मत्ती 9
9
नम्क्योंन नतपाबि ठीक लहज़ी
(मरकु 2:1-12; लूको 5:17-26)
1दंङ यीशु किशती रिंङ बंङज़ा नुरेह हखा इलि, दोऊ थल एनोह नगरो हखा अच्च़ा इलि। 2दंङ रेह मीहज़ी इच्च़ा नम्क्योंन टेहची नतपाबि मंजीऊ टोईच़ी केचे यीशु कछंङ हतिरे। यीशु ज़ि दोतु विशवास खांऐ दुह नम्क्योंनो नतपाबि कुहतो, “हे मित्रा याहऊ लोह; कांह पाप माफ शुई।”
3दिरंङ रेह यहुदी शास्त्री ज़ि सोचेक्ति “दीह ता परमेश्वरो बुराई लहज़ा।” 4यीशुज़ि दोतु सेहमो गप्पा ञेंहई कुहतो, “केहच़ी केनातु सेहमरिंङ दीह मांजी विचार छिले हप्तांई? 5सीधा गप्पा छि शुह? दीह कुट्री कि कनु पाप माफ शुहचे इलि, या दी कुट्री, अहच़ु दंङ जोऊ। 6पर दिऊ थल्जी कि केहच़ी दिह ञेंए केहई कि गेह मीहू योह बि धरतीऊ टोईच़ी पाप माफ लहज़िमी ला अधिकार तोह।” दोई नम्क्योंन टेहची दंङ दोबि कुतोह, “गेह करंङ साते कुट्रातग, अहच़ु केनोह मंजी कुरच़े चुंखा अच़ा इला।” 7दुह अह्च़ा एनोह चुंखा अच्च़ा इलि। 8मीहरे दिह खांई बेई इलिरे दंङ परमेश्वरो महिमा लहज़ी लेह्तिरे, अच़ि मीहतिंङ दिह अधिकार रांहषी तोह।
मत्ती बि ऐनाहरंङ साते बुलाच़ी
(मरकु 2:13-17; लूको 5:27-32)
9दोरच़ी तुंखा इलजे यीशुज़ि मत्ती मिन्दु इच्च़ा मीहबी अंऊ एनोह चुंगी लेहप्च़िमी अड्डारिंङ बंङज़ा तोहई। दंङ यीशुज़ि दोहरंङ साते कुतोह, “गिऊ थले अता दंङ गिऊ चेला बणेंक इल।” दंङ दुह खड़े अच़ा एनोह कम ब्याड़ा लहजे यीशु थले शुहचे इलि। 10अपेहल यीशु मत्तीऊ चुंङ इलजे बगत ज़ेहई लेहकी तोई, महस चुंगी लेहपच़ा ए पापी यीशुए दोऊ चेला रंङ साते बगत ज़े बंगज़ा इलिर। 11दीह खांऐ फरीसी ज़ि दोऊ चेला तंङ कुह्तोर, “केहतु गुरू चुंगी लेपचाढ ए पापी रंङ साते छिला बगत ज़े लेहकी तोह?”
12यीशुज़ि दी रेड्रा दोतंङ साते कुतोह, “लहरज़े ठीक मीहतु थल्जी मशुहद्ध पर टेहची दोतु थल्जी शुहबी। 13दिऊ थल्जी केहरे ईलांई दंङ दिऊ मतलब सिखेकतुंई, ‘कि गेह बलिदान माह पर दाह जुंज़ातग’ गेह दुह मीहतिंङ बुलाच़ि अंज़े माह शुगाह अच़ि एनाबि धर्मी चेहच़ातोर, दंङ दोतिंङ बुलाच़ी अंज़े शुगाह अच़ि एनाबि पापी चेहच़ातोर।”
उपबासो बारे प्रश्न
(मरकु 2:18-22; लूको 5:33-39)
14दंङ यूहन्ना चेलाज़ि यीशु कछंङ अंज़े कुंहई, “छि गप्पा शुह कि ञेंहरे ए फरीसी ज़ि धोंण ब्रत तहच़ातंई, पर कनु चेलारे ता ब्रत माह लहज़ातोर?”
