Johani 4
4
Jesu nomukadzi weSamaria
1Zvino Ishe akati aziva kuti VaFarisi vakanga vanzwa kuti Jesu akaita nokubhabhatidza vadzidzi kupfuura Johani, 2kunyangwe Jesu akanga asingabhabhatidzi amene, asi vadzidzi vake, 3akabva Judhiya, akaendazve Gareriya. 4Akanga achifanira kupfuura neSamaria.
5Zvino akasvika paguta reSamaria, rainzi Sikari, pedyo nemunda wakanga wapa Jakobho mwanakomana wake Josefa.
6Tsime raJakobho rakanga riripo. Zvino Jesu aneta nokufamba, ndokungogara zvake patsime. Yaiva nguva inenge yechitanhatu. 7Zvino mumwe mukadzi weSamaria akasvikapo kuzochera mvura. Jesu akati kwaari, “Ndipeiwo, ndinwe.” 8Nokuti vadzidzi vake vakanga vaenda muguta kundotenga zvokudya.
9Ipapo mukadzi muSamaria akati kwaari, “Ko iwe muJudha, unokumbira seiko kwandiri kunwa, ini mukadzi muSamaria?” (Nokuti vaJudha havafambidzani navaSamaria).
10Jesu akapindura, akati kwaari, “Dai waiziva chipo chaMwari, uye kuti ndiani anoti kwauri, ndipeiwo ndinwe, ungadai waikumbira kwaari, akakupa mvura mhenyu.”
11Mukadzi akati kwaari, “Ishe, hamuna chamungachera nacho, tsime rakadzika, zvino mvura mhenyu mungaiwanepiko? 12Ko muri mukuru kuna Baba vedu Jakobho, vakatipa tsime iri, vakanwa pariri vamene navanakomana vavo nezvipfuwo zvavo?”
13Jesu akapindura, akati kwaari, “Mumwe nomumwe, anonwa mvura iyi, achava nenyotazve. 14Asi ani naani, anonwa mvura yandichamupa ini, haachazovi nenyota nokusingaperi; asi mvura, yandichamupa, ichava mukati make tsime remvura, inovhaira kuupenyu husingaperi.”
15Mukadzi akati kwaari, “Ishe, ndipei mvura iyi, kuti ndirege kuzova nenyota, kana kuuya kuchera pano.”
16Jesu akati kwaari, “Enda, undodana murume wako, ugouya pano.”
17Mukadzi akapindura, akati kwaari, “Handina murume.” Jesu akati kwaari, “Wareva zvakanaka, zvawati, ‘Handina murume.’
18“Nokuti watova navarume vashanu; uyo waunaye zvino, haasi murume wako; apo wareva chokwadi.”
19Mukadzi akati kwaari, “Ishe, ndinoona kuti muri muporofita. 20Madzibaba edu ainamata pagomo iri; imi munoti muJerusaremu ndimo munofanira kunamatwa.”
21Jesu akati kwaari, “Mai, nditende kuti nguva inouya, yamusingazonamati Baba pagomo iri, kana muJerusaremu. 22Imi munonamata chamusingazivi; isu tinonamata chatinoziva, nokuti ruponeso runobva kuvaJudha. 23Asi nguva inouya, nazvino yatovapo, yokuti vanonamata nechokwadi vachanamata Baba mumweya nechokwadi; nokuti Baba vanotsvaka vakadaro kuzomunamata.
24“Mwari ndiMweya; vanomunamata, vanofanira kumunamata mumweya nechokwadi.”
25Zvino mukadzi akati kwaari, “Ndinoziva kuti Mesiasi anouya, anonzi Kristu; kana iye asvika, uchatiudza zvose.” 26Jesu akati kwaari, “Ini, ndinotaura newe, ndini iye.”
27Zvino vadzidzi vake vakasvika, vakashamiswa vachiona kuti anotaurirana nomukadzi; kunyangwe zvakadaro hakuna mumwe akati, “Munotsvakeiko kwaari?” Kana, “Munotaurireiko naye?”
