Luka 2
2
Uwa na Yesu
(MAT 1:18-25)
1Pay dəpaska, Məlĩ Ogustu aɗiyək wən nan nawver iya net ɗiy naka dələv pakə. 2Əver maddaabəŋ vanəs agəɗ na aka pay Kiriniyus asan daya na kivadələv na Siri yi. 3Ɗiy addoŋguk əvere, naway pak a walaŋgəla-metiŋ nani.
4Yosef tam asilik səka dələv na Galile sə walaŋgəla-metiŋ na Nazaret, ambatək a Yude a walaŋgəla-metiŋ na Davit məs adawyaŋ na Bet-Lehem, vi səddəv məlma gəm həlfa na Davit iyi, 5vi kawver ki zən dət Miryam ɗak nan dədaway nakə. 6Aka adassoŋ adaka, pay nawa nat gapə. 7Tuwək wiyən mizilin tizi nata, tətərək də lukutu, təvoŋgənək addəv zəga nawzəmgit zəgeɗi, vi dərəhaŋ təki a təki net melekeɗ ɓa.
Maslay tay ərban zən azet məzuteɗeŋɗe
8Aka kivadələv vani, məzuteɗeŋɗe tahəŋ a muyã nani, tahəŋ əganən timiŋgiɗ net dəfɗa. 9Maslay na Daya agilik abeti, gagdak na Daya awiɗik kiyit tərwəslə, geslne' armek diyɗa. 10Yaŋ maslay aɓsit na: Kədawgeslne'eŋ ɓa, vi alabara nenek nədawnah sukum, wasan ənnek metiŋgin viyit ɗiy pakə. 11Vi muwa sukumi məzukõh dəpaŋ a walaŋgəla-metiŋ na Davit, ndəni Kristu Daya. 12Aŋki zəga an narban sukum: Wakərəhaŋ mipriŋge mətərən də bəssa, məvoŋgən addəv zəga bəlay nawzəm net zəgeɗ addəvən.
13Yaŋ ləŋ mezəlpaŋ na disiŋ diyɗa azzoŋ əsap də maslay an naka, agagdakanən Maŋgəlva, aɓɗaŋ na:
14Gagdak sən Maŋgəlva a disiŋ məsəɗəɗə,
zazay aka dəlva a walaŋgit ɗiy en aŋgələ.
Məzuteɗeŋɗe tay əmbataŋ a Bet-Lehem
15Səza maslayɗe azaraŋ faraɗa səzet əddoŋ a disiŋ, məzuteɗeŋɗe aɓɗaŋ a walaŋ zit na: Mədam a Bet-Lehem van ɗah mulagən an məs dəgəɗəŋka, an məs Daya arbə səməŋka. 16Agəmənək zit əmbat adaka, arətənək Miryam də Yosef gəm mipriŋge, məvoŋgən addəv bəlay nawzəm net zəgeɗ addəvən. 17Səza awlanəni, abotonənək an məs məneh sit aka wən na wiyən vani. 18Ɗiy en dəprəmən an məzuteɗeŋɗe anah sitin pak aggətaŋka. 19Ya nat Miryam na tərmek wənɗes pak akata, də əɗɗum aket a makrata. 20Yaŋ məzuteɗeŋɗe amilyoŋ dawgagdakan Maŋgəlva gəm əɗikiyən vi an məs aprəmaŋ gəm an məs awlaŋ agəɗək va an mənah siti.
Tay əpsənən iya sən Yesu
21 #
MƏS 12:3
LUK 1:31
Səza əvoŋ dodopoɗon agəɗ naskələn awra, yaŋ kan məpsən iya na Yesu, iya an məs maslay aŋgəɗ tak əsɗa nan addəvət mani.
Tay ərbanən Yesu addəv Gəla-na-Maŋgəlva
22Adan pay nabbur net va mahenziŋ na Moyis aŋgəl agapə, ndəɗaŋ mah əkan a Yerusalem, vi karban sən Daya, 23#ƏGI 13:2,12va məverin addəv mahenziŋ na Daya na: Uwa mizilin na məlviya pak na Daya yi. 24#MƏS 12:6-8Gəm vi kawzaɓ-Maŋgəlva va mahenziŋ na Daya anahə: Biŋgeɗ na maha ndap sula awaniɓa mizlzliŋgirɗe sula.
