लुका 19
19
इसु रो तिरो ल्होपाका जखायस
1इसु यरिहो पुरको दामा जेङतेङ हानिदोङघाहि। 2इङको पुरता जखायस मिङ हिका एअ्मि धनि द्याङ हिघाखे। जाइ तिरो ल्होपाकालाइको हाकिम हिघाखे। 3वा इसुहेङ खाङलि भोदोङघाखे। कालाउ वा पोतोका हिनासिङ द्याङगेलाइको चेअ्सुमेअ्सुकासो इसुहेङ तिङलि मादोहि। 4इङकोङभाअ्सिङ वा भेनेङ द्याङगेलाइ खान्तेङ लाम्फा धाअ्तेङ हानिहि रो इसुहेङ खाङलिको भाअ्सिङ एलोङ दुमरिको सिङता ताङहि, हाइदोनु इसु इङकोङ दामा पाहा हानिदोङघाखे। 5इङको थामेता थुकालिलोलाउ वा सिङ र्हुता खाङतेङ जखायसहेङ दोअ्हि, “ओइ जखायस, मारफा लेता खुअ्तेङ लो! नानि कासेहेङ नाङको साअ्ता बासा हिलि हानिलिगोइका हि।” 6इङको हिङतेङ जखायस मामारफा लेता खुअ्हि रो लेङचातेङ इसुहेङ ताइ साअ्ता चुमपुहि। 7इदोइ तिङतेङ झाराङ एसा दोअ्तेङ गानगानाइलि तेङहि, “इदोइ द्याङते पापिको साअ्ता कि बासा हिलि हानिखे।” 8कालाउ जखायस प्रभुको आगाता जाअ्तेङ दोअ्हि, “प्रभु, काङकोदोफा हिका ताका काउरिको आधे भाग मान्थुकालाइहेङ बाखाराइ प्याङका। कालाउ हासुदोफा बुङ ढाटाइतेङ हेन्जा ल्होपाका हिघा पानु का इङकोको द्या गुना घुरिपाप्याङका।” 9इसु वासेहेङ दोअ्हि, “नानि इदोइ साअ्को द्याङगेलाइ छुटकारा निङका हि। हाइ जखायस बुङ आब्राहामको सान्तान माको कुनु? 10का द्याङको चान राम्कालाइहेङ दोङ भोलि रो बान्चिपालि दोअ्तेङ लोका हिघा।”#मत्ति १८:११
सोनाको टाकाको उदारन
(मत्ति २५:१४-३०)
11इसु यरुसलेम भेरपाङ थुकालिलोका हिघाहि। कालाउ द्याङगेलाइ स्वरगको सारभि एला मार्फा ल्वाङ दोअ्का फोमपातेङ वाको काथा हिङदोङघाहि। एन्साजेङलाउ वा एलोङ उदारन पितेङ एम्बालाइहेङ स्वरगको सारभिको बारेता इस्का काथा दोअ्हि, 12“एअ्मि खानदानि द्याङ हेन्जाङ दुरे भेनेङ मुलुकता हानितेङ ताइको मुलुकको राजा जेङतेङ घुरिलि बिचार पाहि। 13वा हानिका खान्तेङ लाम्फा ताइको तेमि कामत्यागेलाइहेङ काइतेङ झाराङहेङ एलोङ एलोङपा सोनाको टाका पितेङ एम्बालाइहेङ दोअ्हि, ‘का घुरितेङ मालोपाधाउ इदोइ टाकासो पाइकार पातेङ हेन्जा नाफा ल्होपासु।’ 14कालाउ ताइको मुलुकको द्याङगेलाइ वासेहेङ मोन्दामाताघाहि। कालाउ वा हानिकान्हुसो ओबालाइ ‘इदोइ द्याङ केलाइको भाअ्सिङ राजा माज्याको।’ दोअ्तेङ बिम्ति पालि द्याङगेलाइ दिङगिल्हि।
15 “कालाउ इङको द्याङ राजा जेङतेङ दोङ घुरिहि। कालाउ वा लोतेङसाङ ताइको कामत्यागेलाइहेङ पाइकार पातेङ हेथे कामाइसुन्हा दोअ्तेङ हिअ्लि काइगिल्हि। 16लाङ कामत्या लोतेङ दोअ्हि, ‘मालिक, नाङको पिका एलोङ टाकासो का तेलोङ टाका काम्हाइतेङ चुमाका हिघा।’ 17राजा वासेहेङ दोअ्हि, ‘च्याबास, ना रेम्का कामत्या हिन्हा! ना आतुइका काथाता खान्धुर पानाङसिङ का नासेहेङ ते पुरको हाकिम बान्हायाङका।’ 18भेनेङ कामत्या लोतेङ दोअ्हि, ‘मालिक, नाङको पिका एलोङ टाकासो का नालोङ टाका काम्हाइतेङ चुमाका हिघा।’ 