मत्ती 21
21
यरूशलेमङ विजय प्रवेश
(मरकु 11:1-11; लूको 19:28-44; यहून्न 12:12-19)
1अपेहल यीशु ए दोऊ चेलारे यरूशलेम शहरो कछंङ पिचातोर, दंङ दोरे जैतून मिंदंङ गोह मुखारिंङ बेतफगे ओ कछंङ अन्दोर, दंङ यीशुज़ि झुह्ट चेलारे दिह कुचे च़रतिर। 2“तुईज़ी नगरारिंङ ईलांई। दोहर इच्च़ा करेटु छ़ुह्च़ी तोह, दंङ दोहरंङ साते करेटु केतिंङ खोकसोतो दुह युहप्छे गिऊ कछंङ रेंज़ा हतांई। 3अगर अच़िया केतंङ छाह कुंई ताह, दंङ कुंई कि प्रभु यीशुबि दिऊ ज़रूरत तोह, दंङ दोई दुह दोहथरे च़रपोतो।” 4दिह दोऊ थल्जी शुहत्ते कि अंऊ बचन भविष्यवक्ताज़ि कुहषी ताहरेर, दुह पुरे शोतो। 5“खंणु सिय्योंनो मिओ रंङ कुंई, खंणु कांह रज्ज़ा कांह कछंङ अपा; दुह नम्र तोह दंङ करेटु टोईच़ी तोह; करेटु टोईच़ी।”
6चेलाज़ि इलजे, छना यीशुज़ि एनोह चेला तिंङ कुतोह, ध्वांए लाहतोर। 7दंङ करेटी ए करेटु ह्न्जे दोतु टोईच़ी एनातु खमज़े केरिरे दंङ दुह दोऊ टोईच़ी बंङज़ा इलि। 8दंङ महस मीहच़ी एनोह-एनोह शाल चादर अमरिंङ थिङी च़रति, दंङ ऊहई मीहच़ी बुटो ब्रन्ज़ेर ट्रिके अमरिंङ बिछाएकातेर। 9अंऊ भीड़ तुहई, तुहई यवाते ए थले-थले अपाते, हऊषेके, हऊषेके कुट्राते, “दाऊदो खानदानो योह बि होशाना। धन्य शुह दुरेह अंऊ प्रभुऊ अधिकारंङ अपा, सर्गंङ होशना।” 10अपेहल दोई यरूशलेमंङ पिह्छा, दंङ भत्ते नगरारिंङ हलचल शुहचे इलि, दंङ मीहच़ी रुहक्च़ी लेह्तिरे, “दिह अरी शुह?” 11मीहच़ी कुह्तोर, “दिह गलील प्रदेशो नासरतो शहर भविष्यवक्ता यीशु शुह।”
मंदिरंङ ज़ि व्यापारी रे हुंपी
(मरकु 11:12-19; लूको 19:45-48)
12यीशुज़ि परमेश्वरो मंदिरंङ लेन-देन लहज़ी लेहकी तोईरे, हुंज़े च़रतिर, दंङ सुनारातु पीढ़ी ए कबूतर लंङज़ातु चोकि फुचंङ लेह च़रतिर; 13यीशुज़ि दोतिंङ रैहच़ी ते कुहतो, “च़ेहसी तोह, गिऊ घरबार भत्ते जातिऊ थल्जी प्रार्थनाओ घरबार शोतो।; पर केहच़ी दोबि डाकुतु अड्डा बणाके चरच़ातंई।”
14अपेहल काणे ए लट्टे यहुदी मंदिरंङ दोऊ कछंङ अन्दोर, दंङ दोई दोरे ठीक लहतो। 15पर अपेहल यहुदी मोह्ड़े पुरोहिता ज़ि ए यहुदी शास्त्री ज़ि दुह हेरानीऊ कमारे, अंऊ दोई लहसी तोईरे, दंङ कटुतिंङ यहुदी मंदिरो अंद्रेग, रज्ज़ा दाऊदो खानदानो योह बि होशना कुट्री तंङातोर दंङ दोतिंङ महस रोष अंजा। 16दंङ दोबि कुट्री लेह्तिरे, “केई रेड्रातना दोच़ी छि केट्रातोरे?” यीशुज़ि दोतिंङ कुहतो, “वेई; छि केहच़ी दिह पढ़ेक्सी माहतंईया; कटुतु दोरच़ी ए पानुतुंङज़ा कटुतु दोरच़ी केई अपार स्तुति लहज़ी लाहतेन?” 17दंङ यीशु दोतिंङ केहट्रा नगरीऊ धह्तेका बैतनिय्याह नगरो हखा अच्च़ा इलि दंङ रातारिंङ दोरे बंङज़ा इलि।
