KEJADIAN 3
3
Manusia Kilawan Jenang
1Tijik binatag de paleng nekcennong ju dikdij binatag darat de bicipte ya Jenang Yahweh. Tijik kitanya nu kerdor, “Betolka Jenang Kiget hek hacak pelek ju ma-ma pen keneng jehuk ku taman adeh?”
2Kerdor ajeh kiberlag, “Jar buleh jarcak pelek ju dikdij keneng jehuk de mong ku taman adeh, 3kecuali pelek ju keneng jehuk de mong ku semakdek taman adeh. Jenang Kiget jarcak ataopen jarpep pelek ju keneng jehuk ajeh. Amen jarbeh begei ajeh, jar doh jardat.”
4Tijik ajeh kiberlag, “Tok, jerkek doh pek jerkedat. 5Jenang Kiurok begei ajeh kerana Kipanei hal adeh: Ku mase jerkecak pelek ajeh, peniker jerkek doh kitebuka ru jerkejadi sama begei Jenang de panei ma de bor ru de jehat.”
6Kerdor ajeh kineng pelek ju keneng jehuk ajeh bor ru begei besendap icaknak. Lagipen, kek kaha-gucak pelek ajeh kerana kipiker pelek ajeh buleh kibeh kek kijadi panei. Kerana ajeh, kek kileh pelek ajeh lalu kicak. Kek kiog juga pelek ajeh nu igengsir de mong besama ru ilei, lalu igengsir pen kicak. 7Telas ubai cak, peniker ubai pen kitebuka ru baisedar liubai ajeh baigei beres. Kerana ajeh, ubai taj selak are lalu baitutop berog ubai ya selak ajeh.
8Ku dui ajeh, ubai cerngai engrok ceknip Jenang Yahweh ku taman, lalu ubai pen baiberencep ku engkap keneng jehuk supaye pek bibakek ya Jenang Yahweh. 9Jenang Yahweh Kicereg keral ajeh, “Ku belokka hek?”
10Keral ajeh kiberlag, “Bile ngcerngai Enjen ku taman, eng ngsengoh kerana nggei beres. Kerana ajeh, ngberencep.”
11Jenang Kitanya, “Bok de bepasal hek hagei beres? Hek hacak pelek ju keneng jehuk de Ngget ajehka?”
12Keral ajeh kiberlag, “Kerdor de Jen pergei besama ru eng ajehloh de kiog pelek ajeh nu eng ru eng pen ngcak.”
13Lalu Jenang Yahweh Kitanya nu kerdor ajeh, “Ma de ya habeh?”
Kerdor ajeh kiberlag, “Tijik kitipu eng lei ngcak pelek ajeh.”
Jenang Kisumpah
14Lalu Jenang Yahweh Kiurok nu tijik ajeh, “Kerana ya bahneh hek ajeh, Ngsumpah hek lebeh terok daripade dikdij binatag daknek ru binatag ces! Ju hunen, hek doh hawekwet ru hacak habok tik selame hasui. 15Eng doh Ngbeh hek ru kerdor ajeh ratak jerkegaktek. Kenon-cenok hek ru kenon-cenok kerdor ajeh pen doh naibemusoh. Numom ju kenon-cenok kerdor ajeh#3:15 Numom ju kenon-cenok kerdor ajeh: Adeh kirujok nu Yesus. doh kiremok kui hek tapi hek doh hapatok tumet jog kek.”
16Telas ajeh Jenang Yahweh Kiurok nu kerdor ajeh, “Eng doh Ngtambah senusah ru penghod mase haperikyos. Hamapen begei ajeh, hek doh hariag#3:16 Riag: Mong juga ahli Alkitab naianggap perkataan adeh kirujok nu heknod ikenah kaha-kuasa igengsir. ha gengsir lihek tapi kek doh kibekuasa nu hek.”
17Lalu Jenang Yahweh Kiurok nu keral ajeh, “Hek hacerngai engrok kenah hek, ru hacak pelek de Ngget ajeh. Kerana ya bahneh hek ajeh, Eng Ngsumpah tik. Hek hod habekerjak keras selame hasui supaye tik dapat kiperhol caknak de cukop. 18Tik doh kiperhol semak ru jerlak tapi hek doh hacak cengwai ju selai. 19Hek doh habekerjak keras ru hasengep habeh tik adeh kiperhol caknak lei hajog nu tik, kerana ju kenjehloh hek bicipte. Hek bicipte ju tik ru doh hajog balek nu tik.”
20Keral ajeh imuh Adam ru kiog muh ikenah ajeh Hawa kerana kerdor ajeh doh kijadi amek nu dikdij sengoi. 21Telas ajeh Jenang Yahweh Kibeh leknog ju getek binatag ha Adam ru ikenah lalu Kiperlog nu ubai.
Adam ru Hawa Bihalau ju Taman Eden
22Jenang Yahweh Kiurok, “Sengoi ya kijadi begei Hik. Kek ya kipanei ma de bor ru de jehat. Hunen ubai mesti bihalang dari baicak pelek ju keneng jehuk de kiog sinui supaye pek baisui lei ditehjeh.” 23Jadi, Jenang Yahweh Kihalau ubai hol ju Taman Eden ru Kibeh baiusehe ha tik. Ju tikloh ubai ajeh bicipte.
24Lalu ku englag timur taman ajeh, Jenang Yahweh Kidek memerip maklok bekengyeg#3:24 Maklok bekengyeg: Kateh engrok Ibrani, maklok bekengyeg ajeh bisebot ‘kerub.’ ru Kidek juga pedang beros de bepuseg nu dikdij arah untok jenaga nong nu keneng jehuk de kiog sinui de lei ditehjeh ajeh.
Zvasarudzwa nguva ino
KEJADIAN 3: AEH
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2023, Wycliffe Bible Translators, Inc. All rights reserved.
© 2023, Bible Society of Malaysia. All rights reserved.