19मालिक इङकोहेङ दोअ्हि, ‘ना बुङ नालोङ पुरर्हुता खाबारा निनाना।’ 20कालाउ भेनेङ कामत्या दोअ्हि, ‘मालिक, नाङको पिका टाका हाइदोङ मापासिङ का धाबाता चोङतेङ म्होअ्तेङ ताअ्का हिघाखा; को इता हि। 21का नाङकोदोफा थिघा हाइदोनु नाङको मन उन्ठुइ भाइपा थाङका हि। नाते ताइमिको लागानि मापाका थामेसो बुङ नाफा भोखेना रो ताइमिको मालागाइका बालि बुङ चेतेङ चुमपुखेना।’ 22राजा वासेहेङ दोअ्हि, ‘ओइ बादमास कामत्या, नाङकोङ नुइको जोबानसो का नासेहेङ दुस्याङका। काङको मन उन्ठुइ भाइपा थाङका हि, ताइमिङको लागानि मापाका थामेसो नाफा भोका रो ताइमिको मालागाइका बालि चेतेङ चुमपुका दोअ्तेङ ना गिदोङघाखेना। 23एन्सा जेङनु ना काङको टाका हाइपालि ब्याजता मालागाइपिन्हा कुनु? इङको टाका ब्याजता लागाइपिका हिनु का घुरितेङ लोलाउ हाइदोङ माकोलाउ बुङ ब्याज थिकापा ते निङधाङका।’ 24कालाउ वा इन्ता जाअ्तेङ हिकालाइहेङ दोअ्हि, ‘एला वाकोसो इङको टाका घिङतेङ तेलोङ टाका हिकाहेङ पिसु।’ 25एम्बालाइ दोअ्हि, ‘मालिक, वाकोदोफा ते तेलोङ टाका हिदोङ हि!’ 26राजा दोअ्हि, ‘का नेलाइहेङ दोअ्ताङका, जाइदोफा हि; वासेहेङ आरोङ प्यावा। कालाउ जाइदोफा मान्थु; वाकोसो आतुइसा हिका बुङ घिनावा।#मत्ति १३:१२; मरकुस ४:२५; लुका ८:१८ 27एला का राजा जेङका मोन्दामाताका काङको दुस्मनगेलाइहेङ इता चुमातेङ एम्बालाइहेङ काङकोङ आगाता सेअ्सु!’”#मत्ति २५:१४-३०
इसुहेङ यरुसलेमता स्वागत पाका
(मत्ति २१:१-११; मरकुस ११:१-११; युहन्ना १२:१२-१९)
28इदोइ उदारन दोअ्लि दोकान्हुअ्सो इसु चात्यागेलाइको आगाआगा यरुसलेमभारि हानिहि। 29कालाउ बेथफागे रो बेथानियाको देरा भेरपाको जाइतुन दोअ्का आरदाङता थुकालाउ इसु न्हेमि चात्याहेङ एसा दोअ्तेङ दिङगिल्हि, 30“ओदोइ भेरपाको देराता हानिसु रो इन्ता नेलाइ हासु बुङ माधोल्का एलोङ गाधाको चान धेउतेङ ताअ्का तिङस्वाना। इङकोहेङ खाइतेङ इता चुमासु। 31कालाउ हासु बुङ ‘यासेहेङ हाइपालि खाइसुखेना?’ दोअ्तेङ हिअ्नु ते, ‘प्रभुहेङ गोइका हि’ दोअ्सु।”
32कालाउ इङको न्हेमि चात्या हानिलाउ इसुको दोअ्का भाइपाङ गाधा धेउतेङ ताअ्का निङहि। 33एम्बालाइ इङको गाधाहेङ खाइलि तोम्लाउ वाको धनि लोतेङ हिअ्हि, “नेलाइ हाइपालि यासेहेङ खाइसुखेना?” 34एम्बालाइ जाबाफ पितेङ दोअ्हि, “इदोइ प्रभुहेङ गोइका हि।” 35कालाउ चात्यागेलाइ इङकोको गाधाहेङ चुमातेङ वाको गान्धिता ताइको धाबा दाअ्पितेङ इसुहेङ इङकोर्हुता योम्पाहि। 36इसु हानिकाताङ पालाउ द्याङगेलाइ ताइको धाबागेलाइ दामाता दाअ्तेङ वासेहेङ स्वागत पाहि।
37जेलाउ इसु यरुसलेम भेरपाङ जाइतुन आरदाङको लेता थुकालिलोहि। इङको पहर इसुको पाका भारभुसाइका कामगेलाइ तिङतेङ झाराङ द्याङगेलाइ लेङचातेङ बारका गालापातेङ परमेस्वरको बाखिन्लि तेङहि:
38“प्रभु परमेस्वरको मिङता लोका राजा हेथे सहसाम्पा निङका हि!
