लूको 2
2
यीशु जन्म
1दुह ध्याड़ारिंङ ओगुस्तुस मिन्दु रोमी महाराजा ज़ि हुकुम रन्दो कि रोमी राज्यो भत्ते मीहरे केनातु-केनातु मिन दर्ज लांई। 2दीह मुण्डो मिन दर्ज दुह टेमा शुई, अपेहल क्किरिनियुस सीरिया प्रदेशो हाकिम तोहई। 3दंङ भत्ते मीहरे मिन दर्ज लहज़िमी थल्जी एनोह-एनोह नगरो हखा इलिरे अंऊच़ि दोतु बाह-मेमेरे तोईरे।
4झांह लेह यूसुफ अरी राजा दाऊदो खानदानो तोहई, गलील प्रदेशो, नासरत नगरंङ ज़ि यहुदिया प्रदेशंङ रज्ज़ा दाऊदो नगर बेतलहम इलि। 5कि एनोह मंगेतर मरियम रंङ साते अरी खोकटुंङ तोहई मिन दर्ज लहरी। 6-7अपेहल दोरे बेतलहम शहरंङ तोईरे, दंङ दोतु थल्जी अंऊर यात्रीतु थल्जी सराय तोहई दोर तिंङ ठहरि माहखोक्सिरी। दिऊ थल्जी दोरे घ्वांण केट्रिमी ठाहरीरिंङ बंङज़ा इलिरे। अपेहल मरियमो लिहक्पिमी ध्याड़ा पुरे शुहचे इलि ता दोई दोर तिंङ एनोह मुण्डो योह बि जन्म रांई। दोई कटुबि खमज़े बिचंङ जिलज़े दंङ पोंङरिंङ केहरी, अंऊर मीहज़ी घ्वांणातु थल्जी चारा केहट्री।
स्वर्गदूतो दोरच़ी पोहाल तिंङ खबर
8दंङ दुह देशंङ थोड़े अरे पोहाल रे तोईरे, अरी रातारिंङ मैदानंङ बंङज़ा एनातु मांतू झुंडो पहरा रंड्री लेहकी तोहई। 9दंङ प्रभुऊ इच्च़ा दूत दोतु कछंङ अंज़े खड़े शुई; दंङ प्रभुऊ महिमा ऊ छंङी दोतु पिला हासी चमकेपी, दंङ दोरे महसे बेवा इलिरे। 10दंङ स्वर्गदूते दोतंङ साते कुतोह, “बेओनि थाह; छना कुचे खंणुई, गेह केतिंङ खुशी ओ रूठे खबर गप्पा कोग अंऊ भत्ते मीहतु थल्जी शोतो। 11कि तोग बेतलहमंङ अंऊ रज्ज़ा दाऊदो शहर तोह, दोर तिंङ केहतु थल्जी इच्च़ा उद्धार लहज़ा ज़ेहका, दुहए मसीह प्रभु शुह 12दिह निशानीरंङ साते केतिंङ पता लेहकी योतो कि दुह गंङकटु अरी शुह: केहच़ी दुह कटुबि खम्ज़ो अंद्रेग ज़िल्ज़ी दंङ पोंङरिंङ षोड़िंङ बंङज़ी तंङफोनी।”
13दंङ अचानक दुह स्वर्गदूता रंङ साते स्वर्गदूतो मंडलीबि परमेश्वरो स्तुति लहज़ा ए दी कुट्री तंङरीरे, 14“स्वर्गंङ परमेश्वरो महिमा दंङ धरतीऊ टोईच़ी दुह मीहतु बिचंङ अतु दोरच़ी दुह खुश तोह, शांति शोतो।”
15अपेहल स्वर्गदूतारे दोतु दोरच़ी स्वर्गो हखा अच़ा इलि, ता पोहालरे एनातु बिचंङ कुट्री लेहतिर, “अतंई, ञेंहरे बेतलहम शहरो हखा इलजे दीह गप्पा अंऊ शुहचे तोह, दंङ छना प्रभुज़ि ञेंतिंङ कांहषी ततो, खमोंई।” 16दंङ दोच़ी युरनाह इलजे मरियम ए यूसुफाबि दंङ पोंङारिंङ दुह कटु षोड़िंङ केहशी तंङरिर। 17दोतिंङ खंड्रिमी थल दोच़ी दुह गप्पा अंऊ कटु पाहठी स्वर्गदूताज़ि कांहषी तातेर, प्रगट लहरी, 18पोहाल तु भत्ते गप्पा थक्शातेर भत्ते मीहरे हेरान शुहचे इलिर अंऊर दोहर तोईरे। 19पर मरियम दिह भत्ते गप्पा एनोह सेहमरिंङ केट्रे सोचेके लेहती। 20दंङ पोहालरे छना स्वर्गदूताज़ि दोतिंङ गंङकटुऊ पाहठी कांहषी तरेर, ध्वांए ए भत्ते रेड्रा ए खंड्रा परमेश्वरो महिमा ए स्तुति लहज़ा अच़ा इलिर।
