लूको 4
4
यीशु परीक्षा
(मत्ती 4:1-11; मरकु 1:12; 13)
1दंङ यीशु पवित्र आत्माज़ि परिपूर्ण शुहचे, यरदन बेंडी ज़ि यह्च़ी; दंङ पवित्र आत्मो सिखेच़िमी बजह सुनसान ठाहरीरिंङ देखा नोखा ज़ोवा लहाते; 2दंङ निन्ज़ा ध्याड़ा तचेक शेतान दोऊ परीक्षा लहज़ा लहाते। दुह ध्याड़ा रिंङ दोई छहले मा ज़हरी, दंङ अपेहल दुह ध्याड़ा रे पुरे शुहचे इलि ता दोबि योंहष लेहती। 3दंङ शेताने यीशुरंङ साते कुतोह, “अगर कांह परमेश्वरो योह शुनाह ता दीह रह्घ तिंङ कुड़ु कि रोटी बणेंक ईलांई।”
4यीशुज़ि दोबि जुबाब रेंई, “पवित्र शास्त्रारिंङ च़ेहसी तोह, मीह सिर्फ रोटी रंङ साते श्रींङी माह बंङज़तो।” 5दंङ शेतान यीशुबि रंगी ठाहरीरिंङ रेंज़ा शिली दंङ दोबि थोड़े टेमो अंद्रेग संसारो भत्ते राज कंड्रिरी। 6दंङ दोरंङ साते कुहतो, “गेह दिह भत्ते अधिकार ए, भत्ते ठाट बाठ कनिङ रामोग, छना कुचे दी भत्ते गिऊ गुहड़िंङ तोह; दंङ अतिंङ ला चेयोग दोबि रें च़रपोग। 7झांह लेह अगर केई गिह्बी फ्यग लोहन ता दीह भत्ते कनु शुहचे योतो।” 8यीशुज़ि दोबि जुबाब रेंई, “पवित्र शास्त्रारिंङ च़ेहसी तोह केई प्रभु केनोह परमेश्वरा बि फ्यग लोहू; दंङ सिर्फ दोऊ ए भक्ति लोहू।”
9दंङ दोई यीशुबि यरूशलेम शहरंङ लेंज़ा यहुदी मंदिरो पुज़ंङ खड़े लहतो, दंङ दोरंङ साते कुतोह, “अगर कांह परमेश्वरो योह शुनाह ता, केई केनाबि देरच़ी योंखा छङें साबित लोह। 10छना कुचे पवित्र शास्त्रारिंङ च़ेहसी तोह; ‘परमेश्वर कांह पाहठी स्वर्गदूतातिंङ आज्ञा रमतो, कि दोरे कांह रक्षा लोहतो।’ 11दंङ ‘दोरे कनिंङ एनोह गुहड़ रिंङ उठाएपोर, झांह शुबी माह जूंस कि कांह कोंज़ारिंङ रघटे साते घाह लेह्पोतो।’ 12यीशुज़ि दोबि जुबाब रेंई, पवित्र शास्त्रारिंङ दिह ला च़ेहसी तोह: ‘केई प्रभु केनोह परमेश्वरो परीक्षा थाह लेहप्तुंई।’” 13अपेहल शेतान भत्ते परीक्षा लेह च़रति, दंङ थोड़े टेमो थल्जी दोऊ दोरच़ी अच़ा इलि।
यीशु सेवा कमो शुरूआत
(मत्ती 4:12-17; मरकु 1:14-15; यहून्न 4:43-45)
14दोहपल यीशु पवित्र आत्मो सामर्थे पिंङषा गलील प्रदेशो हखा अति, दंङ दोऊ चर्चा देहसी नोह्सी भत्ते प्रदेशंङ फेलेके इलि। 15दंङ दुह यहुदी सभा घरबारंङ धर्मिक शिक्षा रंड्री लेहती, दंङ भत्ते दोऊ तारीफ लहज़ातेर।
नासरतंङ यीशु अनादर
