मत्ती 18
18
स्वर्गो राजंङ मोह्ड़े अरी?
(मरकु 9:33-37; लूको 9:46-48)
1दुह मुक्का चेलारे यीशु कछंङ अंज़े रुहक्च़ी लेहतिरे, “स्वर्गो राजंङ अरी मोह्ड़े शुह?” 2यीशुज़ि इच्च़ा कटु बि बुलाके दोतु बिचंङ खड़े लहरी। 3दंङ कुहतो, “गेह केतंङ हेले कुट्रातग अपेहल तचेक केरे कटुतु ठ्रोह मशोंई केरे स्वर्गो राजंङ पिचे मरपोंई। 4अच़िला दिह कटु ठ्रोह ऐनाबि कवचि लोहतो, दुह स्वर्गो राजंङ मोह्ड़े शोतो। 5अगर अच़िया गिऊ चेला शुहबिमी बज़ाहज़ि अरीया कटु अपनाच़ा, दंङ दोई गेह अपनाच़ा।
पाप लहज़िमी थल परीक्षा
6पर अच़िला गिऊ टोहकठे विशवास लहज़ा चाहे दुह कवचि ए शोतो अरीला मीह दोबि पापो अमो दोरच़ी लेन्ज़ा दोऊ विशवासो दोरच़ी थलका लोहतो, झांह ठ्रोह मीहबी परमेश्वरो सज़ा खोकसिरी बे रुठे तोह कि दोऊ मुथूरिंङ घहटो रघ छ़ुचे दोबि समुन्द्र छांङे च़रतु छना कुचे परमेश्वर दोबि दिह्बे बेह्द अंज़े सज़ा रमतो। 7ठोकरातु थल्जी संसाराबि धिक्कार! ठोकर ज़रुर लेह्फी; पर दुह मीहबी धिक्कार! अतु बजाहज़ि ठोकर लेहपा।
8अगर कांह गुहड़च़ि छिता कांह कोंज़े कनिंङ ठोकर खिलाचा, दंङ दुह ट्रिके छङें च़रतु टुंडे ए लट्टे शुहचे स्वर्गंङ इबी कांह थल्जी दिह्बे रूठे शोतो कि झुह्ट गुहड़ ए कोन्ज़ारंङ साते कांह योहसिमी मेहरिंङ (नरकंङ) योन। 9अगर कांह टिरे कनिंङ ठोकर रंड्रा दंङ दुह हुंज़े च़रतु; कणे शुहचे स्वर्गंङ इबी कांह थल्जी दिह्बे रूठे शोतो कि झुह्ट टिरारंङ कांह नरको मेहरिंङ योन।
योह्ंषा माऊ कथा
10खांई, केहच़ी दिहरे क्वाच़ी तु बिचंङ अतिंङ ला क्वाच़ी थचेहतुंई; छना कुचे गेह केतंङ कुट्रातग कि सर्गंङ दोतु दूतारे हमेशा गिऊ सर्गो बाहरंङ साते बंङज़ातोर। 11छना कुचे गेह मीहू योह योंहंषा दोतिंङ पेट्री अंज़े शुगाह।
12केहच़ी छि समझेक्च़ातंई कि अगर अरीआ मीहू राह मा रे शुईरे, दंङ दोतु बिचंङज़ि इच्च़ा योंहंषा यवा दंङ दोई पी निंज़ो स्सकू तिंङ छोड़ेके दंङ गोहतु टोईच़ी दुह योंहंषा त्रैंई पेट्री मेहओतो आ? 13दंङ अगर दोई खोकसा गेह केतंङ हेले कुट्रातग दुह दोरे पि निंज़ो स्सकू त्रेंईतु थल्जी अंऊ योंहंषा माहतोईरे धोंण राजी माशोह्तो अंयों दिह त्रैंइऊ थल्जी लोहतो। 14ध्वांए केहतु बाह अरी स्वर्गंङ तोह दिह हिटी माह कि दिह कवचि दीतु बिचंङज़ि इच्च़ा लाह योह्सोतो
अपराधी तु साते व्यबहार
15अगर कांह साथी न्वाज़ि कांह थल्जी गलती लाहता इला इलजे दोहरंङ गप्पा लेह समझाएतु; अगर दोई पश्चाताप लहरी ता केई केनोह साथी न्वाबि खोक्शे केहतन। 16अगर दोई माह रेड्राता इच्च़ा यताह झुह्ट मीह केनाह रंङ साते लेन्ज़ा शिला, छना कुचे मूसाऊ कानूनो हिसाबे हर इच्च़ा शिकायता बि झुह्ट छिता षुमु गवाहीतु तुईज़ी ठीक साबित शुहबी जूंस। 17अगर दोई दोतु लाह मरेड्रीरी ताह कलीसियाओ मीहतु हखा कुड़ु अगर दोई कलीसियाओ लाह मरेड्रीरी ता दोरंङ साते ध्वांए व्यावार लांई छना केहच़ी ऊई जाति ए चुंगी लेहपच़ा दोतंङ साते लोहन।