यीशु मिन केहट्री
21दुह कटु यीशु जन्मो थल रेह ध्याड़ो थल दोऊ खतना ओ ध्याड़ा अति, ता दोऊ मिन यीशु केरिर, दिह मिन स्वर्गदूतो दोरच़ी, दोऊ खोकटुंङ अन्जी बे तुई रांहषी तरेर।
मंदिरंङ यीशु अर्पण लहज़ी
22-24अपेहल मूसाऊ कानूनो हिसाबे मरियम शुद्ध शुहबिमी ध्याड़ा योह्सा इलजी तोहई, मरियम ए यूसुफ ए यरूशलेम शहरो यहुदी मंदिरंङ इलिरे। दोहर दोरे कटु बि अर्पण लेह इलजी तोईरे अंऊर दोच़ी दोर तिंङ झुह्ट कबूतरो कटुतु बलि चढ़ाएच़िमी थल्जी इलिरे दुह प्रभुऊ कानून मनेक्च़िमी थल्जी तोहई। दोरे यीशुरंङ साते यरूशलेम शहरंङ ला इलिर कि दोबि प्रभुऊ तुईज़ी हपोंई छना कुचे प्रभुऊ कानूना अंद्रेग दि ला च़ेहसी तोहई कि; “हर इच्च़ा मोह्ड़े योह प्रभुऊ थल्जी शत्ह लेह जूंस।”
शमौनो गीत
25दुह टेमारिंङ यरूशलेम शहरारिंङ शमौन मिन्दु इच्च़ा मीह तोहई, दंङ दुह मीह धर्मी ए भक्त तोहई; दंङ दुह बेसब्र सुचे मसीहू अपिमी थल्जी रुमज़ा तोहई कि दुह अपतो दंङ इस्राएलो मीहतिंङ शांति रमतो, दंङ पवित्र आत्मा दोरंङ साते तोहई। 26पवित्र आत्माज़ि दोबि कंड्रिरी, कि सिमी बे तुई दोई प्रभु मसीह बि खमतो। 27दंङ दुह ध्याड़ारिंङ पवित्र आत्माओ अगुवाई दोरच़ी दुह यहुदी मंदिरंङ अति; दंङ अपेहल याह बाह दुह गंङकटु यीशुबि अंद्रेग हति, कि दोऊ थल्जी कानूनो हिसाबे लोहर, 28दंङ शमौने गंङकटु यीशुबि टुड़िङ लहरी दंङ परमेश्वरो धन्यवाद लेह कुतोह: 29“हे प्रभु, दाह गिह्बी केनोह दासबि केनोह वाईदाओ हिसाबे शांति रंङ साते सीए इबि रोंहू; 30गेह दुह उद्धार लहच़ाबि तंङे च़रतग अच़ि केई भत्ते मीहतिंङ बचाएच़िमी थल्जी चरच़ातन। 31अतिंङ केई भत्ते देशो मीहतु थल्जी तेयार लहसी तातन, 32कि दुह ऊईजाति तिंङ सच्चाई कंड्रिमी थल्जी परमेश्वरा बि प्रगट लहज़ा छंङी शुह, दंङ कनु एनोह प्रजा इस्राएलो थल्जी महिमा शोतो।”
33दंङ यीशु याह ए बाह दीह गप्पारे अंऊ शमौने यीशु पाहठी कुहते दुह रेड्रा दोरे हेरान शुहचे इलि। 34दंङ शमौने दोतिंङ आशीष रेह, दोऊ याह मरियम रंङ साते कुतोह, “खंणु, दिह ता इस्राएल शहरंङ महस मीहतु उद्धार ए नाश शुहबिमी बजह शोतो, दंङ दिह इच्च़ा चेतावनीऊ निशानी ठ्रोह शोतो, अतु खिलाप मीहरेर गप्पा लोहर। 35कि महसो सेमो गप्पा प्रगट शोतो। इच्च़ा महस मोह्ड़े दुख तलवारो ठ्रोह कांह प्राण देच़ि-नोच़ी तिरच़ी च़रपोतो।”