28Ipapo mukadzi akasiya chirongo chake, akaenda muguta, akati kuvanhu, 29“Uyai muone munhu, akandiudza zvose zvandakaita. Ko uyu handiti ndiye Kristu here?”
30Vakabuda muguta, vakaenda kwaari. 31Nenguva iyo vadzidzi vake vakafanomunyengetera, vachiti, “Rabhi, chidyai.”
32Iye akati kwavari, “Ini ndine zvokudya, zvandinodya, zvamusingazivi.”
33Zvino vadzidzi vakataurirana, vachiti, “Kasi mumwe amuvigira zvokudya kanhi?”
34Jesu akati kwavari, “Zvokudya zvangu ndizvo, kuti ndiite kuda kwoakandituma, nokupedza basa rake. 35Ko imi hamuti, ‘Kwasara mwedzi mina, kukohwa kwasvika?’ Tarirai, ini ndinoti kwamuri, simudzai meso enyu, onai minda, kuti yatochena kuti ikohwiwe. 36Anocheka anopiwa mubairo, anounganidza mbesanwa muupenyu husingaperi; kuti anokusha naanocheka vafare vose. 37Nokuti tsumo ndeyechokwadi, inoti, ‘Mumwe anokusha, mumwe achikohwa.’ 38Ndakakutumai kundokohwa zvamusina kubindukira; vamwe vakabindukira, zvino imi mapinda pane zvavakabindukira ivo.”
39Zvino vaSamaria vazhinji veguta iro vakatenda kwaari neshoko romukadzi, akapupura, achiti, “Andiudza zvose zvandakaita.”
40Zvino vaSamaria vakati vachisvika kwaari, vakamunyengetera kuti agare navo; akagarapo mazuva maviri.
41Navamwe vazhinji vakatenda neshoko rake. 42Vakati kumukadzi, “Hatichatendi nokureva kwako; tazvinzwira timene, tinoziva kuti uye ndiye Muponesi wapasi pose.”
43Mazuva maviri akati apfuura, akabvapo; akaenda Gareriya. 44Nokuti Jesu amene akapupura, kuti muporofita haakudzwi munyika yake. 45Zvino akati achisvika Gareriya, vaGareriya vakamugamuchira, nokuti vakanga vaona zvose zvaakaita Jerusaremu pamutambo wePasika, nokuti naivo vakanga vaendawo kumutambo wePasika.
Jesu anoporesa mwanakomana wegurukota
46Zvino Jesu akasvikazve paKana yeGareriya, paakanga ashandura mvura ikaita waini. Ipapo pakanga panorimwe gurukota raishe, mwanakomana wake akanga achirwara paKapenaume.
47Iye akati achinzwa kuti Jesu abva Judhiya, asvika Gareriya, akaenda kwaari, akamunyengetera kuti aburuke kundoporesa mwanakomana wake; nokuti akanga achitandadza. 48Zvino Jesu akati kwaari, “Kana musingaoni zviratidzo nezvishamiso, hamungatongotendi.”
49Gurukota raishe rakati kwaari, “Ishe, burukai henyu, mwana wangu asati afa.”
50Jesu akati kwaari, “Enda hako, mwanakomana wako mupenyu.” Munhu uyu akatenda shoko rakarehwa naJesu kwaari, akaenda. 51Akati achaburuka, varanda vake vakasangana naye, vakati, “Mwana wenyu mupenyu.”
52Zvino akavabvunza nguva yaakatanga kunaya nayo. Vakati kwaari, “Zuro nenguva yechinomwe fivha yakabva kwaari.” 53Zvino Baba vakaziva kuti ndiyo nguva Jesu yaakati kwaari, “Mwanakomana wako mupenyu.” Iye akatenda nemhuri yake yose.
54Ichi ndicho chiratidzo chechipiri chakaitwa naJesu, abva Judhiya, asvika Gareriya.
Zvasarudzwa nguva ino
Johani 4: SUB
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
Shona Union Bible © Bible Society of Zimbabwe, 2002.