25Ɗəf maɓɓan tay a Yerusalem adaka, iya nan na Simeyoŋ, ɗəf nan təstəsi, məgeslne' sən Maŋgəlva, tay əga əkõh na Israyel. Zeŋgile Salala tay akani, 26Zeŋgile Salala arban sənək na amtə na tak dula Kristu na Daya ɓa ɓa. 27Əmpəs areɗik addəv Gəla na Maŋgəlva. Adan migil Yesu akinənək vi kaɗɗa sən va mahenziŋ anahə, 28aslanək wiyən van aka vani. Agəɗək əsoko sən Maŋgəlva, amna:
29Kakaŋ na Mərbəzəga, is tat əpəl balam nok
də zazay va əpel nok anahə.
30Vi haraw awlak əkõh noko,
31an məs kəzaɓan abet ɗiy pakəŋka.
32 #
ISA 42:6; 49:6; 52:10 Ndəni təki babar narbok azet ɗiy-ɗarə,
gəm gagdak net mə Israyelɗe ɗiy noko.
Kəleŋ na Simeyoŋ
33Afən dət man assoŋguk gərəŋ sən wən an məpel aka wən nani. 34Simeyoŋ aɗɗak əzaɓ eketi, aɓsət Miryam man na: wiynəŋ tay ahəŋ vi əzbəra awaniɓa əsilye net ɗiy diyɗa a Israyel, gəm va zəga nawsilgin əŋzlama. 35Is zəknoko, masalam watilik zeŋgiloko; hã gap an əɗɗum net ɗiy diyɗa arbəka.
Anna məskəleŋkə
36Məskəleŋgək tat lahəŋka'e adawyaŋ Anna, wətən Fanuyel zev Aser. Təbək əzva. Dərɓaga təgəɗ əzva buhul kaka' ammba zələt təŋ səka ŋgbuɓɓo nata, 37təsatək də gəlata; təgəɗək əzva kaklaw dodopoɗo kiyən poɗo. Tawzar səddəv gəla na Maŋgəlva ɓa. Ndət əgagdakan Maŋgəlva dəfəɗ də kapaya, də əɗɗa meme gəm əkkama. 38Yaŋ təde daka' də pay nan ləŋ tədaɗɗa soko sən Maŋgəlva, tədawpel wən na wiyən van sit məzuganən əkõh na Yerusalem pakə.
Wəmnda a Nazaret
39 #
MAT 2:23
Adan agrakənən an mahenziŋ na Daya aɗiyə, ndəɗaŋ buryok a Galile a Nazaret walaŋ gəla metiŋgin neti. 40Wiyən tay əɓaya, tay əsɓa, aknahək də maɗɗula. Mbəlembəle na Maŋgəlva asanək akani.
Yesu də Əzva kəlaw kiyən sula addəv gəla na Maŋgəlva
41 #
ƏGI 12:1-27; ƏMS 16:1-8 Aza wəzva pak migilin əddoŋ a Yerusalem a wəzləra na Pak. 42Səza agap əzva kəlaw kiyən sula, ndəɗaŋ peŋ va məsərəka na wəzləra. 43Səza əvoŋ na wəzləra aggrakə, ndəɗaŋ buryok, wiyən Yesu nak bew a Yerusalem, ya migilin dəsənnən eket ɓa. 44Azet na tay dit ɗiy en dəmbataŋ dənɗaŋ. Adawaŋgək wəsɓəta taka, yaŋ atəŋgaŋ wəkayanən a weleŋgit ɗiy neti gəm masəŋkeɗ neti. 45Ya dərəhnən ɓa, amndoŋ a Yerusalem də əkayani. 46Aka pay ma hoko'ən, arəhənək addəv gəla na Maŋgəlva, ɗewwe a weleŋgit mərbaŋ zəga. Ndən əprimti gəm əssõhẽti. 47Dəprəmənən pak aggətaŋgək aka əsən nani də əzlan nani. 48Səza awlanəni, aggətaŋka. Man təɓsən na: Wətuwa vi mi kəgəɗ səm vaŋ di? In də afuk pak məkoyokuk mam təpa'təpa'ə. 49Aɓsit na: Vi mi kədawkayawən di? Kəsənən na aslək nəsawgən ezet zəgeɗ na əbba ɓa sa? 50Ya aprəmənən gabba əpel məs adawpel sit ɓa.
51Ndən prik dənɗaŋ, pay a Nazaret, ndən əprəm meti. Man tərmak wənəs pak akata. 52#1SA 2:26; WƏN 3:4Yesu tay əmbat abe abe də maɗula, də əɓaya gəm də mbəlembəle aba Maŋgəlva gəm azet ɗiyi.
Zvasarudzwa nguva ino
Luka 2: GB
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
All right reserved