Mataayo 7
7
Mwasiga okuramurira abhandi
(Maariko 4:24; Ruuka 6:37-42)
1“Mwasiga kuramurira abhandi, mwone mwasiga kuramurirwa. 2Enaaika kutyo kwa okubha kutyo omuramurira abhandi, nikwo kutyo Nyamuwanga aribharamurira. Na indengo inu omurengera abhandi, niyo mwone murirengerwa na Nyamuwanga.
3“Ndora owuringira akati kanu kari mu-riiso rya oweejaanyu, enu utakuringira riibhaawu rinu riri mu-riiso ryawo? 4Owutura kutiki okubhwira oweejaanyu ati, ‘Siga nikusoosishe akati kanu kari mu-riiso ryawo,’ enu awe omwene uri na riibhaawu mu-riiso ryawo? 5Mubheeyi awe! Nuusooshe okwamba riibhaawu rinu riri mu-riiso ryawo, niwe owuuja okurora kujomu, nuusoosha akati kanu kari mu-riiso rya oweejaanyu.
6“Mwasiga okuyaana gimbwa ebhiinu bhinu ebhisooka ku-Nyamuwanga, gyasiga okubhayindukira ngibhakaraabhura. Na mwasiga okuyaana gingurubhe giiruuru#7:6 Giiruuru. Ni magina matoototooto ga bhugusi bhunene muno, agabhaga mu-nyanja. gyemwe, gyasiga okugitajataja.”
Okusabha ku-Nyamuwanga
(Ruuka 11:9-13)
7“Musabhe Nyamuwanga, kaaja okubhayaana kinu omusabha. Mwagare ku-Nyamuwanga, omwene kaaja okubhayaana kinu omwagara. Mukonoone orwigi, Nyamuwanga kaaja okubheegurira. 8Kwa okubha abhasabhi, nibho abhayaanwa. Na abhaagasi nibho abhanyoora. Na abhakonooni bha orwigi nibho abheegurirwa.
9“Angu, niga agati weemwe, unu omwana waaye akamusabha omukaate, weeki kaamuyaana riigina? 10Amwi ati amusabhe inswi, weeki ˆnaamuyaana ekisoro? 11Mmbe ikabha ati emwe abhakayi mwone, mumenyere okuyaana abhaana bheemwe emisanga emijomu, angu, Esomwana unu ari mu-rwire atakutura okukorera amajomu abhaanu bhoone kutyo bhanu abhamusabha?
12“Mmbe ganu omwenda mukorerwe na abhaanu, emwe mwone mubhakorere kutyokutyo, kwa okubha okukora kutyo, ni niyo insonga ya ebhiraagiro bhya Musa na ameeyigisho ga abharagi.”
Okwingira mu-bhukama bhwa Nyamuwanga
(Ruuka 13:24)
13“Mwingire okuturira mu-muryango omutooto, kwa okubha omuryango na injira inu eyibhusha abhaanu ni ngari, na abhaanu abhaafu abheengira okuturira ku-muryango guyo. 14Nawe omuryango gunu ogusira abhaanu mu-bhurame ni mutooto, na injira inu eyigenda-yo iyigeene. Na abhaanu bhanu abharora injira iyo, ni bhatooto.”
Okumenya abharagi abhabheeyi
(Ruuka 6:43-44)
15“Mwiyangarire na abharagi abhabheeyi, bhanu abhabhaaja-ko bhari rwa giingʼondi, nawe kimari ni nsunji nduru. 16Emwe muribhamenya okuriingʼaana na ebhikorwa bhyebhwe. Abhaanu bhatakunoga giijabhiibhu amwi ati giitiini ku-mati ga amawa. 17Riiti riijomu eritwasha amatwasho amajomu, na riiti riibhiibhi ryone eritwasha amatwasho amabhiibhi. 18Riiti riijomu ritakutura okutwasha amatwasho amabhiibhi, na riiti riibhiibhi ritakutura okutwasha amatwasho amajomu. 19Amati goone kutyo ganu gatakutwasha amatwasho amajomu, agatemwaga ngeeswa mu-muriro. 20Nikwo kutyo muribhamenya okuriingʼaana na ebhikorwa bhyebhwe.”
Abheeyigira abha ekimari na abhabheeyi
(Ruuka 13:25-27)
21“Bhatari bhoone kutyo bhanu abhambirikira ati, ‘Raatabhugenyi, Raatabhugenyi,’ ati bhariingira mu-bhukama bhwa mu-rwire. Tari, unu kaakora ganu Raata wa mu-rwire keenda, uyo niwe ariingira-mo. 22Bhaanu bhaafu bharimbwira ku-rusuku rwa indamuro ati, ‘Ee Raatabhugenyi, owuyiita ati ꞉kyasoosiishe obhuragi okuturira kw-isiina ryawo, na ꞉kyabhirimyaga ebhiwi nkikora na bhigwa bhyafu kw-isiina ryawo?’ 23Anye noone niribhabhwirira abhweru ati, ‘Nitakubhamenya emwe wuri! Musooke ku-anye anu, abhakosi bha amabhiibhi emwe!’”
Ekirengekanyo kya abhoombaki abhabhiri
(Ruuka 6:47-49)
24“Mmbe, omuunu woonewoone unu koongwa amangʼana gaani, na okugakora, kaarengekanywa na omuunu omwenge unu oombakire iinyumba yaaye kw-itare. 25Bhunu ingubha ꞉yaaguuye, giinyuji ngituumura, riiyaga nditiimuka ryafu ndibhuma iinyumba iyo, nawe nyumba iyo ꞉itaaguuye ansi, kwa okubha obhwambiro bhwayo ꞉bhwariga bhuumbakirwe kw-itare. 26Nawe muunu woonewoone unu koongwa amangʼana gaani ˆnaasiga okugakora, kaarengekanywa na omuunu omutengʼo unu oombakire iinyumba yaaye ku-nsenyi. 27Anu ingubha ꞉yaambire okugwa, giinyuji ngituumura, na riiyaga nditiimuka ryafu, ndibhuma iinyumba iyo, niigwa ansi niinyaragana yoone kutyo.”
28Bhunu Yeesu ꞉aamarire okwaika amangʼana gayo, abhaanu bhanu ꞉bhaariga bhasangire ayo, mbaruguurira muno ameeyigisho gaaye. 29꞉Bhaaruguurire kwa okubha, amangʼana gaaye ꞉gaariga gari muna ga muunu unu ari na obhuturo, gatari rwa aga abheeyigisha bheebhwe abha ebhiraagiro bhya Musa.
Zvasarudzwa nguva ino
Mataayo 7: kya
Sarudza vhesi
Pakurirana nevamwe
Sarudza zvinyorwa izvi
Unoda kuti zviratidziro zvako zvichengetedzwe pamidziyo yako yose? Nyoresa kana kuti pinda
© 2023, Wycliffe Bible Translators, Inc. All rights reserved