फल मेह अंजीरो बुट
18मुंजे सरके अपेहल यीशु नगरीऊ हखा यह्च़ी लेहकी तोहई दंङ दोबि योंहष लेहती। 19सड़को कछंङ इच्च़ा अंजीरो बुट खंड्रा दुह दोऊ कछंङ इलि, दंङ लप्तु सिवाए ऊहई छल्ले मखोकसिरंङ कुहतो, “दिऊ थलबे कनिंङ अपेहला फल लेहकी माजूंस।” दंङ अंजीर बुट दोहथर काहरचे इलि।
20दिह खंड्रीरंङ चेला तिंङ हेरानी शुई दंङ दोच़ी कुह्तोर, “दिह अंजीरो बुट दोहथर छना काहरचे इलि?” 21यीशुज़ि दोतिंङ जवाब रेह, “गेह केतंङ साते हेले कुट्रातग अगर केहच़ी विशवास लोह शक मलाहरिता, दिह ए मलेहई अंऊ दिह अंजीरो बुह्टरंङ शुहचा, पर दिह गोह बि लाह कुंई कि, पोंङषा ईला दंङ समुन्द्रङ अच़ा इला, दंङ दिह शुहचे योतो। 22दंङ प्रार्थनारिंङ छिला विशवासारंङ पेट्रोंई दुह भत्ते केतिंङ खोकसा योतो।”
यीशु अधिकारो टोईच़ी सवाल
(मरकु 11:27-33; लूको 20:1-8)
23यीशु यहुदी मंदिरंङ इलजे उपदेश रंड्री लेहकी तोहई, दंङ यहुदी मोह्ड़े पुरोहितरे ए मीहतु यहुदी सेंहणाज़ि दोऊ कछंङ इलजे रुहकातोर, “केई दिह अतु अधिकारे लहतन? कनिंङ दिह अधिकार अच़ि रांहषी ताह्तो?”
24यीशुज़ि दोतिंङ जुबाब रन्दो, “गेह ला केहतु दोरच़ी इच्च़ा सवाल रुहक्पोग; दुह अगर केहच़ी गिह्बी कंडीताह, गेह केतिंङ कम्बतो कि गेह दिह कम अतु अधिकारे लहज़ातग। 25यूहन्ना ओ बपतिस्मा अंऊच़ि तोहई? स्वर्गो दोरच़ी आ मीहतु दोहरची?” दंङ दोरे एनातु बिचंङ शासी लेह्तिरे, “अगर हेंज़ी कुणी सर्गो दोहरची, दंङ दोई कोहतो, केहच़ी दोऊ विशवास दंङ छिले मलाहतेंई? 26अगर ञेंहच़ी कुंई कि, मीहतु कुट्रिमीरंङ साते दंङ हेन्दिंङ भीड़ो बेह्द तोह, छना कुचे दोच़ी भत्ते ज़ि यूहन्नाबि भविष्यवक्ता मनाकच़ातोर।”
27दंङ दोच़ी यीशुबि जुबाब रेंहई, ञेंहच़ी माञेंनी दोई ला दोतंङ कुहतो, “गेह ला केतिंङ मा कमोग कि गेह दिह कम अतु अधिकारंङ लहज़ातग।
झुह्ट योहतु कथा
28केहच़ी दिह कथाए छि समझेक्च़ातंई? अरीआ मीहू झुह्ट योहरे तोईरे; दोई मोह्ड़े दोऊ कछंङ इलजे कुहतो, हे योह तोग दाखो बगीचारिंङ कम लोहऊ। 29दोई जुबाब रंड्रा गेह मेहग; पर थले एनोह जुबाब रंङ पछतावा शुई, दंङ दोरच़ी अच़ा इलि।
