प्रेरीत् 3
3
1अरुलम् पाःती त्योम्आकाय् ओहाङःसैको यात्दीन्हाङः न्हीदीङ्हाङः पत्रुस्मा युहनामा अरु यरुसालेम्कोः मान्तालम्कुस्इ परमेस्वर्कायः झाह्ती तोलाङ् मन्दीर्ताङ् लन्ह्ती आल्आकाय्। 2फेरी ओउः मन्दीर्कोः पेओ त तोओ धोकाहाङः यात्चाक् लयः ओत्ओहाङःसै क्ल्योय्बाङ् स्याव्ओ मान्ता पैसा युङ्ती तेलाङ् मुओ खेःतो। ओउः मान्ताकायः दीन्का दीन् अरुइ लात्ती वानःती ओउः धोकाहाङः तेसाकायः गम्ओ खेःतो। 3ओउः क्ल्योय्बाङ् मान्तापाय् धोकाहाङः लात्ती वानःओ बेलाहाङः ओउःइ पत्रुस्मा युहनामा मन्दीर् पोक्खेःओ च्यवःती झ्यान्ते ओउःनीस्कः पैसा तेआ। 4पैसा तेओ सायःती पत्रुस्मा युहनाइमा ओउःकायः ल्हेःती योती “लौ इताङ् योउ दा” त तोचुतो ती 5ओउः मान्ता “ङाकायः दोह्खेलो बयःनाःताङः” त म्हर्ती ओउःनीस्कायः घीःती योआथाच। 6“लौ ङा पैसा नाःङल दोह्लो ङाकःहाङः मुनाः ओउःलेः बुरु ङाइ बयःनेःनाङ्। लौ नाङ्कायः नासरेत्कोः ख्रीस् त तोओ येसुइ स्याक्तेः ताक्तेःपाः। लौ वाह्अ” त दाय्ह्ती पत्रुस्इ तोआथै। 7ओउःत तोआक्तीको ओउःकोः ङोय् क्रुत्इ ज्योती ओउः क्ल्योय्बाङ्कायः चीङ्ताक्आथै। चीङ्ताक्ती कुस्ब्रक्त ओउःकोः दोम् क्र्योङः सेलः स्याव्आ। 8एत सेलः स्याव्आक्तीको ओउः ङ्हा वाह्सा खाय्मालो मान्ता क्र्योन्योक्त चीङ्ती युहना पत्रुस्नीस्कुस् वाह्ती मन्दीर्ताङ् पोक्आकाय्। 9-10एत चीङ्ती परमेस्वर्कायः लुङ्ती तोती ज्योस्ती वाह्तोक्हाङः सबै अरु मान्तालम्इ च्यवःती “लौ इपाय् ओउः धोकाहाङः मुओ पैसा युङ्ती तेओ मान्ता लेःआः खेःतो बा। ओउः द्याह् क्वान्ह् क्वान्ह् त सेलःलो लेखा वाह्धै स्याव्जेःआ बा” त दाय्ह्ती अरुइ ग्याङ्ह्ती च्यवःआकानी।
11च्यवःआक्तीको सबै मान्तालम् सुलेमान् त तोओ पीन्देहाङः योलाङ् तन्ती वाङ्आकाय्। ओहाङः ओउः ङ्हा जीक्ओ मान्ताइ पत्रुस् नीस्साथीचाःकायः चुम्ती चोङाय्ती मुओ खेःतो। 12ओउःमयःकःताङ् मान्तालम् हुम्ती वाङ्आक्तीको पत्रुस् नोःसाकायः चीङ्आ “अ नीङ् इस्राएल्कोः मान्तालम्य दोह् हायःतीतेः नीङ्इ एतलेः नीचीकायः ग्याङ्ह्ती योतेःनेःनानाङ्स। नीचीइ लःलयःकोः ग्वम्इ इ मान्ताकायः स्याक्ताक्ओ खेःबाय्ल। 13इ स्याक्ताक्साकायः ङीकोः आय्कानः तोकानःइ झाह्ती तोओ परमेस्वर्इ जाङ्ह्आकान्। ङीकोः आब्राहाम् इसाक् र याकुब् त तोओ तोकानःलम्इ झाह्ओ परमेस्वर् ओउःइलेः लयःकोः काम् जाङ्ह्ओ येसुकायः ताङ्ह्तो स्याव्ताक्साकायः इ मेस्कोः ग्याङ्ह्राय् जाङ्ह्ताक्आकान्। नीङ्खेइ इ येसुकायः चुम्ती पानःआक्तीको ओउः पीलातस् त तोओ अन्चलादीस्कःताङ् दाक्तेःआकानी। दाक्आक्तीको पीलातस्खेइ येसुकायः फेसा बोङःउतो ती नीङ्खेइ ‘ओउःकायः फेलाम्’ ततेः तोतेःआकानी। 14ओउः पेओ जय्कुमःओ येसुखेकायः ‘फेलाम्’ ततेः तोतेःनीतो यात्चाक् रेव्ओ अरु मान्ता सात्ओ मान्ताखेकायः ‘इखे फेउ’ ततेः तोतेःआकानी बा। 15नीङ्खेइ ओउः स्याक्ताक्सा चीःओ मान्ताकायः सात्तेःनीतो सात्आक्तीको परमेस्वर्खेइ ओउः येसुकायः उह्ती च्याक्ताक्आथै। ओहाङःसैको येसु सात्ओमा उह्ती च्योक्ताक्ओमा च्यवःओ मान्तालम्पाय् ङीलेः मुनाङी। 16मेस्खा ङीइ ङ्हाम्ओ येसुकोः मय्ङ् पेह्ती इ क्ल्योय्बाङ् खेःओकायः सेलः स्याव्ताक्आलाङःसु। इ स्याक्ताक्ओ नीङ्इ च्यवःतेःआकानी। ङीइ येसुकोः कुरा ङ्हाम्ती झ्यान्ते एतलेः स्याक्ताक्सा खाय्नाङःसु।