18गेह केतंङ हेले कुट्रातग छिल्ला केहच़ी धरतीरिंङ छुपोंई दुह स्वर्गंङ छुहसोतो दंङ छिल्ला धरतीरिंङ युहपोंई दुह सर्गंङ युह्प्सोतो। 19दंङ गेह केतंङ कुट्रातग अगर केहतु बिचंङज़ि झुह्ट मीहरे धरतीरिंङ छिआ गप्पो थल्जी इच्च़ा सेहम लेह पेहणी ताह दंङ दुह गिऊ बाहऊ दोरच़ी अरी स्वर्गंङ तोह दोऊ थल्जी शुहचे योतो। 20छना कुचे अंऊर झुह्ट या षुमु गिऊ मिनज़ि ठ्रोहका शोर, दोर तिंङ गेह दोतु बिचंङ शुहबी।”
निर्दयी सेवको कथा
21दंङ पतरसे कछंङ अंज़े यीशुबि कुहतो, “हे प्रभु अगर गिऊ साथी न्वाज़ि पाप लोहआ लहरिता, दंङ गेह अंयों फेरा दोबि माफ लाह्गा? छि निह्ज फेरा?” 22यीशुज़ि दोबि कुहतो, गेह कनिंङ दिह मकुट्रातग कि निह्ज फेरा, पर निह्ज फेरो षुमुनिज़ो सा गुणा तचेक कनिंङ दोबि माफ ले चरच़ि जूंस।
23“दिऊ थल्जी स्वर्गो राज दुह रज्ज़ो ठ्रोह शुह अच़ि एनोह परगरातु हिसाब लेहपच़िमी तहरे। 24अपेहल दोई हिसाब लेहपच़ी लेहती ताह इच्च़ा मीह दोऊ तुईज़ी अति साह हज़ार तोड़ो कर्ज़दार तोहई। 25पर रंड्रीमी थल्जी दोई छल्ले माहतरे, दंङ दोऊ रज्ज़ाए कुहतो, दिह ए दिऊ मेच़ा कटुरे ए छिल्ला दिऊ तोह दोऊ भत्ते लंङे च़रतुंई दंङ कर्ज़ा चुकाके च़रतुंई। 26दिरंङ दुह परगरे कोंजंङ दह्चे फ्यग लेह कुड़ी, हे रज्ज़ा, धीरज़ तोह गेह भत्तेधिर चुकाके च़रपोग। 27दंङ दुह परगरो रज्ज़ाज़ि दाह चेहके दोऊ कर्ज़ा लाह माफ लेह, दुह छोड़ेके च़रति।
28पर अपेहल दुह परगर धकतेखा हुन्ज़िरी ताह दोऊ साथी परगर दोहरी अच़ि दोऊ राह मुलतु टंगा रंड्रीमी तरेह; दोई दुह टटूरिंङ ज़ि च़ुमरी कुड़ी, अंयों ला केई गिऊ रंड्रीमी ततन दुह रेणह च़रतु।
29दिरंङ दोऊ साथी परगर कोंजंङ दह्चे दोबि मनाएच़ि लेहती कि थोड़े ध्याड़ो थल गेह भत्ते चुकाके च़रपोग। 30दुह माह मनेक्ति दंङ दुह शिल्ज़े जेलंङ केह केहरी कि अपेहल तचेक कर्ज़ा माह रंणी दोहथल तचेक दोरे बंङज़ोतो। 31दोऊ साथी परगर दिह खंड्रीरंङ साते महस दुखी शुहचे इलिरे दंङ इलजे एनातु रज्ज़ाबि भत्ते कंज़े रेंईर।
32दंङ दोऊ रज्ज़ाए एनोह दुह परगर बुलाएती अरी महस कर्ज़दार तोहई दोबि कुहतो हे मांजी परगरा का गिऊ कछंङ अंज़े क्रपच़ातेन ता गेह कांह भत्ते कर्ज़ा माफ लेह केहतग। 33दिऊ थल्जी दोऊ कर्ज़ा ला माफ लेह च़रतु छना गेह कांह टोईच़ी दाह लेह कांह कर्ज़ा माफ लेह चरच़ातग। 34दंङ दोऊ रज्ज़ाए रोहषे दुह सज़ा रंड्रातु हखा रेह च़रति कि अपेहल तचेक दोई भत्ते कर्ज़ा माह रमतो दोहथल तचेक दोतु दोहर बंङज़ोतो।
35दिऊ थल्जी केहतु बिचंङ ज़ि हर इच्चे अपेहल तचेक केन्दु साथी न्वाबि माफ मलेहई दंङ गिऊ बाह अरी स्वर्गंङ तोह केतंङ साते ला ध्वांए लोहतो।”
Zvasarudzwa nguva ino
मत्ती 18: LBFNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.