मर्कुस 15
15
येसु पिलातसक आघु
(मति २७:१-२,११-२६; लुका २३:१-५,१३-२५; युहन्ना १८:२८—१९:१६)
1कालुपल्ट बेहेनिहिँ मुक्खे पुजेहेरिसब, धर्मगुरुसब, अगुवासब र बड्क सभाक अरु सदस्सेसब एक-आपसयँ सल्लाहा करिकुन येसुके बाधिकुन, बड्क हाकिम पिलातसकलघि सोपदेल। 2हसे पिलातसेइ येसुके पुछ्ल, “किति तोइ यहुदिसब्क राजा हखस?”
ओनेनेइ जबाफ देइकेभइल, “तोहे नइ ओस्न कहते बाटउ।”
3मुक्खे पुजेहेरिसबेइ येसुके धेरइ कुराक दोस लागाल। 4उहइगुनेइ पिलातसेइ ओनेन्के फेरि पुछ्ल, “तेह्रासे केहाउ जबाफ नइजे से? चाहुक् त, उसबेइ तेर बिरोधयँ कत्का दोस लागातिन् बाटत।”
5तर येसुइ केहाउ पुनु जबाफ नइजेदेइकेभइल। इसे देखिकुन पिलातस छक्कइ पोर्ल।
6निस्तार पाब्निक बेलायँ मानुससबेइ माङ्ल झेलखानायँ पोर्ल एक जेना कइदिके पिलातसेइ उसब्क लागि छाड्ते रहत। 7हुलदङ्गाक बेलायँ हत्या कर्लाहार हत्यारासब्के झेलखानायँ थुन्ल रहइ। उसबमद्धे बारब्बा नाउक मानुस पुनु उछिका रहइ। 8उहइगुनेइ भिड आइकुन पिलातसक चलनअनुसार पइलाक जस्नइ इसे साल पुनु कइदिके छाडिदेओ कइकुन बिन्ति करिके लाग्ल। 9हसे पिलातसेइ उसब्के पुछ्ल, “किति मोइ यहुदिसब्क राजाके तेउह्रसब्क लागि छाड्देउ?” 10किकेकने मुक्खे पुजेहेरिसब डाडेइ भोरिकुन येसुके उक्रलघि सोपदेल हखइ कइकुन पिलातसके थाहा रहइ।
11तर मुक्खे पुजेहेरिसबेइ उसब्क लागि येसुके नइजे, बारब्बाके नइ छाडिदेओ कइकुन भिडके सुरेल। 12पिलातसेइ उसब्के फेरि पुछ्ल, “ओसेकने तोहेसब जोख्राके यहुदिसब्क राजा कताहाउ, उख्राके चाहिँ मोइ किति करिके?”
13उसबेइ फेरि चिच्चेतिन् कहल, “उख्राके क्रुसयँ झुन्डाओ।”
14पिलातसेइ उसब्के कहल, “किके? इहाइ किति अपराध कर्ल बाटइ से?”
उसबेइ झन बड्क सोरेइ चिच्चेतिन् कहल, “उख्राके क्रुसयँ झुन्डेइके पोरित, झुन्डेइके पोरित।”
15हसे पिलातसेइ भिडके खुसि पार्लाहार इच्छाइ बारब्बाके छाड्देल, र येसुके चाहिँ कोर्रा लागाइकुन क्रुसयँ झुन्डेइके सिपाहिसब्के जिम्मा लागाल।
सिपाहिसबेइ येसुके खिसि कर्ल
(मति २७:२७-३१; युहन्ना १९:२-३)
16येसुके सिपाहिसबेइ दरबारयँ लेज्ल, जोनो चाहिँ पिलातसक प्रेटोरियन रहइ। हसे सभइ पल्टनसब्के पुनु बोलाइकुन जम्मा कार्ल। 17हसे उसबेइ येसुके राजाइ लागालाहार जस्नइ बइजनि रङक लुगा लागाइदेल, र काटोक सिर्पेच बानाइकुन ओनेन्क मुडयँ लागाइदेल, 18उपाछु उसबेइ, “यहुदिसब्क राजाक जय भउस्!” कहतिन् ओनेन्क खिसि कर्ल। 19हसे उसबेइ ओनेन्क मुडयँ लउह्रिइ ठोक्ल, थुथेल र ठेउनो धसिकुन ओनेन्के सेवा लाउलजस्न नाटक पार्ल। 20यस्के येसुक खिसि करिसक्लपाछु उसबेइ बइजनि रङक लुगा फुच्काइदेल, हसे ओनेन्क आफ्नइ लुगा लागाइ देइकुन ओनेन्के क्रुसयँ झुन्डेइके बाहार लेज्ल।
येसु क्रुसयँ
(मति २७:३२-४४; लुका २३:२६-४३; युहन्ना १९:१७-२७)
21उसब जइतिनखना अलेक्जेन्डर र रुफसक बुबाक् कुरेनि सिमोनके गाउकमाटे आइरहल भेट्लपाछु, उख्राके नइ येसुक क्रुस बोकिकुन लेजिके कर लागाल। 22हसे उसबेइ येसुके गलगथा कलाहार ठाउयँ लेज्ल, जोक्र अर्थ चाहिँ “खप्परक ठाउ” हखइ। 23उछिका उसबेइ येसुके मुर्र मिसाल दाखमध देल, तर ओनेनेइ नइजेखइल। 24उपाछु उसबेइ येसुके क्रुसयँ झुन्डाल। हसे ओनेन्क लुगासब कोनेइ कोनो भाग पाउलाहार हखइ कइकुन, उक्र लागि उसबेइ चिठ्ठा घालिकुन एक-आपसयँ बाट्ल। 25उसबेइ ओनेन्के क्रुसयँ झुन्डातेखना बेहेनक नउ बज्ल रहइ। 26ओनेन्के दोस लागाइकुन फलेक्क टुक्रायँ “यहुदिसब्क राजा” कइकुन लेख्ल रहइ। 27उसबेइ येसुके क्रुसयँ झुन्डातेखना ओनेन्क दाइनेपटि र देब्रेपटि छुटाछुटइ क्रुसयँ दुइ जेना डाकुसब्के पुनु झुन्डाल रहइ। 28[यस्के धर्मक कितापयँ लेखिल बचन पुरा भइल, “ओनेन् अपराधिसबसाङ गनिकेभइल।”]