युहन्नाओ गवाही
36दंङ आशेरो खानदानो बिचंङ हन्ना मिन्दु फनुएलो मियो इच्च़ा भविष्यवक्तिन तोहई: दुह महसे ए यंङषी तोहई, दंङ ब्याह शुहचे थल निज़ी साल एनोह गगसा रंङ साते तोहई। 37दुह निहज़ो पि साल बेहच़ी रंणी तोहई, दंङ यहुदी मंदिरंङ बंङज़ा ब्रत ए प्रार्थना लहज़ा मुंजे ए ञोंकोल अराधना लहज़ाते। 38दंङ दुहए मुका दोहर अंज़े प्रभुऊ धन्यवाद लहज़ी लेहती, दंङ दोरे भत्ते यरूशलेम शहरो मीहतिंङ छुड़ाएच़िमी थल्जी मसीहबि च़रच़िमी थल्जी परमेश्वर ओ इंतज़ार लहज़ातेर, दोऊ पाहठी गप्पा लहज़ी लेहकी तोहई।
नासरत हखा वापिस इबी
39दंङ अपेहल यूसुफ ए मरियम प्रभुऊ कानूनो हिसाबे भत्ते धिर पूरा लेह च़रति ता गलील प्रदेशंङ एनोह बाह-मेमेतु नगर नासरतंङ अच़ा इलिरे। 40दंङ गंङकटु मोह्ड़े ए बलवान दंङ बुद्धि रंङ साते परिपूर्ण शुहबी लेहती, दंङ परमेश्वरो दया दोऊ टोईच़ी तोहई।
कटु यीशु मंदिरंङ
41यीशु याह बाह हर साल फसह त्याहरो मुका यरूशलेम शहरंङ इवा लाहतेर। 42अपेहल यीशु सनी सालो शुई, ता दोरे त्याहरो रीतीऊ हिसाबे यरूशलेम शहरो हखा इलिरे। 43अपेहल मरियम ए यूसुफ दोरे ध्याड़ारे पूरे लहज़ा यह्च़ी लेहतिर, ता गंङकटु यीशु यरूशलेम शहरंङ ए बंङज़ा इलि; दंङ दीह गप्पाऊ पाहठी दोऊ याह बाहबि पता माह तोहई। 44दोरे दी ञेंह कि दुह ऊई यात्रीतिंङ साते शोतो, इच्च़ा ध्याड़ा योह्सा इलि; दंङ दोबि एनोह नातिऊ तु ए जान पहचानो मीहतु बिचंङ पेट्री लेहतिर। 45अपेहल दुह माह खोकसी सा ता दोबि पेट्रा-पेट्रा यरूशलेम शहरंङ वापिस अच़ा अतिरे, 46दंङ षुमु ध्याड़ो थल दोच़ी यीशुबि यहुदी मंदिरो ल्वाड़िंङ शिक्षा रंड्रा दोतु बिचंङ रेड्री ए सवाल रुहक्ती तंङरिर। 47अंयों दोऊ गप्पा रेड्री लेहकी तोईरे, दोरे भत्ते दोऊ समझदारी साते दंङ दोऊ जुबाब रंङ साते हेरान तोईरे। 48दंङ दोऊ याह बाह दोबि खांई हेरान शुहचे इलि दंङ दोऊ याहज़ि दोरंङ साते कुतोह, “हे कटु केई ञेंतंङ साते झांह छिले लहतेन? खंणु, कनु बाह ए गेह चिंदरंङ साते कनिंङ पेट्री लेहकी तोईरे?” 49दोई दोतंङ साते कुतोह, “केहच़ी गिह्बी छिले पेट्रातंई? छि केहच़ी माञेंनी कि गिह्बी गिऊ बाहों मन्दिरंङ बंङज़ी ज़रूरी तोह?” 50पर मरियम ए यूसुफाबि दोऊ गप्पाओ मतलब समझ माह अति।
51दंङ यीशु दोतंङ साते इलि, दंङ नासरत नगरंङ अति दंङ दोतु वशा रिंङ बंङज़िरी; दंङ दोऊ याहज़ि दिह भत्ते गप्पारे एनोह सेहमरिंङ तहरि। 52दंङ यीशु बुद्धि रंङ ए डिल डोलङ दंङ परमेश्वरो ए मीहतु दया रंङ मोह्ड़े शुई।
Zvasarudzwa nguva ino
लूको 2: LBFNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.