मत्ती 22
22
बेहा-भोजको कहानी
(लूक. 14:15-24)
1जाके बारेमे येशू फिरसे बिनसे कहानीमे कही: 2स्वर्गको राज्य बो राजाके समान हए, जौन अपनो लौंणाको बेहा तयार करी, 3और निउतोमे आदमीके बुलान अपन नोकरके पठाइ, पर बे आन मन नाए करीं।
4फिर बो नोकरके अइसे कहिके पठाइ, “निउतो दएभए आदमीनसे कहाओ: देखओ, मए भोज तयार करो हओं, और मए मिर बक्रा और पलेभए भेंणा मारे हओं, और सब चीज तयार हए; बेहाको भोजमे आबओ।”
5पर बे नाएदेखे जैसो करीं और कोइ अपनो खेत घेन, और कोइ दुस्रो ब्यपार घेन चलेगए। 6और दुस्रे आदमी बक बचेभए नोकरनके पकणके बिनके दुरव्यहार करीं और बिनके मारडारीं। 7तओ राजा जा सुनके दिक्कसे चूर हुइगओ, और बो अपनो सेननके पठाएके बे हत्यारनके नाश करी, और बिनको सहर आगीसे जलाए दइ।
8तओ बो अपन नोकरसे कही, “बेहाको भोज त तयार हए, पर निउतो दएगए आदमी आनको योग्य नाए भए। 9जहेमारे तुम हर ठिहामे जाओ, और जित्तो आदमी तुमके मिलएं, सबके बेहाको-भोजमे बुलाओ।” 10तओ, बे नोकर सब ठिहामे गए, और भेँटा भए सबके खराब और असल, जित्तो मिले, सबके इकट्ठा करीं। और बेहा बारो घरमे पहुननसे भरीगओ।
11जब राजा पहुनाके देखन करके भितरसे आओ; तओ राजा हुवाँ एक आदमीके देखी, जौन बेहाको कुर्ता नाए लगाए रहए। 12बोसे राजा पुछी, “सँगी, बेहामे लागन बारो कुर्ता नाए पैँधके तए हियाँ काहे आइगओ?” और बो आदमी चुप हुइगओ।
13तओ राजा नोकरनसे कही, “बोके हात-टाँग बाँधके बोके बाहिर अन्धकारमे डारदेओ, जहाँ आदमी रुइहएं और दाँत किटकिटए हएं।” 14काहेकी बुलाए भए बहुत हएं, पर चुनेभए थोरी हएं।
परमेश्वर और कैसरके कर देनो
(मर्क. 12:13-17; लूक. 20:20-26)
15तओ फरिसीनको समुह जाएके येशूके बातमे बाके कैसे फसामएं करके सल्लाह करन लागे। 16बे अपन चेलनके, हेरोदी दलके आदमीनके सँग येशूके ठिन पठाइं। बे कहीं, “ए महान गुरु, हम जानत हएं, तुम सत्य हओ, और परमेश्वरको डगर सच्चो हए करके तुम सिखात हओ, और तुम कोइसे नाए डरात हओ, काहेकी तुम आदमीके मुँहुँ देखके काम नाए करत हओ। 17जहेमारे हमके बताओ, रोमको महाराजा कैसरके कर तिरन ठिक हए कि नाए?”