29उसे पइडायँ हिठ्लाहारसबेइ आफ्न मुड हल्लातिन यस्न कइकुन खिसि कर्ल, “खुप मोइ हुँ कइकुन मन्दिर भत्काइकुन तिन दिनिहिँ बानातम कहल रहस् नि, 30लु त क्रुसकमाटे झरिकुन आउक्, र आफइके बाचाउक्।”
31ओसिनकरिकुन मुक्खे पुजेहेरिसब र धर्मगुरुसबेइ पुनु एक-अर्कसाङ ओनेन्क खिसि कर्तिन कहल, “इहाइ अरुके त बाचाल, तर आफइके चाहिँ बाचाइके नासकइ। 32हे इस्राएलक राजा ख्रिस्ट, आबे क्रुसकमाटे झरिकुन आउस्, हसे हामे उसे देखिकुन बिस्वास कर्ताहिँ।”
येसुसाहिन क्रुसयँ झुन्डालसबेइ पुनु ओनेन्क अपमान कर्ल।
येसु मोर्ल
(मति २७:४५-५६; लुका २३:४४-४९; युहन्ना १९:२८-३०)
33दिनक बाह्र बजेसे तिन बजेसमन देसइभरि आन्धारघुस भइल। 34तिन बजेपटि येसु बड्क सोरेइ यस्न कहतिन् चिच्चेइकेभइल, “इलोइ, इलोइ, लामा सबखथनि?” जोक्र अर्थ भइत, “हे मेर परमेसोर, हे मेर परमेसोर, तोहे मेह्राके किके तेग्ल बाटउ?”
35येसु चिच्चेइकेभइल सुनिकुन ठोडेलसबमद्धे कोलोउ-कोलोउयेइ कहल, “सुनुक् त, इहाइ एलिया अगमबक्ताके बोलातिन् बाटइ।” 36हसे एक जेना दुघ्रतिन जाइकुन झुम्रो आम्लो दाखमधयँ चोपिकुन लाबो लउह्रिक टुप्पायँ राखिकुन येसुके पिइके देतिन् कहल, “चाहु न, इख्राके झारिके एलिया आइत कि!”
37हसे येसुइ बड्क सोर निस्काइकुन परान छाडिकेभइल।
38उहइ बेलायँ मन्दिरक पर्दा पुनु उप्रसे हेठसमन दुइ भाक भइकुन चेत्तिल। 39येसुइ यस्के परान छाडिकेभइल देखिकुन ओनेन्क आघु ठोडेलाहार रोमि कप्तानेइ कहल, “साच्चिकइ इसे मानुस त परमेसोरक छावा रलाहाइ।”
40उछिका कोलोउ-कोलोउ बेटिसब पुनु टाढोहिँसे चाहिराख्ल रहत। उसबमद्धे मरियम मग्दलिनि हसे नान्हि याकुब, योसेफक उइया मरियम र सलोमि रहइ। 41येसु गालिलयँ भइतेखना, ओनेन्के पच्छेतिन उसबेइ ओनेन्क सेवा कर्ते रहत। ओनेन्साङ यरुसलेमयँ अइलाहार अरु पुनु धेरइ बेटिसब रहत।
येसुक लासके चिहानयँ राख्ल
(मति २७:५७-६१; लुका २३:५०-५६; युहन्ना १९:३८-४२)
42उसे तयारिक दिन, अथबा नात्लिक दिनक आघुल्ल दिन रहइ, र आन्धार भइतिन् रहइ। 43बड्क सभाक अरिमाथिया सहरक मान पाउल योसेफेइ परमेसोरक राज्जेक पइडा चाहातिन् रहइ। उहाइ नडाराइकुन पिलातसकलघि जाइकुन येसुक लास माङ्ल। 44हसे येसु आघुहिँ मोरिकेभइल कुरा सुनिकुन पिलातस छक्क पोरिकुन, उहाइ कप्तानके आफ्नलघि बोलाइकुन साच्चिकइ ओनेन् मोर्ल हखइ कइकुन पुछ्ल। 45पिलातसेइ कप्तानसे ओनेन् मोरिसक्ल कुरा थाहा पाउलपाछु, ओनेन्क लास लेजिके अनुमति योसेफके देल। 46उपाछु योसेफेइ मलमलक लुगा किन्ल, हसे ओनेन्क लासके क्रुसकमाटे हेठ झारिकुन उहइ लुगाइ बेह्रिकुन, चट्टानयँ खोपिकुन बानाल चिहानयँ राख्लपाछु उहाइ एक्टा बड्क पाथर चिहानक मुहुयँ राखिदेल। 47हसे मरियम मग्दलिनि र योसेफक उइया मरियमेइ ओनेन्के राख्ल ठाउ चाहिराख्लि रहत।
Zvasarudzwa nguva ino
मर्कुस 15: DRY
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2024 (Active), Mother Tongue Translators Society and Wycliffe Bible Translators, Inc. All rights reserved.