30दंङ पिता परमेश्वरे ऊईतु कछंङ इलजे ध्वांए कुट्रा, दोई जुबाब रंड्रा, बेईज़ी योग पर मेहली। 31दिकुतु बिचंङ अच़ि बाहऊ हिटी पुरे लहज़ा?” दोच़ी कुह्तोर “तुहई दोई।” यीशुज़ि दोतिंङ कुहतो, गेह केतंङ हेले कुट्रातग कि चुंगी लेहपच़ा रे ए कुकम लहज़ा केरेबे तुहई परमेश्वरो राज्यरिंङ प्रवेश लोहर। 32गेह झांह ठ्रोह दिऊ थल्जी कुट्रातग छना कुचे अपेहल यूहन्ना बपतिस्मा रंड्राज़ि केतिंङ कंड्राते कि छना धर्मिकता रंङ बंङज़िमी तोह, दंङ केहच़ी दोऊ टोईच़ी विशवास माह लहरिन पर चुंगी लेहपच़ा ए कुकम लहज़ा ज़ि बिशवास लाहतेर दंङ एनोह पापो कम ब्याड़ा लेह केहरिर; दंङ केरे दिह खंयेला माह पछताकातंई कि दोऊ विशवास लाहयंङ।
दुष्ट ज़िमदारातु कथा
(मरकु 12:1-12; लूको 20:9-19)
33“अई इच्च़ा कथा रेड्रुंई; इच्च़ा घरबारो घ्राहक तोहई, अच़ि दाखो बगीचा लगाएती, दुह बाहगो पीला हासी बाड़ लगाके च़रति दंङ दुह बगीचंङ दाखो रस हुपिमी थल्जी इच्च़ा ठहरि बणाएक्ती दंङ इच्च़ा छन ला बणाएक्ती दोहर ज़िमदारातिंङ घाह्ड़ी रेह परदेश अच़ा इलि। 34अपेहल फलो ध्याड़ा कछंङ पिचा दंङ दोई एनोह परगरा रे दोऊ फसल (फल) लेहपच़िमी थल्जी ज़िमदारातु कछंङ च़रति।
35पर ज़िमदाराज़ि दोऊ रेह परगर तेहङातोर। रेह सचे चरच़ातोर, रेहईतिंङ रघटे भाएकातोर। 36दंङ दुह मालिक तुईबे महस परगरा रे चरच़तो, दंङ दोच़ी दोतिंङ लाह ध्वांए लाहरिरे। 37थल मुखंङ दोई एनोह योह दिह चेहके चरच़ातोंई दुरेह गिऊ योहू आदर लोहर। 38पर ज़िमेदारा ज़ि योह खंऐ एनातु बिचंङ कुह्तोर दिए ता दिह ज़मीनो वारिस शुह। अतंई, हेंज़ी दी ला स्चे च़रपोंई, दंङ दिऊ हिस्सा लेहपच़े च़रपोंई। 39दंङ दोच़ी दुह च़ुमने दाखो बगीचारिंङ धकतेखा हुंज़े सचे चरच़ातोर। 40धह दाखो बगीचा ओ घ्राहक अपतो ता ज़िम्मेवारारंङ साते छि लोहतो?”
41दोच़ी यीशुबि कुह्तोर, “दोई दुह मांजी मीहरे मांजी तरीका रंङ खत्म लोहतो, दंङ दाखो बगीचा ओ ठेका ऊहई ज़िम्मेवारातिंङ रमोतो, अच़ि टेमो टोईच़ी दोबि फल रमोर।” 42यीशुज़ि कुहतो, “छि केहच़ी पवित्रशास्त्रंङ दिह माहपढ़ेकातंईया; अंऊ रघबि राजमिस्त्रीज़ि बेकार लेह केहषी ताहरेर दुहए कुंणीऊ रघ शुहचे इलि? दिह प्रभु तरफे शुहचा, दंङ हेंदु टिरातिंङ अनोखे तोह।
43दिऊ थल्जी गेह केतंङ कुट्रातग कि परमेश्वरो राज्य केहतु दोरच़ी लेहपशे झांह ठ्रोह ऊईजाति तिंङ रमोतो अच़ि रुठे परिणाम हपोतो। 44अरी दिह रघटु टोईच़ी दपोतो, दुह छटछिट शोतो, दंङ अतु टोईच़ी दुह दपोतो, दुह पीङे च़रपोतो।” 45यहुदी मोह्ड़े पुरोहित ए फरीसी मीहरे दोऊ कथा रेड्रा ञेंए इलिरे कि दोई दोतु पाहठी कुट्री लेहकी तोह। 46दंङ दोच़ी दुह च़ुमज़ि ताहरेर पर मीहतंङ बेऐ इलिरे छना कुचे दोच़ी दोबि भविष्यवक्ता मनेक्च़ातेर।
Zvasarudzwa nguva ino
मत्ती 21: LBFNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.