18तओ येशू बिनको चतुरयाइ पता पाएके कही, “कपटी तुम मोके काहे जाँचत हओ? 19कर तिरन बारो सिक्का मोके दिखाओ।” और बे बाके ठिन एक सिक्का ल्याइं। 20बा बिनसे कही, “जा फोटु कौनको हए, और कौनको नाउँ लिखो हए?” 21बे बासे कहीं, “रोमको महाराजा कैसरको।” तओ बा बिनसे कही, “जहेमारे जो रोमको महाराजाको हए, बे रोमको महाराजाके देओ, और जो परमेश्वरको हए बो परमेश्वरके देओ।” 22जा सुनके बे अचम्मो मानी, और बाके छोडके गैभए।
पुनरुत्थान और बेहा
(मर्क. 12:18-27; लूक. 20:27-40)
23मरके जिन्दा नाए होत हएं कहीके कहान बारे सदुकीनको समुह बो दिन बाके ठिन आए, और बे बासे जा प्रश्न करीं, 24“महान गुरु, मोशा त कही रहए कि, अगर कोइ आदमी बिना सन्तान हुइके मरजएहए तओ बोको ददाको सन्तान खडा करए। 25हमर बीचमे सात ददाभइया रहएं। बडो बेहा करके बो मरिगओ, और सन्तान नाए होनके कारण अपनी बैयरके अपन भइयाके ताहीं छोडीगओ। 26अइसियए करके मझला और सझला फिर और सातौ जनै उइसी करीं। 27जब बे सब मरीगए तओपिच्छु बो बैयर फिर मरिगै। 28अगर बे सबए मरके फिरसे जिन्दा हुइजएहएं, तओ बे सात जनै मैसे कौनकी बैयर हुइहए? काहेकी बो सबकी बैयर हुइडारी रहए।” 29येशू बिनके जबाफ दइके कही, “तुम भ्रममे पणेहओ, काहेकी तुम पबित्र-शास्त्र और परमेश्वरको महान शक्ति नाए जानत हओ। 30काहेकी मरके जिन्दा हुइके आदमीनको बेहा होतए नाएहए। नए बेहा करत हएं, पर बे स्वर्गमे स्वर्गदूत जैसे होत हएं। 31पर मरके जिन्दा होनके बारेमे परमेश्वर तुमसे का कही हए, का तुम बो नाए पढे हओ?
32‘मए अब्राहामको परमेश्वर, इसहाकको परमेश्वर और याकूबको परमेश्वर हओं।’ परमेश्वर मरेभएनको परमेश्वर नाए हए, पर जिन्दनको परमेश्वर हए।”
33जा सुनके भिड बाको शिक्षामे अचम्मो मनि।
सबसे बडो आज्ञा
(मर्क. 12:28-34; लूक. 10:25-28)
34बा सदुकीनको समुहके चुप करदइ करके सुनके, फरिसीनको समुह बाके ठिन आए। 35बिन मैसे एक जनै नियम कानुन सिखान बारो बाको परीक्षा करनके बिचारसे बासे पुछी, 36“महान गुरु, मोशाको नियम कानुनमे बडो आज्ञा कौनछो हए?”
37बा बिनसे कही,
“तुम परमप्रभु अपन परमेश्वरके अपन सारा ह्रदयसे, और अपन सारा प्राणसे, और अपन सारा समझसे येशू हानी प्रेम करीयओ।
38महान और पहिलो आज्ञा जहेहए। 39दुस्रो फिर उइसी हए,
‘तुम अपन परोसीके अपनए कता प्रेम करीयओ।’
40सारा मोशाको नियम कानुन और अगमबक्ताको शिक्षाको आधार जे दुई आज्ञा हएं।”
ख्रीष्ट कौनको लौंणा हए?
(मर्क. 12:35-37; लूक. 20:41-44)
41जब फरिसीनको समुह इकट्ठा भए रहएं, तओ येशू बिनसे एक प्रश्न करी, 42“ख्रीष्टके बारेमे तुम का कहात हओ? बा कौनको लौंणा हए?” बे बासे कहीं, “दाऊदको लौंणा।” 43बा बिनसे कही, “उइसो हए तओ कैसे दाऊद आत्मामे प्रेरणा पाएके बासे प्रभु कहिके पुकारत हए? बो कहात हए,
44‘परमप्रभु मिर प्रभुसे कही,
तुम मिर दहिने हात घेन बैठओ जब तक मए तुमर शत्रुके तुमर टाँगके पाउँ तरे नाए धरहओं।’
45अगर दाऊद बासे प्रभु कहात हए तओ, बो कैसे बाको लौंणा हुइहए?” 46और कोइ फिर बाको जबाफमे एक बचन फिर नाए बोलपाइ। बो दिनसे कोइ बासे प्रश्न पुछनके कोसिस नाए करी।
Zvasarudzwa nguva ino
मत्ती 22: THRNT
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Rana Tharu Bible (राना थारु) by The Love Fellowship is licensed under Creative Commons Attribution-ShareAlike 4.0 License.