स्वरगता सान्ति ज्याको!
परमेस्वरहेङ पारताप ज्याको!”#ले ११८:२६
39कालाउ इन्ता द्याङगेलाइको माझासो फरिसिगेलाइता एअ्मि न्हेमि इसुहेङ दोअ्हि, “मास्टर, नाङको चात्यागेलाइहेङ सिकापा हिलि दोअ्।” 40इसु एम्बालाइहेङ दोअ्हि, “का नेलाइहेङ दोअ्खा, एबालाइ सिकापा हिनुते इताको उन्ठुइगेलाइ बुङ र्हिकाइलि तेनावा।”
इसु यरुसलेमको भाअ्सिङ खारहि
41जेलाउ इसु यरुसलेम भेरपा थुकालिलोलाउ इङको पुरहेङ तिङतेङ वा खारहि रो दोअ्हि, 42“सान्ति हिदोइ काथासो चुमाखे दोअ्तेङ ना नानि बुङ गिका हिनु जेन्धाङ! कालाउ एला नाङको नजरसो इङको म्होअ्न्हाका हि। 43एला ते इस्का पहर ल्वावा, जेलाउ नाङको दुस्मनगेलाइ चारपाहाङसो गोर्हाइतेङ नासेहेङ चारपाहाङसो घेर्यावा। 44कालाउ नेलाइको जामालाइहेङ बुङ सेअ्तावा। कालाउ एम्बालाइ एलोङ उन्ठुइ बुङ मालाअ्ध्यावा। हाइदोनु परमेस्वर नेलाइहेङ सिन्हुपालि लोलाउ बुङ नेलाइ वासेहेङ मामा नाल्सुन्हा।”
इसु थानता हानिका
(मत्ति २१:१२-१७; मरकुस ११:१५-१९; युहन्ना २:१३-२२)
45इङकोन्हुअ्सो इसु थानता हानिहि कालाउ इङको थामेता पाइकार पातेङ हिकालाइहेङ तिङतेङ एसा दोअ्तेङ गिल्गिल्हि, 46“धरमकिताबता इस्का लेखिका हि: ‘काङको साअ् पारथाना पाका साअ् जेङलिगोयाङ।’ कालाउ नेलाइते यासेहेङ खुकालाइको आडा बान्हाइका हिसुन्हा।”#यासाइया ५६:७; यरमिया ७:११
47इङकोन्हुअ्सो इसु दिनाङभाइपा थानता धिरपाघाहि कालाउ मुल धामिगेलाइ, धरम मास्टरगेलाइ रो बो हाकिमगेलाइ मिलितेङ वासेहेङ सेअ्लि खाङघाखे।#लुका २१:३७ 48कालाउबुङ एम्बालाइ इसुहेङ दुसिका थामे हाइदोङ मानिङहि, हाइदोनु झाराङ द्याङगेलाइ वाको बिद्या हिङलि मोन्दाताघाखे।
Zvasarudzwa nguva ino
लुका 19: DHIM
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2025 by Nepal Bible Society and Wycliffe Bible Translators, Inc.