Ruka 21
21
Jesu anorumbidza chipo chechirikadzi
(Mako 12:41–44)
1Zvino akati achitarira, akaona vapfumi vachiisa zvipo zvavo muchivigiro chemari. 2Akaona imwe chirikadzi, yaiva murombo, achiisamo tumari tuviri tuduku. 3Akati, “Zvirokwazvo ndinoti kwamuri, chirikadzi iyi, iri murombo, yakaisa kupfuura vamwe vose; 4nokuti avo vose vakaisa zvipo, vachitora pazvizhinji zvavainazvo, asi uyu akaisa, achitora pakushayiwa kwake, zvaaifanira kurarama nazvo, zvose zvaakanga anazvo.”
Jesu anoporofita kuputswa kweJerusaremu nokudzoka kwake
(Mat 24:1, 2; Mako 13:1, 2)
5Zvino vamwe vakati vachitaura pamusoro petemberi, kuti yakanga yakashongedzwa namabwe akanaka nezvipo, iye akati, 6“Kana zviri izvi zvamunoona, mazuva achasvika, asingazoregwi ibwe pamusoro pebwe, risingazowisirwi pasi.”
7Zvino vakamubvunza, vachiti, “Mudzidzisi, izvozvi zvichagova rinhiko? Nechiratidzo chichava chipi, kana izvozvi zvoda kuitwa?”
8Akati, “Chenjerai, kuti murege kutsauswa; nokuti vazhinji vachauya nezita rangu, vachiti, ‘Ndini Kristu’; ‘Nguva yaswedera.’ Musavatevera.
9“Kana muchinzwa zvokurwa, nenyonganiso, musavhunduka henyu, nokuti izvozvi zvinofanira kumboitwa; asi kuguma hakusi pakarepo.”
10Akati kwavari, “Rudzi rumwe ruchamukira rumwe rudzi, noushe humwe huchamukira humwe ushe. 11Kudengenyeka kukuru kwenyika kuchavapo, nokune dzimwe nzvimbo nzara nehosha, nezvinotyisa, uye zviratidzo zvikuru, zvichabva kudenga, zvichavapo. 12Asi izvozvi zvose zvisati zvasvika, vachakubatai, nokukutambudzai, vachikuisai kumasinagoge nomumatorongo, nokukuisai pamberi pamadzimambo namadzishe, nokuda kwezita rangu. 13Ichi chichava chapupu kwamuri. 14Naizvozvo simbai mumwoyo menyu, kuti murege kumbofungisisa pamuchapindura napo. 15Nokuti ndichakupai muromo nokuchenjera, kuchakonesa vavengi venyu vose kukukundai nokuramba zvamunoreva. 16Muchaiswa kuvatongi kunyangwe navabereki, navanun'una, nehama, neshamwari; vamwe venyu vachaurayiwa. 17Muchavengwa navanhu vose nokuda kwezita rangu.
18“Asi ruvhudzi rumwe rwomusoro wenyu harungarasiki. 19Nokutsungirira kwenyu muchawana upenyu hwenyu.
20“Zvino kana muchiona Jerusaremu rakombwa nehondo, zivai kuti roda kuparadzwa. 21Musi uyo vari muJudhiya ngavatizire kumakomo; navari mukati maro ngavabude; navari kuruwa ngavarege kupindamo. 22Nokuti iwayo ndiwo mazuva okutsiva, kuti zvose zvakanyorwa zviitike. 23Asi vachava nenhamo vane pamuviri navanoyamwisa namazuva iwayo, nokuti kutambudzika kukuru kuchavapo panyika, nokutsamwa pamusoro pavanhu ivavo. 24Vachaparadzwa nomunondo, nokutapwa kumarudzi ose; Jerusaremu richatsikwa navahedheni, kusvikira nguva dzavahedheni dzazadzika.
25“Zviratidzo zvichavapo pazuva napamwedzi, napanyenyedzi; napanyika hurombo hwavanhu, vachikanganiswa nokutinhira kwegungwa namafungu; 26vanhu vachapera nokutya nokutarira zvinowira nyika; nokuti masimba okudenga achadengenyeka. 27Ipapo vachaona Mwanakomana womunhu achiuya negore, nesimba nokubwinya kukuru. 28Asi kana izvozvi zvichitanga kuitika, tarirai kumusoro, musimudze misoro yenyu, nokuti kusunungurwa kwenyu kwaswedera.”
29Zvino akavataurira mufananidzo, achiti, “Tarirai muonde nemiti yose. 30Kana yotunga, mukazviona, munoziva kuti zvino zhizha rava padyo.
31“Saizvozvo, nemiwo, kana moona izvozvo zvoitwa, zivai kuti ushe hwaMwari hwava padyo.
32“Zvirokwazvo, ndinoti kwamuri, rudzi urwu harungatongopfuuri, kusvikira zvose zvaitika. 33Denga nenyika zvichapfuura, asi mashoko angu haangatongopfuuri.
34“Chenjerai, kuti mwoyo yenyu irege kuremedzwa nokudyisa nokuraradza, nokufunganya pamusoro pezvinhu zvoupenyu huno, kuti zuva iro rirege kukuwirai seriva. 35Nokuti richawira vose vagere panyika yose. 36Asi rindai nenguva dzose, mukumbire, kuti mugone kupukunyuka pazvinhu izvi zvose zvinozoitwa, mugomira pamberi poMwanakomana womunhu.”
37Zvino aidzidzisa masikati mutemberi, asi usiku aibuda, akandovata mugomo rinonzi reMiorivhi. 38Vanhu vose vakauya kwaari mutemberi mangwanani, kuzomunzwa.
Zvasarudzwa nguva ino
Ruka 21: SUB
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Shona Union Bible © Bible Society of Zimbabwe, 2002.