15यीशुज़ि दोतिंङ कुहतो, “छि ब्याह चुहज़ा ज़ि, अपेहल तचेक ब्याऊ दोतंङ साते तोह शोक लंहीयां? पर दुह ध्याड़ा अपतो अपेहल ब्याहू दोतु बिचङ ज़ि शता लोहुर; दुह मुका दोच़ी छले ज़ेह तुंङमी मेह ब्रत लोहर।
16अरीला मीहच़ी खरकोई खम्ज़ेऊ खन्नी युई खमज़ेतिंङ माह केट्री, छना कुचे दुह टली दुह खमज़े ऊई लाह ब्रक्शे इबी। 17ध्वांए खरकोई दाखो रस युई च़मो थेला रिंङ माह केहट्री; छना कुचे झांह लहज़िमी रंङ साते दुह च़मो थेला ए दाखो रस झुल्ला बर्बाद शुहचे इपि पर खरकोई दाखो रस खरकोई च़मो थेला रिंङ केहट्री दंङ दोरे झुल्ला बचेकी इबि।”
सि मेच़मी कटु ए टेहषी मेच़मी
(मरकु 5:21-43; लूको 8:40-56)
18दुह दोतंङ दिह गप्पारे लह्जी लेह्की तोहई कि इच्च़ा यहुदी नेताज़ि अंज़े दोबि फ्यग लहरी दंङ कुड़ी, “गिऊ मेच़िमी कटु सीए इलज़ा; पर इलजे केनोह गुह्ट्र दोऊ टोईच़ी केऊ, ता दुह षीङे योतो।” 19यीशु अहच़ा एनोह चेला तंङ साते दोरंङ साते अच़ा इलि।
20दंङ खांई, इच्च़ा मेच़िमी अतिंङ सनी साल बेहच़ी शुहई बहाएक्च़िमी बीमारी तोहई दुह थलेसी अति दंङ दोऊ खमज़े मुख थोह्की च़रति। 21छना कुचे दोई एनोह सेहमरिंङ कुट्रा तोहई, “अगर गेह यीशु सिर्फ खम्ज़ेऊ मुख ए थोके च़रपोग, दंङ गेह अईन शुहचे योग।”
22यीशुज़ि यह्च़ा दोऊ हखा खंयातो दंङ कुहतो, “मियो, याहऊ लोह; कांह विशवासे कांह ठीक लह्तो।” दंङ दुह मेच़िमी दोहथरे अईन शुहचे इलि। 23अपेहल यीशु दुह यहुदी नेताऊ घरबारंङ पिह्छा ताह बेंज़ बजाएच़ारे ए महस मीहतु भीड़ो हल्ला लह्जी तंङातोह, 24दंङ कुहतो, “दोखा शुई, मेच़िमी कटु सिए माह, पर इमरिंङ तोह।” दिह गप्पा रेड्रा भीड़ो मीहरे यीशु मज़ाक उड़ाठी लेहतिरे। 25पर अपेहल भीड़ हुंच़े च़रतिर, दंङ दोई तोंङ इलजे मेच़िमी कटु गुहड़ च़ुमरी, दंङ दुह श्रींङे इलि। 26दंङ दिह गप्पो चर्चा दुह भत्ते देश शुहबी लेहती।
झुह्ट काणे तिंङ टिरा रंड्री
27अपेहल यीशु दोरच़ी तुंखा शुईता, ता झुह्ट काणे मीहरे दोऊ थल दिह हऊषेके अपाहतेर, “हे दाऊद ओ खानदानो यीशु! ञेंहतु टोईच़ी दया लोहऊ।” 28अपेहल दुह चुंङ पिचा, ता दोरे कांणे मीहरे दोऊ कछंङ अतिरे, दंङ यीशुज़ि दोतिंङ रूहकातो, “छि केतिंङ विशवास तोह कि गेह केतिंङ ठीक लेह तरपोग?” दोच़ी दोबि कुह्तोर “वेई प्रभु ञेंहतिंङ विशवास तोह कि केई ञेंहतिंङ ठीक लेह तरपोन।”
29दंङ दोई दोतु टिरारे थोहके कुहतो, “छना कुचे केहच़ी विशवास लोहतन कि गेह ठीक लेह तरपोग, दिऊ थल्जी केहरे ठीक शुहचे ईलांई।” 30दंङ दोरे दुह ए मुक्का खंड्री लेहतिर। यीशुज़ि दोतिंङ जोर रें कुहतो, “खबरदार अच़िला दिह गप्पा था कंड्रुंई कि गेह केहतु थल्जी छि लहतग।” 31पर दोच़ी इलजे भत्ते देशंङ दिह गप्पा फेलाके च़रति।
इच्च़ा टटे बि ठीक लहज़ी
32अपेहल यीशु ए दोऊ चेलारे धह्तेका इबी लेहकी तोईरे, दंङ मीहरे इच्च़ा टटे मीह्बी अतु अंद्रेग मांजी आत्मा तोहई, दोबि यीशु कछंङ रेंज़ा हतिर; 33अपेहल यीशुज़ि दुह टटे मीहू दोरच़ी मांजी आत्मा हुंच़े च़रति, दंङ दुह मीह गप्पा लहज़ी लेहती, दिरंङ भीड़ ठट् शुहचे कुट्री लेहती “इस्राएल देशंङ झांह ठ्रोह अपेहला माह तंङसी शुह।” 34पर फरीसी ज़ि कुट्री लेह्तिरे, “दिह ता शेतानो मदत लहज़ा मांजी आत्मा हुंपा।”
35यीशु ए दोऊ चेलारे गलील प्रदेशो महस शहर ए नगरो दोरच़ी जोआ लहरी दंङ यहुदी सभा घरबारंङ शिक्षा रंड्रा, परमेश्वर ओ राज्यो पाहठी रूठे खबर प्रचार लेह, दंङ मीहतु भत्ते पाहठी बीमारी ए कमज़ोरी ठीक लोहवा लहरी। 36अपेहल यीशुज़ि भीड़ तङातो ता दोबि मीहतु टोईच़ी दाह अच्च़ा अति छना कुचे दोरे दुह त्रैंईतु ठ्रोह तोहई, अतु अरीला पोहाल माह शुहबी, अंऊ बेचेन ए भटकेगी तोईरे। 37दंङ दोई एनोह चेला तिंङ कुहतो, “छना रीहरिंङ महसे फसल शुबी, ध्वांए महस मीहरे तोतोर अरी परमेश्वरो बचन रेड्रिमी थल्जी तेयार तोतोर। पर परमेश्वरो राज्यो पाहठी कंड्रा मीहरे थोड़े तोतोर। 38दिऊ थल्जी परमेश्वरारंङ साते बिनती लंई अंऊ रीहऊ मालिक तोह कि दोई एनोह रीहरिंङ कम लहज़िमी थल्जी महस मीहरे च़रपोतो ताकि दोच़ी ऊई मीहतिंङ परमेश्वरो राज्यो पाहठी कमोर।”
Zvasarudzwa nguva ino
मत्ती 9: LBFNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.