17लौ पुःलम् हौलम्य नीङ्इमा नीङ्कोः ताङ्ह्ओ मान्तालम्मा चीःमाःतपाय् एत जाङ्ह्तेःआकानी। ओउःत ङाइ चीःलेःनाङः। 18इ कुरा परमेस्वर्इ ङ्हालेः छ्यानःती तोओ खेःतो ‘लौ ङाकोः ख्रीस् त तोओ मान्ताइ आन लीह्सीःओ गोरःसामा सीसामा खेःतो’ त उय्ह्लेहाङः परमेस्वर्इ लयःकोः मान्तालम्कायः छ्यानःआकान्। द्याह् इ कुरा तेन्छ्याङ् ताप्तोलेः स्याव्ताक्आकान्। 19ओउःत झ्यान्ते ल्हुङ् द्यान्ह्ती परमेस्वर्कः ग्यान दा ओहाङःसै नीङ्कोः रेव्तो हायःझ्याङ्पाय् क्युम्ह्ती वाय्नाः। रेव्ओ काम् क्युम्ह्ती वाय्आक्तीको नीङ्कायः पेओ ल्हुङ् धोमाय्ओ बेला स्याव्नाः। 20फेरी नीङ्कायः ङ्हा तोती गम्ओ ख्रीस् त तोओ इ येसुलेः छ्युङ्ह्ती ल्होक्तेःबत्तेःनै। 21तेन्छ्याङ् इ येसु ख्रीस् लाङ्काताङ् आल्ती द्याह् मुधाङ्सा खेःतो। येसु लाङ्काहाङः मुती गल खेःयाकायःमा इ ल्हाव्ह्दैबाङ्कोः ह्र्योङःसा खेःओ दीन् पुत्चाः ओउःनम् दीन्हाङःलेः येसु सबै ल्हाव्ह्दैबाङ् फेरी पेतो जाङ्ह्साकायः द्यान्ह्तीलेः वाङ्आनाः। इ लोन्दोहाङः स्याव्सा कुरा परमेस्वर्कोः कुरा छ्यानःओमयःइ उय्ह्लेहाङःसै तोलेःआकानी। 22मोसा त तोओखेइ इत तोलेःआकान् ‘लौ लोन्ह्तेहाङः परमेस्वर्इ यात्चाक् ङालो लेखा परमेस्वर्कोः कुरा छ्यानःओ मान्ताकायः नीङ्कःसै छ्युङ्ह्ती गम्नाःथै। ओउः मान्ता मुतोक् बेलाहाङः ओउःइ दोह् दोह्त नोःती तोतेःनै ओउःलेः सायःती जाङ्ह्सा खेःतेःनै। 23ओउःइ तोओ कुरा सुसुइलो त्याक्ती जाङ्ह्नीली ओउःकायःलेः लयःकोः मान्तालम्कःसै वाय्तो स्याव्नै’ त दाय्ह्ती मोसापाय् उय्ह्ले नोःआ। 24ओहाङःसैको सबै अरु परमेस्वर्कोः कुरा छ्यानःओमयः सामुएल् त तोओमा सामुएल्कोः लोन्ह्ते थाओ छ्यानःओमयःमा ओउःमयः सबैइ इ लोन्दोकोः कुरा तोलेःआकानी। 25लौ इ परमेस्वर्इ लयःकोः छ्यानःओ मान्तालम्कायः तोती गम्ओ कुरामा नीङ्कायःलेः स्याव्आनाः। ओहाङःसैको परमेस्वर्इ नीङ्कोः आय्कानः तोकानःलम्कायः तोती गम्ओ कुरामा नीङ्कायः स्याव्लेःनाः ‘लौ नीङ्कोः प्लोमःदानेलम्कःसै सबै ल्हाव्ह्दैबाङ्कोः मान्तालम्कायः ङाकोः आसीक् दोःनाः’ त दाय्ह्ती नीङ्कोः आब्राहाम् त तोओ तोकानःकायः परमेस्वर्इ कुरा तोती गम्आकान्। 26ओहाङःसैको परमेस्वर्इ छ्युङ्ह्ओ लयःकोः काम् जाङ्ह्ओ येसुकायः च्योक्ताक्आक्तीको अरु जात्लम्कोः ङ्हासै ओउःइ नीङ् आब्राहाम्कोः प्लोमःदानेकःताङ् ल्होक्आथै। नीङ्कोः रेव्ओ काम् फेताक्ती नीङ्कायः आसीक् बयःसाकायः येसुपाय् ल्होक्ओआः” त दाय्ह्ती पत्रुस्इ हुम्ओ मान्तालम्कायः तोआथास।
Zvasarudzwa nguva ino
प्रेरीत् 3: CDM93
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 1993 Wycliffe Bible Translators Inc., All Rights Reserved.