङज़ा इलि; दंङ पिला हासी ऊ मीहरे दोऊ कछंङ अपि लेहतिरे।
Zvasarudzwa nguva ino
मरकुसो 1: LBFNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.