16दंङ यीशु नासरत नगरंङ वापिस अति, अंऊर दोऊ भाषे-पोषण शुहते; दंङ एनोह रीतीऊ हिसाबे अरामो ध्याड़ारिंङ यहुदी सभा घरबारंङ इलजे पवित्र शास्त्रा रिंङ पढ़ेक्पिमी थल्जी खड़े शुई, 17यशायाह भविष्यवक्ताओ कताब दोबि रेंईर, दंङ दोई कताब अल्ज़े, दुह ठहरि हुंति अंऊर च़ेहसी तोहई: 18“प्रभुऊ आत्मा गिऊ टोईच़ी तोह, छना कुचे कि दोई गरीबातिंङ रूठे खबर सुनाएच़िमी थल्जी गिऊ अभिषेक लहसी शुह। दंङ गेह दिऊ थल्जी चरच़ि शुगाह कि केदीतिंङ छुटकारा ए कांणे दोतिंङ खंड्रिमी रूठे खबर सुनाएपोग, दंङ दुखी ए लचार मीहतिंङ दोतु दोरच़ी छुड़ाएपोग अच़ि दोतु टोईच़ी अत्याचार लाहतोर, 19दंङ प्रभुऊ खुश बंङज़िमी सालो प्रचार लोहग।”
20दंङ यीशुज़ि कताब बंद लेह सेवको गुहड़ रिंङ रेह च़रति, दंङ षोड़िंङ बंङज़ा इलि; दंङ यहुदी सभा घरबारंङ भत्ते मीहरे दोबि ए खंड्रा बंङज़ा तोईरे। 21दंङ यीशु दोतंङ साते कुट्री लेहती, “तोग ए दीह बचन केहतु तुईज़ी पुरे शुहचे इलि।” 22दंङ भत्तेज़ि दोबि शाबाशी रेंई, दंङ अंऊला मोह्ड़े दाह गप्पा दोऊ आहच़ि हुंच़ाते, दोतंङ साते हेरान शुहचे इलिर; दंङ कुट्री लेहतिर, “छि दीह यूसुफो योह माह शुहआ?” 23दोई दोतंङ साते कुतोह, “केहच़ी गिऊ टोईच़ी दीह कहावत ज़रुर कोहनी, कि हे लर्जे, केनाबि ठीक लोहू! छिला ञेंहच़ी रेड्री तातंई कि कफरनहूम नगरंङ केई लहसी ततन, दुह देर्तिंङ कनु इलाकारिंङ ला लोहू।” 24दंङ यीशुज़ि दोतंङ सा कुतोह, “गेह केतंङ साते हेले कुट्रातग कि अरीला भविष्यवक्ताबि एनोह देशंङ आदर माह खोकसी। 25गिऊ गप्पा रेड्रुंई। दिह हेले शुह कि दोर तिंङ महसे रंणी मेच़मीरे तोईरे, एलियाह भविष्यवक्ताओ ध्याड़ारिंङ अपेहल सढ़े षुमु साल संदा माह शुई, देर तचेक कि भत्ते इस्राएल देशंङ अकाल शुहचे इलि। 26पर एलियाह भविष्यवक्ता बि अतुला कछंङ माह च़रति, सिर्फ सीदोन शहरो कछंङ सारफतो इलाकंङ गैर यहुदी रंणीऊ कछंङ। 27दंङ एलीशा भविष्यवक्ताओ मुक्का इस्राएल देशंङ महस कोढ़ी रे तोईरे, पर नामान मिन्दु सीरिया देशो इच्च़ा गैर यहुदी बि छोड़के दोतु बिचंङज़ि ऊई अरीला शुद्ध माह लहरी।” 28दीह गप्पा रेड्रा अंऊला मीहरे यहुदी सभा घरबारंङ तोईरे दोरे भत्ते रोषेक्च़ा इलिर, 29दंङ खड़े अच़ा दोबि नगरंङ ज़ि धह्कते हुंति, दंङ दुह गोहू टोईच़ी लेन्ज़ा इलिरे अंऊर दोतु नगर बसेके तोहई कि दोबि दोरच़ी योंखा छङें सच़ी च़रपोंई। 30पर दुह दोतु बिचंङज़ि हुंच़ा अच़ा इलि।
मांजी आत्मा ग्रस्त मीहबी ठीक लहज़ी
31दंङ यीशु गलील प्रदेशो कफरनहूम नगरो हखा इलि, दंङ अरामो ध्याड़ारिंङ मीहतिंङ शिक्षा रंड्री लेहकी तोहई। 32दोर तिंङ ला मीहरेर दोऊ धर्मिक शिक्षा रंङ हेरान शुहचे इलिरे, छना कुचे दोऊ वचन अधिकारंङ साते तोहई। 33यहुदी सभा घरबारंङ इच्च़ा मीह तोहई, दोऊ अंद्रेग मांजी आत्मा तोहई। दोई मोह्ड़े सग रंङ साते हाऊष रेंई, 34“हे नासरत नगर ओ यीशु, ञेंतिंङ करंङ साते छि कम? छि केई ञेंतिंङ सच़िमी थल्जी अन्देन आ? गेह कनिंङ ञेंहच़ातग कांह अरी शुनाह? कांह परमेश्वरो पवित्र मीह शुनाह।” 35यीशुज़ि दुह मांजी आत्माबि रोषेके कुतोह, “चुपे तो! दंङ दिह मीहू दोरच़ी हुंच़ा इला” दोहपल मांजी आत्मा दोऊ अंद्रेग च़ि दोबि षोड़िंङ केहट्रा बिना नुकसान लेह हुंच़ा इलि।
36दिह खांई भत्ते मीहरे हेरान शुहचे इलि, दंङ एनातु बिचंङ गप्पा लेह कुट्री लेहतिर, “दी छना ठ्रोह बचन शुह? छना कुचे दीह ता अधिकारंङ साते मांजी आत्माबि हुकुम रंड्रते, दंङ दोरे हुंच़ा य्वातोर।” 37यीशु पाहठी दिह चर्चा भत्ते ठाहरीरिंङ फेलेके इलि।
पतरसो युह्ग ए ऊई मीहतिंङ ठीक लहज़ी
38यीशु यहुदी सभा घरबारंङ च़ि हुंच़ा पतरसो चुंङ इलि, पतरसो युह्ग बि तेज बुखार शुहचे तोहई, दंङ भत्ते मीहरे यीशुरंङ साते बिनती लहरीर दिह्बी ठीक लोहू। 39यीशुज़ि दोऊ कछंङ खड़े शुहचे बुखार रैहति दंङ बुखार अच़ा इलि, दंङ दोहथल ए दुह दोतु सेवा टहल लहज़ी लेहती। 40एके रोपिमी मुका, मीहज़ी शता-शता पाहठी बीमारीरंङ साते टेहची मीहतिंङ यीशु कछंङ रेंज़ा हतिर, दंङ यीशुज़ि दुह भत्तेतु टोहकठे गुहड़ केट्रे दोरे भत्ते ठीक लहरिर। 41दंङ मांजी आत्मा हाऊष रें दीह कुट्रा, “कि कांह परमेश्वरो योह शुनाह,” महसेतु बिचंङज़ि हुंच़ा इलि। पर यीशु दोतिंङ रेहच़ि, दंङ दोतिंङ छले ला कुट्री माह रंड्राते, छना कुचे दोरे ञेंचातेर कि यीशु ए मसीह शुह।
प्रार्थना ओ घरबार प्रचार लहज़ी
42यीशु मुंजे सरके चुंङ ज़ि हुंच़ा इच्च़ा सुनसान ठाहरिरिंङ अच़ा इलि। मीहरे दोबि पेट्रा दोऊ कछंङ अतिर, दंङ दोरंङ साते बिनती लहरिर कि दुह दोतिंङ केट्रा इबि मेस। 43पर दोई मीहतंङ साते कुतोह, “दिह ज़रूरी तोह कि गेह ऊई नगरंङ इलजे परमेश्वरो राज्यो रूठे खबर सुनाएपोग, छना कुचे गेह दिऊ ए थल्जी चरच़ि शुगाह।” 44दंङ यीशु गलील प्रदेशो यहुदी सभा घरबारंङ प्रचार लहज़ी लेहती।
Zvasarudzwa nguva ino
लूको 4: LBFNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.